1 M baꞌabiise, nannanna m yeti ya ne piini line yit Winaꞌam Siig Suŋ ni na la yela. M bood ye ya baŋi li yela a sida siꞌem. 2 Ya miꞌ ye yaname daa nan kaeꞌ yadda niŋidib la, baꞌa kpiilima daa more ya n dol suer beꞌed. 3 Dinzugo, m bood ye ya baŋ ye Winaꞌam Siig Suŋ la yaꞌa be soꞌ ni, o ku tunꞌe pianꞌ Yesu yela beꞌede. Ka soꞌ me ku tunꞌe yel ye Yesu ane Zugsoba, li yaꞌa kaꞌa ye Winaꞌam Siig Suŋ la bee o nii.

4 Siig Suŋ la tisid piini konꞌob konꞌob. Amaa li wusa yitne Siig Suŋ yinni la ni. 5 Tuuma konꞌob konꞌob be. Amaa li ane Zugsob yinni ka ti tumi tisid. 6 Tuuma konꞌob konꞌob be. Amaa li ane Winaꞌam yinni tisid nidib yaꞌam ka ba tumi li.

7 Winaꞌam Siig Suŋ la tisid yadda niŋidib wusa piini siꞌa line paꞌan Siig Suŋ la paŋ ye li suŋ Winaꞌam nidib wusa. 8 Siig Suŋ la tisid ninsieba piini ka ba pianꞌad yaꞌam pianꞌad, ka tisid sieba miꞌilim pianꞌad, 9 ka tisid sieba yadda titaꞌar Winaꞌam ni, ka tisid sieba piini line na tiꞌeb banꞌadnam, 10 ka tisid sieba paŋ ka ba na nyaŋe tum tuumnyalima, ka tisid sieba piini ka ba diꞌed Winaꞌam pianꞌad n tisid nidib, ka tisid sieba yaꞌam ka ba na nyaŋe baŋ line yi Siig Suŋ la saꞌan na ne line pu yi aninaa, ka tisid sieba piini ka ba na tunꞌe pianꞌ pianꞌazuna, ka tisid sieba ka ba na tunꞌe tuꞌas pianꞌazuna la gbin ne a siꞌel. 11 Li ane Siig Suŋ yinni la n niŋid neꞌenam wusa. O tisid soꞌ mekama ne piini gun gun wuu on bood siꞌem.

12 Kiristo nidib wenne niŋgbiŋ yinni ne, n mor luas bedego. Hale ne lin mor luas buudi konꞌob konꞌob la li kpelim ane niŋgbiŋ yinni. 13 Tinam wusa bane a Jew dim ne bane kaꞌ Jew dim, yamis ne bane kaꞌa yamise, Kiristo suu ti wusa ne Winaꞌam Siig Suŋ ka ke ka ti liebi wenne niŋgbiŋ yinni. Winaꞌam tumi o Siig Suŋ yinni la n tisi ti wusa.

14 Niŋgbiŋ la meŋ pu mor lua yinni maꞌanee. Li more luas bedego. 15 Nobir yaꞌa yelin ye, “Man kaꞌa nuꞌug la zug, m kaꞌ niŋgbiŋ la nii,” lin ku nyaŋen keen ka o kaꞌ niŋgbiŋ nii. 16 Tobir me yaꞌa yelin ye, “Man kaꞌa nif la zug, m kaꞌ niŋgbiŋ la nii,” lin ku nyaŋen keen ka o kaꞌ niŋgbiŋ nii. 17 Niŋgbiŋ la wusa yaꞌa aane nifo, li ye li niŋin wala n wum pianꞌade? Ka li yaꞌa aane tobir, li ye li niŋin wala n wum nyuugo? 18 Lin a siꞌem la, Winaꞌam maalne niŋgbiŋ luas wusa toꞌoŋ wuu on bood siꞌem. 19 Li wusa yaꞌa aane lua yinni maꞌaa, niŋgbin naan ku beene. 20 Lin a siꞌem la, luas bedego be, amaa li ane niŋgbiŋ yinni.

21 Dinzugo nif ku nyaŋe yel nuꞌug ye, “M pu bood fu suŋire.” Zug me ku nyaŋe yel noba ye, “M pu boodi ya suŋire.” 22 Ka ti niŋgbiŋ la luas bane wenne ba kaꞌ paŋ la yaꞌa kaeꞌ, niŋgbiŋ la ku tum. 23 Ti gosid niŋgbina luas bane ka ti neꞌes la suꞌuŋa, ka naꞌasid nyan luas bane ka ti pu bood ye nidib nye la n ligini ba. 24 Ka li pu nar ka ti ligin luasuma laa. Winaꞌam meŋ maal ti niŋgbina ka tis luas bane ka ti gos ka ba nyood pu zuꞌe la naꞌasi n gaad lua mekama. 25 Dinzugo weligir kaeꞌ ti niŋgbina nii. Luas konꞌob konꞌob la bood taaba suŋir. 26 Dinzugo lua yinni yaꞌa namisid, luas la wusa me namisidne. Lua yinni yaꞌa nye naꞌasi, luas la wusa more sumalisim.

27 Ya wusa wenne Kiristo niŋgbiŋ ne. Ka soꞌ kam zanꞌasa me wenne o niŋgbiŋ la lua sieba. 28 Ka Winaꞌam gaŋne Tumtumnib o nidib soogin ka ba a kpeenmnam, ka gaŋ nodiꞌesidib ka ba tiaꞌali ba, ka nan gaŋ paꞌanib, ka yuꞌuŋ gaŋ bane maan tuumnyalima, ka lem gaŋ sieba ka ba na tunꞌe maꞌae banꞌadnam, ka gaŋ sieba ka ba suŋid nidib ka gaŋ sieba ka ba gosid ka bigisid nidib tuuma a siꞌem, ka gaŋ sieba ka ba pianꞌad pianꞌazuna. 29 Ti wusa kaꞌ Tumtumnib bee nodiꞌesidib bee paꞌaniba. Li kaꞌ ti wusa mor paŋ na maal tuumnyalima 30 bee tiꞌeb banꞌadnam bee pianꞌ pianꞌazuna, bee nyaŋe tuꞌas pianꞌazuna la gbin ne. 31 Boomi piintitada n gaad bun wusa.

Ka m na paꞌali ya suer line gati ba wusa.