16
Puꞌusug
1 M pianꞌadne ti taunn Foebe yelsum yela tisidi ya. O ane Winaꞌam nidib bane be Kenkiria teŋin la suŋid. 2 Diꞌemini o wenne lin nar ne Winaꞌam nidibi diꞌed taaba siꞌem la, ti Zugsob yuꞌur zug, ka suŋ o ne on bood siꞌel ya saꞌan; ka o meŋ daa suŋid nidib bedego laꞌam ne mam.
3 Puꞌusimi Priska ne Akuila, m tumtum taaba bane tum Yesu Kiristo tuuma la. 4 Ba da siak ye ba kpi mam zug. M puꞌusidi ba bareka, ka li kaꞌ mam maꞌanee, ka me ane bane kaꞌ Jew dim ka a Winaꞌam nidib la me puꞌusidi ba.
5 Ka puꞌus Winaꞌam nidib bane laꞌasedi ba yin la.
Ka puꞌus m zuasuŋ Epenetus one be Asia teŋin la. One daa deŋim siaki dol Yesu Kiristo yiiga.
6 Ka puꞌus Meeri one daa tum hale n tisidi ya la.
7 Ka puꞌus Andronikus ne Junias bane aa m duꞌadib ka da laꞌam be sarega ni ne mam la. Ka Kiristo Tumtumnib la miꞌi ba suꞌuŋa. Ka ba me da deŋi dol Kiristo man yiiga.
8 Puꞌusimi m zuasuŋ Ampliatus one ka m noŋ Kiristo zug la.
9 Ka puꞌus Urbanus, ti tumtum tiraan one tum Kiristo tuuma la, ne m zuasuŋ Stakis.
10 Ka puꞌus Apelles on ka nidib bedego baŋ ye o dol Kiristo ne sida la. Ka puꞌus Aristobulus yidim.
11 Ka puꞌus m duꞌad Herodion. Ka puꞌus Narkissus yidim bane niŋ Zugsob yadda la.
12 Ka puꞌus Trifaena ne Trifosa bane tum Zugsob tuuma la. Ka puꞌus m zuasuŋ Persis one tum bedego tisid Zugsob la.
13 Ka puꞌus Rifus on ka nidib bedego miꞌ o tuuma Kiristo zug la, ne on daa noŋ m wuu o biig la.
14 Ka puꞌus Asinkritus ne Flegon ne Hermes ne Patrobas, ne Hermas ne baꞌabiis zanꞌasa bane be ne ba la.
15 Ka puꞌus Filologus ne Julia ne Nereus ne o taunn ne Olimpas ne Winaꞌam nidib wusa bane be ne ba la.
16 Puꞌusimi taaba ne noŋir.
Kiristo nidib wusa puꞌusidi ya.
Saꞌalug
17 M baꞌabiise, m saꞌali ya ye ya guꞌus ne nimbane mor weligir kenne ya saꞌan ka maan siꞌelnam line lubid nidib la, ba zanꞌas ka pu dol paꞌalug kane ka ya diꞌe laa. Luakimini ya meŋ ne ba. 18 Bane niŋidi ala la pu tum ne ti Zugsob Kiristo tuumaa ka lee tum ne ba meŋ yaꞌamleog tuuma. Ba maꞌad nimbane potenda pu kpiꞌem la n pianꞌ ne nomalisiŋ. 19 Nidib bedego wum yaname siak labasuŋ la siꞌem la, ka linzug ka m mor sumalisim ya yela. Ka m bood ye ya mor yaꞌam ne line a suꞌum, ka da mor potenꞌer ne line a beꞌede.
20 Li kpelim biꞌela ka Winaꞌam one tisidi ti sumalisim na saꞌam Sutaana paŋ ka ke ka ya nyaŋ o.
Ti Zugsob Yesu Kiristo yelsum na be ne ya.
Puꞌusug yaꞌas
21 M tumtum tiraan Timoti puꞌusidi ya. Ka m duꞌadib Lukius ne Jason ne Sosipater me puꞌusidi ya.
22 Man Tertius, one sobid lin ka Paul pianꞌa gbauŋ kaŋa ni la, puꞌusidi ya ti Zugsob yuꞌur zug.
23 Gaius one a m yisigidir daan ne on yin ka Winaꞌam nidib laꞌased la, puꞌusidi ya.
Erastus one gur teŋ kaŋa ligidi la ne ti baꞌabiig Kuartus, puꞌusid ya.
24 Ti Zugsob Yesu Kiristo yelsum be ne ya wusa, Ami.
Winaꞌam naꞌasi la yela
25 Zunꞌomi Winaꞌam one nyaŋe ket ka ya mor paŋ ya yadda niŋir ni la. Ala ka labasuŋ kan ka m paꞌali ya, ne lin ka m mooli tisi ya Yesu Kiristo yela la, ne yelsuaꞌadir line yuꞌun nie paalo ni la yeli ti. Yelsuaꞌadir la da suaꞌeya ka li yuma lal, 26 ka Winaꞌam nodiꞌesidib sob ka li yuꞌun nie paalo. Ka Winaꞌam one voe ka kaꞌ naar la tis noor ka buudi wusa baŋi li, ye nidib bedego siak Winaꞌam ka niŋ o yadda. 27 Winaꞌam one mor yaꞌam gaad soꞌ wusa la diꞌem naꞌasi saŋa line kaꞌ naare Yesu Kiristo yuꞌur zug. Ami.