1 Ning mila ka han kusun la, mila kas ana sip sur milar han tostos utumo na lolo Kos. Pa ana pukakiar lamur, mila han utumo na lolo Rodes, mitingia mila han utumo e Patara. 2 Pa mila pastek pas ning a sip tingia, ning ir han utumo na papar Ponisia. Mila kas ono, pa mila han. 3 Mila oroi a lolo Saiprus i kes ting na ris a kair imila, mila bolosi. Pa mila han utumo na papar Siria, pa mila sot tumo e Tair, sur a sip ir asirok a ututnala. 4 21:4 Aposel 20:23Ning mila pastek pas a tarai a asaer tingia mila kes pas mais a pukakiar taum onla. Pa Talngan Tabu i anuknuk la ana warwara mang, e Pol gong i han usaot e Jerusalem. 5 Ika ning ka rop anumila na pukakiar na keskes tingia, mila ulak, pa tarai a asaer rop taum ana nunla na gurara pa na natnatunla la tur tulan mila miting na hanua utumo latasi. Lamur mila tur ana bokona hamila, pa mila araring. 6 Ning mila ka artulai tar, mila kas ana sip, pa la, la ulak sur uting na nunla na rumai.

7 Mila han mitumo e Tair pa mila sot to e Tolemes, pa mila gas pas la ning la tas ana tortorot, pa mila kes taum onla ning a pukakiar. 8 21:8 Aposel 6:5; 8:40Ana pukakiar lamur, mila han ulak, pa mila hanot to e Sisaria, pa mila kes ting na rumai ane Pilip, a tena warawai ana Wakak a Warwara, i ning a hala mais a barsan, ning a aposella la ka aslang pas la. 9 A barsan ne, diat a natna hane, ning bel la taulai pa la sira warwara na propet.

10 21:10 Aposel 11:28Ning mila ka kes tingia a galis a pukakiar, ning a propet, a risana e Agabus, i hanot misaot na papar Judia. 11 21:11 Aposel 20:23; 21:33I han tetek mila, i los pas a let ane Pol, pa i dot pas naur a hana pa naur a kuna ot ono, pa i atongi mange, “A Talngan Tabu i atongi mange, a tarai Juda saot e Jerusalem lar dot a barsan ning anuna let ne larotne a toli, pa lar sarani uting na kuna tarai ning bel a tarai Juda.”

12 Ning mila longor a warwara ne, mila taum ana tarai miting na hanua ning, mila sairas e Pol sur gong i han usaot e Jerusalem. 13 21:13 Aposel 20:24Ika e Pol i keles la mange, “Sur asaning mulo domos, pa mulo abalmaris iau? Ia ka saran tar iau sur lar dot iau pa dir umkol iau otleng saot e Jerusalem, anasa ana risana Leklek e Iesu.” 14 Ning mila tol panai sur milar sairasi, mila noreni kama, pa mila atongi mange, “I wakak ning dir tolsot pas a nuknuk a Leklek.”

15 Pa lamur, mila sang pas, pa mila han usaot e Jerusalem. 16 Mila armuri taum ana tarai a asaer mitumo e Sisaria. La tulan tar mila tetek ning a barsan, a risana e Nason, a te Saiprus, sur milar kes napirna. I ning a hala tarai a asaer tagun nating.

17 Ning mila hanot saot e Jerusalem, na tastasimila ana tortorot la ben pas mila ana gasgas. 18 Ana pukakiar lamur, mila ma e Pol, mila han sur milar oroi e Jems. Pa ningnigola rop miting na lotu la kaning ma. 19 21:19 Aposel 15:12Ning e Pol ka warwara na gasgas pas la, i atai la ana taktakai utna ning ka tol tari ana rakrakai e God ana nuna titol tetek la ning bel a tarai Juda.

20 21:20 Aposel 15:1, 5Ning la longori, la rakan aleklek pas e God. La atai e Pol mange, “Tasimila, u tasmani mang a galis a rip ondala a tarai Juda, la ka tortorot, pa la rop la rakrakai sur lar mur a Warkuraila ane Moses. 21 La ka longor a asasongo na warwara hom, mang u asaer a tarai Juda rop ning la kes napir a tarai ning bel a tarai Juda, sur lar suah sen a Warkuraila ane Moses, pa u atai la otleng mang gong la kot talilis a natnatunla, pa gong la mur a toltolla ana lotu Juda. 22 Lar longori ot mang u ka hanot ute. Pa asa ma dalar toli? 23 21:23 Namba 6:1-20; Aposel 18:18Ur tol a utna ne mila atai u ono: Diat a barsan omila, la ka lele tar tetek e God. 24 Ur ben pas la, pa mulor atotoh pas mulo arlar ana warwara na warkurai, pa u, ur lou a ututnala na artabar ning lar artabar ono, sur dir bot kokor arop a hihinla. Ning ur toli larne, a taraila rop lar tasmani mang a warwarala ning la longori, bel i momol, pa u otleng u mur ot a warkurai. 25 21:25 Aposel 15:29Pa tetek a tena tortorotla miting onla ning bel a tarai Juda, dala ka tumtumus tar tetek la mange: Gong la ien ta utna ning di artabar ono tetek a asasongo na godla. Gong la ien ta utna ning bel di gos wakak sen a suluk kusuni, pa ta inagoi ning di pos koli ka, anasa a suluk kaning ot ono. Pa gong la tol a pamuk a toltol.”

26 21:26 1 Korin 9:20Ana pukakiar lamur, e Pol i ben pas diat a barsan ning, pa la taum la atotoh la. E Pol i kas uting na rumai artabar, sur ir atong tar a pukakiar ning a titol na atotoh ir rop ono, pa dir tun otleng a artabar anunla taktakai.

27 Ning a mais a pukakiar na atotoh milau ir rarop, dingla na tarai Juda mitumo na papar Esia, la oroi e Pol ting na rumai artabar. Pa la angangas a tarai sur lar balakut e Pol pa la tong akesi. 28 Pa la warwara kol mange, “A tarai Israel, mulor nangan mila. A barsan ne, i asaer a taraila rop te na rakrakan hanua sur lar nget dala, pa Warkuraila ane Moses, pa rumai artabar. Pa ka ben kas pas otleng a te Grikla ute na rumai artabar pa ka adur tar a rumai ning e God i atotoh tari sur anunai. ” 29 21:29 Aposel 20:4La atongi larne anasa nating, la ka oroi tar diau ma e Tropimus, a te Epeses, tumo na hanua, pa la nuki mang e Pol i ben kas pasi uting na rumai artabar.

30 A taraila rop la arlak pa la dun taum, la tong akes pas e Pol, pa la dat purum pasi kusun a rumai artabar, pa la tagar kapit a tamanla. 31 Ning la mang sur lar umkoli, a warwara i kibas a tnan ningnigo anuna tarai a harum mitumo e Rom, mang a tarai Jerusalem rop la arlak pa la tol a tnan mamahat. 32 I ben taum kapit pas a tarai a harum pa nunla ningnigola, pa la dun purum tetek la. Ning a tarai la oroi a tnan ningnigo pa tarai a harum, la manah ana um e Pol. 33 A tnan ningnigo i han tetek e Pol, pa i tong akes pasi, pa i arsune sur dir dot akesi ana naur a sen. Pa i deken la mange, “Esi na barsan ne? Asaning i tol rongon tari?” 34 Dingla na tarai miting na kunum, la atong ning a warwara, pa dingla otleng la atong ning a warwara masik. A tnan ningnigo bel i kibas sot pas a momolna, anasa ana tnan arlak, pa i arsune sur dir ben e Pol uting na rumai anuna tarai a harum. 35 Ning e Pol i hanot ting na leta na rumai, a tarai a harum la losi, anasa a kunum a tarai la ngalngaliah kol. 36 21:36 Luk 23:18Pa kunum a tarai ning la mur la, bel la manah na arkabah mange, “Sai koli!”

37 Ning la mang sur lar kas taum oe Pol uting na rumai anuna tarai a harum, i deken a tnan ningnigo mange, “I wakak ka ning ar atong ta utna tam?” Pa tnan ningnigo i dekeni mang, “Ai, u tasman ot a warwara Grik? 38 21:38 Aposel 5:36-37A nuki mang u a te Ijip, esaning nating i akamtur a harum taum ana matanitu, pa i ben diat a rip a tena tol arlak usaot na hanua bel.” 39 Pa e Pol i kelesi mange, “Iau a te Juda mitumo e Taso, ting na papar Silisia, iau bel miting na ta hanua oros ka. Lak, ur malmaling sen iau, sur ar awara a taraila ne.” 40 Ning a tnan ningnigo ka malmaling tar e Pol, i tur ting na leta na rumai, pa i sairas la ana kuna. Ning la tur longoroi, i atai la ana warwara Hibru mange,