1 M yaꞌa pianꞌad ninsaalib pianꞌad buudi ne maleknam pianꞌad, ka pu mor noŋilim, m kudum wenne lumir bee binnir bane vuudne. 2 Ka m yaꞌa mor nodiꞌesug piini line ka Winaꞌam tisid ka nyaŋe baŋ yelsuaꞌada wusa, ka mor miꞌilim wusa, ka m yadda kpiꞌem Winaꞌam ni ka na nyaŋe yel zuer ka li viki toom, ka pu mor noŋilim, m ane zaalim. 3 Ka m yaꞌa zaŋ man mor siꞌel wusa tis noŋdim, hale ka zaŋi m niŋgbiŋ n tis ka ba nyuꞌe ne bugum, ka pu mor noŋilim, m kaꞌ nyoode.

4 Nimbane mor noŋilim, me mor suguru, ka suŋid nidib, ka pu mor fufum bee duꞌosi meŋa. 5 Ba kaꞌ nyeesim bee titaꞌalim bee boodi o meŋ suŋir maꞌane bee soꞌ yaꞌa maal o beꞌed o pu tiend li o suunrine. 6 Noŋilim pu mor sumalisim ne tuumbeꞌede, amaa li mor sumalisim ne bunsuma. 7 Noŋilim dit suguru ne siꞌel wusa. Ka yadda ne tiꞌir ne modigir kaꞌ siere.

8 Noŋilim pu naae da. Nodiꞌesug ne pianꞌazuna ne miꞌilim na gaad. 9 Ti miꞌilim ne ti nodiꞌesug pu paae Winaꞌam miꞌ siꞌem la. 10 Ka Kiristo one siaꞌal ameŋa la yaꞌa ti paae na, line kaꞌa ameŋa la na gaad.

11 Man daa a biig la, m daa pianꞌad ka tenꞌesidi wenne biig ne, ka gbanꞌadi wenne biig. Ka man yuꞌun nobug la ka bas biilim tuuma. 12 Tiname miꞌ siꞌel nannanna la ane biꞌela wenne tiname gosid gotiŋin ka li a zibisug siꞌem la. Amaa saŋkan la ti na nye siꞌel wusa nyain. Man miꞌ siꞌel nan ane biꞌela. Amaa m na ti baŋi li suꞌuŋa nyain wenne Winaꞌam miꞌ man nyain siꞌem la.

13 Yadda ne tiꞌir ne noŋilim, bunama atanꞌ nwa, na be saŋa wusa. Amaa noŋilim gati ba wusa.