1 M baꞌabiise, sida, m daa pu tunꞌe n pianꞌ tisi ya wuu man pianꞌ n tisid nimbane mor Winaꞌam Siig Suŋ laa. Ka daa pianꞌ n tisi ya wenne dunia kaŋa nidib ka wenne bilies n be Kiristo ni. 2 Ka yaname daa pu paae na diꞌe paꞌalug kpiꞌema wuu niŋkuda na niŋ siꞌem la zug, m daa tuꞌasi ya, ka ya wenne bilies n muꞌad binꞌisim ka pu dit dikpiꞌema. Hale nannanna ya nan pu paae na diꞌe lii, 3 yaname nan kpelim n tumne wenne dunia kaŋa nidib la zug. Fufum yaꞌa bee ya soogin ka ya nwaꞌasid ne taaba, neꞌeŋa pu paꞌal ye ya ane dunia kaŋa nwa nidib ka tumne wenne ban bee? 4 Ka ya yinni yaꞌa yel ye, “Man dolne Paul,” ka yinni ye, “Man dolne Apollos,” ya pu tumne wenne dunia nidib nee?

5 Man ne Apollos a anoꞌone? Ti kuduŋ ane tumtumnib bane daa ke ka ya diꞌe Winaꞌam. Ti yinni yinni tum tuum kan ka Zugsob la tisi ti ye ti tum. 6 Man daa tum wenne m butne biili ne, ka Apollos donꞌonsidi li. Ka li daa ane Winaꞌam n ke ka li nobug. 7 One but ne one donꞌonsid ane zaalim. Winaꞌam maꞌaa ket ka biili la nobugid. 8 Baragaŋ kaꞌ one but ne one donꞌonsid saꞌanne. Winaꞌam na yo soꞌ mekama wusa on tum siꞌem. 9 Ti ane Winaꞌam tumtumnib ne taaba. Yanam wenne Winaꞌam poog ne, ka me lem wenne Winaꞌam yir ne.

10 Man zaŋ piini kan ka Winaꞌam tis im la n tum wenne tanmeedsuŋ ne, n eenb eenbir, ka ninsoꞌ me sunꞌul ne li zug. Ka soꞌ mekama guꞌusime o meŋ on meed siꞌem. 11 Winaꞌam da zaŋ Yesu Kiristo ka o a eenbir la. Eenbir siꞌa lem kaeꞌ ka soꞌ na nyaŋe eenbe. 12 Ninsieba na zaŋ salima bee anzurifa bee kuga ban ka ba ligidi zuꞌe la n sunꞌul eenbir la zug. Ka sieba me na zaŋ daad bee mood n sunꞌul. 13 Yesu Kiristo ken na daar la, soꞌ wusa tuuma a siꞌem la na nie paalo ni. Bugum na paꞌali li. Ka bugum la na mak nid wusa tuuma ka paꞌal lin a siꞌem. 14 Bugum yaꞌa pu di soꞌ tuuma, o na di li nyood. 15 Ka bugum yaꞌa di soꞌ tuuma, o ku di li nyoode. Amaa nid kan na tilig wenne one zo pons ne bugumin ne.

16 Ya ziꞌ ye ya ane Winaꞌam yir ka o Siig Suŋ bee ya nii? 17 Soꞌ yaꞌa saꞌam Winaꞌam yir, Winaꞌam me na saꞌam o. Winaꞌam yir ane o meŋ din gullim, ka yanam me aa o yir.

18 Soꞌ da maꞌ o meŋa. Soꞌ yaꞌa be ya soogin ka tenꞌes ye o ane yaꞌam daan dunia kaŋa nwa ni, li a suꞌum ka on kilim yalim dunia nwa ni, lin na ke ka o niŋ yaꞌam daan. 19 Lin ka dunia dim tenꞌes ka li a yaꞌam la, ane yalimis Winaꞌam saꞌan. Li dolne lin sob Winaꞌam gbauŋin siꞌem la ye, “Winaꞌam bent yaꞌam dimne gbanꞌadi ba ne ba miꞌilim poogin.” 20 Ka lem sob zinꞌisiꞌa ye, “Zugsob miꞌ ye yaꞌam dim tenꞌesa ane zaalim.” 21 Dinzugo soꞌ da nweꞌ nyoꞌog ne lin ka nidib na nyaŋe tum. Siꞌel wusa ane ya din. 22 Man bee Apollos bee Piita bee dunia kaŋa nwa, bee nyovur bee kuꞌum, bee line be nannanna bee saŋa line na ti kena la, yaname soꞌe bama wusa. 23 Ka Kiristo me soꞌe ya, ka Winaꞌam soꞌe Kiristo.