12
Sævam neka wazeam-qa emanqat
Yaq yan-te nqo꞉go, matev kandambaqape ndøfakhán. Nqova ndafe-ús. Sævam mø̀ndøgoám. Tuqa ndabua, khøuwá. Neka tuqa zenda tokhotapak mokho-te, løvøyak mbøigoám neka tuqa kawa-te, nduku tuelv, ande kawa ezoqam-qa wawaq me vømbø̄egoam. 12:2 Mica 4:10Ngunuk sævam, emu-ús. Gèmbongáz. Yaq tùni-akhayám, nqosøgeap gumbo-ewag.
12:3 Dan 7:7Yaq yan-te nqo꞉go, matev nøme vø̄fakhan. Nqáe! Wazeam kandambaqape, mø̀ndøgoám. Køkouk-qapé. Ngenek kawa sevén qambogoam neka auli ten vømbōgoam, neka teqa kawa ate qambøegoam, kawa ezoqam-qa wawaq vømbø̄e-uzupam. 12:4 Dan 8:10Yaq ngenek wazeam, até gendego, nduku nøme yan-te nqo꞉go, vø̄khataz. Okhó genekhatáz, manqei-qape-te vø̄nqagevem. Nduku misika-misika gigoam, yaq menømenas ndigu, até gegoám, geté nøme kopo-kopo ndigu, gèkhatáz. Yaq ndego wazeam, sævam qambongaz, tuqá megemege-té gono-itán. Yaq ndego nakhasam ndego, tui-ova, løutøve-qa mbogoám.
12:5 Psa 2:9; Veve 19:15Yaq ndugu sævam vø̄e-ova. Nakhasam anganeám. Ndego bawabawan ate ndægo, gezømbó-kawaevtát. Bazaføgakh-ús. Teqa khamokh, auli khamokh ndǿgoát. Geté ndego nakhasam é-vøqán-ae, enzol ezoqam, Mbumbukiam-te é-vø̄ndafem, ma ekeza qonam nonqo-te go꞉qotam. Yaq sævam ndugu, leg-av manqei-té gunø-khokhón. Ta manqei ndøgo, Mbumbukiam é-møndømbo-khakheinám. Yaq timbó-kewagát ndǿgo, atema 1260 khøuwa vømǿndāp.
12:7 Zud 9Yaq yan-te, nakhag ndøfakhán. Ndego enzol ezoqam kandambaqape, Maekol neka ekeza enzol ezoqam, wazeám namba me꞉nøfé. Neka ndego wazeam, ekeza enzol ezoqam namba vøndēwan, yaq vøzø̄-qavøiu. Geté ndego wazeam, bazaføgakh mbaín. Yaq gèpitøvém, yaq ndego tegi enzol ezoqam namba, kopømba mbaín, yan-te sekemba tiyagat. 12:9 Gen 3:1, 14; Luk 10:18; 22:31; Veve 20:2Yaq ndego wazeam kandambaqape, iz Nqova Soqaqape neka Saitan ndimbo-akhayam, gè-oginám, ndego manqei-qape ezoqam ate ndi꞉gu, ndetubam. Manqei-qape-té genø-oginám, tegi enzol ezoqam namba.
10  12:10 Job 1:9-11; Zech 3:1Yaq yan-te ndøgo, no manqat kandambaqape nø-ewág. Āv qane-eín nqǽgo,
“Ndakin nigi Mbumbukiam-qa ezoqa khandi꞉zat matev
neka bazaføgakh matev
neka megeat matev,
mø̀ndø-fakhán.
Ndakin Keliso mó꞉kawaevtát,
ndego kawa ezoqam geve.
Zapa ndǿgo, ndego ezoqam, Mbumbukiam-qa megemege-te go꞉yam neka nigi Klisten nøfuap, pavpave nekā lovølova, manqa vøzø̄-søkuzumam,
ndego mø̀ndø-oginám.
11 Klisten ezoqam mø̀ndø-tømbuinám.
Sip Nakhasam-qá kóuk neka unimanqatin manqát gini-tømbuinám, ndøgo ezoqa nøme-te gimanqatam.
Ndigu ekeza yage-qa yaq-te, matavapøteáv, neka ndigu møe mbaín, Mbumbukiam-qa Manqat zapaya, tipakhaez.
12  12:12 Isa 44:23; 49:13Zo khanakhanakh mbá qanegó,
qo yan neka zo yan-te ndozoyage.
Geté ti-te ndigu unimé꞉-soqá, ndigu manqei-qape neka ndaola-te ndiyage.
Zapa ndǿgo, nqova soqaqape màndovís zo-te.
Ndego qaqa kandambá.
Ndego mø̀ndæ-otév, khøuwa khapémbá, ndimbøe-yoza.”
13 Yaq ndego wazeam ge꞉-otev av nqægo, manqei-qape-tē ginø-ogenonām, ndego até gendego, ndugu sævam, nakhasam anganeam gui-ova, vø̄ngeatam. Até gembopavát. 14  12:14 Dan 7:25; 12:7Geté ngunuk sævam, ngangakh kandambaqape-qá taf menas mbo-etøomém. Ekeza manqei-té guabenø-løvuí, leg-av manqei-te ndøgo. Yaq timbó-kewagát ndǿgo, viav misika neka viav nøme yaq-mba vømǿndāp. Ta manqei-te ndøgo, ndugu wazeam-qa bugug-te, qambaqape ndǿgoát. 15 Yaq wazeam, até gendego, ibøkha vø̄qoza. Ibøkha ndøgo, teqa manqa-nqa-te qando-fakhan, andé kea-qá ibøkha mbageáp. Ndego sævam kawøwe-qa mbogoám. 16 Geté ndugu sævam, manqei mbotøké. Manqei manqa-nqa é-møndø-mboqoá, ibøkha vø̄khoug, ndøgo wazeam-qa manqa-nqa-te qando-fakhan. 17  12:17 Veve 11:7Yaq ndego wazeam, qaqa kandambá, ndugu sævam-te. Yaq sègewáv, tugi zi nøme namba vømēnøfe. Nginik ezoqam ndígu, Mbumbukiam-qa manqat o-mba ndo꞉ndape neka Yesu-qa manqat ndīgēāwāt. 18 Yaq ndego wazeam, ndøgeg-té genø-itán.

12:2 12:2 Mica 4:10

12:3 12:3 Dan 7:7

12:4 12:4 Dan 8:10

12:5 12:5 Psa 2:9; Veve 19:15

12:7 12:7 Zud 9

12:9 12:9 Gen 3:1, 14; Luk 10:18; 22:31; Veve 20:2

12:10 12:10 Job 1:9-11; Zech 3:1

12:12 12:12 Isa 44:23; 49:13

12:14 12:14 Dan 7:25; 12:7

12:17 12:17 Veve 11:7