ⅩⅨ
Pásuuma peeyem alacana
Ⅰ Eehuu hipimuus, ínsi patiila pahampanane peecuke nii kilim kiti hícump pakan keeyeniye hiceeku kapusok:
“Haleluya!
Pútuun pa piti unaa pitaakaataak
kafakan niŋ hamake niŋ sempe!
Ⅱ Páhinal etempo kíiti peecoonoole mpitempo.
Kaatuko pisiiŋanaa-siiŋan ti pisiya aal a ahaañiya ya enfakat a,
eelecatane ya etaam ya ti casupoolat ca citeyoo.
Pútuun pa mpúnukan teyoo hísim ha hiti pimiikan etempo.”
Ⅲ Kilim ka nene kiceek:
“Haleluya!
Háaputa ha héefulii ha teyoo nihisilo patiila fo cancowiyaaw púley.”
Ⅳ Ñíhampaatiin ña áwii niŋ pakapaakiil paka niŋ waah wa upaakiil wa weeyem wa kaloŋa, nkákilipo nkámul Pútuun pa peeyeniye pa ti elemeyu ya, nkaceek:
“Amíini! Haleluya!”
Ⅴ Púful toko, hilim níhifulii ti elemeyu ya nihisok:
“Ninimpan Pútuun pa piti unaa,
aluu pimiikan etempo púlooŋ keefeye po ka,✡19:5 Kícimu 135:1
kenfakat ka niŋ kenkilis ka!”
Ⅵ Insí pahampanane peecuke nii kilim kiti hícump pakan, samat nii kúsuu kenfakat kiti kaatii niŋ pasapal etiil piti sempe.✡19:6 Esekiyel 1:24 Kilim ka nkusok:
“Haleluya!
Kaatuko Ateeteyo Pútuun pa piti unaa piti sempe sa púlooŋ
píyaañaa piyeno Amansa ya.✡19:6 Kícimu 97:1; 99:1
Ⅶ Uŋaañaayaa! Utaakaa pásuuma núumulaa po!
Kaatuko pahaaño pa piti esa ya eti Císaacii ca púcoliyoocol,
apan maañoo ya ateyoo naamemanoolo.
Ⅷ Nkawufanoo epaŋ eewalla ápusoolo,
epaŋ eemiñale neekuul naat.”
(Epaŋ ya eewalla ya eyem páhinal pa peenape pa piti keesampanee ka pakati Pútuun pa.)
Ⅸ Fiye maleekoo ya neesokam: “Kiic eehe: Kayihaayih keeyonkalee ka hili káciim ka kiti esa ya eti Císaacii ca!” Nene esokam: “Enkuu kiyem kilim ka kiti pánipani ya kiti Pútuun pa.”
Ⅹ Ta maleekoo ya neepaye ta káakup, ínkilipo ti woot eteyyo púmul yo. Pale neesokam: “Ñaa, timpi hín eehuu! Inci lompo amiikan samat nii awe niŋ pakani ti káyinan keecoke ka tooñaa eyya Yéesu naasoke ya. Kílipo hátikin Pútuun pa! Tooñaa ya eyya Yéesu naasoke ya, ekina nétunk piyaamakoola pa káputuunan hilim ha hiti Pútuun pa.”
Eelapiye ya ti efalinc ya eehiina ya
Ⅺ Fiye, incuk alacana néepankiniye,✡19:11 Esekiyel 1:1 efalinc eehiina néefulii. Aŋa eelapiye ya teyyo caacawoo Eehintiyee niŋ Páni. Náhinhin kíiti pucoonool naakam pucoonool.✡19:11 Kícimu 96:13; Esaaya 11:4 Ⅻ Ñíkinoo iññicaaŋ samat nii kaaleew seemak, naawaso ti hikawoo hícump púwuulu piti amansa. Nkakiic teyoo caacaw enca an náamiit, fo akina lamma ameya co. ⅩⅢ Náasoolo hísool héepuucee ti hísim. Caacawoo hilim ha hiti Pútuun pa. ⅩⅣ Uyoŋ pusoocaali pakati alacana nuunapanoo. Nkásoolo pipaŋ peehiina mpúwalli mpukuul naat. Nkalapo ti pufalinc peehiina. ⅩⅤ Epaay eeliye néefulii ti putumoo, neyyo afaalaako písii pa. Afáatintiŋanii niŋ hikasap hiti mañ,✡19:15 Kícimu 2:9 náayisan káñiken ka kenfakat ka kiti Pútuun pa piti sempe sa púlooŋ, naakakal ti ékaacuma elaan wiiñ ya. ⅩⅥ Ti hísool ha hiteyoo niŋ ti hipoŋoo caacaw ence cikiicee: “Amansa ya ati pumansa pa niŋ Ahámpaatiin a ati ñíhampaatiin ña.”
ⅩⅦ Púful toko, incuk ekee maleekoo eesiiŋiye ti caanak ca. Neeceek meemak ti pusuwa pa empa mpíyit pa patiila, neesok: “Níkey niconcoolo nipili káciim ka kenfakat ka kiti Pútuun pa! ⅩⅧ Níkey nili kihaay pumansa pa, kihaay pusoocaali pa niŋ ñíhampaatiin ña pakateyii, kihaay pufalinc pa niŋ piteteyana etempo, niŋ kihaay pakan paka púlooŋ, kenkilis ka niŋ kenfakat ka, pimiikan pa niŋ keeneetaat ka pimiikan.”✡19:18 Esekiyel 39:17-20
ⅩⅨ Fiye, incuk élukuleen elampa ya, niŋ pumansa pa pakati púlunta pa niŋ uyoŋ wa uti pusoocaali pa pakateyii, nkaconcooliye kati kakam niŋ eelapiye ya ti efalinc ya niŋ uyoŋ wa uti pusoocaali pa pakateyoo. ⅩⅩ Elúkuleen ya neecokee, niŋ ayaamakoola ya eeneetaat a pánipani aŋa náhin ya píyisan apicaakool keetaake ka lánkamaasi ya eti élukuleen ya, payenka nkákilipo ka hátikin himuum eteyyo eeha nkamemanoole ha. Poko t’ésupakii nkawantee kaloŋa ti han ha hiti seemak sa séeceeke sa. ⅩⅪ Keetowiye ka nkamukee niŋ epaay ya éefulii ya ti putum eelapiye ya ti efalinc ya, pusuwa pa púlooŋ mpili kihaayii fo pisiit tuk.