2
Maserpu Chumngor Ta'u San Sussuyun Apu Hesus
1 Sa'ad tan angatuwan nan Ana' Apudyus, maserpu popotpotan ta'us amod chanan chingngor ta'u tot achi ta'u mijaw'awan san atuttugwaan. 2 Nipailaay tuttuwa chanan ukud Apudyus gway ingwhakan chanan a'anghel. Nu ngachan nan mallabsing ja achi chumngor maagwatna nan ustuway chusana. 3 Maid kun chugwachugwana gway achi ta'u kun malisiyan nan chusa nu achi ta'u chongyon nan napatokay sussuyu mipangkop san manakuwan Apudyus an chita'u. As Apu Hesus nan ummuna jan nangipaakammu san mipangkop sannaja sussuyu kun asinot chachay nangngor ipano'no' an chita'u. 4 Sa'ad as Apudyus impano'no'na hos gway tuttuwa nan ingwhakacha san nanggwaana an chicha sasan mangimatunan ja mataakan, san na'aya'ayasiyay inggwacha kapu san ayobhongana ja san nangatchana san umma'allasi ayobhongan gway nerpu san Ispilituna gway iwwayasna sasan whayugwona mangatchan.
Nangngachan Taku As Hesus Tot Takuwona Chita'u
5 Wha'on ku sasan a'anghel nan mantuyajon Apudyus san a''opgwa luhungay umali gway iwhakawhakami. 6 Gwon san nilistaay Ukud Apudyus agwad nan nangipano'no' gway anana,
“Maid kun patog nan taku ta sija nan sosom'om
gwinnu sija nan amamma''am.
7 Inggwam nan taku san sina'itanay chimpu as nawhawha nan saadna sasan a'anghel,
kun pinachajagwam as sija ja impawhigwhignus sija
8 kun impaituyaynu an sija nan losan.”*2:8 Mawhasa san Salmo 8:4-6.
San nangipaituyajan Apudyus san taku san losan, maid kun achina impaituyay an sija. Gwon san sana chaan ta'u maila nan losanay ipaituyayna an sija. 9 Gwon akammu ta'u nan mipangkop an Hesus gway nipawhawha san sina'itanay chimpu nan saadna sasan a'anghel tot kapu san inawhayun Apudyus maserpu matoy san humayugwan nan losan. San sana maila ta'us sija gway nichajaw ja nipangatu kapu san otoy gway inichamana.
10 Inggwan Apudyus nan losan ja inggwana chana tot michajaw as sija. Sija nan ustu nan inggwan Apudyus gway iyujanaay mapalikatan as Hesus tot kapu san likatna mangngachan as sija maid man'uyangana gway manaku sasan taku ja tot angsan nan mangngachan ana' Apudyus gway mitapi san chajawna.
11 Tan sa'ad as Hesus gway mangit'on san taku as ugwan Apudyus ja chanan taku gway it'onna as takun Apudyus, osossa''an losan nan Amacha. Kapu sannaja achi kun mawhain as Hesus gway mangagwag an chichas susunudna 12 gway manggwana an Apudyus,
“Ipaakammu' nan ngachannu sasan susunud'u,
man'antaa' an si'a san agwachan chanan maayuayus gway namati an si'a.Ӡ2:12 Mawhasa san Salmo 22:22.
13 Kun ingwhakana hos gway manggwana,
“Mantayo'a' an Apudyus.”‡2:13 Mawhasa san Isaias 8:17.
Kun ingwhakana hos gway manggwana,
“Annaa' gway nitatappi sasan anana' Apudyus gway inatodna an sa'on.”§2:13 Mawhasa san Isaias 8:18.
14 Sa'ad nannachaja inagwakan Apudyus as anana'na, takucha gway matoy. Sija nan sa'ad as Hesus nangngachan ahos taku tot matoy tot kapu san matojana mampapokona nan ayobhongan Satanas gway anna nan ayobhongana mangtoy sasan taku. 15 Ad kapu san matojan Hesus gwajagwajaana chanan taku gway anigcha nawhayud san ogjatcha gway matoy san losanay chimpun nan matattakuwancha. 16 Tan nayagwag gway wha'on ku sasan a'anghel nan whadngana gwon chanan “kana' Abraham” nan whadngana. 17 Sija nan san losanay inatatakun Hesus maserpu mangngachan as sija isu ta'u gway miwhilang as susunudna tot mangngachan sija nan angatuwanay pachi ta'u gway mangachaku ja napudnu san mansilwhiyana an Apudyus. Inchatunna nan longagna tot ligwatan Apudyus nan whersun chanan taku. 18 Kapu tan nallikat as sija ja nasulisukan gwon achi kun hummersu, mawhalin hosay whadngana chanan masulisukan.