1 Ka neꞌeŋa nwa nyaꞌaŋ la ka Yesu giligid Galilee teŋin ka pu bood ye o giligid Juuda teŋinee, Jew dimi bood ye ba kuu o la zug. 2 Ka Jew dim diꞌemkan ka ba maan suga n gbeend la, da liꞌelne. 3 Ka Yesu pitib yel o ye, “Toomim kpela ka keŋ Juuda teŋin ka fu nyaꞌandolib la nye fu tuuma ban ka fu niŋid la. 4 Ka soꞌ yaꞌa bood ye nidib baŋ o bedego o pu suaꞌadi tumi o tuumaa. Fu yaꞌa tum tuumbama kel ka nidib bedego baŋ.” 5 O pitib la pu niŋ o yadda, linzug ka ba yel o ala.

6 Ka Yesu yeli ba ye, “Mam saŋa nam pu paae, amaa saŋa mekama yanam mor yaꞌa. 7 Dunia dim ku nyaŋe kisi yaa, ka lee kisi m, man paꞌan ye ba tuuma a beꞌed la zug. 8 Yanam kem diꞌema la. M nan ku keŋ diꞌem kaŋaa; ka m saŋa nan pu paae.” 9 On yel wala la ka kpelim Galilee teŋin.

10 Ka o pitib n gaadi naae la ka o me yuolim keŋ, ka pu neeli o meŋa. 11 Ka Jew dim ied o diꞌema la ni ka buꞌosid ye, “O be yaani?”

12 Ka nidib la bedego nyaꞌam, ka sieba ye, “O ane ninsuŋ.”

Ka sieba ye, “Ayei, o paꞌan nidib la line a suebeꞌed.” 13 Ka ban zot Jew dim la zug ka soꞌ pu nyaŋe pianꞌa neele.

14 Ka diꞌema la ti paae pusuk ka Yesu du kpenꞌ Winaꞌam puꞌusum yir n paꞌan nidib. 15 Ka li lidig Jew dim la ka ba yet ye, “Dau kaŋa niŋ wala mor baŋir ka lee pu zamise?”

16 Ka Yesu lebisi ba ye, “M paꞌalug la kaꞌ m meŋ dinne, amaa li ane one tumi m la na din. 17 One bood ye o tum Winaꞌam boodim, o na baŋ ye m paꞌalug la yi ne Winaꞌam saꞌan na, bee m paꞌan ne, ne m meŋ paŋ. 18 One pianꞌad ne o meŋ paŋ la boodne o meŋ yuꞌur. Amaa one bood ye one tum o la na diꞌe yuꞌur la, ane sida sob ka pu mor zirii. 19 Ya pu diꞌe wada Moses saꞌanee? Ka laꞌam ne wala ya soꞌ pu doli li suere. Bo ka ya ied sueya ye ya kuu ma?”

20 Ka nidib la lebis o ye, “Kikirig n dol uf. Anoꞌonami bood ye ba kuu fo?”

21 Ka Yesu lebisi ba ye, “M daa tum tuumnyaluŋ yinni ka li lidigi ya. 22 Moses da yel ye, ya kpenꞌem baŋo, (amaa li da kaꞌane Moses n da pinꞌili lii, ka lee da yi ne ya yaanamin na.) Amaa ya kpenꞌesid biribis baŋo vuꞌusum daar. 23 Ka ya yaꞌa kpenꞌesid biribiŋ baŋo vuꞌusum daar ka li pu saꞌam Moses wada la, bo ka ya sunya pelig ne m, mam daa tiꞌeb dau la vuꞌusum daar la? 24 Mit ka ya gelig ka zerig nid ne nini gosigo, amaa geligim ne line a yelsida.”

25 Dinzug ka Jerusalem ninsieba buꞌos ye, “Li kaꞌane dau kaŋa ka ba bood ye ba ku laa? 26 Ka gosimi ya, o pianꞌadne paalo ni ka ba pu niŋ o siꞌela. Kpeenmnam sid siak ye o ane Kiristo on ka Winaꞌam gaŋ la bee? 27 Amaa ti miꞌ dau kaŋa n yi siꞌel na, ka Kiristo la yaꞌa ti nie soꞌ ku baŋ on yi siꞌel naa.”

28 Linzug Yesu n daa be puꞌusum yir n paꞌan nidib la, o pianꞌ ne kukortitaꞌar ye, “Ya miꞌ maa? Ka ya miꞌ mam yi siꞌel naa? Li kaꞌane m tuꞌer ka m kenaa. Amaa one tum man na la a sida sob, ka ya ziꞌ oo. 29 Ka mam lee miꞌ o, bozugo one tum man, ka o saꞌan ka m yi na.”

30 Dinzug ka ba ied suer ye ba gbanꞌ o, ka soꞌ pu siꞌis oo, bozugo o saŋa daa nan pu paae. 31 Ka laꞌam ne wala nidib la titaꞌam da niŋ o yadda, ka ye, “Kiristo la yaꞌa ti kena o na tum tuumnyalima gaad dau kaŋa tum siꞌel laa?”

32 Ka Farisee dim wum nidib la nyaꞌam Yesu yela, ka ban ne Winaꞌam maalmaan kpeenmnam tum nidib ye ba gbanꞌe Yesu.

33 Ka Yesu yel ye, “M na be ne ya yuug biꞌela ka lem leb one tum man na la saꞌan. 34 Ya na ti iedi m ka ku nye ma, ka mam na be zinꞌisiꞌa la ya ku nyaŋe kenn aninaa.”

35 Ka Jew dim yel taaba ye, “Dau kaŋa gbanꞌe ye o keŋ yaa ni ka ti ku nye oo? O gbanꞌe ne ye o keŋ Greek dim teensin, zinꞌi kan ka Jew dim be la, ye o paꞌal Greek dima? 36 Ka on yel ye, ti na ti iedi o ka ku nyee o, ka ye, on be zinꞌisiꞌa la ti ku nyaŋe kena la, li gbin a bo?”

37 Ka diꞌema la naar dabisir line a dabistitaꞌar la, ka Yesu due ziꞌe ka pianꞌad ne kukortitaꞌar ye, “Kuꞌonuud yaꞌa mor soꞌ, o kemi m saꞌan na nu. 38 Li dolne Winaꞌam gbauŋ n sobi siilim siꞌem la ye, ‘One niŋi m yadda wenne kuꞌobulum line tisid nyovur.’ ” 39 O yel neꞌeŋa ka li gbin paꞌalne Winaꞌam Siig Suŋ la yela, ka bane niŋ o yadda la na ti diꞌe li. Bozugo saŋkan la Winaꞌam da nam pu tisi ba o Siig Suŋ laa, ka Yesu da nan pu nye zunꞌore.

40 Ka ban wum pianꞌakan la, nidib la sieba yel ye, “Oŋa sid a Winaꞌam nodiꞌes la.”

41 Ka sieba ye, “Oŋa a Kiristo la.”

Amaa ka sieba buꞌos ye, “Kiristo la yi ne Galilee na bee? 42 Winaꞌam gbauŋ yel ne ye Kiristo la yi ne David gbinin na ka yi ne Betilehem teŋkan ka David da be la. Li kaꞌ alaa?” 43 Ka bakir be nidibin la o yela. 44 Ka sieba bood ye ba gbanꞌ o amaa soꞌ pu siꞌis oo.

45 Ka nimbane keŋ ye ba gbanꞌ o la leb maalmaan kpeenmnam ne Farisee dim la saꞌan ka ba buꞌos ye, “Bo ka ya pu gbanꞌe o na?”

46 Ka ba lebis ye, “Soꞌ nan ziꞌ pianꞌ wenne dau kaŋaa.”

47 Ka Farisee dim la buꞌosi ba ye, “Ka yanam me yidigi n dol suebeꞌed la ne bee?” 48 Ka kpeenmnam la bee Farisee dim la sieba pu niŋ o yaddaa. 49 Nidib bedego bane ziꞌ wada la, yelbeꞌed doli ba.

50 Ka Nikodemus one daa deŋim keŋ Yesu saꞌan la ka aa ba nid yinni buꞌosi ba ye, 51 “Ti yaꞌa pu wum soꞌ antuꞌa ka baŋ on tum siꞌela, ti kat o saria bee?”

52 Ka ba lebis o ye, “Fu yi ne Galilee na menee? Iem Winaꞌam gbana ni ka fu na baŋ ye nodiꞌes kulim ku yi Galilee naa.”