2
E Karisito anundala tena arnangai
1 2:1 Hibru 9:24Na natnatukla, a tumus a ututnala ne tetek mulo sur gong mulo tol a toltol laulau. Ika ning tik ir tol a toltol laulau, anundala a tena arnangai, e Iesu Karisito a Tena Tostos, ir warwara sur esaning tetek e Tamana. 2 2:2 Jon 1:29; Kolosi 1:20; 1 Jon 4:10I ot i mat sur ir lou langolango pas dala kusun anundala na toltol laulaula, pa ir arop sen a balakut ane God, ning nating kaning ondala. Pa bel i mat sur anundala na toltol laulaula ka, a toltol laulaula anuna taraila rop te na rakrakan hanua.
3 Ning dala longor ana nuna warkuraila, dala talapor mang dala tasman ot e God. 4 Ning tik i atongi mang, “A tasman e God,” ika bel i longor ana nuna warkuraila, i a tena asasongo, pa momolna bel i kes ono. 5 2:5 Jon 14:21, 23Ning tik ir longor ana warwara ane God, ir mang momol sur e God. Dala tasmani mang dala ane God mange: 6 Ning tik i atongi onoi mang ai ane God, ir laun arlar ana lalaun ane Karisito.
A tona warkurai
7 2:7 Jon 13:34; 2 Jon 1:5-6Na halalik, bel a tona warkurai ne a tumusi tetek mulo, a turaina, ning mulo ka longor tari tagun nating ot. A warkurai ne, mulor mang sur na tastasimulo. 8 2:8 Rom 13:12; Jon 1:9Ika a warkurai ning, tuk onone i totoh ot. A momolna ana warkurai ne di oroi oe Karisito, pa omulo otleng, anasa a mormorom i rop amon, pa talapor momol ka hanot.
9 2:9 1 Jon 4:20Esining i atongi mang i kes ana talapor, ika i nget e tasnalik, a barsan ning kaning ot i kes ana mormorom. 10 2:10 Rom 14:13Ika ning tik ir mang sur e tasnalik, i laun ana talapor pa bel ta utna kaning ana nuna lalaun ir tolsot sur ir apungani. 11 2:11 Jon 12:35Ika esining i nget e tasnalik, i kes ana mormorom, pa i hanan ana mormorom, pa bel i tasmani mang i han utaha, anasa a mormorom ka san akut pas a matana.
12 A tumtumus tetek mulo a kakakla, anasa di ka kepsen anumulo na toltol laulau ana risana e Karisito.
13 A tumtumus tetek mulo a tatatnan tarai, anasa mulo ka tasman esaning i laun tagun nating ot.
A tumtumus tetek mulo a barmanla, anasa mulo ka tolsot pas e Satan.
A tumtumus tetek mulo a kakakla, anasa mulo ka tasman e Tamandala.
14 A tumtumus tetek mulo a tatatnan tarai, anasa mulo ka tasman esaning i laun tagun nating ot.
A tumtumus tetek mulo a barmanla, anasa mulo rakrakai, pa warwara ane God i kes ting na balamulo, pa mulo ka tolsot pas e Satan.
15 2:15 Rom 8:7Gong mulo mang sur a rakrakan hanua, pa ututnala otleng ning kaning ia. Ning tik ir mang sur a rakrakan hanua, i asangani mang bel i mang sur e Tamandala. 16 2:16 Rom 13:14Anasa a ututnala ning la kes te na rakrakan hanua, larne a laulau a nuknuk te na balandala, a ram sur a ututnala ning dala oroi, pa toltol na iaunan ana gongon anundala pa anundala titol. A ututnala ning, bel i han miting ta e Tata, i hanot mite na rakrakan hanua. 17 2:17 Matiu 7:21A rakrakan hanua pa laulau a nuknukna lar rarop ka, ika esining i mur a nuknuk e God, ir laun tikin.
A hiruala ane Karisito
18 2:18 Matiu 24:5, 24; 2 Jon 1:7Na natnatukla, onone dala kes ana ararop a pukakiarla. Mulo ka longor tari mang a hirua ane Karisito ir hanot, pa onone a galis a hirua la ka hanot. Larning dala tasmani mang a ararop a pukakiar ka milau. 19 2:19 Aposel 20:30Na hirua ane Karisito la lasan taum ondala, ika la ka han, anasa la bel tagun dala momol. Ning la tagun dala momol, la kar kes tikin taum ondala. Ika anunla tinan kusun dala i asangani mang la bel tagun dala.
20 2:20 1 Korin 2:15Ika mulo, e Karisito ka saran tar a Talngan Tabu tetek mulo. Pa mulo rop mulo ka tasman tar a momolna. 21 Bel a tumtumus tetek mulo kamkamna mang bel mulo tasman a momolna. A tumtumus tetek mulo anasa mulo ka tasman tar a momolna, pa momolna bel i kamkamna on ta asasongo. 22 2:22 1 Jon 4:3; 2 Jon 1:7Esi a tena asasongo? Esining i puai mang e Iesu bel a Karisito. Esaning i atongi larne, ai a hirua ane Karisito, anasa i puain sen e Tamana pa e Natnalik. 23 2:23 Jon 5:23; 1 Jon 4:15; 5:1Tik ning i puain sen a Nat e God, e Tamana otleng bel i kes onoi. Pa tik ning i patuai talapor oe Natnalik, e Tamana otleng i kes onoi.
24 I wakak ning a asaerla rop ning mulo longor tari nating ot, ir laun omulo. Ning i laun omulo, mulo otleng mulor laun oe Natnalik, pa oe Tamana. 25 Asaning i lele tari sur ir sarani tetek dala, i a lalaun tikin.
26 A tumus a ututnala ne tetek mulo, sur ar atumarang mulo kusun la ning la mang sur lar ben rongon mulo. 27 2:27 Jon 16:13A Talngan Tabu ning e Karisito i saran tari tetek mulo, i laun omulo, pa bel mulo kapan sur tik ir asaer mulo. Anasa a Talngan Tabu i asaer mulo ana ututnala rop. Pa utna ning i asaer mulo ono i momol, pa bel a asasongo. Mulor nuk akes a asaer ne sur mulor laun oe Karisito.
28 Momol, a natnatukla, mulor patap oe Karisito, sur gong dala matmataut pa gong dala meme na matana, ana nuna tinan ot. 29 2:29 1 Jon 3:10Mulo tasmani mang e God a tena tostos, pa mulo tasmani otleng mang la rop ning la tol a tostos a toltol, la na natnat e God.
2:1: 2:1 Hibru 9:24
2:2: 2:2 Jon 1:29; Kolosi 1:20; 1 Jon 4:10
2:5: 2:5 Jon 14:21, 23
2:7: 2:7 Jon 13:34; 2 Jon 1:5-6
2:9: 2:9 1 Jon 4:20
2:17: 2:17 Matiu 7:21
2:18: 2:18 Matiu 24:5, 24; 2 Jon 1:7
2:19: 2:19 Aposel 20:30
2:20: 2:20 1 Korin 2:15
2:22: 2:22 1 Jon 4:3; 2 Jon 1:7
2:23: 2:23 Jon 5:23; 1 Jon 4:15; 5:1
2:29: 2:29 1 Jon 3:10