1 Bel ma mitol mang sur mitol ir kes kol, anasa mitol nuknuk kol o mulo. Mitol nuki mang i wakak ning mia ka ma e Sailas, miar kes te e Atens pa miar sune e Timoti. 2 Pa mia ka sune tar e Timoti a tasindala, pa a tena titol ane God taum o miau, ning mitol sira warwara talapor ana Wakak a Warwara o e Karisito. Mia ka sune seni tetek mulo, sur ir arakrakai mulo, pa ir warwara na harnangai tetek mulo ana numulo na tortorot, 3 sur gong tik tagun mulo a nuknukna ir loklokron ana mamahatla ning mulo kilangi. Anasa mulo tasmani ot mang a mamahatla ir kibas dala. 4 Ning dala kes taum, mitol sira atai mulo mang dir alaulau dala. Pa mulo ka tasmani mang a mamahatla ning ka hanot. 5 Ine a kamkamna ning a sune e Timoti tetek mulo. Bel a mang sur ar kes kol, anasa a nuknuk kol o mulo, pa a sune i tetek mulo sur ar tastasman ana numulo a tortorot. A matmataut, sakana a Tena Alam ka apungan ulak pas mulo, pa anumitol a titol tetek mulo ir utna oros ka.

6 Ika onone e Timoti ka ulak kusun mulo tingia ute tetek miau. I abaran a wakak a warwara talapor o mulo tetek miau, ana numulo a tortorot pa anumulo a marmaris. I atai miau mang mulo sira gas ning mulo sira nuk ulak pas anundala keskes taum nating, pa mulo mang kol sur mulor oroi mitol, larning mitol otleng mitol mang kol sur mitol ar oroi mulo. 7 Na tastasimitol, ning mitol kes na arpotor ana mamahatla ning mitol kilangi pa akadikla, anumulo a tortorot i arakrakai mitol. 8 Onone anumitol a lalaun i wakak kol, anasa mulo tur rakrakai ana Leklek. 9 Mitol gas kol o mulo namatana nundala God, pa mitol atong wakak teteki. Anumitol a gasgas i itna kol, pa bel mitol tolsot pasi sur mitol ar atong wakak sur ir arlar ana numitol a tnan gasgas. 10 Ana moromla pa a kabakiarla, mitol saran arop tar anumitol a lalaun ana nunung. Mitol nunung sur mitol ir oroi ulak mulo, pa mitol ar asaer mulo anal utna ning mulo kapan suri ana numulo a tortorot.

11 Pa mitol nunung mang e God a Tamandala pa nundala Leklek e Iesu, ir atalapor anumitol a ngas sur mitol ar han tetek mulo. 12 Pa mitol nunung otleng sur a Leklek ir agomo numulo a marmaris sur ir bukus pa ir taptapek artalai o mulo pa tetek a tarai masik otleng, lar anumitol a marmaris tetek mulo. 13 Manglarning, a Leklek ir arakrakai mulo sur mulor totoh, pa bel dir arup sot pas mulo on ta rongo, ning mulor tur namatana e God a Tamandala, ana pukakiar ning anundala Leklek e Iesu ir hanot, taum ana nuna tarai rop.