5
ཆོས༌ཚོགས༌སི༌ ནང༌ང༌ ལུས༌བྲེལ༌ ངན༌པའ༌ སྐྱོན༌རྗོད༌ ཛདས༌།
5:1 ནེ༌ 13
1 ཁྱོ༌ཞ༌གུན༌ནི༌ ཕྲོའ༌ ཏེ༌ཟུག༌ ལུས༌བྲེལ༌ ངན༌པ༌ རིག༌ དུག༌ ཟེར༌ཏེ༌ ཚོར༌, ཀ༌བོ༌ ཏད༌པ༌ མེད༌ཁན༌གུན༌ནིའང༌ ཅོའ༌ མ༌ནོག༌, ཁྱོ༌ཞའེ༌ ཆོས༌ཚོགས༌སི༌ ནང༌ང༌ བུ༌ཚ༌ཞིག༌གི༌ ཁོ༌རང༌ངི༌ མ༌ཚབས༌ *5:1 མ༌ཚབས༌ ནི༌ ཨ༌བའེ༌ ན༌མ༌ གཉེས༌པ༌ ཟེར༌ར༌ནོག༌། ཉམ༌པོ༌ ལུས༌བྲེལ༌ བོར༌དུག༌ ཟེར༌ཏེ༌ ངའ༌ ཤད༌ད༌རག༌། 2 ཁྱོ༌ཞ༌གུན༌ནི༌ རྡུག༌པོ༌ དང༌ ཁྲེལ༌བའེ༌ ནང༌ང༌ ཉ༌ངན༌ ཅོས༌ཏེ༌, ཏེ༌ མི༌བོ༌ ཆོས༌ཚོགས༌སི༌ ཕྲོ༌ནེ༌ ཕིང༌གོ༌ཤེས༌ ཨིན༌ནོག༌། ཨིན༌ནའང༌ ཁྱོ༌ཞ༌གུན༌ནི༌ ཏེ༌བོའེ༌ཀ༌ ཕོ༌སོ༌ ཚོར༌དུག༌།
3-4 ཞན༌ ང༌ ང༌རང༌ ཁྱོ༌ཞ༌གུན༌ནི༌ ཕྲོའ༌ མེད༌ནའང༌, སེམས༌ཉིད༌དི༌ ཐོག༌ནེ༌ ང༌ ཁྱོ༌ཞའ༌ ཉམ༌པོ༌ ཨིན༌། ཡང༌ ང༌ ཏེ༌རུ༌ ཁྱོ༌ཞའ༌ ཉམ༌པོ༌ ཡོད༌ཁན༌ ཙོགས༌ལ༌, ངའེ༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌, ཏེ༌ མི༌བོའེ༌ཀ༌ ཁྲིམས༌ཅད༌ ཏང༌ ཚར༌ཏེ༌ ཨིན༌། ཁྱོ༌ཞའ༌ ཆོས༌ཚོགས༌ གང༌པོ༌ ཛོམ༌ ཟ༌ནེ༌, ངའེ༌ སེམས༌ ཡང༌ གཙོ༌བོ༌ ཡེ༌ཤུའི༌ ཁྱུད༌, ཁྱོ༌ཞ༌གུན༌ ཉམ༌པོ༌ ཡོང༌ཨིན༌། 5 ཏེ༌ནེ༌ ཁོའ༌ རྡུག༌ངལ༌ ཐོང༌ཏེ༌ དོད༌པ༌ ངན༌པ༌གུན༌ནི༌ ཀ༌ནེ༌ གྱོད༌པ༌ སྐྱེས༌ཏེ༌, གཙོ༌བོ༌ ལོགས༌ཏེ༌ ཕེབ༌ཤེས༌སི༌ ཞག༌ག༌, ཁོ༌ སྐྱོབ༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཏེ༌ མི༌བོ༌ ཆོས༌ཚོགས༌ནེ༌ ཕི༌ལོག༌ག༌ ཕིངས༌ཏེ༌ རྡུད༌གུན༌ནི༌ གོ༌བ༌ ཤེ༌ཏན༌ནི༌ ལག༌ག༌ སྟད༌གོས༌།
6 ཁྱོ༌ཞ༌གུན༌ནི༌ ཏེ༌བོའེ༌ཀ༌ ཕོ༌སོ༌ ཅོ༌ཅེས༌པོ༌ ནི༌ ཇིགས༌ནང༌ཅན༌ ཞིག༌ དུག༌། ཅི༌ འི༌ སྡིག༌པ༌བོ༌ པག༌པའེ༌ གང༌པོའེ༌ ནང༌ང༌, ཕེལ༌ཁན༌ནི༌ སྐྱུར༌ ཆུ༌ངུན༌ ཙོགས༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཆའ༌ མེ༌རག༌ག༌? 7 ཁྱོ༌ཞ༌གུན༌ནི༌ ཕྲོ༌ནེ༌ སྐྱུར༌ སྙིང༌པ༌བོ༌ ཕིངས༌ཏེ༌ མེད༌ཁན༌ ཅོ༌གོས༌། ཏེ༌ནེ༌ སྐྱུར༌ མེད༌ཁན༌ནི༌ པག༌པའེ༌ སོ༌མ༌ རུས༌ཁན༌ ཙོགས༌, ཁྱོ༌ཞ༌གུན༌ དམ༌པ༌ གྱུར༌ཨིན༌, ཀ༌བོ༌ ཁྱོ༌ཞ༌གུན༌ དེན༌བ༌ ཨིན༌ནོག༌, ཅིའ༌ཟེར༌ན༌ པེ༌སག༌གི༌ ལུ༌གུ༌ མ༌ཤི༌ཀ༌ ང༌དང༌ངི༌ སྡིག༌པ༌གུན༌ནི༌ ཕིའ༌ ཆོད༌པ༌ ཕུལ༌ལ༌ ཛདས༌། 8 ཏེ༌བོའེ༌ཕིའ༌ ང༌དང༌གུན༌ནི༌ ངན༌སེམས༌ དང༌ ངན༌པ༌ སྐྱུར༌ སྙིང༌པའེ༌ ཏ༌གི༌ ཉམ༌པོ༌ གའ༌སྟོན༌ མ༌ཅོའ༌, རྩང༌མ༌ དང༌ དྲང༌པོའེ༌ སྐྱུར༌ མེད༌ཁན༌ནི༌ ཏ༌གི༌བོ༌ ཉམ༌པོ༌ གའ༌སྟོན༌ ཅོ༌ཨིན༌། †5:8 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཝང༌ངི༌ ཡོག༌ནེ༌ ཐར༌ཏེ༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌རང༌གུན༌ནི༌ རང༌ཝང༌པོ༌ པེ༌སག༌གི༌ གའ༌སྟོན༌ནི༌ ཏུས༌ལ༌ རྩིའད༌པིན༌། ཏེ༌ཏུས༌ ཁོང༌གུན༌ནི༌ ཁང༌པའེ༌ ནང༌ང༌ སྐྱུར༌ མེད༌ཁན༌བོ༌ ཏན༌ཏན༌ ཅོ༌ཅེས༌ ཡང༌ ཁོང༌གུན༌ནི༌ སྐྱུར༌ མེད༌ཁན༌ནི༌ ཏ༌གི༌ ཟའད༌པིན༌།
9 ངའེ༌ ཁྱོ༌ཞ༌གུན༌ལ༌ སྔུན༌ལ༌ བྲི༌ ཟ༌ནེ༌, ལུས༌བྲེལ༌ ངན༌པ༌ བོར༌ཁན༌ནི༌ མི༌གུན༌ ཉམ༌པོ༌ མི༌དྲེས༌ཤེས༌སི༌ ཕིའ༌ ཟེར༌པིན༌། 10 ཨིན༌ནའང༌ ཏད༌པ༌ མེད༌ཁན༌ ཀ༌གུན༌ ལུས༌བྲེལ༌ ངན༌པ༌གུན༌ནི༌ ནང༌ང༌ དྲེས༌སད༌, ཡ༌ ནོར༌ནབས༌ཅན༌, ཡ༌ གོབ༌སྐོར༌ཁན༌, ཡ༌ སྐུན༌དྲ༌ གུན༌ལ༌ ཆོས༌ཅོ༌ཁན༌ གུན༌ནི༌ སྐོར༌ལ༌ ངའེ༌ ཟེར༌ཏེ༌ མན༌, གལ༌ཏེས༌ ཨིན༌པིན༌ན༌ ཏེ༌ནེ༌ ཁྱོ༌ཞ༌གུན༌ལ༌ འི༌ ཇིག༌རྟེན༌ ཕང༌གོས༌ཏེ༌ ཡོད༌གྲོ༌། 11 ངའེ༌ བྲི༌ཅེས༌སི༌ ཏོན༌ཏག༌པོ༌ ནི༌ ཁྱོ༌ཞ༌གུན༌, ཏད༌པ༌ཅན༌ ཨིན༌ ཟེར༌ཨིན༌ནའང༌, ལུས༌བྲེལ༌ ངན༌པའེ༌ ནང༌ང༌ དྲེས༌ཁན༌ ཡ༌ ནོར༌ནབས༌ ཡོད༌ཁན༌, ཡ༌ སྐུན༌དྲ༌ ཅོལ༌ཁན༌, ཞན༌མའེ༌ སྐོར༌ལ༌ རྩོག༌པོ༌ ཟེར༌ཁན༌, ཡ༌ ར༌རོས༌ཁན༌, ཡ༌ མི༌གུན༌ལ༌ གོབ༌སྐོར༌ ཏང༌ཁན༌ གུན༌ ཉམ༌པོ༌ བྲེལ༌ མི༌ཅོ༌ཅེས༌པོ༌ ཨིན༌། ཏེ༌ཙོགས༌སི༌ མི༌གུན༌ ཉམ༌པོ༌ ཟན༌ནའང༌ མ༌ཟ༌ཤིག༌།
12 ཆོས༌ཚོགས༌སི༌ ཕི༌ལོག༌ག༌ ཡོད༌ཁན༌ནི༌ ཏད༌པ༌ མེད༌ཁན༌གུན༌ལ༌ ཁྲིམས༌ཅད༌ ཏང༌ཅེས༌པོ༌ ངའེ༌ ཁག༌ མན༌། ཨིན༌ནའང༌ ཆོས༌ཚོགས༌སི༌ ཨིན༌ཨིན༌ཞིག༌ སྡིག༌པ༌ ཅོ༌ཁན༌གུན༌ལ༌ ཁྲིམས༌ཅད༌ ཏང༌ཅེས༌པོ༌ ཏན༌ཏན༌ལ༌ ཁྱོ༌ཞ༌གུན༌ནི༌ ཁག༌ ཨིན༌ནོག༌། 13 དཀོན༌མཆོག༌གི༌ ཏད༌པ༌ མེད༌ཁན༌གུན༌ལ༌ ཁྲིམས༌ཅད༌ད༌ ཛད༌ཨིན༌། དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, "ཁྱོ༌ཞ༌གུན༌ནི༌ ཕྲོ༌ནེ༌ མི༌ ངན༌བོ༌ ཕིང༌གོས༌།"‡5:13 ཁྲིམས༌སི༌ སྤེ༌ཆ༌ ཉིས༌པའེ༌ 17:7; 19:19; 21:21, 24; 24:7
*5:1 5:1 མ༌ཚབས༌ ནི༌ ཨ༌བའེ༌ ན༌མ༌ གཉེས༌པ༌ ཟེར༌ར༌ནོག༌།
†5:8 5:8 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཝང༌ངི༌ ཡོག༌ནེ༌ ཐར༌ཏེ༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌རང༌གུན༌ནི༌ རང༌ཝང༌པོ༌ པེ༌སག༌གི༌ གའ༌སྟོན༌ནི༌ ཏུས༌ལ༌ རྩིའད༌པིན༌། ཏེ༌ཏུས༌ ཁོང༌གུན༌ནི༌ ཁང༌པའེ༌ ནང༌ང༌ སྐྱུར༌ མེད༌ཁན༌བོ༌ ཏན༌ཏན༌ ཅོ༌ཅེས༌ ཡང༌ ཁོང༌གུན༌ནི༌ སྐྱུར༌ མེད༌ཁན༌ནི༌ ཏ༌གི༌ ཟའད༌པིན༌།
‡5:13 5:13 ཁྲིམས༌སི༌ སྤེ༌ཆ༌ ཉིས༌པའེ༌ 17:7; 19:19; 21:21, 24; 24:7