Maktubm gɛn Ɛbrege
Kupm mɛtn taar taaɗjeki ɗoobm gɛn dooy maktubm gɛn Ɛbrege
Maktubm gɛn *Ɛbrege se debm kɛn raaŋin̰ se, kꞋtaaɗ te ron̰ eyo ɔɔ jee kɛn kꞋraaŋɗen maktubm se kic ɓo kꞋjeelɗe eyo. Debm kɛn raaŋo maktubm ara se, naan̰ jeel ɔk Kitapm gɛn Raa dɔɔko ute jeege do dɔkin̰ se jiga. Jee al‑Masigen naan̰ raaŋɗen maktubm ara se, Ꞌtɛɗn Yaudge. Jee al‑Masigen gɔtn ese se, jaay nakgen ɔɔn̰ lee aan doɗe ki se tɛɗɗen maakɗe tuju ɔɔ kaal maakɗen mɛtn‑jiki se kic ɓo ɓaa urlga. Ɔɔ jee mɛtin̰ge se, jenoga rɛsn ute ɗoobm al‑Masi se naatn. Anum naan̰ raaŋɗe se, je aɗen kɛɗn kaay kaama. Ute ɗoobm al‑Masi kɛn Raa ɔlin̰o se ɔl jikilimge taarɗe ɓaa ute Raa (kon̰ 1.1–2.18). Ɗeere, al‑Masi se naan̰ Goon Raa ɔɔ naan̰ se Raa mala mala. Ɔɔ naan̰ ɓaaɗo tɛɗga debkilimi mala mala (kon̰ 1.3). Kooy kɛn naan̰ ooy se aan gɔɔ jikilimgen lee ooy se, kusin̰ kɛn ɔk tɔɔgɔ do jeege tu se, tɔɔgin̰ se naan̰ tɛɗin̰ga tɛɗga gɔtɔ (kon̰ 2.14). Ute bɛɛ kɛn al‑Masi tɛɗ se ɓo, jee took aal maakɗe don̰ ki se Ꞌkɔŋ ɓaa cɛɛsn Raa ki (kon̰ 3.1–5.10). Taa al‑Masi se ook ɓaaga bini aanga gɔtn Raa ki ɔɔ naan̰ ɓo Raa ɔndin̰ga tɛɗga magal debm tɛɗn sɛrkɛ Raa ki gɛn jee kɛn took aal maakɗe don̰ ki (kon̰ 5.11–10.31). Isa se tec aan gɔɔ magal gɛn jee tɛɗn sɛrkɛ Raa ki do dɔkin̰ se eyo taa naan̰ se tiŋg gɛn daayum. Maakŋ Kitapm kɛn Raa dɔɔko ute jeege do dɔkin̰ se, jee tɛɗn sɛrkɛ Raa ki se daayum naaɗe lee tɔɔl mooso taa Raa aɗen tɔɔl kusin̰ɗe. Num gaŋ al‑Masi se ɛɗ ron̰ sɛrkɛ taa kusin̰ jeege jɛ‑kalaŋ sum ɔɔ gɛn sɔrɔkin̰a. Taa naan̰ se ɓo ɓɔrse jee al‑Masige se iŋgga do ɗoob kɛn kiji ɔɔ naaɗe se Ꞌkɔŋ tɛrl ute mɛtɗe ey sum. Bin ɓo kaal maakŋ gɛn jee do dɔkin̰ se taaɗɗesin̰ taa aɗen tɛɗn saaɗa (kon̰ 11‑12). Saaɗn kɛn naan̰ taaɗɗen ese ɓo kɛn ɛɗɗen kaay kaama maakŋ nakge tun ɔɔn̰ kɛn aan doɗe ki ute nakŋ naam kɛn ɓɔrse aan doɗe ki se kici.
1
*Raa taaɗjeki ute taar Goonin̰a
1 Do dɔkin̰ se, Raa lee taaɗo ɓugjege tu ute taar jee taaɗ taar teeco taar Raa ki se mɛt dɛna ɔɔ ute ɗoobm jeege dɛna. 2 Gaŋ ɓɔrse se maakŋ ɓiige tun kaam mɔɔtn ara se, naan̰ taaɗjekiga ute ɗoobm Goonin̰a ɔɔ Goonin̰ se ɓo, naan̰ bɛɛr ɔndin̰o ɔɔ ɛɗin̰ga nakge paac kaam jin̰a. Ɔɔ ute ɗoobm Goonin̰ se ɓo naan̰ aalo nakgen ɓaa se paac kici. 3 Goon ese se ɓo kɛn taaɗ *nookŋ Raa kɛn wɔɔr gɔtɔ kɛlɛŋ ɔɔ naan̰ se tec Raa mala mala. Ute taar naan̰ kɛn ɔk tɔɔgɔ se ɓo, nakgen ɓaa se paac naan̰ tɛɗɗe utu tiŋg gɔtɗe ki. Kɛn naan̰ jaay tug *kusin̰ jikilimge aas sum se, naan̰ ook ɓaa iŋg maakŋ raa ki do ji daam Raa Sidburku ki.
Isa se naan̰ magal cir *kɔɗn Raage
4 Goonin̰ se, Raa ɔndin̰ga raan do kɔɗn Raage tu ɔɔ bin ɓo ro kɛn Raa ɛɗin̰ se, cir gɛn kɔɗn Raage. 5 Taa ɓii kalaŋ tap ɓo Raa taaɗ te kɔɗin̰ kɛn gam eyo, kɛn an̰ ɗeekŋ ɔɔ:
Naai se, ꞋGoomuma,
jaaki maam mꞋtaaɗn naan jeege tu paac maam ɓo mꞋBubi.*Aak KKR 2.7.
Tɛr daala kɔɗn Raa kɛn gam tap ɓo Raa taaɗin̰ te eyo, kɛn an̰ ɗeekŋ ɔɔ:
Maam se mꞋtɛɗn Bubi ɔɔ naai lɛ am Ꞌtɛɗn goonuma.†Aak 2Sam 7.14 ɔɔ 1Krk 17.13.
6 Num tɛr daala, kaaɗ kɛn naan̰ ɔlo Goon paragin̰‡Isa se naan̰ goon paragŋ kalaŋ lak, gɔɔsin̰ gɔtɔ. do duni ki se, naan̰ ɗeek ɔɔ:
Ɔn̰ kɔɗumge paac kɛrɛgŋ naanin̰ ki.§Aak Dt 32.43 ɔɔ KKR 97.7.
7 Gɛn kɔɗin̰ge se Raa taaɗ ɔɔ:
Naaɗe se jee tɛɗn naabumge,
naaɗe se tec aan gɔɔ kuulu ɔɔ aan gɔɔ rɔɔn̰ pooɗo.*Aak KKR 104.4.
8 Num gɛn Goonin̰ ki se, Raa taaɗin̰ ɔɔ:
Gaar naai Raa se tiŋg gɛn daayum,
ɔɔ jeeige se lɛ, naai tɔɔɗɗe ute ɗoobm daan ki.
9 Naai lɛ Ꞌje nakŋ ute ɗoobin̰a
ɔɔ nakŋ *kusin̰ se naai ɔɔɗ undin̰ naatn.
Taa naan̰ se ɓo Bubi Raa, naan̰ ɔɔyiga uubu doi ki gɛn maak‑raapo kɛn taaɗ ɔɔ
naai se gaarge ɔɔ maakŋ parige tu se naai ɓo magal cirɗe.†Aak KKR 45.7‑8.
10 Tɛr Raa ɗeekin̰ daala ɔɔ:
Kɛse ɓo naai, Mɛlje, do kupm mɛt ki se naai aalo do naaŋa
ɔɔ maakŋ raa lɛ naai tɛɗin̰o te jii.
11 Nakgen se paac utu Ꞌtuju, gaŋ naai se tiŋg gɛn daayum.
Ɗeere, maakŋ raa ute do naaŋa se utu Ꞌkooy koono aan gɔɔ kala.
12 Ɔɔ naai utu aɗen tuɗn aan gɔɔ kala
ɔɔ utu aɗen pɛlɛkŋ aan gɔɔ kɛn kꞋlee kꞋpɛlɛkŋ kalge se.
Num naai lɛ Ꞌtɛrl roi eyo ɔɔ daayum daayum naai iŋg gɔti ki.‡Aak KKR 102.26‑28.
13 Ɔɔ taa ɓii kalaŋ tap ɓo Raa taaɗ te kɔɗin̰ kɛn gam eyo, kɛn an̰ ɗeekŋ ɔɔ:
ꞋƁaaɗo iŋg do ji daamum ki,
bini jee taamooyige se maam mꞋaɗen Ꞌtɛɗn naai ɓo kiŋg doɗe ki.§Aak KKR 110.1.
14 Kɔɗn Raage se tap ɓo naaɗe naŋge? Naaɗe se jee kaan̰ naabm Raagen paacn̰ jꞋɔŋ jꞋaakɗen eyo, ɔɔ Raa ɔlɗeno se taa noogŋ jeegen kɛn Raa utu aɗen kaaja.