1 Ka dau soꞌ daa be anina, ka o yuꞌur buon Ananias, ne o poꞌa Safira. Ka on ne o poꞌa me kuosi ba laꞌad sieba, 2 ka yiis ligidi la sieba n suꞌa, ka ke line kpelim la n mor na n tis Tumtumnib la. Ka o poꞌa me baŋ li yela.

3 Ka Piita buꞌos ye, “Ananias, bo ka fu ke ka Sutaana kpenꞌ fu suunrin, ka fu maꞌ n tis Winaꞌam Siig Suŋ, ka yiis ligidi kan ka fu kuos fu laꞌad sieba n suꞌa? 4 Fun nam pu kuosin la, li kpelim aane fu din. Fun kuos la men fu tunꞌe n maal fu yaꞌam bood siꞌem. Ka bo niŋ ka fu tenꞌes yelkaŋa fu suunrin ne? Fu pu maꞌ n tis ninsaala, amaa fu maꞌ n tis ne Winaꞌam Siig Suŋ.”

5 Ka Ananias n wum pianꞌad kaŋa nwa la, ka lu teŋin n kpi. Ka dabiem bedego kpenꞌ bane wum bun kaŋa nwa la. 6 Ka dasam due n zaŋ o n vilig o ne pien n zee o keŋ mum.

7 Ka li pu yuuge ka o poꞌa me kena, ka pu baŋ line pun niŋ la yelaa.

8 Ka Piita buꞌos o ye, “Yelimi ma, yanam kuosi ya laꞌad la, ligidi la wusa nwa bee?”

Ka o lebis ye, “Eenn, li wusa la.”

9 Ka Piita buꞌos o ye, “Bo niŋ ka ya niŋ noor yinni ye ya mak Zugsob Winaꞌam Siiga? Gosima bane mum fu sid la nan ziꞌe zaꞌanoorin la. Ba me na zee fu n yi.”

10 Ka poꞌa kpelim lu teŋin n kpi Piita tuon. Ka dasam la kena n nye ka o kpi sa, ka ba nok o n keŋ mum kpiꞌeli o sid. 11 Ka dabiem bedego kpenꞌ bane niŋ yadda la wusa ne bane wum yelkaŋa nwa la.

12 Ka Tumtumnib la tum nyalima tuuma bedego nidib la wusa sisoogin. Ka yadda niŋidib la laꞌas taaba zinꞌisiꞌa ka li buon Solomon zaꞌambeŋ. 13 Ka bane pu niŋ Winaꞌam yadda n zo dabiem n pu laꞌas ne ba, hale baa ne nidib n pianꞌ ba yuꞌur suꞌuŋa la. 14 Poꞌab ne dap bane daa niŋ Zugsob la yadda daa paas hale lieb bedego. 15 Hale ka nidib mor banꞌadnam na n digili ba sueya ni ne deba ye Piita maꞌasim na ligili ba, o yaꞌa gaad anina saꞌan. 16 Ka nidib bedego yi teens bane gilig Jerusalem na n mor banꞌadnam, laꞌam ne bane ka kikiris doli ba kena. Ka ba wusa paam laafe.

17 Ka maalmaan kpeenm ne bane be o saꞌan n a Sadusii dim la daa nen ne ba ka due suunr, 18 n gbanꞌe Tumtumnib la kpenꞌesi ba sarega ni. 19 Amaa ka Zugsob malek daa keŋ n yoꞌog sarega doog zaꞌanoor la yuꞌuŋ kan, n more ba n yiis yiŋ ka yeli ba ye, 20 “Kem n ziꞌen Winaꞌam puꞌusum yin n tuꞌas nidib la nyovurpaal labaar la wusa.”

21 Ban wum neꞌeŋa la, ka keŋ n kpenꞌ Winaꞌam puꞌusum yin bekeeung la n paꞌan nidib.

Ka maalmaan kpeenm ne bane be o saꞌan la daa buol Israel dim kpeenmnam wusa ye ba laꞌas Jew dim la gbanꞌar laꞌasug anina, ka ba wusa be anina ka ba tum sarega ni la ye ba mor Tumtumnib la na. 22 Amaa ban tum sieba la paaya ka pu nyee ba sarega la nii, ka leb na n yeli ba ye, 23 “Tiname paae la ti nye ka sarega doog zaꞌanoor la kpar, ka bane gur la ziꞌe zaꞌanoorin, ka ba yoꞌog ka ti pu nyee ba anina.” 24 Ka Winaꞌam puꞌusum yir gurib kpeenm ne maalmaan kpeenmnam la n wum yelkaŋa nwa la, ka biꞌesid line niŋ siꞌem ka li a ala.

25 Ka soꞌ kena n yeli ba ye, “Dap ban ka ya sa kpenꞌes sarega ni la, ziꞌe Winaꞌam puꞌusum yin n paꞌan nidib.” 26 Ka Winaꞌam puꞌusum yir gurib kpeenm la ne o nidib keŋ gbanꞌe ba na, ka lee pu daami ba, ban zot ye nidib la na ti lobi ba ne kuga la zug.

27 Ban more ba na n ziꞌeli ba tuon la, ka maalmaan kpeenm la buꞌosi ba ye, 28 “Ti daa pu yeli ya ye ya mit ka ya lem paꞌal soꞌ kpela ne yuꞌur kaŋa nwa yaꞌasa? Amaa gosim yaname niŋ siꞌem, Jerusalem nwa peꞌel ne ya paꞌalug. Ya bood ye ya zaŋ dau nwa ziim n zuol tinam zutin.”

29 Ka Piita ne o Tumtum taaba la lebisi ba ye, “Li suꞌum ka tinam siak Winaꞌam noor n gaad ninsaalib noor. 30 Winaꞌam on ka ti yaanam da puꞌusid la daa vuꞌug Yesu on ka ya daa kpaꞌ tabil dapuudir zug n ku la. 31 On la ka Winaꞌam duꞌos o n ziꞌel o datiuŋ, ka o a tuon gat ne faangir ye o tis Israel suer ka ba tiake ba sunya, ka Winaꞌam yiis ba tuumbeꞌed n bas. 32 Tinam ne Siig Suŋ on ka Winaꞌam tisid nimbane siak o noor la, wusa daa nyee li, ka tuꞌasi li n tisi ya.”

33 Ban wum pianꞌakaŋa nwa la, ka ba sunya pelig hale ka ba bood ye ba kuu ba. 34 Ka dau soꞌ due n ziꞌe laꞌasug la nidib sisoogin, n a Farisee nid ka o yuꞌur buon Gamaliel, n a one paꞌan Winaꞌam wada la yela, ka lem a yuꞌur daan nidib saꞌan. Ka o tis noor ye ba yiisim Tumtumnib la yiŋ ka li niŋ biꞌela. Ka ba yiisi ba. 35 Ka o yel ye, “Israel dima, guꞌusimi ya meŋ ne yaname maan nimbama nwa siꞌel la. 36 Ya tenr ye li pu yuug sa ka Teudas daa duꞌe n duꞌos o meŋ n yel ye on ane nintitaꞌar. Ka nidib wenne kobus anaasi daa dol o. Amaa ban daa kuu o la, nidib bane daa dol o la wusa daa widig. Ka li lieb zaalim. 37 Ka lin nyaꞌaŋ ka Judas on yi Galilee ni me duꞌe, nidib kaalug saŋa la. Ka nidib sieba daa dol o. Ban daa kuu o la nidib bane daa dol o la daa widig men. 38 Dinzugo nannanna m yeti ya ne ye ya yiisi ya nuꞌus nimbama yela ni. Ka li yaꞌa ane ninsaalib tuuma, li na ti lieb zaalim. 39 Amaa li yaꞌa ane Winaꞌam din, ti ku tunꞌe n saꞌami lii. Daasiꞌer ti na ti nye ka ti zabid ne Winaꞌam.”

40 Ka ba siak o yelug la, ka buol Tumtumnib la n ke ka ba buꞌu ba, ka yeli ba ye, “Mit ka ya lem tuꞌas Yesu yuꞌur yaꞌas tis nidib.” Ka nyaan basi ba, ka ba keŋ.

41 Ka Tumtumnib la yi laꞌasug la ni ne sumalisim ban miꞌ ye Winaꞌam tenꞌes ye ba a suꞌum ne nyan diib Yesu yela la zug. 42 Ka daar wusa ka ba be Winaꞌam puꞌusum yin la ne ba yaan, ka pu bas nidib zamisugo, ka moon ye Yesu ane Kiristo.