1 Yelmeŋir nwa ka m yet ye, soꞌ yaꞌa bood ye o a Winaꞌam nidib soꞌod, o boodim ane o tuuma a suꞌum. 2 One a Winaꞌam nidib soꞌod asee ka o a one kaꞌa gbaꞌare, ka a poꞌayiŋdaan ka gbanꞌadi o meŋ, ka mor yaꞌam, ka a one tum line dol suer suꞌuŋa, ne one diꞌesid saam ne sumalisim, ka a one na tunꞌe paꞌal nidib suꞌuŋa, 3 ka da a danuuda bee one bood zaba, amaa o be baanlim, ka a one pu mor noŋgban nwaꞌare, ka da noŋ ligidi, 4 ka tunꞌe gosidi o yidim wusa suꞌuŋa, ka o biis siakidi o yelug ka mor naꞌasi o yela wusa ni. 5 Ka soꞌ yaꞌa pu nyaŋe gosi o yidima, o na niŋ wala n guri Winaꞌam nidiba? 6 Ka da a niŋkane niŋ yadda paalim nan ne. Li yaꞌa kaꞌa ala o na mor nyeesim ka ba kad o saria beꞌed wuu Sutaana ne. 7 Asee ka yiiŋdim baŋ ye o a ninsuŋ. Li yaꞌa kaꞌa ala o na di nyan ka lu Sutaana bendugin.

8 Bane me a Winaꞌam nidib suŋidib nar ka ba a nimmua dim, ka da mor pianꞌade ayi yi, bee da ke ka daam kuli baa, bee dol suer beꞌed nye nyoode. 9 Li nar ka ba gbanꞌe yelsuaꞌadir line ka Winaꞌam yuꞌun paꞌali ti ka ti siak la kiŋ kiŋ, ka ba potenda a nyain. 10 Asee ba kpansi ba yiiga, ka ba yaꞌa sid ane yelsida dim, ban on nyaan tum Winaꞌam nidib suŋidib tuuma.

11 Ka ba poꞌab la me ae bane tum ne nimmua, ka da yeesida, ka gbanꞌadi ba meŋ, ka a yelsida dim siꞌel wusa ni.

12 Asee ka suŋidib a poꞌayiŋ dim ka na nyaŋe gosi ba biis ne yidim wusa suꞌuŋa. 13 Suŋidib bane sid tum suꞌuŋa la nyet naꞌasi, ka na nyaŋe pianꞌ Yesu Kiristo yadda niŋir yela ne sukpiꞌem.

14 Laꞌam ne man mor potenꞌer ye m na kenn fu saꞌan ka li ku yuug la, m sobid saꞌal bama ye 15 daasiꞌere, m yaꞌa yuuge, fun on baŋ nidi na tunꞌe tum siꞌem Winaꞌam nidibin, bane a Winaꞌam one voe la nidib la, ka suŋid yelsida la wuu zaꞌantolug ne zaŋguomi suŋid doog siꞌem la. 16 Soꞌ kaeꞌ na biꞌes yelsuaꞌadir titaꞌar line be ti Winaꞌam dolim ni laa.