1 Kel ka ba gos ka ti a Kiristo tumtumnib ne yelmaanib ka Winaꞌam guꞌuli ba ne yelsuaꞌadir line a ameŋa la. 2 Li nar ka one ka Zugsob nok tuuma niŋ o nuꞌusin a yelsida sob. 3 Li pu daam man baa biꞌela ye yanam bee ninsieba n pianꞌade m yela wuu ya ane sariakatib la. Hale m pu pianꞌad m meŋ yela wuu sariakata. 4 Man potenꞌer a nyain, amaa li pu paꞌal ye m pu maal beꞌede. Zugsob la a one kad man saria. 5 Dinzugo, da wenne sariakatib n deŋi koos soꞌ ye o maal beꞌed, ka Zugsob la nam pu kenaa. O yaꞌa ti kena, o na ti yiis line suaꞌ likin paalo ni na, ka nie line be ninsaalib wusa potenda ni. Saŋkan la Winaꞌam na pianꞌ soꞌ wusa pianꞌasuŋ line nar o.

6 M baꞌabiise, yanam suꞌum yela ka m nok neꞌeŋa wusa mak ne mam meŋ ne Apollos ye ya zamis tinam saꞌan yelug line ye, “Dol Winaꞌam gbauŋ la yel siꞌem la tituꞌaa.” Dinzug da nweꞌ nyoꞌog ne nid yinni ka neꞌes ayinni. 7 Anoꞌone maali ya ka ya be ya konꞌ ne sieba? Bo ka ya mor ka li kaꞌa ye Winaꞌam tisi ya? Ka ya yaꞌa diꞌe li, wala ka ya duꞌosidi ya meŋ wenne ya pu diꞌe li?

8 Ya pun mor yaname bood siꞌel wusa, ka pun mor Winaꞌam piini wusa. Ka me lieb naꞌanam hale ka tiname pu paꞌase. M naan boodin ka ya sid aan naꞌanam, ka ti wusa laꞌam di naꞌam. 9 Man saꞌan, m tenꞌeseya ka Winaꞌam gaŋ tinam bane a Tumtumnib la ka ti a tadimnam, n wenne nidib bane ka ba kuud paalo ni la, ka dunia dim wusa ne maleknam laꞌam gosidi ti la. 10 Tinam ane zon Kiristo zug, amaa yanam ane yaꞌam dim Kiristo ni. Tinam kaꞌ paŋa, amaa yanam mor paŋ. Nidib neꞌesid tinam amaa ba naꞌas yanam. 11 Lin paae saŋkaŋa nwa, tinam gilig ne koꞌom ne kuꞌonuud ka yeed kparikeend n kene giligid zinꞌig zinꞌig ka ba buꞌud tinam, 12 ka tum bedego n diisidi ti meŋ. Ba yaꞌa po noor tisi ti, ti lebisidne bareka puꞌusug. Ba yaꞌa namisi ti, ti modigidne. 13 Ba yaꞌa pianꞌ ti pianꞌabeꞌed, ti lebisidne pianꞌamalisiŋ. Ti lieb tadimnam ka wenne dunia tampoor ne dunia bundianꞌadnam ne, hale n paae nannanna.

14 M pu sob neꞌeŋa tisi ya ye m diisi ya nyan ne, amaa ye m paꞌali ya wenne ya ane man meŋ binoŋa. 15 Hale baa ya yaꞌa mor suŋidib tusa piiga yaname dol Kiristo la, ya mor baꞌ yinni maꞌaa. Bozugo ya nyovur beilim ne Yesu Kiristo noor yinni laꞌasug la, mane lieb ya saam, man n mor labasuŋ la kena tisi ya la zug. 16 Dinzugo m belimi ya, ye ya doli mane maan siꞌem la. 17 Neꞌeŋa yela ka m tum Timoti ya saꞌan na. O ane m meŋ binoŋir, on a yelsida sob Zugsob ni. One na tienn ya man nyovur beilim Kiristo ni yela, lin na dol ne bun lin wusa ka m paꞌan yadda niŋidib n be zinꞌis wusa la.

18 Ya sieba mor nyeesim n tenꞌesid ye m ku kena kaae yaa. 19 Ka Zugsob la yaꞌa bood, li ku yuuge ka m na keen ya saꞌan, ka baŋ lin ka nyeesim dim bama na tunꞌe maal, ka kaꞌ ba pianꞌad la maꞌanee. 20 Winaꞌam soꞌolim kaꞌane noor pianꞌade, amaa ka lee mor paŋ. 21 Ya bood dine? M kena fiꞌebi ya ne kpaꞌasa bee m kena ne noŋilim ne sumbugusum na?