1 Ka ba wusa widigi kul ka Yesu keŋ Olives zuerin. 2 Ka bekeeung ka o leb Winaꞌam puꞌusum yin la yaꞌas ka nidib la wusa keŋi o saꞌan na ka o zinꞌi paꞌani ba. 3 Ka gbauŋmiꞌidib ne Farisee dim mor poꞌa na on ka ba kuk ka o saꞌam dau, ka ziꞌel o nidib la soogin, 4 ka yel Yesu ye, “Paꞌana, ti kuk poꞌa kaŋa ne dau. 5 Ka Moses wada la da ziꞌel ye, ti lob nimbamanam taaba ne kuga n ku. Ka fun ye wala?” 6 Ba yeli ala ye ba kpans o gos, ka nye yela bul o.

Ka Yesu sunne noki o nuꞌubili sobid teŋin. 7 Ka ban kpelim buꞌosid o la, ka o gorigi yeli ba ye, “One nan pu tum tuumbeꞌed ya soogin nokim kugir lobug o yiiga.” 8 Ka lem sun yaꞌase noki o nuꞌubili sobid teŋin.

9 Ka ban wumi ala la ka ba yi yinni yinni lin pinꞌil ne bunkuda la ni ka nyaꞌal poꞌa la gullim ka o ziꞌe Yesu tuon. 10 Ka Yesu gorigi buꞌos poꞌa la ye, “Bane mor uf la na be yaani? Soꞌ pu koosi fu yela la beꞌedee?”

11 Ka poꞌa la lebis o ye, “M Zugsoba, ayei.”

Ka Yesu yel o ye, “Mam me ku koosi fu yela beꞌede. Kem ka da lem tum tuumbeꞌed yaꞌase.”

12 Ka Yesu lem yel nidib la ye, “Mane a dunia neesim la. One doli m ku ken likin ne, amaa o na bene nyovur line a neesim la ni.”

13 Ka Farisee dim yel o ye, “Fu pianꞌadne fu meŋ yela. Fu pianꞌad la kaꞌ sidaa.”

14 Ka Yesu lebisi ba ye, “Hale baa m yaꞌa pianꞌadi m meŋ yela m pianꞌad la a sida; ka m miꞌ mam yi siꞌel na ne mam ken siꞌel, amaa ya ziꞌ mam yi siꞌel na ne mam ken siꞌela. 15 Ya geligid soꞌ tuuma ne ninsaal yaꞌam. Mam pu geligid soꞌ yelaa. 16 Amaa m yaꞌa gelig soꞌ yela, m geligir la a sida; ka li kaꞌane mam maꞌanee amaa mam ne one tum m la na n geligid. 17 Ya wada la ni li sob ye, nidib ayi kaset diib a ameŋa. 18 Mam dit kaset n tisidi m meŋ, ka m Baꞌ one tum man na la me dit kaset n tisidi m.”

19 Ka ba buꞌos o ye, “Fu Baꞌ be yaani?”

Ka Yesu lebisi ba ye, “Ya ziꞌ man ne m Baꞌ la wusaa. Ya yaꞌa baŋin man, ya naan baŋin m Baꞌ la men.” 20 O pianꞌ neꞌenam ne one daa paꞌan nidib la Winaꞌam puꞌusum yin ka li kpiꞌe ligid laꞌasug zinꞌigin la. Ka soꞌ pu gbanꞌe oo, o saŋa nan pu paae la zug.

21 Ka o yeli ba yaꞌas ye, “M na yi ya saꞌan, ka ya na ie man, amaa ya ku nye ma. Ya na kpi ya tuumbeꞌed la ni. Man ken siꞌel la ya ku nyaŋe keenn aninaa.”

22 Ka Jew dim yel ye, “O ye o ku ne o meŋ bee? On sadigim yel ye, on ken siꞌel la, ti ku nyaŋe keŋ la.”

23 Ka Yesu yeli ba ye, “Yanam yi ne teŋin na, ka man yii agol na. Ya ane dunia nwa nidib, ka mam kaꞌa dunia nwa nida. 24 Linzug ka m yeli ya ye, ya na kpi ne ya tuumbeꞌed la, ka ya yaꞌa pu niŋ yadda ne mane yel ye m a soꞌ laa, ya sid na kpi ne ya tuumbeꞌed la.”

25 Ka ba buꞌos o ye, “Fu aa anoꞌone?”

Ka o lebisi ba ye, “M ane on ka m yeli ya pinꞌilugin sa la. 26 M mor yela bedego line ka m na pianꞌ ka kadi ya saria. One tum man la a sida sob ka line ka m wum o saꞌan la, lin ka m mooni n tisid dunia dim.”

27 Ka ba pu baŋ on pianꞌ siꞌel la ane o Baꞌ Winaꞌam yela. 28 Dinzug ka Yesu yel ye, “Ya yaꞌa uk mam one a Ninsaal Biig la agol ya na baŋ man yel ye m a soꞌ la. Ka lem baŋ ye m pu tum siꞌel ne m meŋ paŋa, amaa m pianꞌad neꞌeŋa wuu m Baꞌ Winaꞌam n paꞌali m siꞌem la. 29 Ka one tum man la be ne man ka pu basi ma, bozugo m maan line maꞌedi o suunr daar wusa.” 30 Ka on pianꞌ neꞌeŋa la, ka nidib bedego niŋ o yadda.

31 Ka Yesu yel Jew dim bane niŋ o yadda la ye, “Ya yaꞌa kpelim mor m pianꞌad la, ya na ane m nyaꞌandolib ameŋa. 32 Ka ya na baŋ yelmeŋir la. Ka yelmeŋir la na tisi ya yolisim.”

33 Ka ba lebis n yel o ye, “Tinam ane Abraham yaas, ti kaꞌ nid soꞌ yamise. Ka wala ka fu yel ye, ti na nye yolisim?”

34 Ka Yesu lebisi ba ye, “Ameŋa ka m yeti ya ye, niŋkan wusa tum tuumbeꞌed la ane tuumbeꞌed yamug. 35 Yamug ku zinꞌi yin saŋa wusa, amaa yisob biribiŋ la zinꞌine yin la saŋa wusa. 36 Dinzugo yisob biribiŋ la yaꞌa tisi ya yolisim, ya mor yolisim ameŋa. 37 M miꞌ ye ya ane Abraham yaas. Amaa ya boodne man ye ya ku, bozugo m pianꞌad la pu kpenꞌedi ya sunya nii. 38 Man nye siꞌel m Baꞌ saꞌan la, lin ka m tuꞌasid. Ka yanam me niŋidne bun lin ka ya wum ya baꞌ saꞌan la.”

39 Ka ba lebis n yel o ye, “Abraham ane ti yaab.”

Ka Yesu lebis n yeli ba ye, “Ya yaꞌa aan Abraham yaas, ya naan tumin Abraham tuuma la. 40 Amaa ya boodne man ye ya ku, man one tuꞌasi ya yelmeŋir kan ka m wum Winaꞌam saꞌan la. Abraham da pu niŋ alaa. 41 Ya tumne ya baꞌ la tuuma.”

Ka ba yel o ye, “Ti kaꞌ poꞌagoonda biise. Ti mor Baꞌ yinni one a Winaꞌam.”

42 Ka Yesu lebis n yeli ba ye, “Winaꞌam yaꞌa aane ya Baꞌ, ya naan noŋin man, bozugo m yine Winaꞌam ni n kena. M pu kene m tuꞌer naa, amaa o tumi m ne na. 43 Bo niŋ ka ya pu baŋ man yet siꞌel la gbin ne? Li ane ye yanam ku tunꞌe n siak m pianꞌad la zug. 44 Ya baꞌ ane Sutaana. Ka ya tumne ya baꞌ boodim n a siꞌem la. O daa pun ane ninkuud hale pinꞌilugin sa. O ziꞌ yelmeŋire, bozugo yelmeŋir kaꞌ o saꞌane. O yaꞌa maꞌad ziri la, o pianꞌadne wenne o meŋ n a siꞌem la, bozugo o ane ziri sob ne ziri wusa baꞌ. 45 Amaa mane tuꞌasidi ya yelmeŋir la, ya pu siaki. 46 Anoꞌone na tunꞌe n paꞌal ye m tum tuumbeꞌede. Man yaꞌa tuꞌasid ameŋa, wala ka ya pu siake ma? 47 One a Winaꞌam nid la kelisidne Winaꞌam pianꞌad. Yanam kaꞌ Winaꞌam nidib la zug, ka ya pu wumma.”

48 Ka Jew dim la lebis n yel o ye, “Tinam n yel ye, fu ane Samaritan nid la, ka kikirig dol uf la, ti maꞌanee?”

49 Ka Yesu lebisi ba ye, “Kikirig pu doli ma, amaa m duꞌosidne m Baꞌ yuꞌur suꞌuŋa, ka yanam poꞌogid man. 50 Man meŋ pu ied m meŋ yuꞌur duꞌosugo. Soꞌ be one iedi o meŋ yuꞌur, one a saria kat la. 51 Ameŋa ka m yeti ya ye, nid kane siakim noor la, ku nye kuꞌum baa biꞌelaa.”

52 Ka Jew dim yel o ye, “Nannanna ti baŋi ya ye kikirig dol uf. Abraham ne Winaꞌam nodiꞌesidib la kpiya. Ka fu yet ye, nid kane siaki fu noor la, ku kpii baa biꞌela. 53 Fu gaad ti yaab Abraham one kpi laa? Bee fu gaad Winaꞌam nodiꞌesidib bane kpi laa? Fu tenꞌesid ye fu ane anoꞌone?”

54 Ka Yesu lebis n yeli ba ye, “Man yaꞌa duꞌosidi m yuꞌur la, li ane zaalim. Man Baꞌ la a one duꞌos m yuꞌur, on ka ya yel ye, one a ya Winaꞌam la. 55 Amaa yanam ziꞌ on a soꞌo. Ka man miꞌ on a soꞌ. Man yaꞌa yelin ye, m ziꞌ on a soꞌ, m naani aan ziri sob wen wuu yanam ne. Amaa m miꞌ on a soꞌ, ka siak o noor la. 56 Ya baꞌ Abraham da mor tiꞌir ye o na ti nye man saŋa nwa. Ka o nye ka mor sumalisim.”

57 Dinzug ka Jew dim la yel Yesu ye, “Fu nan pu paae yuum piisnu, ka niŋ wala nye Abraham?”

58 Ka Yesu yeli ba ye, “Ameŋa ka m yeti ya ye, Abraham da nan kaeꞌ saŋsiꞌa la, ka man pun be.” 59 Alazug ka ba zaŋ kuga ye ba lob o. Ka Yesu suaꞌ o meŋ, ka yi Winaꞌam puꞌusum yin la.