1 Ka li kpelim daba ayuobu ka kum malek gaadug dabisir la paae, ka Yesu keŋ Betani, teŋ kan ka Lazarus on ka o daa vuꞌug kumin la be. 2 Ka ba maal diib tis o, ka Marta pudug diib la, ka Lazarus paas bane dit ne o la ni. 3 Ka Meeri zaŋ tudaare kpaam line ka ba buon naad la, ka na peꞌel kolibir, ka li ligidi zuꞌe bedego la, n kpaꞌe siinꞌe Yesu noba la ka nok o zuobid n duus li, ka yir la wusa taae ne tudaare kpaam la nyuug.

4 Ka Judas Iskariot one a Yesu nyaꞌandolib la yinni, one na ti zam o la, yel ye, 5 “Bo ka o pu kuos tudaare kpaam la m mor ligidi la na ka ti tis noŋ dima? Ligid kan na paae nid yinni yuum yood.” 6 Li kaꞌane on noŋ noŋdim la yela ka o yel neꞌeŋa, amaa li ane on da mor ba ligidi kolug ka a naꞌayiig la yela, ka yiti suaꞌ yiis line be anina la.

7 Ka Yesu yel ye, “Basimi poꞌa la baanlim. Kel ka o tenr lin ka o maal la n guri m mum daar. 8 Noŋ dim na be ne ya saŋa wusa, amaa mam lee ku be ne ya saŋa wusa.”

9 Ka Jew dim nidib titaꞌam sa n wum ye o be ani la, ba kena ka li kaꞌane Yesu yela maꞌanee, amaa laꞌam ne Lazarus one ka Yesu vuꞌug o kumin la nyeeb men. 10 Ka maalmaan kpeenmnam la gbanꞌe ye ba ku Lazarus men. 11 Bozugo on yela ka Jew dim la bedego tiak ka niŋid Yesu yadda.

12 Ka yim beug ka nidib bedego bane keŋ maluŋ dabisir la ni wum ye Yesu ken Jerusalem la, 13 ka zaŋ kpukpar vaand n tuꞌosid o ka pianꞌad ne kukortitaꞌar ye, “Hosaana, yelsum bene one ken na ne Zugsob la yuꞌur la, ka a Israel dim naꞌab la.” 14 Yesu nye buŋsiaꞌasiŋ ka banꞌ o ka li dolne lin da sob siꞌem Winaꞌam gbauŋin ye,

16 O nyaꞌandolib da nam pu deŋim baŋi li gbin ne, amaa Yesu n ti nye zunꞌor la, ba tienn ye neꞌeŋa da sobne o yela ka li me a line ka ba niŋi tis o la.

17 Ka nidib bedego bane da be o saꞌan saŋkan ka o vuꞌug Lazarus kumin ka o yi yaugin na la, n yel Yesu n daa niŋ siꞌem. 18 Ka on tum tuumnyaluŋ kaŋa ka nidib bedego wum la zug ba keŋ tuꞌos o. 19 Ka Farisee dim yuꞌun yet taaba ye, “Ti ku nyaŋe niŋ siꞌe siꞌela. Gosimi ya, nidib la wusa dol o ne.”

20 Ka Greek dim sieba me daa be bane keŋ Jerusalem ye ba puꞌus Winaꞌam maluŋ dabisir daar la. 21 Ka ba kenn Filip one yi Besaida, Galilee soꞌolimin la saꞌan na n yel o ye, “Ti bood ye ti nye Yesu.” 22 Ka Filip keŋ yel Andrew ka ba dol taaba me keŋ yel Yesu.

23 Ka Yesu lebisi ba ye, “Saŋa la paae ya ye Ninsaal Biig la nye zunꞌor. 24 Asida ka m yeti ya ye kief yaꞌa pinꞌ teŋin ka pu bule, li kpelim ane yinni, amaa li yaꞌa bul li na duꞌa ki bedego. 25 One noŋi o nyovur na koꞌoŋi li, amaa one basi o nyovur dunia nwa ni la na nye nyovur line kaꞌ naare. 26 One bood ye o tum tisi m, asee ka o doli m, ka mam be zinꞌisiꞌa la o me na be ani. Soꞌ yaꞌa tum tis man, m Baꞌ na zunꞌe o daana yuꞌur.

27 “Nannanna m sunf saꞌameya, ka m na yel ye bo? M Baꞌa faann m saŋkaŋa namisugin nwaa? Ayei, li ane neꞌeŋa nwa yela ka m kena paae saŋkaŋa nwa. 28 M Baꞌa, zunꞌomi fu yuꞌur.”

Ka kukor yi saazug n yel ye, “M zunꞌe m yuꞌur ka na lem zunꞌe li yaꞌas.” 29 Ka nimbane ziꞌe kpiꞌe la wumi li la ka yel ye, “Saa dam,” ka sieba ye, “Maleki pianꞌ tis o.”

30 Ka Yesu lebis ye, “Kukor kaŋa pianꞌane ya yela, ka kaꞌ mam yelaa. 31 Dunia nwa saria kadib paae ya, ka ba na kad one soꞌe li la bas. 32 Ka ba yaꞌa duꞌos man agol, m na buol nidib wusa kenn m saꞌan na.” 33 Yesu yel neꞌeŋa ne ye o paꞌal kuꞌum kan buudi ka o na ti kpi.

34 Ka nidib la lebis o ye, “Ti wum wada gbauŋin ka li yel ye Kiristo la kpelim be ne saŋa wusa, ka bo ka fu yel ye, ba na duꞌos Ninsaal Biig la agole? Ka Ninsaal Bikaŋa a anoꞌone?”

35 Yesu siilimi ba ye, “Neesim la na be ne ya saŋa biꞌela. One a neesim n be la, kemi, ka neesim nan kpen be la da ke ka yuꞌuŋ sobi ya. One keŋ likin ziꞌ on ken siꞌela. 36 Yaname be neesim la saꞌan la, niŋimini o yadda ka lieb neesim la biis.”

Ka on yel neꞌeŋa naae la ka toom n suaꞌ o meŋ ba saꞌan. 37 Hale baa on tum tuumnyalima bedego ka ba nye la, laꞌam ne wala ba pu niŋ o yaddaa. 38 Li da niŋi ala ye Winaꞌam nodiꞌes Azaya da pianꞌa siꞌel la niŋi ameŋa ye,

39 Ba da pu niŋ o yaddaa, bozugo Azaya da lem yel yaꞌas ye,

42 Ka laꞌam ne wala hale Jew dim tuongatib bedego niŋ o yadda ba sunya ni, ka Farisee dim zotim la yela ka ba pu neeli li ye ba na ti yiisi ba laꞌasug doogin n basi, 43 ban noŋ saalib zunꞌor n gat Winaꞌam zunꞌor la zug.

44 Ka Yesu pianꞌ ne kukortitaꞌar ye, “One niŋid man yadda la, pu niŋid mam yadda maꞌanee, amaa o laꞌam niŋid ne one tum man na la yadda men. 45 Ka one nyee man la me nye one tum man la na. 46 M ane neesim n kenn dunia ni na, ka one niŋi m yadda ku kpelim likin ne.

47 “Ka soꞌ yaꞌa wumi m pianꞌad la ka pu doli li sueya, m ku kadi o saria, bozugo m pu kena ye m kadne dunia dim saria amaa ye m faaenn ba. 48 One zanꞌas ka pu diꞌe m pianꞌad la mor saria kadib. Ka pianꞌaban ka m pianꞌa la na ti kadi o saria naar daar la. 49 Ka m pu pianꞌ ne m meŋ paŋa. Amaa m Baꞌ one tum m la na meŋ tis m noor mam na pianꞌ siꞌem wusa. 50 Ka m miꞌ ye o noor ziꞌelug la taꞌasid nyovur line kaꞌ naare. Dinzugo m Baꞌ yeli m siꞌel la, lin ka m pianꞌad.”