1 Ka ba gbanꞌe ye ti kpenꞌ aaruŋ keŋ teŋ kane yuꞌure buon Itali la, ka nok Paul ne sarega nidib sieba n niŋ sogia kpeenm yinni one yuꞌure buon Julius la nuꞌugin, one a Ogestus sogianam kpeenm. 2 Ka aaruŋ kane yi Adramitium teŋin na daa be anina ye li keŋ Asia ateuk gbeug teŋ sieba ni. Ka ti kpenꞌ waꞌae. Ka Aristarkus one a Masedonia nid one yi Tesalonika na la, doli ti.

3 Ka beog nie ka ti paae Sidon teŋin, ka Julius maal Paul suꞌuŋa bas o noor ka o keŋ o zuanam saꞌan ka ba tis o diib. 4 Ka ti kpenꞌ aaruŋ anina. Ka pebisug tuꞌusidi ti. Ka ti kpiꞌe Saipuros teŋin ka dol zinꞌig kane na lusi ti lebis pebisugin la, 5 ka gaad ateuk la line kpiꞌe Silisia ne Pamfilia teensin n paae Mira teŋin line be Lisia soꞌolimin. 6 Anina ka sogia kpeenm la nye Alekizandria teŋ aaruŋ ka li bood ye li keŋ Itali teŋin. Ka ti wusa kpenꞌ. 7 Ka li kaꞌa naꞌana ka ti keŋ kuꞌomin la biꞌel biꞌel dabisa biꞌela n paae Nidus teŋin na. Ka pebisug pu ke ka ti nyaŋe keŋ tuone, ka luaki keŋ kpiꞌe Salmone teŋ kane be Krete soꞌolimin. Ka Krete teŋ lusi ti lebis pebisugin. 8 Ka ti kene kpiꞌe ateuk gbeug. Ka li muꞌe ka ti paae zinꞌi kane buon “Zinꞌisuŋ kan ka Aaruŋ Ziꞌe la.” Ka li kpiꞌe Lasea teŋin.

9 Ka dabisa yuug ka li lieb yeli tisi ti ne tinam na keŋ kuꞌomin la n tugis, noor loob dabisir n gaad la zug. Ka Paul saꞌali ba ye 10 “M baŋeya ka ti kuꞌomin ken la na niŋ yel beꞌed tisi ti. Laꞌad la bedego na saꞌam, laꞌam ne aaruŋ la meŋ ne nidib nyovuya.” 11 Amaa ka sogia kpeenm la kelis aaruŋ la sob pianꞌad, ka pu kelis Paul n yel siꞌel laa. 12 Ka pebisug saŋa ka zinꞌig la kaꞌa suꞌuŋa ka aaruŋ na ziꞌen. Lin zug ka nidib la sieba bedego yel ye, li a suꞌum ka ti keŋ, ka li yaꞌa a siꞌem ti na paae Foenik teŋin n zinꞌin teŋkan ni, teŋ kane be Krete soꞌolim n gosid tuon la.

13 Ka pebisug yi dagobug na daꞌad. Ka ba tenꞌes ye ba nye ba meŋ ka teeg aaruŋ la kunt line kpenꞌ teŋin la n fue ne nwiig. Ka ti kene n kpiꞌe ateuk gbeug Krete teŋin. 14 Ka li pu yuuge ka sisiꞌetitaꞌar yi Krete teŋin line buon nyaꞌaŋ sisiꞌem 15 n kena daꞌae aaruŋ la bedego. Ka ba ku nyaŋe ke ka aaruŋ la kpaꞌ sisiꞌem la ka bas li morem ka ke ka sisiꞌem la n mor aaruŋ la ken. 16 Ka ti paae teŋbil zinꞌig kan ka kuꞌom gilig ka li buon Kauda. Ka teŋ la lusi ti sisiꞌemin. Ka ti kpeꞌeŋi ti meŋ ka gbanꞌe aaruŋbil la suꞌuŋa 17 n duꞌos aaruŋ titaꞌar zugin. Ka ba nok nwiis n lo kiŋkiŋ n vilig aaruŋ titaꞌar la n tisi li paŋ, ka zo dabiem ye ti na paae zinꞌig kan ka titanbiꞌisug be ka li buon Sirtis ka kuꞌom pu zulum la. Lin zug ka ba sigis aaruŋ la futitaꞌar ka ke ka sisiꞌem la zeedi li ken. 18 Ka beog nie ka sisiꞌem la kpelim daꞌad. Ka ba pinꞌili yiisid laꞌad bane be aaruŋin la n basid kuꞌomin. 19 Ka beog lem nie ka ba meŋ yiis aaruŋ la meŋ laꞌad la n bas kuꞌomin. 20 Dabisa bedego ka saŋgbana ligil winig ne nwadibibis, ka sisiꞌem kpelim daꞌad ne paŋ. Ka ti pu lem mor potenꞌer ne vum.

21 Ka nidib la yuug ka pu di diibo. Ka Paul ziꞌeni ba soogin n yel ye, “Ya yaꞌa da siakini m noor ka da duon Krete teŋine, ti naani yiin yelbama nwa wusa ni. 22 Amaa m sosidi ya ye ya kpeꞌeŋi ya sunya. Ka hale baa yinni ku kpii ti soogine. Asee aaruŋ la maꞌaa na saꞌam. 23 Yuꞌuŋ ka Winaꞌam malek sa ziꞌe m saꞌan, ye Winaꞌam one soꞌe man ka m puꞌusid o la, 24 yel m ye, ‘Paul, da zo dabiem. Sida fu na ziꞌen naꞌatitaꞌar Kaisa la tuon, fu saria kadib yela. Ka Winaꞌam na tis uf bane dol uf la wusa vum.’ 25 Dinzugo, kpeꞌeŋimi ya sunya; ka man niŋ Winaꞌam yadda ye li sid na niŋ wuu malek la yel m siꞌem la. 26 Amaa sisiꞌem na daꞌae ti keŋ zinꞌig kan ka kuꞌom gilig la n fir.”

27 Li daa ane dabisa pii na anaasi yuꞌuŋ ka sisiꞌem daꞌadi ti ateukun ken. Ka ateuk la yuꞌur buon Adria. Ka yuꞌuŋ sisoos ka nidib bane tum aaruŋ la tuuma tenꞌes ye ti tuꞌae teŋ 28 ka nok line makid ne li kal wusa n mak kuꞌom la nye ka kuꞌom la zuluŋ a maka kobuga ne piisi. Ka li niŋ biꞌela ka ba lem maki gos, ka li a piiswai. 29 Ka ba zo dabiem ye aaruŋ la na tuꞌos tampiins, ka sigis aaruŋ la kunt line kpenꞌ teŋin la anaasi ne nwiis aaruŋ la nyaꞌaŋ ka puꞌus ye beog nie. 30 Ka nidib bane tum aaruŋ la tuuma la maꞌ ye ba sigis kunt kuꞌomin aaruŋ la tuon, ka sigis aaruŋbil la kuꞌomin kpeꞌeŋid ye ba yi aaruŋin la. 31 Ka Paul yel sogia kpeenm ne sogianam la ye, “Nimbama nwa yaꞌa pu zinꞌin aaruŋin la, ti wusa ku nyaŋe tilige.” 32 Ka sogianam la kensig nwiis bane lo aaruŋbil la ka kee li ka li keŋ.

33 Ka beog bood nier, ka Paul belimi ba wusa ye ba dim diib ka yel ye, “Zina dabisa piina anaasi nwa ka ya biꞌesid kuꞌum ne vum ka pu di siꞌela. 34 Dinzugo m belimi ya ne ye ya di diib ka nye paŋ; ka ya zuobug baa yinni ku bodige.” 35 On yel neꞌeŋa naae la, ka nok bodobodo n puꞌus Winaꞌam bareka ba wusa tuon ka koꞌog bodobodo la n di. 36 Ka ba wusa kpeꞌeŋi ba meŋ sunya n di diib la ba meŋ. 37 (Ti wusa daa ane nidib kobus yi ne piisyopoi ne ayuobu aaruŋ la poogin.) 38 Ban dii siak la ka nok line kpelim la lob kuꞌomin, ye aaruŋ la fak.

39 Ka beog nie ka bane tum aaruŋ la tuuma pu baŋ teŋ laa. Amaa ka ba nye zinꞌig kane a kukun ka gbanꞌe ye ba yaꞌa nyaŋ, ba na ke ka aaruŋ la kpaꞌ anina. 40 Ka ba lodig aaruŋ la kunt n bas ateukun ka lodig daad bane ket ka aaruŋ la keŋ ban bood zinꞌisiꞌa la, ka duꞌos fuug line be aaruŋ la tuon ye pebisug daꞌae aaruŋ la n keŋ tuon. 41 Ka aaruŋ la tuꞌos titanbiꞌisduur. Ka li tuon fir n guꞌuŋ ken. Ka kuꞌopila nweꞌedi li nyaꞌaŋ, ka li saꞌam.

42 Ka sogianam la gbanꞌe ye ba ku sarega nidib la wusa ka soꞌ da nyaŋe suaꞌ lub kuꞌom du gbeugo. 43 Amaa ka sogia kpeenm la bood ye o yiis Paul kumin ka zanꞌas, ka tis noor ye bane miꞌ lub la iankim yi aaruŋin la yiiga n lubu du gbeug, 44 ka bane kpelim la n doli gbanꞌe daad ne aaruŋ la dakoolima n lubu du. Ala ka ti wusa daa tiligi du gbeug.