Nan Mi'aggwaay Suyat Juan
Nan Mipangkop Sannaja Suyat
Annaja nan suyat Juan san Ina gway pinilin Apudyus ja sasan anana'na. Agwad nan manggwanaon agwad nan manina gway agakammun Juan. Sa'ad nan uchum ananchaon sa'ad nan pijaona anan nina, chanan osa naamung gway namati ja chanan gwaschi osa mitapi sannaja maamung.
Ta'on nu ahowha nannaja suyat napatog nan pijaona anan. Anana sannaja gway sa'ad chanan namati maserpu manisiwhayucha tot achicha maallilaw san wha'wha''onay sussuyu.
Chanan Hu'yona
Nan Lugyukin Nan Suyat 1-3
Nan Tudtudchu Mipangkop San Lajad 4-6
Nan Tudtuchu Mipangkop San Mangisussuyu San Wha'on Kus Tuttuwa 7-11
Nan Anungus Nan Suyat 12-13
1
1 Ipatpatog'uway Ina, sa'ad as sa'on gway naagwakan as mangipangpangu sasan namati, annaja nan suyat'u an si'a gway pinilin Apudyus ja sasan anana'nu.
Kadto'ay ipatpatog'u cha'aju ja wha'on kus ahusa' as mangipatpatog an cha'aju gwon ama ahos nan losanay mangakammu san atuttugwaan. 2 Ipatpatogmi cha'aju kapu san atuttugwaanay anna an chita'u ja ingkaw an chita'u as ingkaingkana.
3 Ilugwayu' gway ipailan Apudyus gway Ama ja as Hesu Kristu gway Ana'na nan inawhayucha ja nan achakucha ancha sumissija nan ma'ahubuyunan ta'u an Apudyus kapu san atuttugwaan ja lajad.
Nan Tudtudchu Mipangkop San Lajad
4 Nayagsa'a' as amod san nangakammugwa'ay agwad nan uchum sasan anana'nu gway manussuyut san atuttugwaan gway sachi nan ingwhilin Apudyus gway Ama an chita'u gway oon ta'u. 5 Ad san sana, iwhaka' an si'aay ina gway manisiwhayu ta'u. Wha'on kus assahu whilin nanna isuyat'u an si'a, sijana nan whilin gway naatod an chita'u san chamchamun nan namatiyan ta'u. 6 Ad annaja nan pijaon nan lajad anan: Maserpu mawhijag ta'uway patiyon ta'u chanan whilin Apudyus. Annaja nan whilin gway chingngorju san chamchamu gway maserpu mawhiwhijag aju san lajad.
Nan Tudtuchu Mipangkop San Mangisussuyu San Wha'on Kus Tuttuwa
7 Iwhaka' nannaja tan angsan chanan mangalallilaw gway nigwayas sannaja luhung, chanan takuway achi kun mamigwhig gway sa'ad as Hesu Kristu ummaliyay nangngachan taku. Sa'ad nan a'ammasnaay taku mangalallilaw ja humursu an Kristu. 8 Ammanju ilan nan longagju ta pajan nan nanungayanju ta makanabjuway ustu nan niwhawhagka gway maatod an cha'aju.
9 Nu ngachanman nan achina ainnugwan san sussuyun Kristu ja mangutup sina, wha'on kus na'aosossaan an Apudyus. Nan ainnugwana san sussuyun Kristu, na'aosossaan as sija an Apudyus gway Ama ja san Ana'na. 10 Sa'ad nu agwad mangijali an cha'aju san wha'on kus sussuyun Kristu, achiju perno'on san hoyoyyu ja achiju kingaan as sija. 11 Tan sa'ad nan kuminga an sija mitapi an sija san lagwingay o'oona.
Nan Anungus Nan Suyat
12 Angsan pay otjan nan isuyat'u an cha'aju gwon wha'on kus isinnuyat'u. Tan namnamao'ay umali' cha'aju ilan ja augugkud tot sa'ad nan lagsa' ta'u maid kun man'uyangana.
13 Sa'ad chanan anana' nan sunudnu huwhai gway pinilin Apudyus, paiwhakachaay ininon nan whijagnu.