1 Mam, Paul one ka Winaꞌam gaŋ ka m a Yesu Kiristo Tumtum, ne ti baꞌabiig Timoti 2 n sobid gbauŋ kaŋa tisid yanam bane a Winaꞌam nidib, ka a yinni ne Kiristo ka be Kolose teŋin ka a ti baꞌabiis bane a yadda dim la.

Ti Baꞌ Winaꞌam na tisi ya yelsum ne sumalisim.

3 Tinam yiti puꞌusid Winaꞌam one aa ti Zugsob Yesu Kiristo Baꞌ la tisidi ya saŋa mekama. 4 Ti puꞌusid o bareka tiname wum ye ya niŋid Yesu Kiristo yadda ka noŋ Winaꞌam nidib wusa la, 5 yaname mor tiꞌir ne line ka Winaꞌam digil arazana ni n guri ya la zug. Ya pun deŋim wum tiꞌir la yela sida pianꞌadin line a Winaꞌam labasuŋ la, 6 ka ba mooli tisi ya la. Ka zinꞌis bedego ka nidib bedego siak Winaꞌam labasuŋ la, ka ba kal peꞌesid. Ala men ka li me niŋidi ya saꞌan saŋa kan ka ya wum Winaꞌam popielim yela ka sid baŋi li n ti paae nannanna la. 7 Ya zamis neꞌeŋa Epafras saꞌan one aa ti tumtum tiraan Yesu Kiristo ni, ka lem a Kiristo tumtum yelmeŋir ka ziꞌe ti noba zug ya yela la. 8 O yeli ti yanam mor noŋilim Winaꞌam Siig Suŋ ni siꞌem la.

9 Dinzug ka ti pu basi ka kpelim sosid Winaꞌam tisidi ya, saŋa kan ka ti wum ya labaar la n ti paae nannanna, ka sosid Winaꞌam ye ya baŋ o potenꞌer bood siꞌem suꞌuŋa, ne yaꞌamsuŋ ne baŋir line ka Winaꞌam Siig la tisid. 10 Ti sosid ye ya tuuma n nar Zugsob la, ka li maꞌae o suunr bedego, ka ya tum tuumsuŋ wusa, ka ya Winaꞌam yela baŋir peꞌes. 11 Ka Winaꞌam paŋ titaꞌar la zug ka ya na mor paŋ bedego men, ye ya tunꞌe modig suꞌuŋa ne sumalisim 12 ka na puꞌusidi ti Baꞌ Winaꞌam bareka. On maali ya ka ya nar ye yanam laꞌam ne ya Winaꞌam nidib taaba n diꞌe line a ya din ka be Winaꞌam soꞌolim line a nyain la ni. 13 Winaꞌam faann ti Sutaana soꞌolimin line a likine n taꞌasi ti o Binoŋir soꞌolimin. 14 On zug ka ti nye yolisim ka Winaꞌam yiisi ti tuumbeꞌedi bas la.

15 Winaꞌam one ka ba pu nyet la a siꞌem la Yesu me sid ane ala. O ane bun kane maal wusa la kpeenm. 16 Ka li yine o saꞌan na ka Winaꞌam maali li wusa, bun bane be dunia ni bee saazug, bee bun nyeta, bee bane pu nyetaa, bee bane mor naꞌam bee soꞌolim, bee paŋ, bee kpiꞌeuŋ la. Ka bun wusa maalug yine o saꞌan ka ane o meŋ yela. 17 O pun deŋim be ka siꞌel siꞌel nam kaeꞌ, ka o paŋ ket ka li wusa a gumm. 18 One a Winaꞌam nidib kpeenm wuu zugu a yiiga siꞌem niŋgbiŋin la, ka lem a yiiga sob bane vuꞌug kumin la, ye o a siꞌel wusa kpeenm. 19 Ka li malis Winaꞌam ye on a siꞌem la wusa Yesu me ane ala. 20 Li yine o saꞌan ka Winaꞌam zaŋ o ziim kane yi kuꞌum dapuudir zug la naal noor ne bun line be saazug ne dunia ni wusa.

21 Saŋsiꞌen la ya daa ane biꞌemnam ne Winaꞌam, ka mor potenꞌebeꞌed ne tuumbeꞌed. 22 Amaa Yesu Kiristo kuꞌum la yela o naal noor ne yanam, ka na ziꞌel ya nyain Winaꞌam tuon ka ya ku lem mor gbaꞌar bee taale. 23 Ala zug ya yaꞌa kpelim mor ya yadda la kiŋ kiŋ wuu eenb suŋ ne, ka pu bas tiꞌir line ka ya wum labasuŋin laa, li na niŋi ala. Nwa ane labasuŋ kane ka ba daa mool tis soꞌ wusa one be dunia ni. Labaar kan la ka mam Paul liebi li tumtum la.

24 Li malis man Paul ne mane namisidi ya yela la. Namisug kan ka m namisid la ye li niŋne paae li ben wenne Kiristo n daa yel ye m na namis la. Ka li ane o niŋgbiŋ line a o nidib la yela ka m namisid. 25 Ka ya yela ka Winaꞌam gaŋi m ye m liebi o nidib la suŋid ka mooni o labaar la suꞌuŋa. 26 Labaar la da ane yelsuaꞌadir saŋa kane gaad la wusa, amaa nannanna li yuꞌun nie tis o nidib. 27 Ka Winaꞌam gbanꞌe ye o ke ka o nidib baŋ ye yelsuaꞌadir la ane yelsum titaꞌar n me tis buudi wusa. Yelsuaꞌadir la ane ye Kiristo a yinni ne ya ka tisi ya tiꞌir ka ya na be ne Winaꞌam.

28 Ti moon Kiristo yela, ka saꞌan soꞌ mekama, ka paꞌani ya ne yaꞌamsuŋ ye ya biꞌ Kiristo ni ka ti zaŋi ya n paꞌal Winaꞌam. 29 Linzug ka m kpeꞌeŋi m meŋ n mo hale ne paŋ titaꞌar line ka Kiristo tisi m la.