1 Neꞌeŋa nyaꞌaŋ ka ti baŋ ye teŋ la yuꞌuri daa buon Malta. 2 Ka teŋ la nidib maali ti zuod bedego. Ka saa pinꞌili niid ka waad be ka ba nyuꞌe bugum n diꞌe ti ka ti uosid. 3 Ka Paul laꞌas dabobir n niŋid bugumin. Ka tuulug wum waaf. Ka o yi na gaꞌ Paul nuꞌug. 4 Ka teŋ la nidib nye waaf la gaꞌ o nuꞌug la ka yel ba taaba ye, “Biꞌesug kaeꞌ, oŋa ane niŋkuud. Yelsida ku ke ka o vuꞌugi, hale baa ne on nyaŋe yi kuꞌomin la na.” 5 Amaa ka Paul misig o nuꞌug ka waaf la lu bugumin ka pu niŋ o siꞌela. 6 Ka nidib la guꞌus ye ba na nye ka o niŋgbina mot bee o na kpelim lu teŋin n kpi. Amaa lin yuug ka ba pu nye ka siꞌel niŋ o la ka ba tiake ba potenda ye o ane baꞌar.

7 Ka zinꞌig kan ka ba be la ka poog kpiꞌe anina yamin n a teŋ la naꞌab poog. Ka naꞌab la yuꞌur buon Publius. Ka o diꞌe ti ne sumalisim. Ka ti be o yin a o saan daba atanꞌ. 8 Ka o saam benꞌed n digi ka o niŋ tul ka o saand. Ka Paul kpenꞌ o doogin n puꞌus Winaꞌam ka paꞌal o nuꞌus o ni ka o nye laafe. 9 Neꞌeŋa niŋ la ka teŋ la nidib bane a banꞌadnam wusa kena. Ka Paul sos Winaꞌam ka ba nye laafe. 10 Ka ba tisi ti piini bedego.

11 Ka nwadisa atanꞌ nyaꞌaŋ ka ti waꞌae ka kpenꞌ Alekizandria teŋ aaruŋin line daa be Malta teŋin sisiꞌetitaꞌar saŋa, ka aaruŋ la yuꞌur buon “Lieba.” Ka ba niŋ aaruŋ la poogin tiname bood siꞌel la. 12 Ka ti keŋ paae Sirakuse teŋin ka zinꞌini anina daba atanꞌ, 13 ka naami anina n keŋ paae Regium teŋin na. Ka beog nie ka sisiꞌem yi ti nyaꞌaŋ na n daꞌadi ti. Ka daba ayi daar ka ti paae Puteoli teŋin 14 n nye yadda niŋidib sieba anina. Ka ba sosi ti ka ti zinꞌi ne ba daba ayopoi, ka ken Room teŋin na. 15 Ka yadda niŋidib bane be Room teŋin la wumi ti yela la, ka yi na. Ka sieba paae zinꞌig kane buon Saam Dooda Atanꞌ teŋin na. Ka sieba paae zinꞌig kane buon Appius Daꞌan teŋin na n tuꞌosi ti. Ka Paul n nyee ba la ka puꞌus Winaꞌam ka o sunf kpeꞌeŋ.

16 Tiname kpenꞌ Room teŋin na la, ka sogia kpeenm ke ka Paul zinꞌini o konꞌ ka sogia gur o.

17 Ka daba atanꞌ nyaꞌaŋ ka Paul buol Jew dim kpeenmnam bane be teŋin la n laꞌas ka yeli ba ye, “M zuanama, hale laꞌam ne mam daa pu niŋ siꞌel beꞌede ti nidibin bee wada bane ka ti diꞌe ti yaanam saꞌan laa, ba daa gbanꞌe m Jerusalem ni n nok m n tis Room sogianam. 18 Ka ba buꞌos m buꞌosa ka bood ye ba bas m, ban daa pu nye ka m tum tuumbeꞌed siꞌa line nar ne kuꞌum la zug. 19 Amaa Jew dim zanꞌas. Ka man pu tunꞌe niŋ siꞌela ka sos noor sogia kpeenm saꞌan ye o tis m suer ka m keŋ Room naꞌatitaꞌar koto ni, hale ka kaꞌ ye m mor antuꞌa siꞌa ne m meŋ nidiba. 20 Dinzug ka m buoli ya ye m nyee ya n pianꞌ ne ya. Nid kan yela ka Israel dim mor tiꞌir la zug ka ba lo m ne bana.”

21 Ka ba yel o ye, “Ti pu diꞌe gbana Juuda teŋin ka li sob fu yelaa. Jew dim bane kenn kpela na la, ba soꞌ pu tisi ti fu labaar bee pianꞌa fu tuumbeꞌed yelaa. 22 Amaa ti bood ye ti wum fu saꞌan fun tenꞌes siꞌel puꞌusum kan ka fu dol la. Ti miꞌ ye zinꞌig wusa nidib pianꞌad puꞌusum la pianꞌabeꞌed.”

23 Ka ba ziꞌel dabisir ne Paul. Ka li daar paae la ka nidib bedego laꞌas Paul zinꞌigin na. Ka Paul tuꞌasidi bigisidi ba Winaꞌam naꞌam yela, yi beogin ti maꞌae zaam. Ka o kpeꞌeŋidi nyaŋe paꞌani ba Yesu yela Moses wada gbauŋin ne Winaꞌam nodiꞌesidib gbana ni. 24 Ka o pianꞌad la nyaŋe ke ka sieba siak ka sieba pu siake. 25 Ka Paul naan pianꞌa pianꞌuk yinni ye, “Winaꞌam Siig Suŋ daa mor yelsida ka yel n tisi ya yaanam Winaꞌam nodiꞌes Azaya pianꞌad poogin ye,

28 “Dinzugo, baŋimi neꞌeŋa ye Winaꞌam tum labaar line a faangir n tis bane kaꞌ Jew dim la. Bama na kelis.” 29 Ka nidib la kaꞌ noor yinni ka widig.

30 Ka Paul zinꞌin yir kan ka o yood li yela la ni yuma ayi, ka diꞌesid ban wusa kene o saꞌan na, 31 ka paꞌani ba Winaꞌam naꞌam yela ne Zugsob Yesu Kiristo yela, ka pianꞌad ne sukpiꞌeuŋ ka soꞌ pu giŋid oo.