Ta̱-Bolofe̱i̱-Mala̱-Suluguadi-O Kedia̱
Dabai
Degele I
Tawale Ta̱
Kuguo ko͟͡ume o Lukha̱ nala̱i̱. Ta̱-bolofe̱i̱-mala̱-suluguadi-o kedia̱ dabai degele i kaha̱ ta̱ ke̱ nala̱i̱. E̱ kuguo tane ko͡u nala̱i̱. Kuguo ke̱me Yesuha̱ degei kaha̱ ta̱, di Ta̱ Uwo Bolofe̱i̱ Lukha̱ Nala̱i̱yodele ili.
Kuguo ko͟͡ume e̱ nala̱ma, o Tiofilusko͡u ne̱i̱. O ke̱me Juda o mei. Kuguo ke̱ nala̱ma ne̱i̱ kaha̱ge dine o kedia̱ dabai gehe̱ gehe̱ degele idi ke̱ tawamabadomo͡u kuhe nala̱ma ne̱i̱ dala.
Kuguo ko͟͡umaha̱ ta̱ sibige̱be ko͡u gue: Duo Bolofe̱i̱ha̱ nele̱ya ke̱no͡u ta̱-bolofe̱i̱-mala̱-suluguadi-o kedia̱ sa sa o sasa̱i̱ kedia̱moko͡u Yesuha̱ ta̱ hehegiemo͡u suluguei.
Ta̱ hiye 1 ile 12 ke̱me Pitaha̱ dabai degei kaha̱ ta̱. Ta̱ Hiye 13 ile 28 ke̱me Polha̱ dabai degei kaha̱ ta̱. Sawisiei ilo kelegebe Luk e̱ Polha̱ sulu sesele siei.
Luk e̱me medigo dabai degedi o sa̱ degei. Kolosi 4:14 koko͡u duguma.
Dabai kuguo ko͟͡umaha̱ ta̱ sibige̱ tano͡u tano͡u olo͡u fe̱i̱be kuhe̱:
Ta̱ Hiye 1:1–8:3
Sa Jerusalemko͡u ge, ta̱-bolofe̱i̱-mala̱-suluguadi-o kedia̱ Yesuha̱ degei kaha̱ ta̱ ke̱ hehegile i.
Ta̱ Hiye 8:4–12:25
Sa Judiabo͡u, sa Samariabo͡u keleya ke̱, ta̱-bolofe̱i̱-mala̱-suluguadi-o kedia̱ Yesuha̱ degei kaha̱ ta̱ ke̱ hehegiemo͡u suluguei.
Ta̱ Hiye 13:1–21:14
Polha̱ sa sa su̱do keleya ke̱ Yesuha̱ degei kaha̱ ta̱ ke̱ hehegiemo͡u siei.
Ta̱ Hiye 21:15–26:32
Sa Judiako͡u ge, o kedia̱ Pol e̱ didio̱ degemamo͡u, ta̱ sa i.
Ta̱ Hiye 27–28
Ami o kedia̱ Pol sa Romko͡u tolo͡u yai.
Sa Jerusalemko͡u ge, ta̱-bolofe̱i̱-mala̱-suluguadi-o kedia̱ Yesuha̱ degei kaha̱ ta̱ ke̱ hehegile i
1
(Ta̱ Hiye 1:1–8:3)
Yesuha̱ Duo Bolofe̱i̱ tobo͡u ba hagualeyodema makai
Mogo Tiofilus, ta̱ dagado a̱ na̱moko͡u nala̱ma ne̱i̱ koko͡u be, Yesuha̱ degegai ke̱bo͡u, ta̱ e̱ hehegiei ke̱bo͡u olo͡u fe̱i̱ nala̱i̱. Yesuha̱ dabai degega haguabe demo͡u, Godiha̱ e̱ hebenito͡u mala̱ felei ke̱me a̱ ko͡u nala̱i̱. Godiha̱ e̱ mala̱ ili mei kelege, Yesuha̱ e̱ ta̱-bolofe̱i̱-mala̱-suluguadi-o, e̱ ko͡u makagai kedia̱moko͡u tama̱ degemo͡u, Duo Bolofe̱i̱ha̱ nele̱ya ke̱ dia̱moko͡u egei tobou. E̱ tolo ilemo͡u hagua̱ gehe̱ dege dalali, dia̱moko͡u tama̱ degemo͡u, e̱me gehe̱ dege dalayodemamo͡u hehegiemo͡u siei. Sawisiei olo͡u fe̱i̱ 40 kege dia̱bo͡u de dalali, Godiha̱ o sasa̱i̱ wolo͡u dalaleyode tobolo͡u delei. Sawisiei ta, Yesuha̱ dia̱bo͡u de nale̱ nala̱ duwoli, egei ko͡u gue tobou, ni̱ sa Jerusalem to͡u fogo͡u dama. A̱ ni̱moko͡u ma̱ Ayeha̱ bi ta nele̱yodeiyode tobo͡u mo͡u du ke̱ dia dalama. Jonha̱ge hue̱i̱liko͡u fafeleya degedi. Ke̱no͡u si sawisiei hiyefe̱i̱ tieli mei, ni̱me Duo Bolofe̱i̱ha̱ fafeleya degeleyode tobou.
Kegemo͡u, ta̱-bolofe̱i̱-mala̱-suluguadi-o kedia̱ kefeguomo͡u, e̱moko͡u yodulo i, Hiye O, ifi na̱ di sa Israel hiyedo degemaba, di hiye o taha̱ di sa haba de wolo͡u dalale? E̱ sima tobou, ke̱me ni̱ bi mei. Sawisiei ke̱me Aye Godi yo͟͡uno͡u makaiyode tobou. Ke̱no͡u si habage, Duo Bolofe̱i̱ha̱ migileba, ni̱moko͡u nele̱ hiyedo ne̱i̱ba, ni̱ ma̱ ta̱ sa Jerusalembo͡u, sa Judiabo͡u, sa Samariabo͡u olo͡u fe̱i̱ koko͡u hehegiemaba, habage sa sa olo͡u fe̱i̱ ke̱ne tefele hehegiemo͡u sulugualeyode tobou.
Yesu hebenito͡u fogo͡u i
(Mak 16:19-20; Luk 24:50-53)
Yesuha̱ ta̱ ke̱ tobou mei degeimo͡u, o kedia̱ dugube, Godiha̱ nele̱ye e̱ mala̱ foulugi, mabi taha̱ e̱ gogumo͡u, dia̱ e̱ dugulo ili mei. 10 Fogo͡u imo͡u, dia̱ agudileto͡u baha tafalaguamo͡u, o bolo̱u̱ ta toto tama̱ degemo͡u, dia̱bo͡u de tefeleiguei. O bolo̱u̱ ke̱dilie yukueibe fo̱ degele i dugulo i. 11 Dilie tobou, Galili o dia̱ma, ni̱ kageimo͡u agudileto͡u baha tafalagua? Ifi Yesube ni̱ to͡u fogo͡u mo͡u, Godiha̱ hebenito͡u mala̱ i. Habagesi, ni̱ e̱ imo͡u dugu saga̱i̱ ke̱no͡u tefele boholo͡u ma̱ hagualeyode tobolo͡u i.
O kedia̱ Judasha̱ timo͡u molo͟͡u o ta makai
12 Kegemo͡u, ta̱-bolofe̱i̱-mala̱-suluguadi-o kedia̱ bito̱u̱ Oliv to͡u fogo͡u, sa Jerusalemko͡u boholo͡u ma̱ yai. Ahu mei, hafe̱i̱do. 13 Sa Jerusalemko͡u fologamo͡u, fo͡u gou moso̱ dio͟͡u duwoguadi koto͡u fologai. O kedia̱, die hu̱be olo͡u fe̱i̱ kuhe̱, Pita, Jon, Jems, Andru, Filip, Tomas, Bartolomyu, Matyu, Alfiusha̱ dihi Jems, Saimon e̱ hu̱ tabe Selot, Jemsha̱ dihi Judas. 14 O kedia̱me fi̱ tano͡u dege kefeguo duwoguali, diho̱ baga̱ tobolo͡u idi. Sasa̱i̱ ilo kelebo͡u, Yesuha̱ e̱ adio͡u Mariabo͡u, e̱ mala̱ dia̱bo͡u olo͡u fe̱i̱ne, o kedia̱bo͡u de duwoguali diho̱ baga̱ tobolo͡u idi.
15 Kelegebe, damale̱yodei o sasa̱i̱ olo͡u fe̱i̱be 120 saga̱i̱ kege delei. Kegemo͡u, Pitaha̱ duo kile hagua̱ tafalali tobou, 16 mogo dia̱ma, Judasha̱ degei kaha̱ ta̱, o Devitha̱ Duo Bolofe̱i̱ha̱ nele̱ya ke̱ ko͡u tobou ke̱me Godiha̱ kuguoko͡u nala̱i̱ dala.* 1:16 Buk Song 41:9 Kegemo͡u, Judasha̱ Yesu o kedia̱moko͡u sesegumo͡u kuhe tolo͡u ma̱ ta̱ sa i kaha̱ degemo͡u, ta̱ Devitha̱ toboube damale̱do tama̱ degei kehe̱. 17 Judas e̱me eibo͡u de ko͡u dalali, dabai tano͡u degediyode tobou.
18 Kegemo͡u, Judasha̱ midiho̱ kasaga̱i̱ milou kaha̱ hebe ke̱ sele mala̱mo͡u, aso͡u kolo ta mamo̱u̱. Aso͡u kolo ke̱ mamo̱u̱ koko͡u ge e̱me mihi̱ko͡u fiyamo͡u, gua olo͡u fe̱i̱ tigile mugumo͡u, e̱ tolo i. 19 Sa Jerusalem o kedia̱ e̱ degei ta̱ ke̱ dulomo͡u, die ta̱e aso͡u kolo kaha̱ hu̱be Akeldamayodele idi. Hu̱ kamaha̱ e̱ sibige̱be Kafeibo͡u Sa.
20 Kegemo͡u, Pitaha̱ haba tobou, ke̱ degei ke̱me Die̱ Fedi Kuguoko͡u be ko͡u gue nala̱i̱ dala,
Sa e̱ tiadi ke̱me yo͟͡u mo͡u kege dalale. Kelebe o ta daladayedei. Buk Song 69:25
Tabe ko͡u gue,
O taha̱ e̱ timo͡u ke̱ mo͟͡ubane bolo̱. Buk Song 109:8
21 Kegei kaha̱ degemo͡u, di o ta makame. Hiye O Yesuha̱ dibo͡u de sumo͡u, o ilo dibo͡u de suluguei o kele ta makame. 22 Jonha̱ Yesu e̱ fafeleya degei kelege haguabe demo͡u, Godiha̱ e̱ hebenito͡u mala̱ imo͡u dugu o kele ta makame. O kegei kamaha̱ dibo͡u de dabai degeleba, Yesube tolo ilemo͡u hagua̱ gehe̱ degeiyode tobo͡u mo͡u sialeyode tobou.
23 Kegemo͡u, o kedia̱ o bolo̱u̱ ta maka degele i. O ta e̱ hu̱be Josep, e̱ hu̱ tabe Barsabasyodele idi. E̱ hu̱no͡u tabe Jastus. O tabe e̱ hu̱be Matias. 24 O kedia̱ o bolo̱u̱ kege maka degemamo͡u, diho̱ baga̱ tobolo͡u i, Hiye O, o fi̱ olo͡u fe̱i̱dobe na̱ tewe. Na̱ o koyo maka degeiya, na̱ eimoko͡u hegiyedele i. 25 Judas e̱me di dabai ke̱ to͡u fogo͡u, sa yo͟͡u dalale saga̱i̱ koko͡u fogo͡u i. O koyoha̱ e̱ timo͡u ke̱ mala̱ba, ta̱-bolofe̱i̱-mala̱-siadi-o degele ke̱ eimoko͡u hegiyedema diho̱ baga̱ tobolo͡u i. 26 Diho̱ baga̱ tobo͡u mamo͡u, igi yale̱ iligi, Matiasha̱ e̱ hu̱ tama̱ degeimo͡u duguomo͡u, e̱me ta̱-bolofe̱i̱-mala̱-siadi-o ta degemamo͡u, o kegele i 11 kege kedia̱moko͡u geleguomo͡u, olo͡u fe̱i̱be 12 kege degei.

*1:16 1:16 Buk Song 41:9