1 Ning a ututnala ne ka rop, e Pol i han mitumo e Atens uto e Korin. 2 18:2 Rom 16:3Dia arsongo taum ana ning a te Juda tingia, a risana e Akuila, i mitumo e Pontus, pa nuna hane, a risana e Prisila. Nating ka dia han mitumo e Itali, anasa e Sisar Klodius i warkurai i mang a tarai Juda rop lar han mitumo e Rom, a tnan hanua tumo e Itali. Pa e Pol i han sur ir geren diau. 3 18:3 Aposel 20:34I kes taum ondiau pa ditol titol taum, anasa ditol natol a tena tol rumai a sel. 4 Ana Pukakiar Sabatla i warwara taum onla ting na rumai lotu, sur ir dat atur a nuknuk a tarai Juda pa la otleng ning bel a tarai Juda sur lar tortorot oe Iesu.

5 18:5 Aposel 17:14-15Ning e Sailas pa e Timoti dia hanot mitumo na papar Masedonia, e Pol bel i manah ana warawai ana warwara ane God, pa i apuasa i tetek a tarai Juda mang e Iesu a Karisito esaning e God i sune i ute. 6 18:6 Aposel 13:46, 51; 20:26Ika a tarai Juda la warwara alalar ka a asaer ane Pol pa la atong saksakani. Pa e Pol i daplan anuna kaen, a asilang mang bel ma ir warwara ulak tetek la. Pa i atai la mange, “Ning mulor hirua ana warkurai ane God, mulo ot a kamkamna, pa ia ka langolango. Turpasi onone, ar han kama tetek la ning bel a tarai Juda.” 7 Pa i purum kusun a rumai lotu, pa i kas uting na rumai anuna ning a barsan, a risana e Titius Jastus, a tena lotu tetek e God, pa anuna rumai i tur milau a rumai lotu. 8 E Krispus a ningnigo miting na rumai lotu pa la rop otleng ning la kes ting na nuna rumai, la tortorot ana Leklek. Pa galis a tarai Korin, ning la longor a warawai ane Pol, la tortorot, pa di baptais la.

9 18:9 Josua 1:9; Aisaia 41:10Ning a morom a Leklek i warwara tetek e Pol ana tatatai mange, “Gong u matmataut, ur warwara ka. Gong u kes longoroi, 10 anasa a kes taum hom, pa bel tik ir alaulau u, anasa anuk a galis a tarai kane na hanua ne.” 11 Pa e Pol i kes tingia ning a rau pa diono na kalang, pa i asaer la ana warwara ane God.

12 Ana rau ning e Galio i ningnigo tumo na papar Akaia, a tarai Juda la tur taum sur lar um e Pol, pa la beni sur ir tur ana warkurai. 13 Pa la atongi mange, “A barsan ne i asaer a tarai sur lar lotu tetek e God ana toltol ning bel i arlar ana Warkuraila anumila a tarai Juda.” 14 Ning e Pol i mang sur ir warwara, e Galio i atai a tarai Juda mang, “Mulo a tarai Juda, ning a utna ne i toli ir laulau, pa bel i mur a warkurai anuna matanitu, ir tostos sur ar longor mulo ono. 15 Ika ning mulo tiwi ka ana warwarala, pa ana risingla, pa ana numulo na warkuraila ot, i wakak ning mulo ot mulor warkurai i. Iau bel ar warkurai a toltolla larne.” 16 Pa i kepsen la kusun a keskes a warkurai. 17 Pa la rop la tong akes pas e Sostenes, a ningnigo miting na rumai lotu anuna tarai Juda, pa la umi na matana keskes a warkurai. Ika e Galio bel i pos balana ana utna ne.

18 18:18 Namba 6:18; Aposel 21:24Ning e Pol ka kes bongnani tumo e Korin, i han kusun la ning la tas ana tortorot pa i han uto e Senkria. Ning i kes tingia di kumur arop a hihna, anasa ka tolsot pas anuna lele tetek e God. E Prisila pa e Akuila taum oe Pol ditol kas ana sip utumo na papar Siria. 19 Ning a sip i sot to e Epeses, e Pol i han kusun diau tingia, pa i kas uting na rumai lotu, pa i warwara taum ana tarai Juda. 20 Ning la nunungi sur ir kes al siklik taum onla, bel i longor tanla. 21 Pa ning la han sarara, i atai la mange, “Ning a nuknuk e God, ar ulak tetek mulo.” Pa i han mitumo e Epeses ana sip.

22 Ning i sot to e Sisaria i han usaot e Jerusalem pa i oroi tar a tarai a lotu, pa lamur i han uto e Antiok. 23 Ning ka kes pas dingla na pukakiar tingia, i han kusun la. Pa i han taltal ting na hananuala ting na naur a papar Galesia pa e Prigia, pa i arakrakai a tortorot anuna tarai a asaer rop.

24 Ning a te Juda mitumo e Aleksandria, a risana e Apolos, i hanot to e Epeses. I ning a wakak a tena warwara, pa i tastasman kol ana Buk Tabu. 25 Di ka asaer tari ana ngas anuna Leklek, pa i gas kol sur ir warawai. I asaer wakak oe Iesu, ika i tasman ka a baptais ane Jon*18:25 A baptais ane Jon ona lingir a nuknukindala. E Apolos bel i tasman a baptais ane Iesu Karisito. A baptais ane Iesu Karisito ona tortorot ana minat e Iesu sur ir alaun dala.. 26 I han uting na rumai lotu pa i turpas a warwara pa bel i matmataut. Ning e Prisila pa e Akuila dia longori, dia ben pasi, pa dia atong talapor a ngas ane God teteki. 27 Ning e Apolos i mang sur ir han utumo na papar Akaia, la ning la tas ana tortorot to e Epeses, la wunan tari, pa la tumtumus tetek a tarai a asaer tumo e Akaia, sur lar gas pasi. Pa ning ka hanot tumo na papar Akaia, ai a wakak a tena arnangai tetek la, ning e God ka lingir pas la ana tnan marmaris anunai sur lar tortorot. 28 18:28 Aposel 9:22Anasa i keles rakrakai a warwara anuna tarai Juda na matana tarai ning la puai mang e Iesu bel a Karisito. Pa i amomol tari ana warwara na Buk Tabu mang e Iesu ot a Karisito.