1 Winaꞌam Siig Suŋ la nie paꞌal nyain ye, dunia naar saŋa la, ninsieba na basi ba yadda niŋir ka dol siis bane maꞌad nidib la, ne siis beꞌednam paꞌalug. 2 Paꞌalug bama ane line yi damaꞌamnam saꞌan ka ba potenda n kpi la ni na. 3 Nimbama paꞌan ye poꞌab da kul sidib bee dap di poꞌaba, ka lem kis disieba diib, line ka Winaꞌam maal ye bane puꞌus o bareka ka niŋ o yadda ka baŋ yelsida suer la, na tunꞌe dii li la. 4 Bun line wusa ka Winaꞌam maal la ane suꞌuŋa ka ba yaꞌa diꞌed li ne Winaꞌam bareka puꞌusum siꞌel siꞌel pu kisa. 5 Ka Winaꞌam yelsum ne ti winsosug la ke ne ka li lieb suꞌum ye ti di.

6 Fu yaꞌa paꞌali fu baꞌabiis taab la neꞌeŋa fu na a Yesu Kiristo tumtum suŋ, bozugo fu diꞌe Winaꞌam yelkan a yelmeŋir yadda la ne paꞌal suŋ line ka fu dol la. 7 Zanꞌasim solima line kaꞌa gbin ne ka me zanꞌas line a yalim tuuma, amaa kpeꞌeŋimi fu meŋi n zamis Winaꞌam suer ne li tuuma niŋir. 8 Fu yaꞌa tum line na tis niŋgbiŋ paŋ li nyood be biꞌela, amaa Winaꞌam suer dolim lee mor nyood bedego line a tiꞌir beilim kaŋa, ne line na ti kena la ni.

9 Yelmeŋir nwa nar ye soꞌ mekama diꞌe li. 10 Neꞌeŋa nwa yela ka ti kpeꞌeŋid hale ne tuum kpiꞌema, ka ti mor tiꞌir ne Winaꞌam one voe la yela, one a nidib wusa faangid la, ka li kas kas ane bane niŋ o yadda la.

11 Paꞌalim ka saꞌali ba neꞌenam. 12 Da ke ka soꞌ ziem uf fun a dasaŋ la zugo, ka niŋim line a suꞌum ka ba me tuꞌas uf, ka me tuꞌasi fu pianꞌad ne fu tuuma ne fu noŋilim ne Winaꞌam yadda niŋir potenꞌesuŋ. 13 Karem Winaꞌam gbauŋ la n tis nidib la, ka paꞌani ba, ka lem saꞌali ba hale ka m ti kena. 14 Da bas piini line ka Winaꞌam tis uf saŋkan ka nodiꞌes soꞌ da diꞌe o pianꞌad ka pianꞌa piini yela ka kpeenmnam nyaan paꞌali ba nuꞌusi fu zugin la.

15 Tum tuumbama ka noki fu meŋi pesig tuuma la, ka ba nye fun kpeꞌeŋidi fu meŋ siꞌem. 16 Guꞌusimi fu meŋ ne fun paꞌan siꞌel la. Kpelim tumi ala, ka tuumbamanamin ka fun ne bane kelisidi fu pianꞌad la na paam faangir.