2
ཤེས༌རབས༌སི༌ སྐོར༌ལ༌ པ༌འུ༌ལུའི༌ ལབ༌ཞ༌།
2:1 ནེ༌ 16
1 སྤུན༌གུན༌ ཁྱོ༌ཞའ༌ དཀོན༌མཆོག༌གི༌ སང༌ཝའེ༌ ཐབས༌པོ༌ ཤད༌ཅེས༌ལ༌ ངའ༌ གོ༌མ༌རང༌ ཡོང༌ ཟ༌ནེ༌, ངའེ༌ ཀྲག༌པོ༌ ཤེས༌རབས༌ ཡ༌ ཧ༌ལས༌ཤེས༌སི༌ ཚིགས༌ མ༌ཀོལ༌པིན༌། 2 ཅིའ༌ཟེར༌ན༌ ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌, ངའེ༌ ཁྱོ༌ཞ༌གུན༌ལ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ ཡེ༌ཤུ༌ མ༌ཤི༌ཀ༌ ཅིག༌པོ༌ མ༌སྟོགས༌ ཞན༌ཡང༌ ཅི༌ཞིག༌གི༌ སྐོར༌ལ༌ མི༌ཤད༌ཅེས༌ ཐག༌ཅད༌པིན༌། 3 ཁྱོ༌ཞ༌གུན༌ ཉམ༌པོ༌ ཡོད༌ཏུས༌, མ༌ཤི༌ཀའེ༌ ཆག༌ལས༌ ཅོ༌ཅེས༌སི༌ ནང༌ང༌ ང༌ འུ༌ཐུགས༌, ཁྲེལ༌ཁན༌ དང༌ ཇིགས༌ཁན༌ཞིག༌ ཚོར༌ར༌ རག༌པིན༌། 4 ངའེ༌ ལབ༌ཞ༌ དང༌ ཆོས༌ཤད༌ཅེས༌ གུན༌ ཧ༌གོའ༌ལ༌ ལ༌མོ༌ ཡང༌ ཁྲུལ༌ཅེས༌ དང༌ ཁས༌པ༌ སྤེ༌ར༌གུན༌ནི༌ཀ༌ རག༌ མ༌ལས༌ས༌, ངའེ༌ དམ༌པའེ༌ ཐུག༌ཉིད༌དི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོའེ༌ཀ༌ ཨིད༌ཤེས༌ ཅོས༌ཏེ༌ ལབ༌ཞ༌ ཏངས༌པིན༌། 5 ངའེ༌ ཏེ༌བོ༌ ཁྱོ༌ཞ༌གུན༌ནི༌, མིའི༌ ཤེས༌རབས༌སི༌ཀ༌ མན༌པ༌, དཀོན༌མཆོག༌གི༌ ཤེད༌དི༌ ནང༌ང༌ ཨིད༌ཤེས༌ ཅོ༌ཅེས༌སི༌ ཕིའ༌ ཅོས༌པིན༌།
6 ཏད༌པའེ༌ ནང༌ང༌ ལྡན༌ཁན༌གུན༌ནི༌ ཕྲོའ༌ ཡོད༌ ཟ༌ནེ༌, ངའེ༌ ཤེས༌རབས༌ཅན༌ནི༌ ཚིགས༌གུན༌ ཉམ༌པོ༌ སྤེ༌ར༌ ཏང༌ངད༌། ཨིན༌ནའང༌ ཏེ༌ ཤེས༌རབས༌གུན༌, གྱོགས༌པ༌ མེད༌ཁན༌ ཆ༌ཅེས༌ཅན༌ནི༌ འི༌ ཇིག༌རྟེན༌པ༌ ཡ༌ འི༌ ཇིག༌རྟེན༌ནི༌ ཝང༌སྲུལ༌པ༌ གུན༌ནི༌ མ༌ནོག༌། 7 ང༌ཞའེ༌ སྤེ༌ར༌ ཏང༌ཁན༌ནི༌ ཤེས༌རབས༌པོ༌ ནི༌, དཀོན༌མཆོག༌གི༌ སང༌ཝའེ༌ ཐབས༌པོ༌ ཨིན༌ནོག༌, ཀ༌བོ༌ ཁོང༌ངི༌ སྦས༌ཏེ༌ བོར༌ར༌ ཛད༌ཏེ༌ ཨིན༌། ཨིན༌ནའང༌ ང༌དང༌གུན༌ལ༌ ཟིར༌རྗིད༌ ཐོབ༌ཅེས༌སི༌ ཕིའ༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌, ཁོང༌ངི༌ འི༌ ཐབས༌པོ༌ ཅོའ༌ ཛད༌ཏེ༌ ཨིན༌པིན༌། 8 འི༌ ཇིག༌རྟེན༌ནི༌ ཝང༌སྲུལ༌པ༌གུན༌ནི༌ ཏེ༌ སང༌ཝའེ༌ ཐབས༌པོ༌, ཧ༌མ༌གོའ༌ ཨིན༌ནོག༌། གལ༌ཏེས༌ ཧ༌གོ༌པིན༌ན༌, ཁོང༌གུན༌ནི༌ ང༌དང༌ངི༌ ཟིར༌རྗིད༌ཅན༌ནི༌ གཙོ༌བོ༌བོ༌ རྐྱང༌ཤིང༌ངི༌ཀ༌ རྐྱངས༌ཏེ༌ མེད༌གྲོ༌། 9 ཏེན༌ན༌བོའེ༌ཕིའ༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌
" སུ༌ཞིག༌གིའང༌ མ༌ཐོང༌ཁན༌ ཡ༌ མ༌ཚོར༌ཁན༌
ཡ༌ སམ༌བའེ༌ ནང༌ང༌ མེད༌ཁན༌ཞིག༌
དཀོན༌མཆོག༌ག༌ ཅེས༌པ༌ ཅོ༌ཁན༌གུན༌ནི༌ ཕིའ༌
གྲལ༌གྲིག༌ ཅོའ༌ ཛད༌ཏེ༌ ཡོད༌ཏེ༌ ཨིན༌ནོག༌།"*2:9 ཡེ༌ཤ༌ཡཱ༌ སྤེ༌ཆའེ༌ 64:4
10 ཨིན༌ནའང༌ ཏེ༌གུན༌ དཀོན༌མཆོག༌ ཁོང༌རང༌ངི༌ ཐུག༌ཉིད༌བོའེ༌, ང༌དང༌གུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌། དམ༌པའེ༌ ཐུག༌ཉིད༌ལ༌ ཅི༌ཚང༌མ༌ ཐུག༌གྱུས༌ ཨིན༌ནོག༌, དཀོན༌མཆོག༌གི༌ སང༌ཝ༌གུན༌ནའང༌། 11 མི༌ཞིག༌གི༌ སམ༌ཁན༌གུན༌ ཏེན༌ན༌ མི༌བོའེ༌ སེམས༌ཉིད༌ མ༌སྟོགས༌ ཞན༌ སུ༌མི༌ཞིག༌གའང༌ གྱུས༌ ཆ༌མ༌ནོག༌། ཏེན༌ན༌ ཙོགས༌ལ༌ དཀོན༌མཆོག༌གི༌ ཐུགས༌སམ༌གུན༌ ཁོང༌ངི༌ ཐུག༌ཉིད༌ ཅིག༌པོ༌ མ༌སྟོགས༌, ཞན༌སུ༌ཞིག༌གའང༌ གྱུས༌ཆའ༌ མ༌ནོག༌། 12 ཡང༌ ང༌དང༌གུན༌ལ༌ ཇིག༌རྟེན༌པའེ༌ སེམས༌ཉིད༌ མན༌པ༌, དཀོན༌མཆོག༌གི༌ ཐུག༌ཉིད༌ ཐོབས༌ཏེ༌ ཨིན༌ཅེས༌པོའེ༌, ང༌དང༌གུན༌ལ༌ དཀོན༌མཆོག༌གི༌ ཧ༌ལས༌ཤེས༌སི༌ སྐྱེས༌གུན༌ རིན༌ མེད༌པ༌ སལ༌ལ༌ ཛད༌ཁན༌བོ༌ ཧ༌གོ༌ ཐུབས༌ཏེ༌ ཨིན༌ནོག༌།
13 ཁྱོ༌ཞ༌གུན༌ལ༌ ཏེ༌ ཚང༌མའེ༌ སྐོར༌ལ༌ ཤད༌ ཟ༌ནེ༌, ང༌ཞའེ༌ མིའི༌ ཤེས༌རབས༌ནེ༌ བྱུང༌ཁན༌ནི༌ ཚིགས༌གུན༌ མ༌ཀོལ༌ལ༌, ཐུག༌ཉིད༌དི༌ སལ༌ཁན༌ནི༌ ཚིགས༌གུན༌ གྱུད༌ཏེ༌, སྤེ༌ར༌ ཏང༌ངད༌། ཐུག༌ཉིད༌དི༌ དེན༌བ༌གུན༌ †2:13 ཐུག༌ཉིད༌དི༌ དེན༌བ༌གུན༌ ནི༌ ཏེ༌ དེན༌བ༌གུན༌ ཨིན༌ནོག༌ ཀ༌བོ༌ ང༌དང༌ངི༌ མིག༌ནེ༌ ཐོང༌ མི༌ཐུབ༌ ཨིན༌ནའང༌ དཀོན༌མཆོག༌གི༌ ང༌དང༌གུན༌ལ༌ སྔོན༌ ཅུག༌ག༌ ཛད༌ད༌ནོག༌། ལབ༌ཅེས༌ལ༌ ཐུག༌ཉིད༌ཅན༌ནི༌ ཚིགས༌གུན༌ ཀོལ༌ལད༌། 14 ཨིན༌ནའང༌ ཐུག༌ཉིད༌ མེད༌ཁན༌ནི༌ མི༌བོའེ༌, དཀོན༌མཆོག༌གི༌ ཐུག༌ཉིད༌ནེ༌ ཡོངས༌ཁན༌ནི༌ དེན༌བ༌གུན༌ནི༌ཀ༌ ཨིད༌ཤེས༌ ཅོའ༌ མ༌ནོག༌། ཏེ༌ མི༌བོའ༌ འི༌གུན༌ ཏོན༌མེད༌ ཚོར༌ར༌ནོག༌, ཡང༌ ཁོའ༌ ཧ༌གོའ༌ མ༌ནོག༌, ཅིའ༌ཟེར༌ན༌ ཐུག༌ཉིད༌ ཡོད༌ཁན༌གུན༌ལ༌ མ༌སྟོགས༌, ཡང༌སུའང༌ ཏེ༌གུན༌ ཧ༌གོ༌ ཐུབ༌བ༌ མ༌ནོག༌། 15 ཐུག༌ཉིད༌ ཡོད༌ཁན༌གུན༌ནི༌ ཅི༌ཚང༌མའེ༌ སྐོར༌ལ༌ སྟག༌ཅད༌ ཅོས༌ཏེ༌ ཧ༌གོ༌ཉན༌ན༌ནོག༌, ཨིན༌ནའང༌ ཐུག༌ཉིད༌ མེད༌ཁན༌གུན༌ནི༌ ཐུག༌ཉིད༌ ཡོད༌ཁན༌གུན༌ནི༌ ཅོ༌ཟོ༌ དང༌ སམ༌ཟོ༌ གུན༌ ཧ༌གོ༌ ཐུབ༌བ༌ མ༌ནོག༌། 16 ཅིའ༌ཟེར༌ན༌
"སུའ༌ གཙོ༌བོའེ༌ ཐུགས༌སམ༌གུན༌ གྱུས༌ ཆེན༌?
སུའི༌ ལག༌ག༌, ཁོང༌ང༌ ལབ༌ཞ༌ ཏང༌ཅེས༌སི༌ ཤེས༌རབས༌ ཡོད༌?‡2:16 ཡེ༌ཤ༌ཡཱ༌ སྤེ༌ཆའེ༌ 40:13 "
ཨིན༌ནའང༌ ང༌དང༌གུན༌ནི༌ ནང༌ང༌ མ༌ཤི༌ཀའེ༌ ཐུགས༌སམ༌གུན༌ ཡོད༌ པ༌སང༌, ང༌དང༌གུན༌ལ༌ ཏེ༌གུན༌ ཧ༌གོ༌ཐུབ༌བ༌ནོག༌།