Nan Suyat Sasan Hebreoway Namati
Nan Mipangkop Sannaja Suyat
Sa'ad nannaja suyat, nilista sasan Hebreo gway namati. Nilista tot sa'ad nan pammaticha pumigsa kapu tan choo ekay umamamod nan mapalikatancha ad takangaycha manchu'kan nan pammaticha an Kristu. Nannaja nangisuyat impapigsana nan pammaticha kapu san nangipaakammugwana san inangatun nan saad Kristu. San nanggwaanasna chinagsonana ingwhaka nan tuyu atuttugwaan: (1) Sa'ad as Hesus sija nan maid kun lukina ja maid pungpungna Ana' Apudyus. As osa Ana' Apudyus, sa'ad as Hesus nangatngatu sasan profeta, nangatngatu sasan a'anghel ja an Moses. (2) Sa'ad as Hesus nangatngatu sasan papachin nan Hudyu tan sa'ad nan inggwana napatpatog san o'oon chanan papachin nan Hudyu. Sija nan, sija nan nisu'at an chicha gway mangisa'usa' sasan taku an Apudyus as ingkaingkana. (3) Kapu an Hesus sa'ad chanan namati natakucha san whersu, ogjat, ja otoy. Kapu an Hesus gway Nangatuway Pachi, mataku chanan taku kapu tan sija nan ustuway natungpayan nan ugukalin chanan Hudyu ja chanan ajam gway inchatuncha an Apudyus.
San mi'asergwas osa kapitulu, iwhakana nan whayu pammatin chanan uchumay nayata'ay taku san uullit nan Israel tot sissija napudnucha. San kapitulu 12 inammana iwhaka sasan namati ta ainnugwancha napudnu san pammaticha ingkana anungus nan erkaw gway Hesus ekay nan mangituyunganchas pammaticha ad iyattomcha nan ngachamman sinatay palikat gway humu'nag an chicha. Iyanungusna sannaja suyat san tudtuchu gway mangichayan an chicha san ooncha.
Chanan Hu'yona
Nan Ina'apudyus Hesus Gway Ana' Apudyus 1:1-4
Nangatngatu Nan Ana' Apudyus Sasan A'anghel 1:4–2:18
Nangatngatu As Hesus An Moses Ja Josue 3:1–4:13
Nan Inangatun Nan Inapachin Kristu 4:14–7:28
Nan Inangatun Nan Intuyag Apudyus Gway Impatungpern Kristu 8:1–9:28
Nan Inangatun Nan Nangichatunan Kristu San Longagna 10:1-31
Nan Inapatog Nan Pammati 11:1-40
Nan Ingwhihwhijag Chanan Namati 12:1–13:19
Nan Mapungpungan Nan Suyat 13:20-25
1
Nan Ina'apudyus Hesus Gway Ana' Apudyus
(Juan 1:1-18)
1 Sa'ad san agwi nanginnadchu ja nan'aya'ayasi nan in'aman Apudyus gway na'aapapat sasan nerpugwan ta'u kapu sasan profetana. 2 Gwon sa'ad san annachaja mangudchi erkaw na'aapapat as sija an chita'u kapu san Ana'na gway sija nan chinutu'ana as mangin'ugwa san losan. Kapu ahos san Ana'na inggwan Apudyus chanan luhung ja chanan losanay agwad ad langit. 3 Nan Ana'na nan maillan nan ina'erjadna ja sija nan ustu'ustu ilan nan ina'apudyus Apudyus ancha sija nan manitingngil san losan kapu san ayobhongan nan ukudna. Nappungna kun inggwa nan losan tot ligwatan Apudyus nan whersun chanan taku, ummoy ad langit kun na'atuyay*1:3 Nan niigka san Griego “tummu'chu san machigwanan Apudyus.” san machigwanan Apudyus gway Amod nan Ayobhongana.
Nangatngatu Nan Ana' Apudyus Sasan A'anghel
4 Nangatngatu nan Ana' Apudyus sasan a'anghel kapu tan inatchan Apudyus as sija san saad ad langit gway nangatngatu an chicha. 5 Tan jo'o anan Apudyus san osa sasan a'anghelnaon,
“Si'a nan Ana''u,
san sana nangngachan sa'on nan Amam?Ӡ1:5 Mawhasa san Salmo 2:7.
Gwinnu jo'o anana hoson,
“Sa'on nan mangngachan Amana
ad sija nan mangngachan Ana''u?”‡1:5 Mawhasa san 2 Samuel 7:14.
6 Sa'ad san mangipaaliyan Apudyus san osossa''anay ana'na ad asna luhung anana,
“Cha'ajuway a'anghel'u maserpu chajagwonju losan as sija.”
7 Ad sa'ad nan mipangkop sasan a'anghel, anan Apudyus,
“Oon Apudyus chanan a'anghelna gway mansilsilwhi an sija as isun chi tungnin§1:7 Manisu nan pijaona anan nan Griego ukud gway “tungnin ja ispilitu”.
ja isun chi kukumngot gway apuy.”
8 Gwon nu mipangkop san Ana'na, anana,
“Sa'ad nan mantuyajam Apudyus, ingkaingkana
ja nalintog nan intuttuyaynu san mantuyajam.
9 Impatognu nan manggwaan san ustu kun kinuyam nan manggwaan san lagwing.
Sija nan sa'on gway Apudyusnu pinili' si'a
ja inggwa' si'a as nayagyagsa' sasan huhuyunnu kapu san chajaw gway inatod'u an si'a.”*1:9 Mawhasa san Salmo 45:6-7.
10 Kun anan ahos Apudyus san Ana'na,
“Si'a, Apu, nan nanggwa san luta san chamuchamu
ja chanan losanay agwad ad langit.
11 Mumaidcha gwon sumissija'a
ja losancha chumachaan as isun nan luput.
12 Ad tinupim chicha as isun nan akoy,
ad naorsancha hos as isun nan masu'atan nan luput.
Gwon sissija'a gway achi kun manohos,
ad sa'ad nan whijagnu achi kun mapungpung.Ӡ1:12 Mawhasa san Salmo 102:25-27.
13 Maid kun nangiwhagan Apudyus san osa sasan a'anghel as nanggwanaanaon,
“Ma'atuyay'a an sa'on
ingkanas ipaawha''u chanan ahursum
ad isucha nan layappangan nan i'im.”‡1:13 Mawhasa san Salmo 110:1.
14 Ad ngachan maangkay pangkop chanan a'anghel? Chicha nan achi mailaay mansilsilwhi an Apudyus gway whawha''unona tot humachangcha sasan takuway takuwona.
*1:3 1:3 Nan niigka san Griego “tummu'chu san machigwanan Apudyus.”
†1:5 1:5 Mawhasa san Salmo 2:7.
‡1:5 1:5 Mawhasa san 2 Samuel 7:14.
§1:7 1:7 Manisu nan pijaona anan nan Griego ukud gway “tungnin ja ispilitu”.
*1:9 1:9 Mawhasa san Salmo 45:6-7.
†1:12 1:12 Mawhasa san Salmo 102:25-27.
‡1:13 1:13 Mawhasa san Salmo 110:1.