1 Ka kuꞌum malek gaadug tienr dabisir la da liꞌel la, ka Yesu baŋ ye o saŋa paae ye o yi dunia kaŋa ni ka keŋ o Baꞌ saꞌan. O da noŋi o meŋ nidib bane be dunia ni, ka noŋi ba hale.

2 Ka Yesu ne o nyaꞌandolib daa ditne ba yuꞌuŋ diib, ka Sutaana daa pun deŋim n kpenꞌ Judas, Simon Iskariot biig la sunfin, ye o zam Yesu. 3 Yesu daa miꞌ ye o Baꞌ la zaŋ siꞌel mekama wusa niŋ o nuꞌugin la, ka miꞌ ye o yine Winaꞌam saꞌan na, ka lebidne Winaꞌam saꞌan. 4 Ka o due diibin la n yeeg o fuug, ka zaŋ pien n lo o sia, 5 ka bue kuꞌom niŋ siꞌuŋun ka pinꞌil n pie o nyaꞌandolib la noba, ka duusidi ba ne pien kan ka o lo o sia la.

6 O daa pie paae Simon Piita. Ka Piita buꞌos o ye, “M Zugsoba, fu ye fu pie m nobaa?”

7 Ka Yesu lebis o ye, “Fun nan ziꞌ man niŋid siꞌel la, amaa, nwa nyaꞌaŋ fu na baŋi li.”

8 Ka Piita yel o ye, “Fu kudum ku pie m nobaa.”

Ka Yesu lebis o ye, “M yaꞌa pu pie fu nobaa, fu lem kaꞌ m nyaꞌandola.”

9 Ka Simon Piita yel o ye, “M Zugsoba, alazugo piem m nuꞌus ne m zug, ka kaꞌ m noba gullimnee.”

10 Yesu yel o ye, “One pun su sa, o noba pier gullim siaki ya, ka li maal o niŋgbiŋ wusa ka li a nyain. Ya ane nyain, amaa kaꞌa ya wusaa.” 11 Ka Yesu daa pun miꞌ one ye o zam o la zug, ka o yel ye kaꞌ ya wusa a nyain ne.

12 Ka one pie ba noba naae la, ka o lem ye o fuug, ka leb n zinꞌi, ka buꞌosi ba ye, “Ya baŋ man niŋ siꞌel laa?” 13 “Ya buon man ye, Paꞌan ne Zugsob. Li ane ameŋa. M ane ala. 14 Lin sadigim ane ye man ane ya Zugsob ne ya Paꞌan la, ka pie ya noba la, li suꞌum ye yanam me pie ya taaba noba. 15 M maal nwa ne ye m paꞌali ya, ye yanam me na maalne wuu man maali ya siꞌem la. 16 Ameŋa ka m yeti ya ye, tumtum ku gaad o zugsoba. Ka ban tum soꞌ la ku gaad one tum o la. 17 Ya yaꞌa baŋ nwa, ka niŋ ala, yelsum be ya zutin.

18 “Li kaꞌ ya wusa yela ka m yeta. M miꞌ mane gaŋ sieba la. Amaa asee Winaꞌam gbauŋ la sob siꞌem la niŋ ameŋa ye, ‘One dit ne man la, tuligi kis man.’

19 “M yeti ya ne nannanna ka li nan pu maali. Ka li yaꞌa ti maal, ya na niŋ m yadda ye mane la. 20 Ameŋa ka m yeti ya ye, one diꞌe on ka m tum la diꞌedne man. Ka one diꞌed man la diꞌedne one tum man la na.”

21 Ka Yesu n pianꞌ neꞌeŋa la ka o sunf saꞌam ka o yel ye, “Asida ka m yeti ya ye, ya yinni na zam man.”

22 Ka o nyaꞌandolib la gosid taaba ka yaꞌamisid on yela ka Yesu pianꞌad la. 23 Ka Yesu nyaꞌandol yinni one ka o noŋ hale la zinꞌi kpiꞌe ne Yesu. 24 Ka Simon Piita enbig nyaꞌandol la ka yel o ye, “Buꞌosim o, one ka o pianꞌad la.”

25 Ka one nan kpelim zinꞌi kpiꞌe ne Yesu baba la, buꞌos o ye, “Zugsoba, li aa anoꞌone?”

26 Ka Yesu lebis ye, “Li ane one ka m na zaŋ bodobodo nwa n suk laan la n tis o la na zam man.” Ka on suk diib la laan la ka zaŋi li tis Judas Iskariot. 27 Ka Judas n di diib la naae la ka Sutaana kpenꞌ o ni.

Ka Yesu yel o ye, “Fun na niŋ siꞌel la, niŋimi li toꞌoto.” 28 Ka bane wusa laꞌam dit ne o la pu baŋ lin yela ka o yel o alaa. 29 Ka sieba tenꞌes ye Judas n da more ba ligidi kolug la yela ka Yesu yet o ye o daꞌam laꞌaban ka ba bood maluŋ diib dabisir la yela, bee o suŋim noŋdim la. 30 Li daa ane yuꞌuŋ, ka Judas n diꞌe diib la naae la, ka kpelim yi.

31 Ka Judas n daa yi la, ka Yesu yel ye, “Ninsaal Biig la yuꞌur na nye zunꞌor nannanna, ka on ni ka Winaꞌam yuꞌur me na nye zunꞌor. 32 Winaꞌam yuꞌur yaꞌa nye zunꞌor, o Biig la zug, Winaꞌam meŋ na zunꞌe o Biig la yuꞌur, ka li ku yuuge.

33 “M biise, m na be ne ya, saŋa biꞌela nwa. Ka ya na ti ied man. Wenne man daa yel Jew dim siꞌem la, ye, man ken zinꞌisiꞌa la ya ku tunꞌe kenn aninaa. Ala men ka m deŋim yeti ya nannanna.

34 “Nooryelug paal nwa ka m tisidi ya ye, ya noŋim taaba. Wenne man noŋi ya siꞌem la, ala men ka ya na noŋ taaba. 35 Ya yaꞌa noŋ taaba, nidib wusa na baŋ ye ya ane m nyaꞌandolib.”

36 Ka Simon Piita buꞌos o ye, “M Zugsoba, fu ken yaani?”

Ka Yesu lebis o ye, “Man na ken zinꞌisiꞌa la, fu ku nyaŋ dol man nannanna. Amaa fu na ti yuolim dol man n keŋ.”

37 Ka Piita buꞌos o ye, “M Zugsoba, bo niŋ ka m ku nyaŋ dol uf nannanna? M na tunꞌe kpi fu zug.”

38 Ka Yesu lebis o ye, “Fu na kpi man zugoo? Ameŋa ka m yet uf ye, fu na kiꞌis man noor atanꞌ ka noraug naan kaas.”