1 Yaname laꞌam sadigim vuꞌug kumin ne Kiristo la, more boodim ne bun line be arazana ni, zinꞌikan ka o zinꞌi Winaꞌam datiuŋ la. 2 Keli ka ya potenꞌer gbanꞌe ne bun line be arazana ni, ka kaꞌane bun line be dunia nii; 3 ka ya kpiya ka mor nyovur paal, ka Kiristo guri li Winaꞌam saꞌan. 4 Ka Kiristo one a ti nyovur la yaꞌa nie ya na laꞌam nie ne o, n be o naꞌamin.

5 Basimi ya niŋgbiŋ boodim line a poꞌasaꞌuŋ bee dianꞌad tuuma bee yaꞌamleog galisug bee potenꞌebeꞌed bee fufum, ka fufum a beꞌed wenne baꞌamaanib ne. 6 Tuum ban yela ka Winaꞌam supeen ken bane zanꞌasidi o noor la ni na. 7 Ya da niŋidi ala men yaname da laꞌam be ne ba la. 8 Amaa nannanna, basimi supeen, ne endug, ne potenꞌebeꞌed, ne yuꞌusaꞌuŋ, ne pianꞌayaalis wusa. 9 Da maꞌadi tisidi taaba yaname basi ya beilim kudug tuuma la, 10 ka tiak beilim paal line ka Winaꞌam kpelim maani li saŋa mekama, ka ti wenne o meŋ ka baŋi o yela n paasid suꞌuŋa. 11 Beilim paalin la, li baꞌa kaeꞌ ye oŋa a Greek nid, bee Jew nid, bee o kpenꞌ baŋo, bee o pu kpenꞌe, bee o a saan bee o yi moogin na, bee o a yamug bee o kaꞌ yamuga, amaa Kiristo maꞌaa gaad siꞌel wusa ka be o nidib wusa ni.

12 Yaname a bane ka Winaꞌam gaŋ ye ya a o nidib bane ka o noŋ la, more nimbaanlzoor, ka suŋidi nidib, ka siedi ya meŋ, ka a potenꞌesuŋ dim, ka a suguru dim 13 ne bane gbanꞌadi ba meŋ ka ket taaba tuumbeꞌedi basid wuu Zugsob la yiisi ya tuumbeꞌedi bas siꞌem la, niŋimini ala men. 14 Ka line gaad li wusa ane ye ya mor noŋilim ka line laꞌased siꞌel wusa ka li a gumm.

15 Keli ka Kiristo sumalisim la soꞌe ya sunya ka li ane sumaliskan yela ka Winaꞌam buoli ya, ka ya a niŋgbiŋ yinni. More Winaꞌam bareka puꞌusug. 16 More Kiristo labaar la suꞌuŋa ya sunya ni, n zamisid ka saꞌan taaba ne yaꞌamsuŋ ka yuum yuuma line be Winaꞌam gbauŋin la, ne Winaꞌam nidib yuuma ne yuumbane ka Winaꞌam Siig Suŋ tisi ya la, ka kpelim mor Winaꞌam bareka puꞌusug ya sunya ni. 17 Line mekama ka ya niŋid, li ane tuuma bee pianꞌade, niŋimi li Zugsob Yesu Kiristo yuꞌurin, ka puꞌusidi ti Baꞌ Winaꞌam bareka ne Yesu Kiristo yuꞌur zug.

18 Poꞌaba, siakimi ya sidib noya, ka li nar ka poꞌab bane dol Zugsob la niŋidi ala.

19 Sidiba, noŋimi ya poꞌab, ka da toe ne baa.

20 Biise, siakimi ya saamnam ne ya manam noya wusa ka line malis Zugsob la.

21 Duꞌadiba, da sanꞌasi ya biis galise, ka ba na sinꞌig.

22 Yamise, siakimi ya zugsobnam noya wusa ka da tummi ban na be ne ya maꞌanee, ka ba tenꞌes ye ya ane tuumsuma dima, amaa ka lee tumi li ne poog yinni, Zugsob la naꞌasi yela. 23 Lin wusa ka ya tumid, tumi li ne poog yinni wen wuu ya tumne tisid Zugsob la, ka kaꞌ nidiba. 24 Ya miꞌ ye Zugsob la na tisi ya nyood lin ka o da yeli ziꞌel ye o na tis o nidib la. Li ane Kiristo one a Zugsob la ka ya tumi tisid. 25 Tuumbeꞌed sob la na diꞌe o tuumbeꞌed la yood bozugo Winaꞌam pu mor baragaŋa.