Nan Mi'atluway Suyat Juan
Nan Mipangkop Sannaja Suyat
Sa'ad nannaja mi'atluway suyat Juan, insuyatna an Gayo gway osa sasan mangipangpangu sasan namati kapu san whayuway namachangana sasan namati ja amamod sasan mangisussuyu san ukud Apudyus. Iwhakawhakana hos an sija gway maserpu ilancha tot achicha suyuton nan lagwingay ukalin nan osa laya'iyay mangngachan Diotrefes.
Chanan Hu'yona
Nan Lugyukin Nan Suyat 1-4
Michaychajaw As Gayo 5-8
Cha Diotrefes An Demetrio 9-12
Nan Anungus Nan Suyat 13-15
1
1 Sa'ad as sa'on gway naagwakan as mangipangpangu sasan namati, isuyat'u nannaja an si'a Gayo gway kadto'ay ipatpatog'u kapu san atuttugwaan.
2 Ipatpatog'uway huyun'u, ilugwayu'ay ta'okot nu whawhayu'a ja napigsa nan longagnu isun nan inapigsan nan pammatim. 3 Amod nan lagsa''u san hummu'nakan chanan uchumay susunud ta'u san pammati kun ingwhakachaay inainnugwam san atuttugwaan ad tuttuwaay mawhiwhijag'a san atuttugwaan. 4 Maid kun uchum as amod as mampayagsa' an sa'on nu achi ahus nan mangngoya' gway sa'ad chanan anana''u san pammati sussuyutoncha nan atuttugwaan.
Michaychajaw As Gayo
5 Ipatpatog'uway huyun'u, tuttuwa'a gway mantayo'an san mammangimangiliyam sasan susunud gway namati ta'on nu wha'on kus agakammum chicha. 6 Impano'no'cha nan mipangkop san lajadnu san sangun chanan maayuayusay namatid asna. Ammam chicha payunguchon gway mangwhaat gway whadngam chicha san maserpucha tan sachi nan masoman Apudyus. 7 Tan kapu san mangipaakammugwancha san ngachan Kristu, lummungudchaay nangwhaat gway achicha kun nangaya as whachang sasan achi mamati. 8 Sija nan sa'ad as chita'uway namati maserpu whadngan ta'u nannachaja taku as maserpucha tot mitapi ta'u san terwhasucha san migwerna'an nan atuttugwaan.
Cha Diotrefes An Demetrio
9 Nanuyata' sasan maayuayusay namati gwon sa'ad as Diotrefes gway whayugwona sija nan mangipangpangu, achina kun whinigwhig nan ayobhonga'. 10 Sija nan sa'ad nu umaliya' ad asnat, iwhaka' losan nan o'oona gway manapapat as lagwing gway maid kun kutu'na san mipangkop an sa'on. Ad wha'on kus mapno' san amasnat gway o'oona, achina kun mangiliyon chanan susunud san pammati. Ijachina hos chanan mammangili an chicha ja perjagwona chicha san maayuayusay namati.
11 Ipatpatog'uway huyun'u, achim agwaton nan lagwing, sija agwatom nan whayu. Sa'ad nan manggwa san whayu nerpu an Apudyus. Sa'ad nan manggwa san lagwing achina kun agakammu as Apudyus.
12 Sa'ad as Demetrio whayu nan iwhagwhakan chanan taku san mipangkop an sija ja mama''ila san whijagna gway sussuyutona nan atuttugwaan. Ad ipano'no'mi hos nan mipangkop an sija ad akammumay sa'ad nan iwhakawhakami tuttuwa.
Nan Anungus Nan Suyat
13 Angsan otjan nan isuyat'u an si'a. Gwon san sana wha'on kus isinnuyat'u 14 tan namnamao'ay umali' ilan si'a san wha'on kus mawhajag ad nanugugkudta.
15 Ta'okot nu sumissija nan ma'ahubuyunam an Apudyus.
Sa'ad chanan huhuyun ta'u paiwhakachaay ininon nan whijagnu. Iwhakam sasan huhuyun ta'uway ininon nan gwaschi osa an chicha.