1 Yesus iyus erti pe ile yi ndre lonen Nasaret. Su disaipel Tadan ho‑us iy hala. 2 Idu Sabat eri Iy ile lon omwen surok pe ipehre Nolwo‑on Lapan ile ta sa lau. Sa lau sulo‑on hehrungi nolou ndre Iy ipehre ti pe hehretek Tadan pe hapa ihpa, “Iy lau kuti ihtunon sane kuti ihpa kehe? Iy impupu‑uh mirakulo yi! Pe puko‑on kuti Iy ikuni odo kehe? 3 Iy ti kamda ke porah. Iy tinen ti Maria, pe tinton su ti Jems, Yosep, Yudas pe Saimon. Pe timso‑on su ti hodo lenga’ tidu hodo kitih.” Ile pe su lau odo ke ndre lonen ti mbore’ su hopo bilip kile Tadan.

4 Yesus ipe ile ta su ihpa, “Profet ti we rangan huyen pe sa waso‑o’ sa tahrung Iy odo hokor pe hokor. Odoke lilin lonen eri we pwi. Su lin tinton pe timso‑on pe murwon ti we mbore’ su Iy.”

5 Ile pe Iy indranon kindripo handrai mirakulo odo lonen ti pwi. Tapake sa sik ndramat se kopwi hala pe Iy iduwe lumwen ile mundre’ su pe su hala huye’ su. 6 Yesus idawene ile hudut, odosa sa lau odo lonen ti hendrupo bilip ile Tadan pwi tih.

Inum pe Yesus ile lok hokor hokor pe ipehre Nolwo‑on Lapan. 7 Pe Iy iyuwen su disaipel Tadan ndre sungoh-pe-rumuu, pe itlangan su hala rumuu rumuu, pe ihtakalan su hala helpehre Nolwo‑on Lapan. Iy iduwe puko‑on odo as sinel ile ta su. 8 Iy ipe ile ta su ihpa, “Atakun hangka‑an kolwii, tapake kendro odo lila. Atakun song kolwii. Atakun ndrop kolwii. Atakun moni kolwii. 9 Atawe su‑e’ oduu. Atakun nuhnuh kile ruweh kolwii, tapake iy ndre idu mundren oduu.” 10 Iy ipe ile ta su yi ihpa, “Uh oduu atla hokor lok pe si lau kiyuwen oduu, eri otto ke ndre um tadan uu kenon ndre oduu ada‑au odo lok ertih. 11 Uh oduu atla hokor lok pe sa lau hendreyuwen oduu atla um pwi, pe hendretahrung oduu pwi eri oduu atakorohon wahun poi odo ndrike’ oduu kidu mada’ su, kinum pe ada‑au. Kile pe su hohtuno su ihpa ndre su ti hendrupo mo‑on.”

12 Ile pe su disaipel ndre sungoh-pe-rumuu ti halla hala hokor pe hokor pe hopo marai. Pe su hapa ile ta sa lau ihpa, “Ada‑au odo punou mo‑on ndre oduu edempo tih.” 13 Su ha‑as sa sinel odo ta sa lau. Sa ndre hamat sik ti su disaipel hetndrenge ndronun mbrwen oliv ile pule‑e’ sa, pe sa hala huye’ sa.

14 King Herot ihrung kaunan Yesus. Sa lau se heninen ihpa, “Jon Baptais indrila yi ndre moren, erti uu pe puko‑on odo pupu‑uh mirakulo ti imin ndrongon iy.”

15 Sa se ti hampa ihpa, “Iy kiti Profet Elaijah.” Sa se yi ti hampa ihpa, “Iy kiti profet homou yi, ihpa ndre su profet se ndre pihe tih.”

16 Herot ihrungi nolou ndre sa hampa ti pe ipe ihpa, “Yu unsimndri padawon Jon Baptais ti ndre pihe, pe pwi ti kihne iy inna yi ndre moren.”

17 Pihe ti, Herot ipe ile ta su lewen pe hondrotowe Jon Baptais pe heduwe iy ile kou.*Jon Baptais ndre imin kou ti pe kah Yesus ipu stat marai. Endre‑et sapta 1.14. Herot ipu kuti odosa, iy iyesuwon Herodias mbrulun tinton ke Filip, 18 odoke Jon impa ile tadan ipe iy erti punou mo‑on. 19 Ile pe Herodias ti lon ndrinen inai ile tan Jon pe ipe kihnan iy kimet, odoke indranon pwi, 20 odosa Herot ti inoh tan Jon. Herot tunon ihpa ndre Jon ti iy lau kapin odo madan Lapan, ile pe iy intawe Jon immin huyen. Herot waso‑on tahrung sohou tan Jon, tapake nolou Jon impa ti inahnan tawene ta Herot inehrut.

21 Patmundrun ndre Herodias ingkeli‑iy ti ihir. Herot ihnan song mandra‑an idu mundrun rang ndre tinen iduwe iy idu eriy tih. Iy ihnan song erti ana’ su lau mandra‑ane odo marai tadan, su lau mandra‑ane odo ami, pe ana’ su lau mandra‑ane odo Distrik Galili. 22 Su ndre hana‑an song ti pe nedun Herodias pihin ile lon um pe indren ise purmada’ su. Herot ndrodan ndre su lau hana‑an song ti hahwaso‑o’ su ndran tan enihin kutih. Ile pe Herot ipe ile tan enihin kuti ihpa, “Homosa ou wasu‑um, eri yu we kuduwe tadam.” 23 Inum pe Herot idamumoi ihpa, “Mondre Eleng, homosa ou ehndremte yu kile eriy ti yu we kuduwe tadam. Ipe ye ou wasu‑um hombrul kantri todo, eri yu we kutpili kile rumbrul, pe kuduwe hombrul kile tadam.”

24 Enihin kuti ile kiu pe ihndremte tinen ihpa, “Yu we kupwe wasu‑u sa?”

Tinen ihpa, “Palan Jon Baptais.”

25 Enihin ti ihtot ile ndre ndrongon king pe ipe ihpa, “Yu wasu‑u mahkele kopwi, palan Jon Baptais kimin lom pelet.”

26 King ikarundrum lakopwi, odoke iy we kindripo kihpa kehe pwi, odosa iy ‘indretamumoi eleng’ idu mada’ sa lau mandra‑ane tih. 27 Ile pe iy ipe ile ta soldia homou ihpa, “Ala sowin kopwi, pe esimndri won Jon Baptais. Eduwe palan kile lon sih pelet pe ekuni kise.” Soldia kuti ile omwen kou pe isimndri padawon Jon 28 inum pe iduwe palan Jon ile lom pelet pe iduwe ile tan enihin kurtih. Enihin ti ikunii pe iltawei ile tan tinen.

29 Su disaipel tan Jon hohrungi mat tadan ti pe su hala haltakuni iy, pe heltawe iy ile lon ngat.

30 Su aposel hondrupo marai kah, pe kah hala yi ndre hu Yesus. Pe su hennen marai sa su hopo pe nolou sa su hapa ti ile ta Yesus. 31 Odoke sa lau sulo‑on lakopwi halla pe hassa, ile pe Yesus pe su aposel handranon hamyau pe heyo‑on song pwi. Ile pe Iy ipe ile ta su ihpa, “Tidu tida‑au titla hepe ndre ndramat pwi tih. Kile pe oduu etmiyau hepe.” 32 Ile pe su hondroh hala ndrol sih pe ha‑au hala lok sehir ndre ndramat hondruto eriy pwi.

33 Odoke sa lau heltuwe su ka helih ti pe sa sulo‑on odo taon sih pe sih odo distrik erti hohtot sal eleng ea, pe helengkeli‑iy holto munen. 34 Yesus indreh ile pwoi odo ndrol, pe iltuwe sa lau sulo‑o’ sa lakopwi. Pe Iy ikarndrum su ile mandra‑an, odosa su hahpa ndre sipsip ndre homou madan indriso ta su pwi. Ile pe Iy itou punou pe tatuhne ile ta su odo sane sulo‑on.

35 Lok ndre kah inna pehon lakopwi, pe su disaipel halpa ile Tadan ihpa, “Lok kihne kah kile lukumwen pe lok keti isiso alau. 36 Apa kile ta sa lau ha‑au, kile pe sa hala lok ndre he‑en mukehe ti pe hesih ana’ su song pe hoyo‑on.”

37 Pe Yesus ipe ihpa, “Oduu ti we otpo song pe su hoyo‑on.”

Su hehndremte Yesus, “Ou wasu‑um apa odu otpo rupweu moni pe atla sihsih bret ana’ su pe su hoyo‑on, erih?”

38 Yesus ihpa, “Bret idu ndrongo oduu ti heski? Atla ndre‑et oh.”

Su hala helndre‑et inum pe hasa yi pe hapa ihpa, “Bret limihir pe ni rumuu.”

39 Yesus ipe ile ta su disaipel Tadan hatparan sa lau hala hemir hemir pe hapa ile ta su hemin poi pule‑en mundriu. 40 Ile pe sa lau hemin poi. Se sangat ea, pe se limngeh ea. 41 Inum pe Yesus ikuni bret ndre limihir pe ni ndre rumuu ise lumwen. Iy madan ile eleng, pe ide urehen Lapan. Iy iptan bret inum pe iduwe ile ta su disaipel, pe su hetlenge ile ta sa lau. Pe Iy itmbre‑e ni ndre rumuu ti pe itlangan ile ta sa lau yi. 42 Sa lau ndre sulo‑on hoyo‑on pe ilanon ndre sa. 43 Inum pe su disaipel hadaparngan bret pe ni ndre irswe ti pe hedehen ile ndrop ndre sungoh-pe-ruhet. Ndrop erti ndre haltah. 44 Su lau kamal ndre hoyo‑o song kuti eri ndre polimngeh (5000).

45 Idu ke ndre sa lau hoyo‑on song kah ti pe Yesus ipe ile ta su disaipel hondroh ile ndrol pe henemunen hala Betsaida. Betsaida ti ise tolau rai odo ndras Galili hodoh. Yesus ti ipe we kihtakalan sa lau ha‑au yi ndre oh, kinum pe Iy kidu omur ta su disaipel. 46 Iy ipe ile ta sa lau ha‑au ndre oh, inum pe Iy inek ile puliy pe ilsurok.

47 Lok ti kah inna lukumwen pe ndrol ti indra‑au inna ndrokoron ndras, pe Yesus Iy kopwi into ndre poi. 48 Pe Iy iltuwe su disaipel hempuke puko‑on ile suwei, odosa langat mandra‑an idu munen pe ineruhi ndrol ise yi ndre omur. Ndre lirang ti pe Iy illa iyus pule‑en wo ile ndrongo su. Iy ipe kihrik ndresale, 49 odoke su heltuwe Iy inelila iyin pule‑en wo. Su hapa yi sinel pe su hedehel, 50 odosa su heltuwe Iy pe honoh ile mo‑on.

Yesus iporitai inlou lakopwi ile ta su ihpah, “Otnoh kolwii. Iy keti Yu.” 51 Inum pe Iy inek ile lon ndrol ndroda su, pe yor imet. Su hehretek ile mo‑on pe poho’ su idu kopwi, 52 odosa, su ma hontut ile ta Yesus. Pingi kopwi ti pe Iy ihlingi sa lau ndre polimngeh ile bret ke limihir, odoke su disaipel tuno’ su Iy inna huyen mapwi. Su pala’ su mapwi intut.

53 Su hesuwei ile ndras hodoh pe halras ile Genesaret pe heswi ndrol iseu. 54 Su hondroh odo ndrol ile poi ti pe sa lau mada’ sa ile, pe hahpa, “Orkom, iy eti Yesus.” 55 Ile pe nolou ihtot ile lok ndre sulo‑on odo erti, pe sa lau hehtuno sa ihpa ndre Yesus insa. Uh kaunan Iy imin lok kehe, eri sa hentawe sa lau sik hala petle pe henesori su halla hu Yesus. 56 Taon pe lok ndre sulo‑on kehe ndre Yesus ile eriy, eri sa hentakuni sa sik halla malal. Pe sa henehndremte Yesus kihran iy pe sa sik heduwe lumwe’ sa kile ngerin kolos Tadan. Pe sa sik ndre sulo‑on ndre lumwe’ sa itkuni kolos Tadan ti hala huye’ sa.