1 Ar warwara tetek mulo ana warwara larlar. A nat a barsan ir kibas a gongonla rop ane tamana ning tamana ir mat. Ika ning i kaklik ot, belot ir kibasi, ir arlar ka lar a tena titol oros. 2 Na tena tai alar lar tai alari taum ana nuna gongonla, pa ir longlongor tanla, tuk ning ir sot a taem ning e tamana i kubus tari, sur a natna ir kibas anuna gongonla. 3 Mang otleng larning tetek dala, ning e Karisito belot i hanot, dala arlar lar a kaklik, dala a tena titol oros ana motla mite na rakrakan hanua. 4 Ika, ning a taem ka sot, e God i sune Natnalik ute. A hane i agon pasi, pa i kes nahai a warkurai ana tarai Juda, 5 sur ir lou langolango pas la ning la kes nahai a warkurai, sur e God ir ras pas dala sur dala na natnatna.

6 Mulo na natnat e God ot. Ine a kamkamna ning i saran a Talngan Tabu, a Inguna e Natnalik, sur ir kes ting na balamulo, pa i arkabah tetek e God mange, “Aba! Tata!” 7 Onone bel mulo kes na tena titol oros ulak ma. Mulo na natnat e God, pa mulor kibas a ututnala ane God.

8 Nating ning bel mulo tasman e God, mulo na tena titol oros ana godla ning bel a momol a godla. 9 Ika onone mulo ka tasman a momol a God. Momol, e God i tasman mulo. Pa sur asa ning mulo ulak sur a ingun laulau orosla mite na rakrakan hanua ning bel al rakrakainla pa bel la to pas ta utna? Mangasa, mulo mang sur mulor na tena titol oros ulak anunla? 10 Mulo rakrakai kol sur mulor mur a Warkuraila anuna tarai Juda ana tatatnan pukakiar, pa kalangla, pa raula, pa mulo nuki mang mulor tostos onoi. 11 A matmataut kol o mulo, sakana anuka titol tetek mulo ir utna oros ka.

12 Na tastasikla, a nunung rakrakai mulo sur mulor kes langolango kusun a warkurai arlar hok, anasa ia ka hanot arlar o mulo ning belsur a tarai Juda. Nating ning a kes napirimulo, bel mulo alaulau iau. 13 Mulo ka tasmani mang, a warawai nigo ana Wakak a Warwara tetek mulo anasa a sasam. 14 Anuka tinsaman i amatmataut mulo, ika bel mulo bilbilor iau, pa bel mulo kepsen iau. Mulo gasgas pas iau arlar ana angelo ane God, o arlar o e Karisito Iesu ot. 15 Sakana ning mulor tolsot pasi, mulo kar lek sen a kalso na matamulo pa mulo kar sarani tak. Ika onone, kanaha ma a gasgas ning? 16 Mangasa, onone mulo nuki kama mang a hanot anumulo a hirua, anasa a atong a momolna ta mulo?

17 Na asasongo na tena asaer ning, la rakrakai sur mulor mur la, ika belsur ir awakak mulo. La mang ka sur mulor tapagal kusun mila, sur mulor rakrakai taum onla. 18 I wakak ning mulor rakrakai sur a utna ning i wakak. Pa mulor rakrakai onoi, ning dala kes taum, pa ning a kes masik otleng kusun mulo.

19 Na natnatukla, a kilang ulak a kankan sur mulo arlar ana hane ning i agon. Ar kilangi tuk mulor arlar o e Karisito. 20 A mang sur ar kes napirimulo, pa ar warwara na marmaris tetek mulo, anasa bel a tasmani mang asa ulak ma ar toli tetek mulo.

21 Ning mulo mang sur mulor mur a Warkuraila, mulor keles iau: Mulo tasman ot a kamkama Warkuraila? 22 A Buk Tabu i atongi mang, e Abaram naur a natna. Takai a nat a hane ning a tena titol oros, pa takai otleng, a nat a hane ning i kes langolango, pa bel i tena titol oros. 23 A nat e Abaram ning a tena titol oros i agoni, i agoni arlar ana ngas a tinaulai mite na rakrakan hanua. Ika a nat e Abaram ning a hane ning i kes langolango i agoni, i agoni anasa e God i tolsot pas anuna lele.

24 A warwara ne di larlar ondala. Naur a hane ne dia tur aslang naur a kunubus. Ning a kunubus ning e God i toli saot ana mangir Sinai ning i saran a Warkuraila ta e Moses. E Hagar i tur aslang a kunubus ning, pa a taraila ning la kes ana kunubus ning, la arlar ana tena titol oros. 25 E Hagar i tur aslang a mangir Sinai tumo e Arebia, pa i arlar o e Jerusalem onone, anasa i kes na tena titol oros taum ana natnatna.

26 Ika e Jerusalem saot na langit, i kes langolango pa i arlar o e Sara, a hane ning i kes langolango, pa i a kabatnandala na tena tortorot. 27 Di ka tumus tari ting na Buk Tabu mange,

28 Mulo na tastasikla, di agon mulo ana lele ane God, larning di agon e Aisak ana lele ane God. 29 E Ismael ning di agoni ana ngas a tinaulai mite na rakrakan hanua, i akadik e Aisak ning di agoni ana rakrakai ona Inguna e God. Mang otleng larne tetek dala onone. 30 Ika, asaning a Buk Tabu i warwara tar onoi? I atongi mang, “Ur kepsen sen a tena titol oros a hane taum e natnalik. Anasa a nat a tena titol oros bel ir kibas a gongon ane tamana, taum ana nat a hane ning i kes langolango.” Stat 21:10