ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཏང༌པོ༌།
ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌, ང༌དང༌ང༌ འི༌ ཆག༌བྲིས༌པོ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌།
ཆོས༌སི༌ ཁས༌པ༌གུན༌ གྱུད༌ཏེ༌, འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 22 ཉེ༌ཁོར༌ལ༌ བྲིའ༌ ཛད༌ཁན༌བོ༌ ང༌དང༌གུན༌ལ༌ གྱུས༌ ཆའ༌ནོག༌། འི༌ ཆག༌བྲིས༌པོ༌ ཁོང༌ངི༌ ཨེ༌ཕེ༌སས༌སི༌ ནང༌ང༌ ཡོད༌ཏུས༌ བྲིའ༌ ཛད༌ཏེ༌ ཨིན༌ནོག༌།
པ༌འུ༌ལུའི༌ འི༌ ཆག༌བྲིས༌སི༌ ནང༌ང༌ ཀོ༌རིན༌ཐི༌ མ༌ཤི༌ཀ༌པ༌གུན༌ནི༌ ཏད༌པ༌ དང༌ མི༌ཚེ༌ ཕུད༌ཅེས༌སི༌ སྐོར༌ལ༌ ཏྲི༌ཝ༌ ཏྲི༌ཁན༌གུན༌ལ༌ ལན༌ཏང༌ཅེས༌ མ༌ཚད༌, ཁོང༌གུན༌ནི༌ ཆོས༌ཚོགས༌སི༌ ནང༌ང༌ བྱུང༌ཨིན༌ ཡོད༌ཁན༌ནི༌ ནོར༌ཁྲུལ༌གུན༌ནི༌ སྐོར༌ལ༌, སྐྱོ༌མོ༌ཅན༌ནི༌ ནས༌ཚུལ༌ ཚོར༌ཅེས༌པོའེ༌ བྲིའ༌ ཛདས༌། ཏེ༌གུན༌:-
1, ཆོས༌ཆོགས༌སི༌ ནང༌ང༌, ཁག༌ བུད༌ཏེ༌ འུ༌སྐྱོང༌ སོ༌སོའེ༌ གྱབ༌ནེ༌ གྲུལ༌ཅེས༌, ཛིང༌མོ༌, ལུས༌བྲེལ༌ ངན༌པའེ༌ སྕོད༌པ༌ ལུས༌ཤུགས༌ཏེ༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌;
2, བག༌སྟོན༌ ཅོ༌ཅེས༌ ཡ༌ མ༌ཅོའ༌ དུག༌ཅེས༌ ཉིས༌ཀོའེ༌ ནང༌ནེ༌ ཀ༌བོ༌ གྱལ༌ལ༌ ཨིན༌ ཏེ༌བོའེ༌ སྐོར༌ལ༌ ལབ༌བ༌ ཛད༌ཅེས༌;
3, ཁོང༌ངི༌ ང༌དང༌གུན༌ལ༌ མ༌ཤི༌ཀའེ༌ ནང༌ང༌ རང༌ཝང༌ ཡོད༌ཅེས༌པོ༌ ལབ༌བ༌ ཛདས༌། ཨིན༌ནའང༌ ང༌དང༌གུན༌ནི༌ ཅི༌ཞིག༌ ཅོ༌ནའང༌ ཞན༌མ༌ མ༌ཤི༌ཀ༌པ༌གུན༌ནི༌ ཕན༌ཐོགས༌སི༌ ཕིའ༌, ཅམས༌པའེ༌ ནང༌ང༌, ཅོ༌གོས༌ ཀ༌བོའེ༌ ཁོང༌གུན༌ལ༌ ཁོ༌རང༌ངི༌ ཏད༌པའེ༌ ནང༌ང༌ སྒག༌གྱབ༌ མི༌ཅུག༌;
4, སྐུན༌དྲ༌གུན༌ལ༌ ཆོད༌པ༌ ཕུལ༌ཁན༌ནི༌ ཟན༌ ཟའ༌ཅེས༌པོ༌ ཆོགས༌ཏེ༌ ཨིན༌ན༌ མན༌ ཏེ༌བོའེ༌ སྐོར༌ལ༌ ལབ༌བ༌ ཛད༌ཅེས༌;
5, ཆོས༌ཚོགས༌ལ༌ སལ༌ལ༌ ཛད༌ཁན༌ནི༌ ཁྱུད༌གུན༌ ཡང༌ ཏེ༌ནང༌ནེ༌ ཀ༌གུན༌ ཆོས༌ཚོགས༌ ལྡན༌ཅེས༌སི༌ ཕིའ༌ ཁག༌ཅན༌ ཨིན༌ ཏེ༌བོའེ༌ སྐོར༌ལ༌ ལབ༌བ༌ ཛད༌ཅེས༌;
6, ཤི༌ཏེ༌ སོན༌ཏེའ༌ ལང༌ང༌ ཛད༌ཅེས༌ ཡང༌ ང༌དང༌གུན༌ནི༌ ཟུགས༌པོ༌ སོ༌མ༌བོ༌ ཀ༌ཟུག༌ཤིག༌ ཡོང༌ཨིན༌ ཏེ༌བོའེ༌ སྐོར༌ ལབ༌བ༌ ཛད༌ཅེས༌;
7, མ༌ཀེ༌དོ༌ནི༌ཡཱའེ༌ ཆོས༌ཚོགས༌གུན༌ལ༌ ཐུགས༌ཏེ༌ སྟིང༌ནེ༌, ཀོ༌རིན༌ཐི༌ ཆོས༌ཚོགས༌ལ༌ ཡང༌སྐྱར༌ ཐུག༌ག༌ ཡོང༌ཅེས༌སི༌ ཐབས༌ལྡིངས༌གུན༌ ཤད༌ད༌ ཛད༌ཅེས༌༎
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 3
1 འི༌ ཨི༌གེ༌བོ༌ ང༌ པ༌འུ༌ལུ༌ དཀོན༌མཆོག༌གི༌ ཐུག༌གོངས༌ ནང༌ཞིན༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛད༌ཁན༌ནི༌ ཆོགས༌ནེ༌ ཨིན༌། ང༌དང༌ངི༌ སྤུན༌ སོས༌ཐེ༌ནེས༌སིའང༌ ཇུ༌ ཀལ༌དུག༌། 2 ངའེ༌ འི༌ ཨི༌གེ༌བོ༌, ཀོ༌རིན༌ཐི༌ གྱལ༌སའེ༌ དཀོན༌མཆོག༌གི༌ ཆོས༌ཚོགས༌གུན༌ལ༌ ཀལ༌ལད༌། དཀོན༌མཆོག༌གི༌ ཁྱོ༌ཞའ༌ ཁོང༌ངི༌ མི༌ དམ༌པ༌གུན༌ གྱུར༌ཅེས༌ལ༌ བོད༌ད༌ ཛདས༌, ཡང༌ མ༌ཤི༌ཀ༌ གྱུད༌ཏེ༌ ཁྱོ༌ཞ༌གུན༌ རྩང༌མ༌ ཅོའ༌ ཛདས༌, ཀ༌ཟུག༌ ཁོང༌ངི༌ ཇིག༌རྟེན༌ གང༌པོའེ༌ ནང༌ང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཁན༌ ཚང༌མ༌ ཉམ༌པོ༌ ཅོའ༌ ཛད༌ཏེ༌ ཨིན༌ནོག༌། ཁོང༌ ནི༌, ང༌དང༌གུན༌ དང༌ ཁོང༌གུན༌ནི༌ གཙོ༌བོ༌ ཞུགས༌ཏེ༌ ཨིན༌ནོག༌། 3 དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞ༌གུན༌ལ༌ སལ༌ཤིག༌།
པ༌འུ༌ལུའི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ ཛདས༌།
1:4 ནེ༌ 9
4 ཁྱོ༌ཞ༌གུན༌ནི༌ ཕིའ༌ ངའེ༌ ཏུས༌གྱུན༌ ང༌རང༌ངི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, ཅིའ༌ཞུ༌ན༌ ཁོང༌ངི༌ མ༌ཤི༌ཀའེ༌ ནང༌ང༌ ཁྱོ༌ཞ༌གུན༌ལ༌ ཁོང༌རང༌ངི༌ ཐུག༌རྗེ༌ སལ༌ལ༌ ཛད༌ཏེ༌ ཨིན༌ནོག༌། 5 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ཁྱོ༌ཞའེ༌ ཆོས༌ཚོགས༌གུན༌ལ༌ ཅི༌ས༌ཐོག༌ནེ༌ ཅིན༌ལབས༌ སལ༌ལ༌ ཛད༌ཏེ༌ ཨིན༌ནོག༌, མིག༌སལ༌ལི༌ གའ༌མོའེ༌ ནས༌ཚུལ༌ ཤད༌ཅེས༌ དང༌ ཁོང༌ངི༌ ལབ༌ཞ༌ ཚང༌མ༌ ཧ༌གོ༌ཅེས༌སི༌ ནང༌ང༌། 6 ཏེ༌བོའེ༌, ང༌ཞ༌གུན༌ནི༌ ཁྱོ༌ཞ༌གུན༌ལ༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ དྲང༌པོ༌ ཨིན༌ཁན༌བོ༌ ལྟན༌ན༌ནོག༌། 7 ཏེ༌བོའེ༌ཕིའ༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཤེས༌སི༌ ཕིའ༌ ཁྱོ༌ཞ༌གུན༌ རིངས༌ཨིན༌ སྲུང༌ ཟ༌ནེ༌, ཁྱོ༌ཞ༌གུན༌ནི༌ ལག༌ག༌ སྒོས༌དོམ༌ ཡོད༌ཁན༌ནི༌ སེམས༌ཉིད༌དི༌ ཁྱུད༌ ཚང༌མ༌ ཡོད༌ཏེ༌ ཨིན༌ནོག༌། 8 ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཞག༌ག༌, སྐྱོན༌མེད༌ཁན༌ ཐེ༌ཅེས༌སི༌ ཕིའ༌, དཀོན༌མཆོག༌གི༌ ཁྱོ༌ཞ༌གུན༌ ཤི༌ཤི༌ ཚོག༌པ༌, ཏད༌པའེ༌ ནང༌ང༌ སྟན༌པོ༌ བོར༌ར༌ ཛད༌ཨིན༌། 9 དཀོན༌མཆོག༌གི༌ ཏེ༌བོ༌ ཅོའ༌ ཛད༌ཨིན༌, ཅིའ༌ཟེར༌ན༌ ཁོང༌ ནི༌ ཨིད༌ཤེས༌ཅན༌ཞིག༌ ཞུགས༌ཏེ༌ ཨིན༌ནོག༌། ཁོང༌ངི༌ ཁྱོ༌ཞ༌གུན༌ ང༌དང༌གུན༌ནི༌ གཙོ༌བོ༌ ཁོང༌རང༌ངི༌ སྲས༌ ཡེ༌ཤུ༌ མ༌ཤི༌ཀ༌ ཉམ༌པོ༌ བྲེལ༌ བོར༌ཅེས༌ལ༌, བོད༌ད༌ ཛད༌ཏེ༌ ཨིན༌ནོག༌།
ཆོས༌ཚོགས༌སི༌ ནང༌ང༌ ཐུན༌བྲེལ༌ མེད༌ཁན༌།
1:10 ནེ༌ 17
10 ངའེ༌ སྤུན༌གུན༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ངའ༌ ཝང༌ སལ༌ལ༌ ཛད༌ཁན༌ གྱུད༌ཏེ༌ ཁྱོ༌ཞ༌གུན༌ ཐུན༌བྲེལ༌ ཉམ༌པོ༌ དུག༌ཅེས༌, ཆོས༌ཚོགས༌སི༌ ནང༌ང༌ པོ༌བུད༌ཏེ༌ ཚོགས༌ཆུང༌ སོ༌སོ༌ མེད༌ཅེས༌ ཡང༌ སམ༌ཚུལ༌ དང༌ ཐག༌ཅད༌གུན༌ནའང༌ ཅིག༌ ཡོང༌ཅེས༌ལ༌ ངའེ༌ མ༌སྲན༌ཏྲེ༌ ཞུ༌ཝ༌ ཕུལ༌ལད༌། 11 སྤུན༌གུན༌, ངའེ༌ འི༌གུན༌ ཟེར༌རད༌, ཅིའ༌ཟེར༌ན༌ ཁ༌ལོའི༌ ཟེར༌ཁན༌ནི༌ སྤུན༌མོ༌བོའེ༌ ནང༌མི༌ ཁ༌ཅིག༌གི༌, ཁྱོ༌ཞ༌གུན༌ནི༌ ཕྲོའ༌ ཛིང༌མོ༌ ཡོད༌ཁན༌ནི༌ སྐོར༌ལ༌ ཤད༌ད༌རག༌། 12 ཀ༌ཟུག༌ "ཁྱོ༌ཞའ༌ ཁ༌ཅིག༌གི༌ 'ངའ༌ པ༌འུ༌ལུའི༌ ལབ༌ཞའེ༌ གྱབ༌ནེ༌' ཁ༌ཅིག༌གི༌ 'ངའ༌ ཨ༌པོ༌ལོས༌སི༌ ལབ༌ཞའེ༌ གྱབ༌ནེ༌' ཡ༌, 'ངའ༌ པི༌ཏྲར༌རི༌ ལབ༌ཞའེ༌ གྱབ༌ནེ༌' ཡ༌, 'ངའ༌ མ༌ཤི༌ཀ༌ ཅིག༌པོའེ༌ གྱབ༌ནེ༌' གྲུལ༌ལད༌ ཟེར༌ཨིན༌ ཨིན༌ནོག༌།"
13 ཅི༌ མ༌ཤི༌ཀ༌ ཚོགས༌པ༌ སོ༌སོ༌ རིག༌གི༌ ནང༌ང༌ བགོའ༌ ཛད༌ཏེ༌ ཨིན༌ནོག༌ག༌? ཅི༌ ང༌ པ༌འུ༌ལུ༌ ཁྱོ༌ཞ༌གུན༌ནི༌ ཕིའ༌ རྐྱང༌ཤིང༌ངི༌ཀ༌ རྐྱངས༌ས༌? ཅི༌ ཁྱོ༌ཞ༌གུན༌ནི༌ ཕྲོ༌ནེ༌ སུ༌ཞིག༌ག༌ པ༌འུ༌ལུའི༌ མིང༌ངི༌ ནང༌ང༌ ཁྲུས༌ཏང༌ས༌? ཏན༌ཏན༌ལ༌ མ༌ཏངས༌། 14 ངའེ༌ ཁྱོ༌ཞ༌གུན༌ནི༌ ཕྲོ༌ནེ༌ སྤུན༌ ཀིརིས༌པུས༌ དང༌ གཱ༌ཡུས༌ གུན༌ལ༌ མ༌སྟོགས༌, ཞན༌སུ༌ཞིག༌གའང༌ ཁྲུས༌ མ༌ཏངས༌ཁན༌བོའེ༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌། 15 ཅིའ༌ཟེར༌ན༌ ལོབ༌ཕྲུགས༌ གྱུར༌ཅེས༌སི༌ ཕིའ༌ ངའེ༌ ཁོང༌གུན༌ལ༌ ཁྲུས༌ ཏངས༌ཏེ༌ ཨིན༌ སུ༌ཞིག༌གིའང༌ ཟེར༌ མི༌ཉན༌། 16 ༼འོ༌ན༌ སྤུན༌ སྟེ༌ཕན༌ནས༌སི༌ ནང༌མི༌གུན༌ལའང༌, ངའེ༌ ཁྲུས༌ ཏངས༌པིན༌, ཏེན༌ན༌བོ༌ མ༌ནེ༌ ཞན༌སུ༌ཞིག༌གའང༌ ཁྲུས༌ ཏང༌ཁན༌ ངའ༌ ཨིད༌ཏུ༌ མེ༌རག༌༽། 17 མ༌ཤི༌ཀའེ༌ ངའ༌ ཁྲུས༌ ཏང༌ཅེས༌ལ༌ མན༌པ༌, གའ༌མོའེ༌ ནས༌ཚུལ༌ ཤད༌ཅེས༌ལ༌ ལམ༌ཅུག༌ག༌ ཛདས༌། མ༌ཤི༌ཀའེ༌ རྐྱང༌ཤིང༌ངི༌ ཁྱུད༌པོ༌ མི༌སྟོར༌ཅེས༌སི༌ ཕིའ༌ ངའེ༌ གའ༌མོའེ༌ ནས༌ཚུལ༌ ཤད༌ ཟ༌ནེ༌ ཤེས༌རབས༌ཅན༌ནི༌ སྤེ༌ར༌ ཀོལ༌ལ༌མེད༌།
དཀོན༌མཆོག༌གི༌ ཤེས༌རབས༌།
1:18 ནེ༌ 31
18 ཁྲེས༌སྟོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌ མི༌གུན༌ནི༌ ཕིའ༌ རྐྱང༌ཤིང༌ངི༌ཀ༌ མ༌ཤི༌ཀ༌ རྐྱངས༌ཁན༌ནི༌ ལོན༌བོ༌ ཏོན༌མེད༌ཞིག༌ ཨིན༌ནོག༌། ཨིན༌ནའང༌ ང༌དང༌ སྐྱོབ༌བ༌ ཛད༌ཨིན༌ ཡོད༌ཁན༌གུན༌ལ༌ ཏེན༌ན༌ ལོན༌བོ༌ དཀོན༌མཆོག༌གི༌ ཁྱུད༌ཅན༌ སྟོབས༌པོ༌ ཨིན༌ནོག༌། 19 ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌དུག༌།
"མི༌ ཁས༌པའེ༌ ཤེས༌རབས༌གུན༌
ཡང༌ ཁོ༌རང༌ རིག༌པ༌ཅན༌ ཨིན༌ སམ༌ཁན༌གུན༌ནི༌
སམ༌ཚུལ༌གུན༌ལ༌ ཅའང༌ རིན༌ མེད༌ཁན༌བོ༌ ངའེ༌ ལྟན༌ཨིན༌། * 1:19 ཡེ༌ཤ༌ཡཱ༌ སྤེ༌ཆའེ༌ 29:14
20 ཏེ༌ནེ༌ ཤེས༌རབས༌ཅན༌གུན༌ ཡ༌ ཡོན༌ཏན༌ཅན༌ ཁས༌པ༌གུན༌ ཡ༌ སྤེ༌ར༌ ཤད༌ཁན༌ ཁས༌པ༌གུན༌ ཀ༌རུ༌ སོང༌? དཀོན༌མཆོག༌གི༌ འི༌ ཇིག༌རྟེན༌པའེ༌ ཤེས༌རབས༌གུན༌ ཏོན༌མེད༌ ཨིན༌ཁན༌བོ༌ ལྟན༌ན༌ ཛད༌ཏེ༌ མ༌ནོག༌ག༌? 21 ཇིག༌རྟེན༌པ༌གུན༌ལ༌ ཁོ༌རང༌ངི༌ ཤེས༌རབས༌གུན༌ གྱུད༌ཏེ༌ དཀོན༌མཆོག༌ ཤེས༌ མི༌ཉན༌ཅེས༌པོ༌ ཁོང༌ངི༌ ཐག༌ཅད༌ད༌ ཛདས༌པ༌, དཀོན༌མཆོག༌གི༌ ང༌ཞའེ༌ ཏོན༌མེད༌དི༌ ལོན༌ ཤད༌ཁན༌བོའེ༌ ནང༌ང༌, ཨིད༌ཤེས༌ ཅོ༌ཁན༌གུན༌ སྐྱོབ༌བ༌ ཛད༌ཅེས༌ལ༌ ཐབས༌ལྡིངས༌ ཛདས༌། 22 ནམ༌ཁའ༌ནེ༌ སྟགས༌རིག༌ ཐོང༌ཏེ༌ མ༌ནེ༌, ཨིད༌ཤེས༌ མི༌ཅོ༌ ཟེར༌ཁན༌ནི༌ ཡ༌ཧུ༌དཱ༌པ༌གུན༌ནི༌ ཕིའ༌, ཏེ༌ ལོན༌བོ༌ ཏོན༌མེད༌ ཨིན༌ནོག༌, ཡང༌ ཇིག༌རྟེན༌ནི༌ ཤེས༌རབས༌ ཙལ༌ཨིན༌ གྲུལ༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌, ཏོན༌མེད༌ ཨིན༌ནོག༌། 23 ང༌ཞའེ༌ མ༌ཤི༌ཀ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ སྐོར༌ལ༌ ཆོས༌ཤད༌ཁན༌བོ༌ ཡ༌ཧུ༌དཱ༌པ༌གུན༌ནི༌ ཕིའ༌ ཏད༌པ༌ ཅོ༌ཅེས༌ལ༌ སྒག༌གྱབ༌ཁན༌ནི༌ རྡོའ༌ ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ འི༌བོ༌ ཏོན༌མེད༌ ཨིན༌ནོག༌།
24 ཨིན༌ནའང༌ དཀོན༌མཆོག༌གི༌ ཐར༌པ༌ ཐོབ༌ཅེས༌ལ༌ བོད༌ད༌ ཛད༌ཁན༌ནི༌, ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ ཉིས༌ཀོའེ༌ ཕིའ༌, མ༌ཤི༌ཀའེ༌ ལོན༌བོ༌ ནི༌, དཀོན༌མཆོག༌གི༌ ཤེས༌རབས༌ དང༌ ཤེད༌ གུན༌ ཨིན༌ནོག༌། 25 ཞན༌ དཀོན༌མཆོག༌གི༌ ཐར༌པའེ༌ ཐབས༌པོ༌ ཏོན༌མེད༌ ཐེ༌ནའང༌, ཏེ༌བོ༌ ནི༌ མིའི༌ ཐབས༌ ཆེ༌ཤོག༌གུན༌ནི༌ སང༌ མང༌ང༌ ཤེས༌རབས༌ཅན༌ ཡང༌ དཀོན༌མཆོག༌གི༌ འུ༌ཐུགས༌པོའང༌, མིའི༌ ཁྱུད༌ ཤེད༌ཤོག༌པོའེ༌ སང༌ མང༌ང༌ ཤེད༌ཅན༌ཞིག༌ ཨིན༌ནོག༌།
26 སྤུན༌གུན༌ ཨིད༌ཏུ༌ ཅོ༌ཤིག༌, དཀོན༌མཆོག༌གི༌ ཁྱོ༌ཞ༌གུན༌ བོད༌ད༌ ཛད༌ ཟ༌ནེ༌, ཁྱོ༌ཞ༌ མང༌ཆེའ༌བོ༌, ཇིག༌རྟེན༌པའེ༌ ཐོག༌ནེ༌ ཁས༌པ༌ ཡ༌ སྟོབས༌ཅན༌ ཡ༌ རྩི༌ཝ༌ཅན༌ མན༌པིན༌། 27 མ༌ཚད༌, ཁོ༌རང༌ ཁས༌པ༌ རིག༌ ཨིན༌ སམ༌ཁན༌གུན༌, ཁྲེལ༌བ༌ ཅོ༌ཅེས༌སི༌ ཕིའ༌, དཀོན༌མཆོག༌གི༌ ཇིག༌རྟེན༌པ༌གུན༌ནི༌ ཏོན༌མེད༌ སམ༌ཁན༌ནི༌ ཏེན༌ན༌ མི༌གུན༌ ལྡམ༌མ༌ ཛད༌ཏེ༌ ཨིན༌པིན༌། ཡང༌ ཁོང༌ངི༌ ཝང༌ཅན༌གུན༌ལ༌ ཁྲེལ༌བ༌ ཅོའ༌ ཛད༌ཅེས༌སི༌ ཕིའ༌ ཤེད༌མེད༌ ཡོད༌ཁན༌ ཏེན༌ན༌ མི༌གུན༌ ལྡམ༌མ༌ ཛད༌ཏེ༌ ཨིན༌པིན༌། 28 ཇིག༌རྟེན༌པ༌གུན༌ནི༌ ཁག༌ཅན༌ ཨིན༌ནོག༌ སམ༌ཁན༌གུན༌ མེད༌ཁན༌ ཅོའ༌ ཛད༌ཅེས༌ལ༌ ཁོང༌ངི༌ ཇིག༌རྟེན༌པའེ༌ ཐོག༌ནེ༌ རིན༌མེད༌, རྩི༌ཝ༌ མེད༌ཁན༌ དང༌ ཁག༌ཅན༌ མན༌ཁན༌ ཐེའ༌ཁན༌ནི༌ མི༌གུན༌, ལྡམ༌མ༌ ཛད༌ཏེ༌ ཨིན༌པིན༌། 29 ཏེ༌བོའེ༌ ཞས༌ཏེ༌, དཀོན༌མཆོག༌གི༌ སྐུན༌དུན༌ལ༌ ཕོ༌སོ༌ སུ༌ཞིག༌གིའང༌ ཅོ༌ མི༌ཉན༌།
30 ཁྱོ༌ཞ༌གུན༌ནི༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཐུན༌བྲེལ༌བོ༌ ནི༌ དཀོན༌མཆོག༌གི༌ ཞས༌ཏེ༌ ཨིན༌, མ༌ཤི༌ཀ༌ ནི༌ ང༌དང༌ངི༌ ཕིའ༌ ཤེས༌རབས༌, དྲང༌པོ༌, རྩང༌མ༌ དང༌ རིན༌ ཤལ༌ཁན༌བོ༌ རྒྱུར༌ར༌ ཛདས༌། 31 ཀ༌ཟུག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌,
"གལ༌ཏེས༌ ཁྱོ༌ཞ༌གུན༌ ཕོ༌སོ༌ ཅོ༌ཉིན༌ ཡོད༌ན༌ ཏེ༌ནེ༌ གཙོ༌བོ༌ དཀོན༌མཆོག༌ ཅིག༌པོའེ༌ཀ༌ ཕོ༌སོ༌ ཚོར༌ཤིག༌།"† 1:31 ཡེ༌རེམ༌ཡཱའི༌ སྤེ༌ཆའེ༌ 9:24