1 Ka dabisa bama saŋa ka nyaꞌandolib kal n daa paasid la, Jew dim bane daa pianꞌad Greek daa nwaꞌasid ne Jew dim bane daa pianꞌa Hibiru pianꞌad ye ban n suŋid nidib ne diib daar wusa la, ba pu tisid ban pokonya la siꞌela. 2 Ala zug ka Tumtumnib piinayi la buol nyaꞌandolib la wusa n yeli ba ye, “Li pu nar ye ti bas Winaꞌam labaar moolug ka tum diib tuuma. 3 Dinzugo ti zuanama, gosimi ya sisoogin la n gaŋ dapa ayopoi bane a ninsuma nidib saꞌan, ka a yaꞌamdim, ka Winaꞌam Siig Suŋ bee ba ni bedego, ka ti zaŋ tuumkaŋa nwa n niŋi ba nuꞌusin. 4 Ka tinam na kpelim pesigi ti meŋ Winaꞌam sosugin ne labasuŋ la moolug tuuma ni.”

5 Ka ban yel siꞌem la daa niŋ nidib la wusa malisim. Ka ba gaŋ Sitivin one niŋ yadda bedego, ka Winaꞌam Siig Suŋ bee o ni bedego, ne Filip, ne Prokorus ne Nikanor ne Timon ne Parmenos ne Nikolas one yi Antiok teŋin na ka dol Jew dim puꞌusum maluŋ la. 6 Ban ka ba more keŋ Tumtumnib la saꞌan ka ba paꞌali ba nuꞌus ba zutin n sos Winaꞌam n tisi ba.

7 Ka Winaꞌam pianꞌad la yadigid ka nyaꞌandolib la kal me paasid bedego Jerusalem ni. Ka maalmaanib la bedego daa siak n niŋ Yesu yadda.

8 Ka Sitivin daa mor Winaꞌam yelsum bedego ne paŋ la, ka tum nyalima tuumtitada nidib sisoogin. 9 Amaa ka ninsieba bane puꞌusid laꞌasug doog siꞌa, ka li yuꞌur buon Soꞌe M Meŋ dim ka ba yi Sairene teŋin ne Alekizandria teŋin, ne Jew dim sieba bane yi Silisia ne Asia teensin na, ka ba nwaꞌas nonwaꞌar ne Sitivin, 10 ka ku tunꞌe lebis o pianꞌa kan ka o pianꞌad ne yaꞌam kan ka Winaꞌam Siig Suŋ tis o laa, 11 ka maal zam n bo nidib bane yel ye, “Ti wum ka o pianꞌ pianꞌabeꞌed n tuꞌu Moses ne Winaꞌam.”

12 Ka ba ke ka nidib la sunf due laꞌam ne kpeenmnam ne gbauŋmiꞌidib la ka keŋ gbanꞌ o mor o keŋ kpeenmnam laꞌasug saꞌan, 13 ka buol ziri kasetib ka ba tuꞌas n zuol o zugin ye, “Dau kaŋa nwa tuꞌud Winaꞌam puꞌusum yisuŋ ne Winaꞌam wada ka pu basida. 14 Ti wum ka o yel ye, Yesu one yi Nazaret na la, na saꞌam Winaꞌam puꞌusum yir la ka tiak malima ban ka Moses tisi ti la.”

15 Ka ban wusa zinꞌi kpeenmnam laꞌasugin la, gosid Sitivin kii, ka nye ka o nindaa wenne malek nindaa ne.