14
མ༌ཤེས༌ཁན༌ནི༌ སྐད༌ དང༌ ལུང༌སྟན༌ ཤད༌ཅེས༌།
14:1 ནེ༌ 25
1 ཅེས༌པའེ༌ ལམ༌མི༌ ནང༌ང༌ གྲུལ༌ཨིན༌ཞིག༌, ཐུག༌ཉིད༌དི༌ སལ༌ལ༌ ཛད༌ཁན༌ནི༌ ཁྱུད༌གུན༌ནིའང༌ དོད༌པ༌ བོར༌གོ༌ཤེས༌ ཨིན༌ནོག༌, མིག༌སལ༌ ཅོས༌ཏེ༌ ལུང༌སྟན༌ ཤད༌ཅེས༌སི༌ ཁྱུད༌། 2 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌སི༌ ཁྱུད༌ ཡོད༌ཁན༌གུན༌ནི༌, དཀོན༌མཆོག༌ ཅིག༌པོའ༌ སྤེ༌ར༌ ཏངས༌ཏེ༌ ཨིན༌ནོག༌། ཡང༌ ཐུག༌ཉིད༌ གྱུད༌ཏེ༌ སང༌ཝའེ༌ ནང༌ང༌ སྦས༌ཏེ༌ ཡོད༌ཁན༌གུན༌ ཤད༌ པ༌སང༌, མི༌གུན༌ནི༌ ཁོང༌གུན༌ནི༌ ཟེར༌ཁན༌གུན༌ ཧ༌གོའ༌ མ༌ནོག༌། 3 ཨིན༌ནའང༌ ལུང༌སྟན༌ ཤད༌ཁན༌གུན༌ནི༌ ཞན༌མ༌ ཏད༌པ༌ཅན༌གུན༌ལ༌ ཤེད༌ཅན༌, སྤོས༌པ༌ དང༌ སེམས༌སི༌ ནང༌ང༌ ཞི༌དེ༌ གུན༌ ཁྱོང༌ང༌ནོག༌། 4 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌ ཁོ༌རང༌ ཅིག༌པོའེ༌ སེམས༌པོ༌ ཤེད༌ཅན༌ ཅོའ༌ནོག༌, ཨིན༌ནའང༌ ལུང༌སྟན༌ ཤད༌ཁན༌བོའེ༌ ཆོས༌ཚོགས༌ གང༌པོ༌ ཤེད༌ཅན༌ ཆའ༌ ཅུག༌ག༌ནོག༌།
5 ཁྱོ༌ཞའ༌ ཚང༌མའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཉན༌ཅེས༌ ཨིན༌ནའང༌ ཏེ༌སང༌ མང༌ང༌ ལུང༌སྟན༌ ཤད༌ཉན༌ཅེས༌ལ༌ ངའེ༌ རེ༌ཝ༌ ཅོའད༌། ཆོས༌ཚོགས༌ གང༌པོ༌ ཤེད༌ཅན༌ ཅོ༌ཅེས༌སི༌ ཕིའ༌ ལུང༌སྟན༌ ཤད༌ཁན༌བོ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌ སང༌ མང༌ང༌ ཀྲག༌པོ༌ ཨིན༌ནོག༌, ནམ༌ཚོག༌པ༌ མ༌ཤེས༌ཁན༌ནི༌ སྐད༌བོ༌ སུ༌ཞིག༌གི༌ སྐད༌གྱུར༌ ཅོས༌ཏེ༌ མི༌ཤད༌།
6 སྤུན༌གུན༌ གལ༌ཏེས༌ ང༌ ཡོངས༌ཏེ༌ ཁྱོ༌ཞའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ན༌, ཁྱོ༌ཞ༌གུན༌ལ༌ ཅི༌ ཕན༌ཐོགས༌ ཐོབ༌ཨིན༌། ཨིན༌ནའང༌ གལ༌ཏེས༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ངའ༌ སྔོན༌ ཅུག༌ག༌ ཛད༌ཁན༌གུན༌ ཡ༌ མིག༌སལ༌ལི༌ ཡོན༌ཏན༌ ཡ༌ ལུང༌སྟན༌ ཡ༌ ལབ༌ཞ༌ ཤད༌ན༌, ཏེ༌བོ༌ ཁྱོ༌ཞ༌གུན༌ནི༌ ཏད༌པའེ༌ ཕིའ༌ ཕན༌ཐོགས༌ཅན༌ཞིག༌ ཨིན༌ནོག༌། 7 ཏེན༌ན༌ ཙོགས༌ལ༌ སྲོག༌ མེད༌ཁན༌ནི༌ རོལ༌མོ༌, ལིང༌བུ༌ ཡ༌ ཧརྦ༌ ཟེར༌ཁན༌གུན༌ སལ༌པོ༌ ཅོས༌ཏེ༌ མ༌སྲོག༌ན༌, སུ༌ཞིག༌གིའང༌ ཏེ༌བོའེ༌ ཡངས༌པོ༌ ཧ༌གོ༌ མི༌ཐུབ༌། 8 ཡང༌ གལ༌ཏེས༌ ཏུང༌བོ༌ སལ༌པོ༌ ཅོས༌ཏེ༌ མ༌ཕུ༌ན༌ ཏེ༌ནེ༌ མག༌མི༌གུན༌ལ༌ མག༌གི༌ ཕིའ༌ བོད༌ཁན༌བོ༌ ཀ༌ཟུག༌གི༌ ཧ༌གོ༌ཨིན༌?
9 ཏེན༌ན༌ ཙོགས༌ལ༌, གལ༌ཏེས༌ ཁྱོ༌ཞ༌གུན༌ནི༌ མི༌གུན༌ལ༌ ཧ༌མི༌གོ༌ཅེས༌སི༌ ཚིགས༌གུན༌ནི༌ ནང༌ང༌ སྤེ༌ར༌ ཏང༌ན༌ ཏེ༌ནེ༌ ཁྱོ༌ཞ༌གུན༌ནི༌ ཟེར༌ཁན༌བོ༌ ཁོང༌གུན༌ནི༌ ཀ༌ཟུག༌གི༌ ཧ༌གོ༌ ཐུབ༌ཨིན༌? ཏེ༌བོ༌ ཁྱོ༌ཞ༌གུན༌ནི༌ ལུངས༌པའེ༌ ནང༌ང༌ སྤེ༌ར༌ ཏང༌ཁན༌ ཙོགས༌ ཨིན༌ནོག༌།
10 ཇིག༌རྟེན༌ནི༌ ནང༌ང༌ སྐད༌ སྣ༌ཚོགས༌ མང༌པོ༌ ཡོད༌ཏེ༌ ཨིན༌ནོག༌, ཡང༌ སྐད༌ ཚང༌མ༌ལ༌ ཏོན༌ཏག༌ ཡོད༌ཏེ༌ ཨིན༌ནོག༌། 11 ཨིན༌ནའང༌ གལ༌ཏེས༌ ང༌ སྐད༌ཞིག༌ ཧ༌གོའ༌ མེད༌ན༌, ཏེ༌བོའེ༌ ནང༌ང༌ སྤེ༌ར༌ ཏང༌ཁན༌བོའེ༌ དུན༌ལ༌ ང༌ ཞན༌ཡུལ༌ལི༌ མི༌ཞིག༌ ཙོགས༌, ཡང༌ ཏེ༌ སྤེ༌ར༌ ཏང༌ཁན༌བོ༌ ངའེ༌ དུན༌ལ༌ ཞན༌ཡུལ༌ལི༌ མི༌ཞིག༌ ཙོགས༌ ཨིན༌ནོག༌། 12 ཡང༌ ཁྱོ༌ཞ༌གུན༌ནི༌ ཕིའང༌ ཏེ༌བོ༌ ཙོགས༌ ཨིན༌ནོག༌། ཁྱོ༌ཞ༌གུན༌ལ༌ ཐུག༌ཉིད༌དི༌ སལ༌ཁན༌ནི༌ ཁྱུད༌ གོས༌ཉིན༌ ཡོད༌ པ༌སང༌, ཆོས༌ཚོགས༌ གང༌པོ༌ ཤེད༌ཅན༌ ཅོ༌ཁན༌ནི༌ ཁྱུད༌རིག༌ ཙོལ༌ཤིག༌།
13 ཏེ༌བོའེ༌ཕིའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌གུན༌ནི༌, ཏེ༌ ཟེར༌ཁན༌གུན༌ སྐད༌གྱུར༌ ཅོ༌ཅེས༌སི༌ ཁྱུད༌དི༌ ཕིའ༌ མོས༌ལམ༌ ཕུལ༌གོ༌ཤེས༌ ཨིན༌ནོག༌། 14 གལ༌ཏེས༌ ངའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ མོས༌ལམ༌ ཕུལ༌ན༌, མོས༌ལམ༌བོ༌ ངའེ༌ སེམས༌ཉིད༌དི༌ ཕུལ༌ཏེ༌ ཨིན༌ནོག༌, ཨིན༌ནའང༌ ངའེ༌ ཟེར༌ཁན༌བོ༌ ང༌ ཧ༌གོའ༌ མ༌ནོག༌།
15 ཏ༌ ཏེ༌ནེ༌ ངའེ༌ ཅི༌ ཅོ༌? ངའེ༌ སེམས༌ཉིད༌ དང༌ ང༌ ཧ༌གོ༌ཁན༌ནི༌ ཚིགས༌ ཉིས༌ཀོ༌ ཉམ༌པོ༌ མོས༌ལམ༌ ཕུལ༌ཨིན༌། ངའེ༌ སེམས༌ཉིད༌ ཉམ༌པོ༌ མ༌ཚད༌ ང༌ ཧ༌གོ༌ཁན༌ནི༌ ཚིགས༌གུན༌ནི༌ ནང༌ངའང༌ དཀོན༌མཆོག༌ག༌ སྟོད༌པའེ༌ ལུ༌ ཏང༌ཨིན༌། 16 གལ༌ཏེས༌ ཁྱོ༌རང༌ངི༌ དཀོན༌མཆོག༌ག༌ སེམས༌ཉིད༌ ཅིག༌པོ༌ནེ༌ སྟོད༌པ༌ ཕུལ༌ན༌, ཏེ༌ནེ༌ ཁྱོ༌རང༌ངི༌ སྐད༌ ཧ༌མ༌གོ༌ཁན༌གུན༌ ཏེ༌ནང༌ང༌ ཀ༌ཟུག༌གི༌ དྲེས༌ཨིན༌, ཅིའ༌ཟེར༌ན༌ ཁོང༌གུན༌ལ༌ ཁྱོ༌རང༌ངི༌ ཟེར༌ཁན༌གུན༌ ཧ༌གོའ༌ མ༌ནོག༌། 17 ཏན༌ཏན༌ལ༌ ཁྱོ༌རང༌ངི༌ ཐུག༌རྗེ༌ཆེ༌ ཕུལ༌ལ༌ནོག༌, ཨིན༌ནའང༌ ཏེ༌བོའེ༌, ཉན༌ཁན༌གུན༌ནི༌ སེམས༌པོ༌ ཤེད༌ཅན༌ ཅོའ༌ མ༌ནོག༌།
18 ངའ༌ ཁྱོ༌ཞ༌གུན༌ནི༌ སང༌ མང༌ང༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཕིའ༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌། 19 ཨིན༌ནའང༌ ཆོས༌ཚོགས༌སི༌ ནང༌ང༌, ཞན༌མ༌གུན༌ལ༌ ལབ༌ཞ༌ ཏང༌ཅེས༌སི༌ ཕིའ༌ ངའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ ཚིགས༌ སྟོང༌ཅུ༌ ཤད༌དི༌ སང༌ ཧ༌གོ༌ཅེས༌ཅན༌ནི༌ ཚིགས༌ ལྔ༌ ཤད༌ཅེས༌རག༌།
20 སྤུན༌གུན༌ ཏེ༌གུན༌ ཧ༌གོ༌ཅེས༌སི༌ ནང༌ང༌ ཁྱོ༌ཞའེ༌ སམ༌བ༌ ཕྲུ༌གུ༌ ཙོགས༌ ཡོང༌ མ༌གོས༌། ཁྱོ༌ཞའ༌ ངན༌པ༌ ཅོ༌ཅེས༌སི༌ ནང༌ང༌ སྐྱོན༌མེད༌ཁན༌ནི༌ ཕྲུ༌གུ༌ ཆུ༌ངུན༌, ཨིན༌ནའང༌ ཏེ༌ ལབ༌ཞ༌གུན༌ ཧ༌གོ༌ཅེས༌སི༌ ནང༌ང༌ ལྡན༌ཁན༌ ཙོགས༌ གྱུར༌ཤིག༌།
21 དཀོན༌མཆོག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, "ངའེ༌ ང༌རང༌ངི༌ མི༌གུན༌ལ༌ སྐད༌རིག༌ སོ༌སོ༌ དང༌ ཞན༌ཡུལ༌ལི༌ མི༌གུན༌ གྱུད༌ཏེ༌ སྤེ༌ར༌ ཏང༌ཨིན༌, ཏེ༌ནེའང༌ ཁོང༌གུན༌ནི༌ ངའེ༌ ཁའ༌ མི༌ཉན༌།"*14:21 ཡེ༌ཤ༌ཡཱ༌ སྤེ༌ཆའེ༌ 28:11, 12 22 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌པོ༌ ནི༌, ཏད༌པ༌ཅན༌ མན༌པ༌, ཏད༌པ༌ མེད༌ཁན༌ གུན༌ནི༌ ཕིའ༌ སྟགས༌ཤིག༌ ཨིན༌ནོག༌། ཨིན༌ནའང༌ ལུང༌སྟན༌ ནི༌, ཏད༌པ༌ མེད༌ཁན༌ མན༌པ༌, ཏད༌པ༌ཅན༌ གུན༌ནི༌ ཕན༌ཐོགས༌སི༌ ཕིའ༌ ཨིན༌ནོག༌། 23 གལ༌ཏེས༌ ཆོས༌ཚོགས༌ གང༌པོ༌ ཛོམས༌ཏེ༌ ཡོད༌ཏུས༌, ཏད༌པ༌ མེད༌ཁན༌ ཡ༌, ཏེ༌ཙོགས༌ ཁྱུད༌དི༌ སྐོར༌ལ༌ ཧ༌མ༌གོ༌ཁན༌ རིག༌ ཡོངས༌ཏེ༌ ཁྱོ༌ཞའ༌ ཚང༌མའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཨིན༌ ཚོར༌ན༌ ཁོང༌གུན༌ནི༌ ཁྱོ༌ཞ༌གུན༌ སྙོས༌ཏེ༌ ཨིན༌ནོག༌ ཟེར༌ར༌ མ༌ནོག༌ག༌? 24 ཨིན༌ནའང༌ གལ༌ཏེས༌ ཁྱོ༌ཞའ༌ ཚང༌མའེ༌ ཛོམས༌ཏེ༌ ལུང༌སྟན༌ ཤད༌ཨིན༌ ཡོད༌ ཏུས༌, ཏད༌པ༌ མེད༌ཁན༌ ཡ༌, ཏེ༌ཙོགས༌ ཁྱུད༌དི༌ སྐོར༌ལ༌ ཧ༌མ༌གོ༌ཁན༌ནི༌ མི༌རིག༌ ཡོང༌ན༌, ཁྱོ༌ཞའེ༌ ཤད༌ཁན༌གུན༌ གྱུད༌ཏེ༌ ཁོང༌གུན༌ སྡིག༌ཅན༌ ཨིན༌ཁན༌ ཡང༌ དཀོན༌མཆོག༌གི༌ ཁྲིམས༌ཅད༌ ཛད༌ཅེས༌པོ༌ ཧ༌གོ༌ཐུབ༌བ༌ནོག༌། 25 ཁོང༌གུན༌ནི༌ སྙིང༌ངི༌ ནང༌ང༌ སྦས༌ཏེ༌ ཡོད༌ཁན༌གུན༌ སྔོན༌ པ༌སང༌ ཁོང༌གུན༌ནི༌ པིག༌དོང༌ ཙུགས༌ཏེ༌ དཀོན༌མཆོག༌ག༌ ཅོལ༌ཏེ༌ ཟེར༌ཨིན༌, "དཀོན༌མཆོག༌ ཁྱོ༌ཞ༌གུན༌ནི༌ ཕྲོའ༌ དེན༌བའ༌ ཞུགས༌ཏེ༌ དུག༌།"
ཚིར༌ ནང༌ཞིན༌ ཆོས༌ ཅོ༌ཅེས༌སི༌ བཀའ༌།
14:26 ནེ༌ 40
26 འོ༌ན༌ ངའེ༌ སྤུན༌གུན༌ དོར༌ལྡུས༌ཏེ༌, ཁྱོ༌ཞ༌གུན༌ ཉམ༌པོ༌ ཛོམ༌ ཟ༌ནེ༌ ཚིར༌ ནང༌ཞིན༌ལ༌, ཅིག༌གི༌ ཆོས༌ལུ༌ ཏང༌ཅེས༌, ཅིག༌གི༌ ལབ༌ཞ༌ ཏང༌ཅེས༌, ཅིག༌གི༌ ཁྱོ༌ཞ༌གུན༌ལ༌ དཀོན༌མཆོག༌གི༌ སྔོན༌ ཅུག༌ག༌ ཛད༌ཁན༌གུན༌ནི༌ སྐོར༌ལ༌ ཤད༌ཅེས༌, ཅིག༌གི༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌, ཡང༌ཅིག༌གི༌ ཁོའེ༌ ཟེར༌ཁན༌གུན༌ སྐད༌གྱུར༌ ཅོ༌གོ༌ཤེས༌ ཨིན༌ནོག༌། འི༌ ཚང༌མ༌ ཁྱོ༌ཞ༌གུན༌ ཤེད༌ཅན༌ ཅོ༌ཅེས༌སི༌ ཕིའ༌ ཅོས༌ཏེ༌ ཨིན༌ནོག༌།
27 མི༌ ཉིས༌ ཡ༌ སུམ༌མི༌ མ༌ནེ༌, མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ མ༌གོས༌། ཁོང༌གུན༌ནི༌ ཅིག༌གི༌ སྟིང༌ནེ༌ ཅིག༌ ཚིར༌ཀ༌ ཅོས༌ཏེ༌ སྤེ༌ར༌ ཏང༌གོས༌, ཡང༌ཅིག༌གི༌ ཁོང༌གུན༌ནི༌ ཟེར༌ཁན༌གུན༌ སྐད༌གྱུར༌ ཅོ༌གོས༌། 28 ཨིན༌ནའང༌ གལ༌ཏེས༌ སྐད༌གྱུར༌ཁན༌ སུ༌ཞིག༌གའང༌ མེད༌ན༌, ཏེ༌ནེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌, ཆོས༌ཚོགས༌སི༌ ནང༌ང༌ ཅུབ༌ཅད༌ཏེ༌ དུགས༌ཏེ༌ སང༌ཝའེ༌ ཐོག༌ནེ༌ ཁོ༌རང༌ དང༌ དཀོན༌མཆོག༌ག༌ སྤེ༌ར༌ ཏང༌གོས༌།
29 མི༌ ཉིས༌ ཡ༌ སུམ༌ཞིག༌ག༌ ལུང༌སྟན༌ ཤད༌ཅུག༌ཤིག༌, ཡང༌ ཞན༌མ༌གུན༌ལ༌ ཏེ༌གུན༌ནི༌ ཟེར༌ཁན༌བོ༌ དེན༌བའ༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ག༌ ཡ༌ མ༌ནོག༌, ཐག༌ཅད༌ ཅུག༌ཤིག༌། 30 ཨིན༌ནའང༌ གལ༌ཏེས༌ སུ༌ཞིག༌གི༌ ལུང༌སྟན༌ ཤད༌དི༌ ཏུས༌ལ༌, ཞན༌མི༌ཞིག༌ག༌ གཙོ༌བོའེ༌ ཆོགས༌ནེ༌ ལོན༌ སོ༌མ༌ཞིག༌ ཐོབ༌ན༌, ཏེ༌ནེ༌ ལུང༌སྟན༌ ཏང༌ཨིན༌ ཡོད༌ཁན༌ནི༌ མི༌བོའེ༌ ལུང༌སྟན༌ ཤད༌ཅེས༌པོ༌ སྒག༌གོས༌། 31 ཏེ༌ཟུག༌ ཅོ༌ཅེས༌པོའེ༌ ལུང༌སྟོན༌པ༌ ཚང༌མ༌ལ༌ ལུང༌སྟན༌ ཤད༌ཅེས༌སི༌ སྐབས༌ ཐོབས༌ཏེ༌ ཆོས༌ཚོགས༌ གང༌པོའ༌ ལོབ༌ཤེས༌ དང༌ སྤོས༌པ༌ སྐྱེ༌ཡིན༌། 32 ཨིད༌ཏུ༌ བོར༌ཤིག༌, ལུང༌སྟན༌ ཤད༌ཁན༌གུན༌ལ༌ ཁོང༌རང༌གུན༌ནི༌ སེམས༌ཉིད༌གུན༌ ཅུན༌ཏེ༌ བོར༌ ཉན༌ན༌ནོག༌། 33 ཅིའ༌ཟེར༌ན༌ དཀོན༌མཆོག༌ ནི༌, ཚིར༌ཀ༌ མེད༌ཁན༌ མན༌པ༌, ཞི༌དེའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌, ཀ༌ཟུག༌ ཞན༌ ཆོས༌ཚོགས༌ ཚང༌མ༌ ཛོམ༌ ཟ༌ནེ༌ ཡོད༌ཏེ༌ ཨིན༌ནོག༌།
34 ཆོས༌ཚོགས༌སི༌ ནང༌ང༌ ཛོམ༌ ཟ༌ནེ༌, བུ༌མོ༌གུན༌ནི༌ སྤེ༌ར༌ མ༌ཏང༌ང༌ དུག༌གོ༌ཤེས༌ ཨིན༌ནོག༌། ཁོང༌གུན༌ནི༌ སྤེ༌ར༌ ཏང༌ཅེས༌པོ༌ འོས༌པ༌ མ༌ནོག༌, ཀ༌ཟུག༌ ལུང༌སྟོན༌པ༌ མོ༌ཟེས༌སི༌ ཁྲིམས༌སི༌ ནང༌ང༌ མོལ༌ཁན༌ ནང༌ཞིན༌, ཁོང༌གུན༌ རང༌ངི༌ མག༌པ༌གུན༌ནི༌ ཝང༌ངི༌ ཡོག༌ག༌ དུག༌གོ༌ཤེས༌ ཨིན༌ནོག༌། 35 གལ༌ཏེས༌ ཁོང༌གུན༌ལ༌ ཏྲི༌ཝ༌ རིག༌ ཡོད༌ན༌, ཁང༌པའ༌ ཁོ༌རང༌གུན༌ནི༌ མག༌པ༌གུན༌ལ༌ ཏྲི༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཆོས༌ཚོགས༌ ཛོམས༌ཏེ༌ ཡོད༌སའ༌ བུ༌མོ༌གུན༌ནི༌ སྤེ༌ར༌ ཏང༌ཅེས༌པོ༌ ཁྲེལ༌བ༌ཞིག༌ ཨིན༌ནོག༌།
36 ཅི༌ དཀོན༌མཆོག༌གི༌ བཀའ༌བོ༌, ཁྱོ༌ཞའ༌ ཀོ༌རིན༌ཐི༌པ༌གུན༌ནི༌ ཀ༌ནེ༌ གོ༌མ༌རང༌ བྱུངས༌ཏེ༌ ཨིན༌ནོག༌ སམ༌མ༌ རག༌ག༌? ཅི༌ ཁྱོ༌ཞ༌རང༌ ཅིག༌པོའ༌, ཏེ༌བོ༌ སལ༌ལ༌ ཛདས༌ས༌? 37 གལ༌ཏེས༌ སུ༌ཞིག༌གི༌ ཁོ༌རང༌ ལུང༌སྟོན༌པ༌ ཡ༌ སེམས༌ཉིད༌དི༌ ཁྱུད༌ ཡོད༌ཁན༌ཞིག༌ ཨིན༌ སམ༌མད༌ན༌, ཏེ༌ནེ༌ ངའེ༌ ཟེར༌ཁན༌གུན༌ གཙོ༌བོའེ༌ བཀའ༌ སལ༌ཏེ༌ ཨིན༌ཁན༌བོ༌ ཁྱོ༌རང༌ང༌ ཧ༌གོ༌གོས༌། 38 ཨིན༌ནའང༌ གལ༌ཏེས༌ ཁྱོ༌ཞ༌གུན༌ནི༌ ཏེ༌བོའ༌ སྣང༌མེད༌ ཅོ༌ན༌, ཏེ༌ནེ༌ དཀོན༌མཆོག༌གི༌ ཁྱོ༌ཞ༌གུན༌ལ༌ སྣང༌མེད༌ ཅོའ༌ ཛད༌ཨིན༌།
39 ཏེ༌བོའེ༌ཕིའ༌ ངའེ༌ སྤུན༌གུན༌ ལུང༌སྟན༌ ཤད༌ཅེས༌ལ༌ རིངས༌ཤིག༌, ཡང༌ ཞན༌མའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ མ༌གོས༌ མ༌ཟེར༌ཤིག༌། 40 ཨིན༌ནའང༌ ཅི༌ཚང༌མ༌ ཚིར༌ཀ༌ ནང༌ཞིན༌ལ༌ ཅོ༌ཅེས༌སི༌ ནང༌ང༌ ཏན༌ཏན༌ ཅོ༌ཤིག༌།