1 Ka dau daa be Betani teŋin. Ka o yuꞌur buon Lazarus. Ka o kaꞌ laafe. Teŋ kan ni ka Meeri ne o bier Marta be la. 2 Li ane Meeri one daa kpaꞌe kpasoondim n walig Yesu ka eens o noba ne o zuobid la, on taunn n a Lazarus one n kaꞌ laafe la. 3 Dinzug o tanp la daa tum n yel Yesu ye, “Zugsoba, fu zuanoŋir la kaꞌ laafe.”

4 Ka Yesu n wumi li la, ka o yel ye, “Banꞌakan ku kuu o. Amaa li ane ye Winaꞌam yuꞌur na du bedego. Ka lin zug ka Winaꞌam Biig la yuꞌur me na du.”

5 Ka Yesu noŋ Marta ne o pitu la ne Lazarus suꞌuŋa. 6 Ka on wum ye Lazarus kaꞌ laafe la, o kpelim on daa be zinꞌisiꞌa la daba yi.

7 Ka lin nyaꞌaŋ la ka o yel o nyaꞌandolib la ye, “Keli ka ti keŋ Juuda yaꞌas.”

8 Ka o nyaꞌandolib la yel o ye, “Paꞌana, Jew dim daa bood uf ye ba lob ne kuga n kuu uf. Ka wala ka fu yel ye, fun na lem n keŋ anina yaꞌase?”

9 Ka Yesu lebis n buꞌosi ba ye, “Li kaꞌ daar yinni a nintaŋ tansib ne zaam maꞌare? Nid yaꞌa ken nintaŋ win o ku tuꞌuge, bozugo dunia neesim be. 10 Amaa nid yaꞌa ken yuꞌuŋ o tuꞌugidne, bozugo neesim kaeꞌ.”

11 Ka on yeli ba nwa n naae la, o yeli ba ye, “Ti zua Lazarus gbisidne. Amaa m na keŋ n nie o gbeenmin la.”

12 Ka o nyaꞌandolib la yel o ye, “Zugsoba, o yaꞌa gbisidne, o na nye laafe.” 13 Amaa Yesu yeti ba ne Lazarus kuꞌum yela. Ka ba tenꞌesid ye o yeti ba ne o gbeenm yela.

14 Ka Yesu yeli ba nyain ye, “Lazarus kpi ne. 15 Man daa kaꞌ o saꞌan la yela, ke ka m mor sumalisim, yanam zug, bozugo ya na niŋ m yadda. Amaa keli ka ti keŋ o saꞌan.”

16 Ka Tomas, one a liiba la yinni, yel o nyaꞌandoltaab ye, “Keli ka ti laꞌam keŋ ne o. Ka li yaꞌa a kuꞌum, tinam laꞌam n kpi ne o.”

17 Ka Yesu n paae la, o nye ka Lazarus pun be yaugin ne daba anaasi sa. 18 Ka Betani teŋ daa pu lal ne Jerusalem. Li ane wuu maila ayi ne. 19 Ka Jew dim bedego kena ye ba belis Marta ne Meeri ba taunn kum la zug.

20 Ka Marta n wum ye Yesu kenna la, o due n yi ye o tuꞌos o. Ka Meeri kpelim n zinꞌi yin. 21 Ka Marta yel Yesu ye, “Zugsoba, fu yaꞌa daa been kpela, man taunn nwa naan ku kpii nee. 22 Amaa m miꞌ ye lin mekama ka fu sos Winaꞌam la, hale baa nannanna o na maal ala n tis uf.”

23 Ka Yesu yel o ye, “Fu taunn la na vuꞌug yaꞌas.”

24 Ka Marta yel o ye, “M miꞌ ye o na ti vuꞌug kumin dunia kaŋa naar daar.”

25 Ka Yesu yel o ye, “Mane a kuꞌum vuꞌugir ne nyovur. One niŋ m yadda la, hale o yaꞌa ane kuꞌum, o na vuꞌug. 26 Ka one mekama voe ka niŋi m yadda la, o kudum ku kpii. Fu niŋ nwa yadda bee?”

27 Ka Marta yel o ye, “M Zugsoba, m niŋ uf yadda ye fu ane Kiristo, Winaꞌam Biig, on ka ba da ye o na kenn dunia ni na la.”

28 Ka on yel nwa naae la, o suaꞌ keŋ buol o pitu Meeri n yel o ye, “Ti Paꞌan la be kpela yamma yamma ka buon uf.” 29 Ka on wum la ka o due toꞌoto n keŋ o saꞌan. 30 Ka Yesu da nam pu paae teŋ la ni naa, amaa o kpelim bene zinꞌikan ka Marta tuꞌos o la. 31 Ka Jew dim bane be yin n belisid Meeri la, n nye ka o due toꞌoto n yi la, ka ba dol o n tenꞌesid ye, o kenne yaugin la ye o kaas.

32 Ka Meeri paae Yesu n be zinꞌisiꞌa la, ka nye o, ka igin Yesu tuon n yel o ye, “M Zugsoba, fu yaꞌa daa been kpela man taunn nwa naan ku kpii nee.”

33 Ka Yesu n nye ka o kum ka Jew dim bane dol o la me kum la, ka o suunr saꞌam hale, ka o sinꞌim bedego, 34 ka buꞌosi ba ye, yaa ni ka ya suaꞌ kum la? Ka ba yel o ye, “Ti Zugsoba, kem na n gos.”

35 Ka Yesu nintoꞌom yi.

36 Ka Jew dim la yel ye, “Gosimi, on noŋ o siꞌem.”

37 Ka sieba buꞌos ye, “Dau kaŋa daa niŋ siꞌem n nie zunzoŋ nini la ku nyaŋen keen ka dau kaŋa tiliginee?”

38 Dinzugo Yesu lem sinꞌim yaꞌas on paae yaugin la. Yaug la ane tampiing voonr, ka kugir ligili li noor. 39 Ka Yesu yel ye, “Lakimi kugir la.”

Ka one kpi la taunn Marta yel o ye, “M Zugsoba, o be ne yaugin daba anaasi nwa. Anwa o punꞌe ya.”

40 Ka Yesu buꞌos o ye, “M pu yel ye, fu yaꞌa niŋi m yadda, fu na nye Winaꞌam paŋa?”

41 Ka ba lak kugir la ka bas yaug la noor. Ka Yesu goꞌe gosidi agol, ka yel ye, “M Baꞌ, man puꞌusid uf bareka fun wumi m sosug la. 42 M miꞌ ye saŋa wusa fu wum ne m sosug. Amaa li ane nidib bane ziꞌe kpela nwa la zug, ka m yeli ala, ye ba niŋ yadda ye fun tum man na.”

43 Ka on n yel nwa wusa n naae la, ka o duꞌos o kukor n tans ye, “Lazarus, yim na.” 44 Ka one daa kpi la due. Ka o noba ne o nuꞌus vilig ne pien. Ka pien bil loo o nindaa.

Ka Yesu yeli ba ye, “Yidigim pien la ka bas o ka o keŋ.”

45 Ka Jew dim bedego bane dol Meeri laꞌam kena ka nye Yesu n maal siꞌem la ba niŋ o yadda. 46 Ka sieba keŋ Farisee dim saꞌan n yeli ba, Yesu n tum siꞌem la.

47 Ka maalmaan kpeenmnam ne Farisee dim laꞌas ba kpeenmnam ka yel ye, “Ti na niŋ wala? Dau kaŋa tum tuumnyalima bedego. 48 Ti yaꞌa ke ka o kpelim niŋidi ala nidib wusa na niŋ o yadda, ka Room dim na kena saꞌami ti zinꞌisuŋ ne ti soꞌolim wusa.”

49 Ka ba nid yinni, on yuꞌur buon Kaifas one da a maalmaan kpeenm yuum kan la, yeli ba ye, “Ya ziꞌ siꞌel siꞌela. 50 Ya pu baŋ ye li a suꞌum ye dau yinni naani kpi nidib la yela n gaad ti buudi la wusa saꞌuŋo?”

51 O pu yel neꞌeŋa ne o meŋ yaꞌam, amaa on da a maalmaan kpeenm yuum kaŋa la n ke ka o diꞌe Winaꞌam pianꞌad n tis nidib la, ye Yesu na kpi n tis Jew dim buudi la. 52 Ka kaꞌane buudi kaŋa la yela maꞌanee, amaa ye o laꞌas Winaꞌam biis bane widig la. 53 Dinzugo daar kan ka ba pinꞌili gbanꞌe ban na niŋ siꞌem ku o.

54 Lin yela ka Yesu pu lem neeli o meŋ Jew dim sooginee, ka toomi anina keŋ teŋ kane kpiꞌe moogin, ka kpenꞌ Efiram teŋin n gbeenn anina ne o nyaꞌandolib la.

55 Ka Jew dim diꞌema lin ka ba buon kum malek gaadug tienr la da liꞌelne, ka ba bedego naam teŋin la keŋ Jerusalem ye ba maal maluŋ kane na ke ka ba a nyain la, ka dabisir la nyaan paae. 56 Ka ba ied Yesu. Ka ban be Winaꞌam puꞌusum yin la ka buꞌos taaba ye, “Ya tenꞌesid wala? Ya tenꞌes ka o ku kenn laꞌasug la naa?” 57 Ka maalmaan kpeenmnam ne Farisee dim la daa deŋim tis noor ye soꞌ yaꞌa baŋ on be zinꞌi siꞌa, on yelimi ba ka ba gbanꞌ o.