MAK
Kamambuno wakai Mak muno boglkwa
Ka mongo yegl ende okuna ongwa
Mak kamo boglo i yegl Yesus Krais ye God Wam moglkwa ipre kamo dungwa. Mak pepamo i mina nono kere kamga Yesus yombuglomo pond pango kongun orkwa. Ye kangiye kande pangwa pre yomba kamambuno wakai beke tendre te spirit kinde simenda ende te tandaglmeno koko ende tendre orkwa.
Yesus yene yegl dungwa. “Na Yomba Wam moglka.” Ye ungwa i yene kor moglkwa nono noro ana yomba prapra toposi ikine endinambuka.
Mak Kamambuno Wakai muno boglkwa i Yesus kongun ormere i ka boglo kuglkwa, ba ye ka yomba beke tongwa i boglo wakane ta kuglkrukwa.
Mak komnaiye ka boglo kuglkwa i Jon Baptais eremogl Yesus baptais ere tomere i kamo dindre te Satan eremogl Yesus bagl nusungwa i kamo dungwa. Ana okuwo yomba yumbun kanekane ingwa i Yesus mitno gogl tendre ana ka beke tongwa. Ba disaipelma wagle Yesus taragl kanekane orkwa i mambunomo ta pirpogl sikrikwa, ba kuri-kurindi ta pirkan erikwa. Ana yomba tau Yesus kundamo ikine ertre, yumbun merkinde teingwa. Dundumara i Mak ka boglo kuglkwa i ana Yesus gogltre andigl ukor ongwa ipre kamo dungwa.
1
Jon Baptais kamambuno dungwa
(Matyu 3:1-12; Luk 3:1-9, 15-17; Jon 1:19-28)
God Wam Yesus Krais pre, kamambuno wakai i mambuno boglkwa.* Yesus plau dungwa enge, ye God kamo wakai di yomba tongwa. Ka wakai iwe, God taragl wakai ere yomba tenagle dungwa kamo. Mak 1:15 mina kano.
Propet Aisaia ka muno yegl boglkwa:
“God dungwa, Na kanna
kep yomba diendimbo
ene okuna yeite, ene
konbaunan akekun eretenambuka.” Malakai 3:1
“Makan waule suna
yomba ta wiyau endungwa,
‘Yaglkande pre konbaunamo
akekun eriyo. Ye unambuka
pre konbo si-ake du endiyo.’ ” Aisaia 40:3
Ana yeglpre, Jon Baptais makan waule unongugl pi ye yomba dipene ende tongwa, “Ene nomano yake tendre baptais erimbi, God ene tandaglmeno koko ende tenambuka.” Ana Judia kamun yomba mundu-yene yeingo te Jerusalem dumo kande yomba prapra Jon kamo piramnedi kikesi ende moglmara pindre, ye yene tandaglmeno dipeglko ana ye Jodan Nigle yomba baptais eretongwa. Jon bugla-kamel yungo mina gaglsuna erikwa i ende-ende orkwa. Te bugla-kau nangiye kumagl ta dane mina suna engenge de wanmoglkwa. Te kaiya moknamo i mongondo ya te brume are nuglo ne-ne orkwa. Ka Matyu 3:4 mina pangwa i kano. Ye ka yegl dipene ende yomba tongwa, “Ba okuwo yomba ta unambuka i yombuglomo pai mitna ende na yombura i engrukwa. Na yagl wakai ta moglmbo kade goinge ere ye kagle towo mina kan-tonguma pangwa i na ta pirka sinaglka kuno erekrukwa. Na nigl mina ene baptais ereteinga, ba ye ene Holi Spirit mina baptais eretenambuka.”
Jon eremogl Yesus baptais eretongwa
(Matyu 3:13-17; Luk 3:21-22)
Ana enge igle Yesus Nasaret kamun Galili dumo kindekondo ende ungo ana Jon eremogl Jodan Nigle suna ye baptais eretongwa. 10 Ana Yesus oglandi nigle kondo ende menda undre, ye kango heven audungo ana Holi Spirit kua yumugl mereyegl ende atne ye moglmara ungwa. 11 Ana heven imbo ka ta yegl dungwa, “Ene na Wana, na ene wakai kandre nomana wakai ene teinga.”
Yesus moglmara Satan bagl nusungwa
(Matyu 4:1-11; Luk 4:1-13)
12 Ana oglandi Holi Spirit diendungo Yesus ende dumo waule suna ongwa. 13 Ye igle wanmoglko ande enge 40 orkwa. Satan wu bagl nusinagledi ka kra merkinde poglkwa. Ye dua-kambu ya agl-bugla are bogl meglko ana angelo wu Yesus akeple dingwa.
Yesus Galili kamun kongun mambuno boglkwa
(Matyu 4:12-17; Luk 4:14-15)
14 Jon sikane yungu suna endigo, okuwo Yesus Galili kamun suna pi ana God kamo wakai dipene endungwa. 15 Ye dungwa, “Enge kaima plau dungo ana God kingdomo ene mina mangigl ungwa, ene nomano yakete kamambuno wakai pirngi diyo!”
Yesus eremogl fis singwa yomba 4 komnaiye diyungwa
(Matyu 4:18-22; Luk 5:1-11)
16 Yesus ende Galili Niglmong bina pindre, ye kango Saimon ya angigle Andru bogl fis gagl piyasi niglmong atne ende miurka. Sraglpre, ye fis ere simbrika yaglmo. 17 Yesus yegl ditongwa, “Ene na mokonamugl wiro, na beke teimbo ene yomba ere-inambrika.” 18 Ana ye oglandi fis ere simbrika gatno kindekondo ana omara embrika.
19 Ye kurita ende inda pindre kango, ana Sebedi wam Jems angigle Jon bogl, botno mina suna mogltre ye fis ere simbrika gatno simbogl akekun ere miurka. 20 Ana ye kandre tambre kana agle dungo, yagl suwo neno Sebedi ya kongun di imbriko erikwa yomba bot mina suna akiye meglko kondo pandigl ana ye Yesus omara mokomugl ende embrika.
Spirit kinde yagl ta mina moglko Yesus simenda endungwa
(Luk 4:31-37)
21 Ye ende Kaperneam kamun eingo ana Sabat enge yongwa, Yesus ende makai yungu yungugl pindre ana mambuno bogl ka beke tongwa. 22 Yomba ka beke tongwa i pirtre sipuglo dingwa. Sraglpre, ye lo beke teingwa yomba dimere yegl manga. Ye yomba ta yombuglo gigledi kande pangwa mereyegl ta ka wakegagl ditongwa. 23 Enge igle ye makaino yungu mina yagl ta spirit kinde moglkwa yungugl mogl ana kaglkane binan bogl yungwa. 24 “Yesus Nasaret nem, ene sragl taragl ere noragledi une? Ene no erekinde ere nora pre un kana? Na ene pirpogl siga. Ene God Holi Yombamo!”
25 Yesus ka giglendi di spirit kinde tongwa, “Ene dran simundo ana yagl i mina kindekondo ende menda wo!” 26 Spirit kinde yombuglo ere yagl i ake pur-dindre ana kaglkane kande ta dindre ye mina ende menda ungwa.
27 Yomba kindaginde yene sipuglodi kundugl dindre ye yene krapogl dipirkwa, “I sragl taragl? I ka kor ta beke dungwa. Yagl i yombuglo gigledi kande pangwa ipre ka dungo spirit kinde dumere pir kamo sika singwa.” 28 Ye kamo boglo i tambre kana waidi Galili dumo mundu kuno orkwa.
Pita ambu imakiye kinde sungwa Yesus erewakai ere tongwa
(Matyu 8:14-15; Luk 4:38-39)
29 Ye makai yungu kondo ende menda wingo, ye Jems ya Jon bogl akiye du yene endpi Saimon ya Andru yungunomugl eingwa. 30 Saimon ambu imakiye kinde si nangiye ninga dungo bogl mina ugl pai moglkwa. Ana Yesus ende yungugl ongo, ye tambre kana ambu kinde sungwa ipre diteingwa. 31 Ana Yesus ambumo pamara pi ye ongo ake ana ake bonduglkwa. Ambu nangiye ninga dungwa i dundungo ana ye mambuno bogl kaiya mokna yomba pre akekun ere tongwa.
Yomba kinde singwa Yesus erewakai orkwa
(Matyu 8:16-17; Luk 4:40-41)
32 Ande bei kamun pokndungo, yomba kinde singwa prapra ya spirit kinde bogl meglkwa yomba auro yu Yesus moglmara wingwa. 33 Taun yomba mundu wu yungu dramugl makai singwa. 34 Ana ye yomba kinde imbo kanekane sungwa erewakai ere tendre, spirit kinde merkinde simenda endungwa. Ba ye spirit kinde ka ta di dinaglmedi pre, angai tekrukwa. Sraglpre ye Yesus pirkan erikwa. Yesus God wam moglkwa ana ye, God yombama ikine endinambuka pre pinde i-pere endungwa. Grik yomba kanno mina ye Krais we dingwa. Te Hibru yomba kanno Mesaia we dingwa. Ka Mak 1:1 mina pangwa i kano. Juda yomba yegl pirkwa. Yagl i God diendinan, unambuka ana ye king mereyegl undre ana Rom yomba si endinan ana Israel yomba wakai moraglmedi pirkwa. Ba Yesus kongun yegl era pre ukrukwa, yeglpre ye ira moglkwa i spirit kinde wagle dipene endimbi ana yomba pir dinaglmedi prukwa.
Yesus Galili kamun kamambuno dungwa
(Luk 4:42-44)
35 Kamun kor tange akemim ere pango, Yesus andigl yungu i kondo ende menda pi ana dumo wau yomara igle ye kamange orkwa. 36 Saimon ya angiglma tau ye akiye wan eingwa, Yesus pre ende menda pi dokingwa. 37 Ye kan indre yegl diteingwa, “Yomba prapra ene pre dokingwa!”
38 Ba Yesus di ikine endungwa, “Nono kamun tau yungu epigl mangigl yomara i endeinamga. Yungu ombuno igle ombugl na kamambuno dipene ende tenaglka. Na taragl ipre winga.” 39 Yeglpre ye Galili kamun prapra wan wu ikine ikine pi, makai yungu yei-omara prapra kamambuno dipene ende te spirit simenda endungwa.
Yagl ta kaglande sungwa Yesus ake winge dungwa
(Matyu 8:1-4; Luk 5:12-16)
40 Yagl ta kaglande sungwa, Yesus moglmara undre goglko bondugl ana akeple dinarambedi pre anduwa yei dungwa, “Ene na erewakai ere naraglendi pitn kade, ene erewakai ere naro.”§ Ka Matyu 8:2 mina pangwa i kano.
41 Ana Yesus miriye kinde gogl ana ongo duglosi yaglmo akindre dungwa, “Na pirka, ene kinden pra wakai erambiwo.” 42 Erme keme kaglande sungwa ikra dundungo ana ye nangiye winge dungwa.
43 Yesus ka giglendi kaima ditendre ana tambre-yene diendungwa. 44 Ana Yesus ye ditongwa, “Ene yomba suwarata ditekratnga, ba ene du ende pris moglmara pindre ana nangin ombuno dimin. Ye ene kanan, yomba prapra ene kaglande singa winge dungwa i kanaglkwa, Moses dumere ere ana ofa garatnga.” 45 Ba yaglmo ende pindre boglo kuglko ana kamo andemagle-wai dungwa. Yegl orko Yesus taun prapra suna enambuka mere mango ye pi kamun bina dangine yomba moglkrimara wanmoglkwa. Ana igle yomba koglkoglo kikesi ye moglmara wu meglkwa.

*1:1: Yesus plau dungwa enge, ye God kamo wakai di yomba tongwa. Ka wakai iwe, God taragl wakai ere yomba tenagle dungwa kamo. Mak 1:15 mina kano.

1:2: Malakai 3:1

1:3: Aisaia 40:3

1:6: Ka Matyu 3:4 mina pangwa i kano.

1:34: Yesus God wam moglkwa ana ye, God yombama ikine endinambuka pre pinde i-pere endungwa. Grik yomba kanno mina ye Krais we dingwa. Te Hibru yomba kanno Mesaia we dingwa. Ka Mak 1:1 mina pangwa i kano. Juda yomba yegl pirkwa. Yagl i God diendinan, unambuka ana ye king mereyegl undre ana Rom yomba si endinan ana Israel yomba wakai moraglmedi pirkwa. Ba Yesus kongun yegl era pre ukrukwa, yeglpre ye ira moglkwa i spirit kinde wagle dipene endimbi ana yomba pir dinaglmedi prukwa.

§1:40: Ka Matyu 8:2 mina pangwa i kano.