1 Ka m bood ye ya baŋ mam kpeꞌeŋi m meŋ siꞌem wusa, ya yela ne bane be Laodisea ne bane pu nyee m ne nif nan la, 2 ye ya laꞌam taaba ne noŋir n kpeꞌeŋi ya sunya, ka baŋ Winaꞌam yelsuaꞌadir line a Kiristo la nyain nyain ka pu biꞌesidi li yela baa biꞌelaa. 3 Ka Kiristo saꞌan ka baŋir ne miꞌilim wusa wusa be. 4 M yeli ya nwa ne ka soꞌ da maꞌa ya ne yaꞌam gonluŋo, 5 ka m baꞌa be ne ya, hale baa man kaꞌa ya saꞌan la, ka m sunf malis ne ya suer la dolim ne yaname siak Kiristo kiŋ kiŋ la.

6 Dinzugo yaname sadigim siak ye Yesu Kiristo a Zugsob la, bei ne o ne noor yinni, 7 ka gbanꞌe o wenne tiig nyaꞌa gbanꞌ teŋ kiŋ kiŋ siꞌem la, ka ya yadda niŋir nobug, ka ke ka ya beilim Yesu ni a wuu tiname paꞌali ya siꞌem la, ka tisidi Winaꞌam bareka puꞌusum bedego.

8 Guꞌusimi, ka soꞌ da panꞌasi ya ne paꞌalug line wen wuu yaꞌam paꞌalugo, ka a damaꞌa zaal, ka a paꞌalkuda ne saalib yiiga paꞌala, ka pu yi Kiristo ni na laa.

9 Ka Winaꞌam a siꞌem wusa la, Kiristo me da ane ala o niŋgbiŋin. 10 Ka yaname a yinni ne o la zug ka ya nye nyovur bedego. Kiristo ane kpeenm ka soꞌe line wusa mor paŋ ne kpiꞌeuŋ. 11 Yanam a Winaꞌam nidib n a yinni ne Kiristo la, ka zanbin line paꞌal ye ya a o nidib la, kaꞌane baŋo kpenꞌesug niŋgbiŋinee, ka ane ye Kiristo yiisi ya potenꞌebeꞌed ya ni. 12 Yaname daa diꞌe kuꞌom suub la, li nwaasne wuu ba laꞌam mumi ya ne Kiristo. Ka yaname niŋ Winaꞌam yadda on vuꞌug Kiristo kumin siꞌem la, li me nwaasne wuu ya laꞌam vuꞌugi ne o.

13 Ya tuumbeꞌed ne ya saalib boodim line pu dol suer la da ke ka ya ziꞌ Winaꞌam ka wenne bane kpine. Ka Winaꞌam ke ka ya laꞌam vuꞌug ne o. O da yiisi ti tuumbeꞌed wusa bas. 14 Yesu yiis wada kan daa sob, ka li kati ti saria la, ka li moŋidi ti buod la, n zaŋi li kpaꞌa tabil o dapuudir la zug. 15 Kiristo kuꞌum dapuudir la yela ke ka o saꞌam siisbeꞌednam bane mor paŋ ne kpiꞌeuŋ wusa ka diisi ba nyan paalo ni, on nyaŋe ba la zug.

16 Dinzug, da ke ka soꞌ yel ye ya niŋimi anwa ne anwaa, diib sieba yela bee nuub yela bee yuum yuum malima bee nwadipaalis malima bee daba ayopoi vuꞌusum daar yela. 17 Bama nwa da nwaasne line na ti kena la, ka li ameŋa a Kiristo. 18 Da ke ka one maꞌa ye o kpiꞌem gat uf panꞌas uf ka maꞌa ye Winaꞌam nie siꞌel paꞌal on ne, ka nyidigid n maꞌadi siedi o meŋ ka puꞌusid maleknama. Ninkaŋa duꞌosidi o meŋ ka li gbin kaeꞌ, bozugo li ane ninsaalib tenꞌesug ka o dol, 19 ka pu dol Kiristo yela. Kiristo wenne zugne, ka ket ka yadda niŋidib wusa a gumm ka nobugid wuu Winaꞌam bood siꞌem, wuu niŋgbiŋ duta ne giinla ke ka niŋgbiŋ a gumm ka mor paŋ siꞌem la.

20 Yaname sadigim wen wuu ya laꞌam kpine ne Kiristo ka bas saalib yiiga paꞌala la, da niŋidi wuu ya beilim kudug la ka siak wada bama buudi bane ye, 21 “Da di neꞌenam, bee da lemi li, bee da siꞌisi li laa.” 22 Ban yela ka lin ka ba dit la mor kpienr poogin la. Li ane saalib maꞌaa wada tisib ne paꞌalug. 23 Ka wadkaŋa tuꞌasne wuu yaꞌam paꞌalug ka ket ka namisug puꞌusug ne meŋsier ne niŋgbiŋ namisug nobugid, amaa ka kaꞌ paŋ ye li kad ninsaal boodim yaꞌamleogo.