Barʉ́wa ya Paúli kwa
Filemóoni
Mʉlongooryo
Barʉ́wa ɨhɨ yaandɨkwa nɨ Paúli. Mʉʉntʉ ˆaandɨkɨrwa barʉ́wa ɨhɨ nɨ Filemóoni (1:1, 19, 21). Vamanyi va Masáare ˆYarɨ Mpeho vaséaa kʉʉntʉ Filemóoni ˆiikaláa, nɨ múuji wa Kolosáai (Vakolosáai 4:9). Kei, ʉhʉ Filemóoni nɨ musúngaati ajáa na ajáa atɨɨte vatʉ́mwa. Yeeye ajáa amuruma Yéesu na nɨ kaayii kwaachwe noo kʉʉntʉ vaantʉ ˆvamuruma Yéesu ˆvalʉmanɨráa (1:2). Paúli na Filemóoni vajáa viimányire vyabooha (1:7, 22).
Paúli aandɨka barʉ́wa ɨhɨ mpɨɨndɨ ˆajáa achuungwa ʉko Róoma kati ya myaaka ya 61-62 keende Kirisitʉ ˆavyaalwa. Paúli aandɨka barʉ́wa ɨhɨ sa mʉtʉ́mwa wa Filemóoni ˆmweene akemerwáa Onésimo. Ʉhʉ mʉtʉ́mwa ajáa amʉtɨɨja Filemóoni (1:18). Ʉko Róoma ajáa alʉmana na Paúli, na Paúli akamʉvariyʉrɨra Masáare Maaja ya Yéesu Kirisitʉ, ne akamʉvarindʉkɨra Yéesu (1:10).
Mpɨɨndɨ jira, koonɨ mʉtʉ́mwa ajáa amutíijire mweenenyuumba waachwe na akwáatirwe nɨ lamʉrɨrwa alamʉrɨrwáa ʉʉlawe. Haaha Onésimo asaakáa ahɨndʉke na kwa Filemóoni mweenenyuumba waachwe. Paúli akoona amwaandɨkɨre barʉ́wa sa adome noyo. Paúli amʉloomba Filemóoni amʉhokere Onésimo ja mwaanaavo kwa Kirisitʉ (1:16).
1
Lʉmbɨ ya Paúli kwa Filemóoni
1 Barʉ́wa ɨhɨ yafúmire kʉrɨ nɨɨnɨ Paúli ˆnachuungwa sa KirisitʉYéesu, na Timotéeo mwaaniitʉ. Tookwaandɨkɨra weewe Filemóoni, mʉtʉmami mwiiwiiswi, ˆtakweenda, 2 na irʉʉmbʉ riitʉ Afía na Aríkipo, mʉnyaampala mwiiwiiswi. Kei tookaandɨkɨra mpuka ya vaantʉ ˆvamuruma Yéesu ˆveene valʉ́manaa kaayii kwaako. 3 Nduwo na mwiikalo mʉʉja fuma kwa Mʉlʉʉngʉ Taáta wiitʉ na kwa Yéesu Kirisitʉ Mweenevyoosi wiitʉ, jive na nyuunyu.
Kweenda kwa Filemóoni na Kumuruma Mʉlʉʉngʉ
4 Kɨra siikʉ kati ˆnoomʉloomba Mʉlʉʉngʉ, nakʉkʉ́mbʉkɨraa na namʉdʉ́ʉmbaa Mʉlʉʉngʉ sa weewe. 5 Nɨ bweeyya niise jei, sa nateera mbuwo ja viintʉ ˆumuruma Mweenevyoosi Yéesu na ˆvyeene ʉveenda vaantʉ voosi va Mʉlʉʉngʉ. 6 Nooloomba kuruma kwaako kʉve kɨɨntʉ kɨmwɨ na kuruma kwa vaantʉ vɨɨngɨ sa ʉtaange kukiimana kwa masáare yoosi ˆyabooha ˆmeene tapata kwa Kirisitʉ. 7 Mwanawiitʉ, kweenda kwaako kwaanjériirye mʉtɨma, na kwaampɨ́ɨre mʉtɨma kamwɨ, sa wavoonʼya mwerere vaantʉ va Mʉlʉʉngʉ.
Paúli Yooloomba sa Onésimo
8 Sa jei, baa neembe ndɨrɨ na lʉvɨro kwa Kirisitʉ lo kʉlairirya ʉtʉmame ˆvyeene vyoosaakwa, 9 maa kaa, nɨɨnɨ nɨɨ́ne nɨ viija nɨkʉloombe ko kiiyenda. Nabwéeyyiirye jei baa neembe nɨɨnɨ nɨ moosi Paúli ˆnachuungwa sa Kirisitʉ Yéesu. 10 Aaɨ nookʉloomba sa mwaana waanɨ Onésimo. Ʉhʉ, kʉnʉ kʉʉntʉ ˆnachuungwa, namʉvariyʉrɨra Masáare Maaja ne aava mwaana waanɨ ko muruma Yéesu. 11 Aho ncholo Onésimo*Onésimo: Nɨ isáare ra Kɨgiríki, noo kʉsea mʉʉntʉ ˆarɨ na kʉnáálo. ajáa asiina kʉnáálo kwaako tʉkʉ, maa kaa, haaha, avɨ́ɨre na kʉnáálo kwaanɨ baa na kwaako.
12 Baa neembe namweendamweenda, nɨ kʉmʉhɨndʉla niise na kwaako. 13 Kwaanɨ naakeenda ngaarɨ achaale na nɨɨnɨ aha, sa aantʉmamɨre kɨpaango chaako mpɨɨndɨ nɨɨnɨ ˆnkaarɨ neékɨɨrwe nyuumbii sa Masáare Maaja. 14 Maa kaa, kisiina ngaarɨ ˆnabwéeyyiirye tʉkʉ bila weewe kʉʉndekera mbweeyye jeyyo. Koonɨ woosaaka kʉʉnyambirirya, nyambirirya ja ˆvyeene weewe ʉrɨ keenda, maa kaa, kʉsɨve kwa njɨra yo kʉdoomererya tʉkʉ. 15 Ifaanaa ɨkava Onésimo akerwa na weewe kwa mpɨɨndɨ kiduudi sa ahɨndʉke na kwaako, wiikale ne sikʉ joosi. 16 Haaha, Onésimo sɨ mʉtʉ́mwa vii tʉkʉ, maa kaa, yeeye nɨ mwaaniitʉ kwa Kirisitʉ na tamweenda. Nɨɨnɨ namweenda maatʉkʉ vii, maa kaa, weewe mweenda ʉrɨ kʉlookya ja mʉtʉmami waako, kei ja mwaanaanyu kwa Mweenevyoosi.
17 Sa jeyyo, koonɨ wookʉʉmbɨɨka ja mwiiwaako ˆtʉtʉ́mamanʼyaa, mʉhokere ja ngaarɨ ˆvyeene wʉʉmpókɨɨre nɨɨnɨ mweeneevyo. 18 Koonɨ baa ahonʼya kɨmwɨ, au baa koonɨ arɨ na noongwa yaako, ndaayya nɨɨnɨ. 19 Nɨɨnɨ Paúli naándikire kwa mʉkono waanɨ, rɨha ndɨrɨ. Maa kaa, sɨ ndɨrɨ kuwyɨɨra weewe ʉtɨɨte noongwa yaanɨ ya nkaasʉ yaako tʉkʉ. 20 Mwanawiitʉ! Nyambirirya kwa Mweenevyoosi. Kei nooloomba wʉʉnjerye mʉtɨma kwa Kirisitʉ. 21 Naándikire kʉnʉ nootaanga kɨkomi tʉmama ʉrɨ kʉlookya baa ayo ˆnalóombire.
22 Hamwɨ na ayo, nooloomba wuunyimirye neeja haantʉ ˆnkɨɨndoojookiikala. Sa kwa kʉlʉʉsɨka kwaanyu na Mʉlʉʉngʉ, nookoona Mʉlʉʉngʉ kʉʉnchʉngʉrɨra arɨ na kʉʉja ndɨrɨ na meenyu.
Lʉmbɨ yo Kiimikirirya
23 Epáfura, akulúumbiirye. Yeeye eekerwa na nɨɨnɨ sa mʉrɨmo wa Kirisitʉ Yéesu. 24 Kei vatʉmami viiviiswi va aha, vala Maáriki, Aristáriko, Déema na Lʉ́ka vakulúumbiirye.
25 Nduwo ya Yéesu Kirisitʉ Mweenevyoosi ɨve na nyuunyu voosi.
*1:11 Onésimo: Nɨ isáare ra Kɨgiríki, noo kʉsea mʉʉntʉ ˆarɨ na kʉnáálo.