1 Yesus pe su disaipel Tadan hodo ndrol ti pe helihir hala hodoh. Lok su hehir eriy ti lone’ su lau odo Gerasa, ise ngerin Ndras Galili odo rai ea. 2-3 Yesus indreh ile pwoi odo ndrol, pe orngon homou ihtot ile hun Iy. Orngon kuti sinel imin pule‑en, pe ine‑en lon ngat odo matmat.*ngat odo matmat. Sa lok erti henesu‑e pehliy iso padan pat odo tunton ndramat mat. Sa lau henehndruhus iy tahit. Sa henehndruhus iy ile sen ti tahit yi. 4 Sa henehndrusi iy illa sen odoke iy isomondrihi sen, pe inti‑i haen odo ndriken. Puko‑on tadan ti ilsou lakopwi, pe homou lau kindranon kindrundrotowe iy pwi. 5 Meseren pe lukumwen sei ihpa ke sei, iy inelila ine‑en lom matmat pe inehtot odo padangkuh, pe inesangar pe inemendrele mundren illa pat.

6 Iy idu ndre alau pe iltuwe Yesus, pe ihtot ile, pe pandrulku‑un ile poi idu kendrun ndriken Yesus. 7-8 Pe Yesus ipe ile tadan ihpa, “Sinel, asa mahun odo tan orngon kitih.”

Pe iy idehel puko‑on ihpa “Yesus! Ou Nedun Lapan Mandra‑an imin Eleng! Ou apa opo sa kile todo? Adamumoi kile ta Lapan ihpa ndre ou we endretudou ngendre‑en kile todo pwi yi.”

9 Eri pe Yesus ihndremte iy ihpa, “Ou rangam si?”

Pe iy ipe ihpa, “Yu rongo Lijen†Lijen. Lijen ti nolou Greek ihpa ndre sa ami iyenon ndre po-hangoh (4000) or pon-onngoh (6000). , odosa odu ti odu sulo‑on.” 10 Pe iy ihndremte Yesus iseu pe iseu, ipe Yesus ki‑es su odo lok erti kolwii.

11 Puu sulo‑on sulo‑on henesusuu hoso tondrih odo lok ertih. 12 Su sinel hehndremte Yesus hahpa, “Ou eduwe odu atla mundre’ su puu holso kitih.” 13 Yesus ipahran pe su ha‑au odo mundren orngon kuti pe hondroh hala tam puu. Eri pe puu ndre sulo‑on, mukehe ndre pwerungeh (2000), hohtot hala ma‑au pe hondroh hala lon ndras. Su ndre sulo‑on hamat.

14 Su lau ndre mada’ su iso tam puu ti hohtot ha‑au pe helninen hala taon pe lok se yi ndre he‑en ertih. Pe sa lau hala helndre‑et. 15 Sa hala ti pe heltuwe orngon ndre su sinel hodo pule‑en pihe ti indretasan kolewen pe imin poi ndroda Yesus. Ngungong tadan indrinum. Ile pe sa lau honoh. 16 Su lau ndre hodo pe hendre‑et homosa ihir tan orngon ndre sinel hodo pule‑en ti henen ile ta sa lau. Su henen homosa ihir ile ta su puu ti yi. 17 Ile pe sa lau odo lok erti honoh pe hapa ile ta Yesus ihpa, “Ou owou odo lok keti pe ala hepe yi.”

18 Yesus indreh ile yi ndre ndrol, pe orngon ndre Yesus iyes su sinel odo mundren ti ihndremte Yesus ihpa, “Yu upwe Ou ekuni yu ku‑us Ou.”

19 Odoke Yesus mboren pe ipe ile tadan ihpa, “Ala yi ndre emwem pe lonem, pe elninen kile ta su murwom. Ala pe enen homosa ndre Lapan ikarundrum ou pe ipu huyen ile tadam.” 20 Ile pe orngon kuti iyeu, pe ile lon taon ndre sungoh ndre he‑en lok erti, pe inen homosa ndre Yesus ipupu‑uh odo henuwii iy. Sa lau ndre sulo‑on hohrungii pe hehretek.

21 Yesus indreh ile yi ndre ndrol pe ile yi ndre hodoh. Iy ilihir hodoh ti pe sa lau sulo‑on hala ndrongon iy odo papi. Su hapa hohrung nolwo‑on. 22 Pe orngon homou rangan Jairus ise hu Yesus. Jairus ti madan iso marai odo lon omwen surok sim. Iy ile pe pandrulku‑un ile poi idu kendrun ndriken Yesus, 23 pe ihndremte puko‑on ihpa, “Yu nedu pihin ke imet. Ou asa lumwem kile tadan, kile pe iy kile huyen pe kimet kolwii.”

24 Yesus iyus iy harla, pe sa lau sulo‑on ho‑us yi. Homou intu‑uw ta homou, pe henelila hosokaltan Yesus ile.

25 Pedih homou idu lenga’ sa lau, eri tadan sik. Iy ineruhti ndrai ti indrahpa ndre sa pedih se ti pwi. Sik tadan ti indrehir into mundrun ti pwi, pe kah idu tadan iyenon ndre krismas sungoh-pe-ruweh. 26 Iy indrepiyen mone‑en ndre sulo‑on ile ta sa ndrokta, odoke isella huyen ke pwi. Sik tadan ti ke illih mo‑on lakopwi. 27 Iy ihrungi sa lau heninen Yesus, ile pe iy irehen iy ile lenga’ sa lau ndre hodo ndruwen Yesus. 28 Iy idawene ihpa, “Uh yu kutkuni ke hepe ngerin kolos Tadan, eri sik todo we kinum.”

29 Iy itkuni kolos ta Yesus, pe ndrai tadan inum. Pe iy ihkalmanan lom mundren ihpa ndre sik tadan ti indrinum ndresale. 30 Idu ke ndre erti pe Yesus ihkalmanan ihpa ndre se puko‑on ti iyeu odo mundren. Ile pe Iy indre‑et ile ta sa pe ihndremte, “Si lumwen ile kolos Todo tih?”

31 Su disaipel Tadan hapa ihpa, “Sa lau ndre sulo‑on henelila ho‑us Ou ti hentu‑uw ke Tadam, pe Ou enehndremte ile sa?”

32 Odoke Yesus ma inendre‑et pe impondrih si lau ndre lumwen ile kolos Tadan. 33 Pedih kuti ihkalmanan sa indrihir tadan eri pe iy inuh pe ihreretek. Iy ile pe pandrulku‑un ile poi idu kendrun ndriken Yesus, pe inen sane ndre sulo‑on. 34 Pe Yesus ipe ile tadan ihpa, “Nedu, bilip tadam indrahnan ou ala huyem. Owou ala yi. Adawene sulo‑on kolwii. Sik tadam ti indrinum.”

35 Yesus ma inesohou ile tam pedih kuti pe lau se hehir. Su lau erti ho‑us um tan Jairus. Su hapa ile tan Jairus ihpa, “Jairus, ou nedum pihin ti indrimat. Konan, ekowi‑iy tisa ti kah kahrii.”

36 Odoke Yesus indretaryan nolou ta su lau kurti pwi. Pe Iy ipe ile tan Jairus ihpa, “Onoh kolwii. Opo ke bilip.” 37 Inum pe Yesus ikuni ke Pita, Jems, pe Jon tinton Jems, pe su ho‑us Iy. 38 Su helihir um tan Jairus ti pe Yesus iltuwe sa lau heneru‑iy pe hentehel. 39 Iy ile lon um pe ipe ile ta sa ihpa, “Oduu edentang pe edentehel ile sa? Enihin kiti indrimat pwi. Iy inemetir kopwi.” 40 Pe su herikiyan Iy.

Yesus ipe ile ta sa lau ndre sulo‑on hala kiu. Inum pe Iy ikuni taman pe tinen enihin kuti, ndrodan ndre su disaipel Tadan ndre tulmuu, pe su hala lon rum ndre enihin kuti iyin eriy tih. 41 Pe Iy lumwen ile lumwen enihin kuti pe ipe ile nolou Aram ihpah, “Talita, kum.” Nolou erti ihpa ndre, “Enehin, yu upwe ile tadam, atlang!”

42 Pe enihin ti isupu‑ur imin eleng pe illa. Krismas tan enihin ti sungoh-pe-ruweh. Su heltuwei pe hehretek pe hemesi‑iy. 43 Yesus ipe ile ta su ihpa, “Etninen kile ta homou kolwii.” Pe Iy ipe su hopo song pe enihin ti kiyo‑on.