3
Nangatngatu As Hesus An Moses
1 Susunud gway takun Apudyus gway isu' gway inajakana mitapi ad langit, maserpu ammanju somsom'on as Hesus gway iwhakawhaka ta'u gway sija nan ingwhaun Apudyus as mangipaakammu san ingwhakana ja angatuwanay pachi ta'u. 2 Napudnus sija an Apudyus gway nanutu' an sija gway isun Moses gway napudnu mansilwhi sasan wherjan Apudyus. 3 Gwon as Hesus niwhilangay nachaychajaw an Moses isun nan mangkakaob san hoyoy gway nachaychajaw san inggwana hoyoy. 4 Tan gwaschi hoyoy anna nan nanggwa gwon nan nanggwa san losan as Apudyus. 5 Ad as Moses kadto'ay napudnu as osaay mansilsilwhi san losanay takun Apudyus gway ingwhilangnas wherjanna. Ipano'no'na nan paiwhakan Apudyus san umali chimpu. 6 Gwon as Kristu napudnu as osaay Ana' gway mangaaygwan sasan takun Apudyus gway ingwhilangnas wherjanna. Ad chita'u nan wherjan Apudyus nu natuyod ta'u ja popotpotan ta'u as amod nan namnamaon ta'u.
Nan Tudtudchu Ta Achin Chanan Namati Manchu'kan As Apudyus
7 Impailistan nan Ispilitun Apudyus san nangilista san Ukud Apudyus gway anana,
“San sana erkaw nu chongyonju as Apudyus,
8 achiju pawhatugwon nan somsomo'ju as isun nan inggwan chanan nerpugwanju gway sinu'ilcha as sija
san chimpun nan namachasancha an sija san luta gway maid kun ingkaw as taku.
9 Anan Apudyus, ‘Pinachasa' sasan aammaju ad aschi
ta'on nu inilacha nan inggwa' san opat puyuway tagwon.
10 Patinajunay ayasi nan somsomo'cha
ja achicha kun oon nan iwhaka' an chicha.
11 Sija nan kapu san lingu' ingwhawhagka' gway
achicha kun puyus mawhalinay umoy san ikaw gway insasagkana' gway umillongancha.’ ”*3:11 Mawhasa san Salmo 95:7-11.
12 Susunud, ammanju ilan tot maid osa an cha'ajus lagwing nan somsomo'na gway achi mamati an Apudyus tan sachi nan manu'ukana an Apudyus gway mawhiwhijag. 13 Gwon mampipinnapigsa ajuwot san somsomo' san whinikat san annaan nan chimpuway ma'gwaniyon, “sana gway erkaw” tot maid osa an cha'ajus humatu nan somsomo'na kapu san maallilagwanjuway humersu. 14 Tan losanay agwad an Kristu ugwa ta'u kahos nu napudnu ta'u san pammati ta'u gway sissija mantayo'an ta'u an Apudyus gway impaila ta'u san chamuway namatiyan ta'u an sija.
15 Sija nan anana san Ukud Apudyus,
“San sana erkaw nu chongyonju nan kingan Apudyus,
achiju pawhatugwon nan somsomo'ju
as isun nan inggwan chanan nerpugwanju gway sinu'ilcha as Apudyus.” †3:15 Mawhasa san Salmo 95:7-8.
16 Ngachan chachay nangngor kusan kingan Apudyus kun sinu'ilcha as sija? Losan chachay impangpangun Moses illagwa ad Egipto. 17 Ad ngachan chachay nalingugwan Apudyus san opat puyuway tagwon? Chachay takuway hummersu gway natoy san luta gway maid kun ingkaw as taku. 18 Ad ngachan chachay nangiwhawhagkaan Apudyus gway achicha kun mawhalinay umoy san ikaw gway insasagkanana an chichas umillongancha? Ahus chachay achi kun chinumngor an sija. 19 Sija nan akammu ta'uway achicha kun ummoy kapu san inamaid nan pammaticha.