1 Neꞌeŋa nwa a yiiga yel, ye fu kpeꞌeŋi ba ka ba puꞌus Winaꞌam ne sosug ne beluŋ ne bareka puꞌusum nidib wusa yela. 2 M bood ye ya sos Winaꞌam n tis naꞌanam ne kpiꞌemnam ka ti be ne laafe ka daamug kaeꞌ, ka ti dol Winaꞌam suer ne nimmua yela wusa ni. 3 Neꞌeŋa a suꞌum ka malisi ti faangid Winaꞌam suunr 4 one bood ye nidib wusa nye faangir ka lem baŋ yelsida suer la. 5 Winaꞌam yinni maꞌaa be. Ka nuꞌunweꞌed yinni maꞌaa me be nidib ne Winaꞌam soogin, ka one a Yesu Kiristo la, 6 one pesigi o meŋi tis ye nidib wusa nye yolisim la. Ka li saŋa paae la bane nyee li la, dii li kaset. 7 Neꞌeŋa nwa zug ka Winaꞌam da gaŋi m ye o tum m ka m mooni li, ka paꞌal bane kaꞌ Jew dim la ye ba niŋ Winaꞌam yadda ka baŋ line a sida. M yetne yelsida, ka pu maꞌada.

8 M bood ye zinꞌig wusa, ka dap puꞌusum ka uk nuꞌus line a nyain la, puꞌus Winaꞌam. Ka supeen ne nogban nwaꞌar kaeꞌ.

9 Ka poꞌab me yeem fuud line nar ka na suaꞌa ba nyan suꞌuŋa, ka kaꞌane zuobid loob yela bee salima laꞌad bee kugvenla line buon peel ka li ligidi zuꞌe, ne fuud ban ka ba ligidi zuꞌe laa. 10 Ba lee venl ne tuumsuma line nar poꞌab bane yel ye ba ane Winaꞌam puꞌusum dim la.

11 Kel ka poꞌab a baanlim ka zamis ka siak ba bane soꞌe ba la noya. 12 M pu siak ye poꞌab paꞌan dapa, bee mor kpiꞌeuŋ ka soꞌe baa. Ba ae baanlim; 13 ka Winaꞌam da deŋim maalne Adam ka nyaan maal Eve. 14 Ka Sutaana da pu maꞌ Adam, amaa o nyaŋe maꞌ Eve, ka o saꞌam Winaꞌam noor yelug. 15 Ka laꞌam ne wala, poꞌa yaꞌa nyidigid ne Winaꞌam yadda niŋir ne noŋilim ka a nyain ka mor yaꞌam suꞌuŋa la na paasid faangir ne biis duꞌabin.