15
མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ ཞངས༌ས༌ ཛདས༌།
15:1 ནེ༌ 11
1 ངའེ༌ སྤུན༌གུན༌ ཏ༌ ང༌ ཁྱོ༌ཞ༌གུན༌ལ༌ ངའེ༌ སྔུན༌ལ༌ ཤད༌ཁན༌ནི༌ གའ༌མོའེ༌ ནས༌ཚུལ༌ལི༌ སྐོར༌ལ༌ ཨིད༌ཏུ༌ སྐུལ༌ཅུག༌ཤིག༌། ཏེ༌ ཟ༌ནེ༌ ཁྱོ༌ཞ༌གུན༌ནི༌ ཏེ༌ ནས༌ཚུལ༌བོའ༌ གའ༌སུས༌ ཞུས༌ཏེ༌ ཨིན༌པིན༌, ཡང༌ ཏ༌རུང༌ངའང༌ ཏེ༌བོའེ༌ ནང༌ང༌ སྟན༌པོ༌ ཨིན༌ནོག༌། 2 གལ༌ཏེས༌ ཁྱོ༌ཞ༌གུན༌ནི༌ ངའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌ ཨིད༌ཤེས༌ ཅོས༌ཁན༌བོའེ༌ ནང༌ང༌ སྟན༌པོ༌ དུག༌ན༌, ཏེ༌ནེ༌ ཏེ༌ ལོན༌བོའེ༌ ཁྱོ༌ཞ༌གུན༌ སྐྱོབ༌ཨིན༌, ཏེ༌ མ༌ནེ༌ ཁྱོ༌ཞ༌གུན༌ནི༌ ཅའང༌ ཕན༌ཐོགས༌ མེད༌ཁན༌ཞིག༌གི༌ ནང༌ང༌ ཏད༌པ༌ ཅོས༌ཏེ༌ ཨིན༌ནོག༌།
3 ངའེ༌ ལག༌ག༌ སྟད༌ད༌ ཛད༌ཁན༌ ཚང༌མའེ༌སང༌ ཁག༌ཅན༌བོ༌, ངའེ༌ ཁྱོ༌ཞ༌གུན༌ལ༌ ཏངས༌ཏེ༌ ཨིན༌པིན༌, དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཡོད༌ཁན༌ ནང༌ཞིན༌ལ༌ ཏེ༌བོ༌ ནི༌ མ༌ཤི༌ཀ༌ ང༌དང༌གུན༌ནི༌ སྡིག༌པའེ༌ ཕིའ༌ ཀྲོངས༌ས༌ ཛདས༌། 4 ཡང༌ དམ༌པའེ༌ སུང༌རབས༌ ནང༌ཞིན༌ ཁོང༌ སྤུར༌ཁང༌ངི༌ ནང༌ང༌ བོརས༌ ཡང༌ ཞག༌མ༌ སུམ༌པའེ༌ ཞག༌ག༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌། 5 ཁོང༌ ཏང༌པོ༌ པི༌ཏྲར༌རི༌, ཏེ༌ནེ༌ མ༌ཤི༌ཀའེ༌ སྐུ༌ཚབས༌ ཅུག༌ཉིས༌པོའེ༌ ཇལ༌ཏེ༌ ཨིན༌པིན༌། 6 ཏེ༌བོའེ༌ སྟིང༌ནེ༌ ཏུས༌ཅིག༌གི༌ཀ༌ ཁོང༌རང༌ངི༌ ལོབ༌ཕྲུགས༌ 500 སང༌ མང༌ང༌ཞིག༌གི༌ ཇལས༌, ཏེ༌གུན༌ནི༌ ཕྲོ༌ནེ༌ ཁ༌ཅིག༌ ཀྲོངས༌ ཚར༌ཏེ༌ ཨིན༌ནའང༌ མང༌ཆེའ༌ཞིག༌ ཏ༌རུང༌ངའང༌ སོན༌ཏེའ༌ ཡོད༌ཏེ༌ ཨིན༌ནོག༌། 7 ཏེ༌ནེ༌ ཁོང༌ ཁོང༌རང༌ངི༌ ནོ༌, ཡ༌ཀོབ༌ ཡང༌ སྟིང༌ནེ༌ སྐུ༌ཚབས༌ ཚང༌མའེ༌ ཇལ༌ཏེ༌ ཨིན༌པིན༌། 8 ཨིན༌ནའང༌ སྟིང༌ཇུག༌ག༌ སེམས༌ཉིད༌དི༌ ནང༌ང༌ ཡམ༌ཚན༌ ཚུལ༌ལ༌ སྐྱེས༌ཁན༌ ངེའང༌ ཁོང༌ ཇལ༌། 9 ང༌ སྐུ༌ཚབས༌ ཚང༌མའེ༌ ནང༌ནེ༌ ཐུ༌ཤོག༌པོ༌ ཨིན༌། ངའེ༌ དཀོན༌མཆོག༌གི༌ ཆོས༌ཚོགས༌གུན༌ལ༌ ནགས༌ ལྟན༌ པ༌སང༌, ང༌ སྐུ༌ཚབས༌ ཟེར༌ཅེས༌སི༌ འོས༌པའང༌ མེད༌།
10 ཨིན༌ནའང༌ དག༌ས༌ ང༌ ཡོད༌ཁན༌བོ༌ ནི༌, དཀོན༌མཆོག༌གི༌ ངའེ༌ཀ༌ མིག༌སལ༌ལི༌ ཐུག༌རྗེ༌གུན༌ ཕོའ༌ ཛད༌ཅེས༌པོའེ༌ ཨིན༌, ཡང༌ ཏེ༌བོ༌ གོད༌ལ༌ སོང༌ཏེ༌ མ༌ནོག༌། ཅིའ༌ཟེར༌ན༌ ངའེ༌ ཞན༌ཡང༌ སྐུ༌ཚབས༌གུན༌ནི༌ སང༌ རྩོན༌གྲུས༌ མང༌ང༌ ཅོས༌ཏེ༌ ལས༌ ཅོའད༌། ཨིན༌ནའང༌ ཏེ༌བོ༌ ང༌ མན༌པ༌, དཀོན༌མཆོག༌གི༌ ཁོང༌རང༌ངི༌ ཐུག༌རྗེ༌ གྱུད༌ཏེ༌, ངའེ༌ ནང༌ང༌ ཆག༌ལས༌ ཛད༌ཏེ༌ ཨིན༌ནོག༌། 11 ངའེ༌ ཆོས༌ཤད༌དད༌གྲོ༌ ཡ༌ ཁོང༌གུན༌ནི༌, ཅའང༌ ཁྱད༌ མེད༌པ༌ ཨིན༌ནོག༌, ཅིའ༌ཟེར༌ན༌ ང༌ཞའ༌ ཚང༌མའེ༌ ཆོས༌ ཙོགས༌ ཤད༌ད༌ནོག༌, ཀ༌བོའ༌ ཁྱོ༌ཞ༌གུན༌ནི༌ ཏད༌པ༌ ཅོས༌ཏེ༌ ཨིན༌ནོག༌།
ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཅེས༌།
15:12 ནེ༌ 34
12 ཨིན༌ནའང༌ ང༌ འི༌བོ༌ ཤོད༌ཤིག༌, ང༌ཞ༌གུན༌ནི༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ ཨིན༌ནོག༌ ཟེར༌ཏེའང༌, ཁྱོ༌ཞའ༌ ཁ༌ཅིག༌གི༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ཀྱག༌ ཅིའ༌ ཟེར༌རད༌? 13 གལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌པིན༌ན༌, ཏེ༌ནེ༌ མ༌ཤི༌ཀའང༌ སོན༌ཏེའ༌ ཞངས༌ཏེ༌ མེད༌གྲོ༌། 14 ཡང༌ གལ༌ཏེས༌ མ༌ཤི༌ཀ༌ མ༌ཞངས༌པིན༌ན༌, ཏེ༌ནེ༌ ང༌ཞ༌གུན༌ནི༌ ཆོས༌ཤད༌ཅེས༌ ཚང༌མ༌ ཕན༌མི༌ཐོགས༌ ཨིན༌ནོག༌, ཡང༌ ཁྱོ༌ཞ༌གུན༌ནི༌ ཏད༌པ༌བོའང༌། 15 མ༌ཚད༌ ང༌ཞའ༌ སྐུ༌ཚབས༌གུན༌ནི༌ དཀོན༌མཆོག༌གི༌ སྤང༌པོ༌ ཟུན༌བ༌ ཏང༌ཏེ༌ ཨིན༌ནོག༌, ཅིའ༌ཟེར༌ན༌ ང༌ཞ༌གུན༌ནི༌ དཀོན༌མཆོག༌གི༌ མ༌ཤི༌ཀ༌ སྤུར༌ཁང༌ངི༌ ནང༌ནེ༌ སོན༌ཏེའ༌ ལང༌ང༌ ཛད༌ཁན༌བོའེ༌ སྤང༌པོ༌ ཏང༌ང༌ནོག༌། ཨིན༌ནའང༌ གལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལངས༌ཤེས༌པོ༌ དེན༌བ༌ མན༌པིན༌ན༌, ཏེ༌ནེ༌ དཀོན༌མཆོག༌གི༌ མ༌ཤི༌ཀ༌ སོན༌ཏེའ༌ ལང༌ང༌ མ༌ཛད༌ད༌ ཨིན༌ནོག༌། 16 ཡང༌ གལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ན༌ ཏེ༌ནེ༌ མ༌ཤི༌ཀའང༌ སོན༌ཏེའ༌ མ༌ཞངས༌ས༌ ཨིན༌ནོག༌། 17 ཡང༌ གལ༌ཏེས༌ མ༌ཤི༌ཀ༌ སོན༌ཏེའ༌ མ༌ཞངས༌ས༌ ཡོད༌ན༌, ཏེ༌ནེ༌ ཁྱོ༌ཞ༌གུན༌ནི༌ ཏད༌པ༌གུན༌ ཕན༌མི༌ཐོགས༌ཤིག༌ ཨིན༌ནོག༌, ཡང༌ ཁྱོ༌ཞ༌གུན༌ ཏ༌རུང༌ངའང༌ ཁྱོ༌ཞའེ༌ སྡིག༌པའེ༌ ནང༌ང༌ ནོངས༌ཅན༌ ལུས༌ཏེ༌ ཨིན༌ནོག༌། 18 ཏེ༌ནེ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཏེ༌ ཤི༌ཁན༌ ཚང༌མའང༌ ཉལ༌ཝའེ༌ ནང༌ང༌ ལེབས༌ཏེ༌ ཨིན༌ནོག༌། 19 ཡང༌ འི༌ མི༌ཚེ༌ ནང༌ང༌ གལ༌ཏེས༌ ང༌དང༌གུན༌ནི༌ མ༌ཤི༌ཀའེ༌ ནང༌ང༌ སོན༌ཏེའ༌ ལང༌ཅེས༌སི༌ རེ༌ཝ༌བོ༌ ཏོན༌མེད༌ ཨིན༌ན༌ ཏེ༌ནེ༌ ང༌དང༌གུན༌ ཚང༌མའེ༌སང༌ སྡིག༌པ༌རིག༌ ཨིན༌ནོག༌།
20 ཨིན༌ནའང༌ ངོས༌པོའ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ས༌ ཛད༌ཏེ༌ ཨིན༌ནོག༌། ཁོང༌ ནི༌ ཤི༌ཁན༌ ཚང༌མའེ༌ སྟོན༌ཐོག༌ ཀྲག༌པོའེ༌ བྲས༌བུ༌ ཏང༌པོ༌བོ༌ ཨིན༌ནོག༌།
21 ཀ༌ཟུག༌གི༌ ཇིག༌རྟེན༌ནི༌ ནང༌ང༌ ཤི༌ཅེས༌པོ༌ ཨ༌དཱམ༌ མི༌བོ༌ གྱུད༌ཏེ༌ ཡོང༌ང༌ ཙོགས༌ལ༌ ཏ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལངས༌ཤེས༌པོ༌ མ༌ཤི༌ཀ༌ མི༌བོ༌ གྱུད༌ཏེ༌ བྱུངས༌ཏེ༌ ཨིན༌ནོག༌། 22 ང༌དང༌ ཚང༌མ༌ ཨ༌དཱམ༌མི༌ པུར༌གྱུད༌གུན༌ ཨིན༌ པ༌སང༌, ཤིའ༌ནོག༌། ཏེན༌ན༌ ཙོགས༌ལ༌ མ༌ཤི༌ཀའེ༌ ཨིན༌ཁན༌ ཚང༌མ༌ལ༌ མི༌ཚེ༌ སོ༌མ༌ཞིག༌ སལ༌ལ༌ ཛད༌ད༌ནོག༌། 23 ཨིན༌ནའང༌ ཤི༌ཏེ༌ སྟིང༌ནེ༌ ལངས༌ཅེས༌པོའ༌ ཚིར༌ཀ༌ཞིག༌ ཡོད༌ཏེ༌ ཨིན༌ནོག༌། སྟོན༌ཐོག༌གི༌ གོ༌མའེ༌ བྲས༌བུ༌ མ༌ཤི༌ཀ༌, ལོགས༌ཏེ༌ སྐྱོད༌ ཟ༌ནེ༌, ཁོང༌ངི༌ ཨིན༌ཁན༌ ཚང༌མ༌ སོན༌ཏེའ༌ ལང༌ང༌ ཛད༌ཨིན༌།
24 ཏེ༌བོའེ༌ སྟིང༌ནེ༌ ཐའ༌མ༌བོ༌ ལེབ༌ཨིན༌, ཁོང༌ངི༌ ཝང༌སྲུལ༌པ༌, ཝང༌ དང༌ ཤེད༌ ཡོད༌ཁན༌ ཚང༌མ༌ མེད༌ཁན༌ ཅོའ༌ ཛད༌ཏེ༌ གྱལ༌སྲིད༌པོ༌ ཡབ༌ དཀོན༌མཆོག༌གི༌ ཆག༌ག༌ ཕུལ༌ཨིན༌། 25 དཀོན༌མཆོག༌གི༌ ཁོང༌རང༌ངི༌ གྲ༌འོ༌ ཚང༌མ༌, མ༌ཤི༌ཀའེ༌ ཞབས༌སི༌ ཡོག༌ག༌ ཁྱོང༌ཁྱོང༌ ཚོག༌པ༌ལ༌, ཁོང༌ངི༌ ཝང༌སྲུལ༌ལ༌ ཛད༌གོས༌། 26 ཡང༌ ཤི༌ཅེས༌ ནི༌ སྟིང༌ཇུག༌གི༌ གྲ༌འོ༌ མེད༌ཁན༌ ཅོ༌ཅེས༌ཅན༌བོ༌ ཨིན༌ནོག༌། 27 དམ༌པའེ༌ སུང༌རབས༌སི༌ ནང༌ང༌ མ༌ཤི༌ཀའེ༌ སྐོར༌ལ༌ མོལ༌ཏེ༌ ཨིན༌ནོག༌ "དཀོན༌མཆོག༌གི༌ ཅི༌ཚང༌མ༌ ཁོང༌ངི༌ ཝང༌ངི༌ ཡོག༌ག༌ བོར༌ར༌ ཛདས༌"* 15:27 སུང༌གུར༌རི༌ སྤེ༌ཆའེ༌ 8:6 འོ༌ན༌ "ཅི༌ཚང༌མ༌ ཁོང༌ངི༌ ཝང༌ངི༌ ཡོག༌ག༌ བོར༌ར༌ ཛདས༌" མོལ༌ལ༌ ཛད༌ ཟ༌ནེ༌, མ༌ཤི༌ཀའ༌ ཝང༌ཆ༌ སལ༌ལ༌ ཛད༌ཁན༌ དཀོན༌མཆོག༌ ཁོང༌རང༌ ཏེ༌བོའེ༌ ནང༌ང༌ ཐེའ༌ མ༌ཛད༌ད༌ ཨིན༌ནོག༌། 28 ཏེ༌ནེ༌ ཁོང༌ངི༌ ཅི༌ཚང༌མ༌ མ༌ཤི༌ཀའེ༌ ཝང༌ངི༌ ཡོག༌ག༌ ཁྱོང༌ ཚར༌ར༌ཅིག༌, མ༌ཤི༌ཀའེ༌ ཁོང༌རང༌ དཀོན༌མཆོག༌གི༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌, ཏེ༌ནེ༌ དཀོན༌མཆོག༌གི༌ ཀ༌རུང༌ས༌ ཅི༌ཚང༌མའེ༌ཀ༌ ཝང༌སྲུལ༌ལ༌ ཛད༌ཨིན༌།
29 གལ༌ཏེས༌ ཤི༌ཁན༌ཞིག༌ སོན༌ཏེའ༌ མ༌ལང༌ན༌, ཏེ༌ནེ༌ ཁ༌ཅིག༌གི༌, ཤི༌ཁན༌གུན༌ནི༌ ཚབས༌ལ༌ ཁྲུས༌ལེན༌ཅེས༌པོའ༌ ཅི༌ གྱུན༌ཚན༌ ཡོད༌ཀྱག༌། གལ༌ཏེས༌ ཤི༌ཁན༌གུན༌ སོན༌ཏེའ༌ ལང༌ང༌ མེད༌ན༌, ཁོང༌གུན༌ནི༌ ཏེ༌ཟུག༌ ཅི༌ཕིའ༌ ཅོས༌ཏེ༌ ཨིན༌ནོག༌།
30 ཡང༌ སོན༌ཏེའ༌ ལང༌ཅེས༌པོ༌ མེད༌པིན༌ན༌, ཏེ༌ནེ༌ ཅི༌ཕིའ༌ ང༌ཞའེ༌ ང༌ཞ༌རང༌ངི༌ མི༌ཚེ༌ ཇིགས༌པའེ༌ ནང༌ང༌ ཏུས༌གྱུན༌ བོར༌ར༌ནོག༌། 31 སྤུན༌གུན༌ ཏན༌ཏན༌ལ༌ ངའེ༌ ཞག༌ཏང༌ ཤི༌ཅེས༌སི༌ ཇིགས༌པ༌གུན༌ དོང༌ལེན༌ ཅོའད༌། ཡང༌ ང༌དང༌ངི༌ གཙོ༌བོ༌ མ༌ཤི༌ཀ༌ ཡེ༌ཤུའི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཟང༌པོ༌ ཅོའ༌ ཛད༌ཁན༌བོའེ༌ ནང༌ང༌ ངའེ༌ ཕོ༌སོ༌ ཚོར༌ཁན༌བོའང༌, དེན༌བ༌ ཨིན༌ནོག༌། 32 ཡང༌ གལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ན༌, རིའི༌ ནང༌ང༌ དུག༌ཁན༌ནི༌ སེམས༌ཅན༌ ཙོགས༌, ཏེ༌ ཨེ༌ཕེ༌སས༌པ༌གུན༌ ཉམ༌པོ༌ ནོལ༌ཁན༌བོའེ༌ ང༌ ཅི༌ ཕན༌ཐོགས༌ ཡོངས༌། ཡང༌ ཏད༌པ༌ མེད༌ཁན༌གུན༌ནི༌ ཟེར༌ཁན༌ ཙོགས༌ལ༌ ང༌དང༌ངིའང༌ ཟེར༌སྲིད༌ཅེས༌ ཨིན༌ནོག༌, "ཡོང༌ཤིག༌, ཟེན༌ ཐུང༌ཨིན༌, ཅིའ༌ཟེར༌ན༌ ཐོ༌རེ༌ ང༌དང༌གུན༌ ཤིའ༌ནོག༌།"† 15:32 ཡེ༌ཤ༌ཡཱའེ༌ སྤེ༌ཆའེ༌ 22:13 33 "ཤི༌ཏེ༌ སྟིང༌ནེ༌ སོན༌ཏེའ༌ ལང༌ང༌ མ༌ནོག༌" ཟེར༌ཁན༌གུན༌ ཙོགས༌ལ༌ ཁྱོ༌ཞ༌གུན༌ བུང༌བུ༌ མ༌གྱུར༌ཤིག༌། "ཕྲོ༌པ༌ ངན༌པའེ༌ སྕོད༌པ༌ ཟང༌པོ༌ ཤིག༌ག༌ནོག༌" ཟེར༌ཅེས༌པོ༌ ཨིད༌ཏུ༌ ཅོ༌ཤིག༌། 34 དྲང༌པོ༌ མན༌ཁན༌ནི༌ སམ༌བ༌ ཕངས༌ཏེ༌ ཤེས༌རབས༌ཅན༌ རིག༌ གྱུར༌ཏེ༌ སྡིག༌པ༌ མ༌ཅོ༌ཤིག༌། ཁྱོ༌ཞ༌གུན༌ ཁྲེལ༌ཅུག༌ཅེས༌ལ༌ ངའེ༌ ཟེར༌རད༌, ཁྱོ༌ཞའ༌ ཁ༌ཅིག༌ག༌ དཀོན༌མཆོག༌ ཤེས༌ ཁོ༌རང༌ ཤེས༌ས༌ མ༌ནོག༌།
ཤི༌ཁན༌ནི༌ ཟུགས༌པོ༌ ལང༌ང༌ ཛད༌ཅེས༌།
15:35 ནེ༌ 58
35 ཨིན༌ནའང༌ ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌, "ཀ༌ཟུག༌གི༌ ཤི༌ཁན༌ཞིག༌ ལངས༌ ཉན༌ན༌ནོག༌? ཁོང༌གུན༌ལ༌ ཟུགས༌པོ༌ ཀ༌ཟུག༌ཤིག༌ ཡོང༌ང༌ནོག༌?" ཟེར༌ཏེ༌ ཏྲི༌སྲིད༌ཅེས༌ ཨིན༌ནོག༌། 36 ཅི༌ སམ༌བ༌ མེད༌ཁན༌ནི༌ ཏྲི༌ཝ༌ཞིག༌ ཨིན༌ནོག༌! ཁྱོ༌ཞ༌གུན༌ནི༌ ས༌འོན༌ ཏབ༌ ཟ༌ནེ༌, ཏེ༌བོ༌ མི༌ཞིག༌ ཤི༌ཏེ༌ སའེ༌ ནང༌ང༌ སུབས༌ཁན༌ ཙོགས༌ལ༌ སུབས༌ཏེ༌ མ༌སྟོགས༌, སྐྱེའ༌ མ༌ནོག༌། 37 ཡང༌ ཁྱོ༌ཞ༌གུན༌ནི༌ ཏབ༌ཁན༌བོ༌ སྐྱེ༌ཁན༌ནི༌ སས༌པོས༌ མན༌པ༌ ཁྱོ༌ཞ༌གུན༌ནི༌ ཏབ༌ཁན༌ནི༌ ཀྲོ༌ ཡ༌ ཡང༌རིགས༌སི༌ ས༌འོན༌ཞིག༌ ཨིན༌ནོག༌། 38 ཏེ༌ནེ༌ དཀོན༌མཆོག༌གི༌ ཏེ༌བོའ༌ ཁོང༌རང༌ངི༌ ཐུགས༌དོད༌ ནང༌ཞིན༌ལ༌, ཟུགས༌པོ༌ སོ༌མ༌ཞིག༌ སལ༌ལ༌ ཛད༌ད༌ནོག༌། ས༌འོན༌ རེ༌རེ༌ ཏེན༌ན༌ རིགས༌སི༌ ཟུགས༌པོའེ༌ ནང༌ང༌ ལྡན༌ན༌ནོག༌། 39 ཏེན༌ན༌ ཙོགས༌ལ༌ ཤ༌ རིགས༌ མང༌པོ༌ ཡོད༌ཏེ༌ ཨིན༌ནོག༌, རིགས༌ ཅིག༌ ནི༌ མི༌, ཡང༌ཅིག༌ སེམས༌ཅན༌, ཡང༌ཅིག༌ ཅ༌ཅིའུ༌, ཡང༌ཅིག༌ ཉ༌ ཨིན༌ནོག༌།
40 ནམ༌ཁའེ༌ ཟུགས༌ དང༌ ཇིག༌རྟེན༌ནི༌ ཟུགས༌ ཉིས༌ ཡོད༌ཏེ༌ ཨིན༌ནོག༌། ནམ༌ཁའེ༌ ཟུགས༌གུན༌ནི༌ ཟིལ༌བོ༌ ནི༌ ཇིག༌རྟེན༌ནི༌ ཟུགས༌གུན༌ནི༌ སང༌ སོ༌སོ༌ རིག༌ ཡོད༌ཏེ༌ ཨིན༌ནོག༌། 41 ཉི༌མ༌ ཁོ༌རང༌ང༌ ཟིལ༌ རིགས༌ ཅིག༌, ཡང༌ ཟླ༌ཝ༌ དང༌ སྐར༌མ༌གུན༌ལ༌ ཞན༌ཡང༌ ཟིལ༌ རིགས༌ ཅིག༌ ཡོད༌ཏེ༌ ཨིན༌ནོག༌, སྐར༌མ༌ ཚང༌མའེ༌ ནང༌ངའང༌ ཁོ༌རང༌ ཅིག༌ དང༌ ཅིག༌གི༌ ནང༌ང༌ ཟིལ༌ སོ༌སོ༌ རིག༌ ཡོད༌ཏེ༌ ཨིན༌ནོག༌།
42 ཏེན༌ན༌ ཙོགས༌, ཤི༌ཏེ༌ སྟིང༌ནེ༌ སོན༌ཏེའ༌ ལངས༌ཤེས༌པོའང༌ ཨིན༌ནོག༌། ང༌དང༌གུན༌ ཤི༌ ཟ༌ནེ༌, ང༌དང༌ངི༌ ཇིག༌རྟེན༌ནི༌ ཟུགས༌པོ༌གུན༌ སའེ༌ ནང༌ང༌ སུབ༌བ༌ནོག༌, ཨིན༌ནའང༌ ཏེ༌གུན༌ ཏུས༌གྱུན༌ ལུས༌ཤེས༌སི༌ ཕིའ༌ སོན༌ཏེའ༌ ལང༌ང༌ ཛད༌ཅེས༌ ཨིན༌ནོག༌། 43 ཞན༌ ཏེ༌གུན༌ སྤལ༌ མེད༌ཏེ༌ སུབ༌ནའང༌, ཏེ༌གུན༌ ཟིལ༌ལི༌ ནང༌ང༌ ལངས༌ས༌ནོག༌། ཏེ༌གུན༌ ཤེད༌མེད༌ཁན༌ནི༌ ནང༌ང༌ སུབ༌བ༌ནོག༌, ཨིན༌ནའང༌ ཏེ༌གུན༌ ཤེད༌ཅན༌ གྱུར༌ཏེ༌ ལང༌ང༌ ཛད༌ཅེས༌ ཨིན༌ནོག༌། 44 ཏེ༌གུན༌ མིའི༌ ཟུགས༌པོའེ༌ ཚུལ༌ལ༌ སུབ༌བ༌ནོག༌, ཨིན༌ནའང༌ སེམས༌ཉིད༌དི༌ ཟུགས༌པོ༌གུན༌ནི༌ ཚུལ༌ལ༌ ལང༌ང༌ ཛད༌ཨིན༌, ཀ༌ཟུག༌ རང༌ཞིན༌ནི༌ ཟུགས༌པོ༌གུན༌ ཡོད༌ད༌ ཙོགས༌ལ༌, སེམས༌ཉིད༌དི༌ ཟུགས༌པོ༌གུན༌ནའང༌ ཡོད༌ཏེ༌ ཨིན༌ནོག༌།
45 དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ "ཨ༌དཱམ༌ མི༌ ཏང༌པོ༌བོ༌, སྲོག༌ ཡོད༌ཁན༌ནི༌ མི༌ཞིག༌ ཛད༌ཏེ༌ ཨིན༌པིན༌"‡ 15:45 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 2:7 ཨིན༌ནའང༌ ཐའ༌མའེ༌ ཨ༌དཱམ༌, ཀ༌བོ༌ མ༌ཤི༌ཀ༌ ཞུགས༌ཏེ༌ ཨིན༌, ཁོང༌ ནི༌ ང༌དང༌ང༌ ཐུག༌ཉིད༌དི༌ མི༌ཚེ༌ སལ༌ཁན༌ ཞུགས༌ཏེ༌ ཨིན༌ནོག༌། 46 ཏང༌པོ༌བོ༌ ནི༌ ཐུག༌ཉིད༌དི༌ ཟུགས༌པོ༌ མན༌པ༌, རང༌ཞིན༌ནི༌ ཟུགས༌པོ༌ཞིག༌ ཨིན༌པིན༌, ཏེ༌ སྟིང༌ནེ༌ ཐུག༌ཉིད༌དི༌ ཟུགས༌པོ༌བོ༌ བྱུངས༌ཏེ༌ ཨིན༌ནོག༌། 47 ཨ༌དཱམ༌ མི༌ ཏང༌པོ༌བོ༌, ཇིག༌རྟེན༌ནི༌ སའེ༌ ཀ༌ནེ༌ ཅོའ༌ ཛད༌ཏེ༌ ཨིན༌པིན༌, ཨིན༌ནའང༌ མི༌ ཉིས༌པ༌ མ༌ཤི༌ཀའ༌ ནམ༌ཁའ༌ནེ༌ ཕེབས༌ཏེ༌ ཨིན༌པིན༌། 48 ཇིག༌རྟེན༌ནི༌ མི༌གུན༌ ཇིག༌རྟེན༌ནི༌ མི༌བོ༌ ཙོགས༌, ཡང༌ ནམ༌ཁའེ༌ མི༌གུན༌ ནམ༌ཁའེ༌ མི༌ ཙོགས༌ ཡོང༌ང༌ནོག༌། 49 ཀ༌ཟུག༌ དག༌ས༌ ང༌དང༌གུན༌ ཇིག༌རྟེན༌ནི༌ མི༌བོ༌ ཙོགས༌ ཨིན༌, ཞག༌ཤིག༌ ང༌དང༌གུན༌ ནམ༌ཁའེ༌ མི༌བོ༌ ཙོགས༌ གྱུར༌ཅེས༌ ཨིན༌ནོག༌།
50 སྤུན༌གུན༌ ངའེ༌ ཟེར༌ཅེས༌སི༌ ཏོན༌ཏག༌པོ༌ ནི༌, ང༌དང༌གུན༌ནི༌ འི༌ ཟུགས༌པོ༌བོའ༌ དཀོན༌མཆོག༌གི༌ གྱལ༌སྲིད༌ ནོར༌སྐལ༌ལ༌ ཐོབ༌བ༌ མ༌ནོག༌། ཤི༌ཅེས༌ཅན༌ནི༌ འི༌ ཟུགས༌པོའ༌ ཏུས༌གྱུན༌ ལུས༌ཤེས༌ཅན༌ནི༌ དཀོན༌མཆོག༌གི༌ གྱལ༌སྲིད༌པོ༌ ནོར༌སྐལ༌ལ༌ མི༌ཐོབ༌། 51 ཨིན༌ནའང༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ སང༌ཝའེ༌ ཐབས༌ལྡིངས༌པོ༌ སྔོན༌ཅུག༌ཨིན༌། ང༌དང༌གུན༌ནི༌ ནང༌ནེ༌ ཚང༌མ༌ མི༌ཤི༌, ཨིན༌ནའང༌ ང༌དང༌ ཚང༌མའེ༌ ནང༌ང༌ གྱུར༌ཇ༌ ཁྱོང༌ང༌ ཛད༌ཨིན༌། 52 ཏེ༌གུན༌ མིག༌ ཀྲབ༌ཁན༌ ཙོགས༌ལ༌ ཧུན༌མེད༌ལ༌ བྱུང༌ཅེས༌ ཨིན༌ནོག༌ ནམ༌ དཀོན༌མཆོག༌གི༌ ཕོ༌ཉ༌གུན༌ནི༌ ཐའ༌མའེ༌ ཏུང༌བོ༌ ཕུ༌ཨིན༌། ཏུང༌བོ༌ ཕུའ༌ཅིག༌, ཤི༌ཏེ༌ ཡོད༌ཁན༌ ཚང༌མ༌ ཏུས༌གྱུན༌ནི༌ ཕིའ༌ སོན༌ཏེའ༌ ལང༌ང༌ ཛད༌ཅེས༌ དང༌ ང༌དང༌ སོན༌ཏེའ༌ ལུས༌ཁན༌གུན༌ནི༌ ནང༌ང༌ གྱུར༌ཇ༌ ཁྱོང༌ང༌ ཛད༌ཨིན༌། 53 ང༌དང༌གུན༌ནི༌ རུལ༌ཅེས༌ཅན༌ནི༌ ཟུགས༌པོ༌ མི༌རུལ༌ཅེས༌ ཡང༌ ཤི༌ཅེས༌ཅན༌ནི༌ ཟུགས༌པོ༌ ཏུས༌གྱུན༌ སོན༌ཏེའ༌ ལུས༌ཁན༌ གྱུར༌གོས༌།
54 ང༌དང༌གུན༌ནི༌ ཤི༌ཅེས༌ཅན༌ནི༌ ཟུགས༌པོ༌གུན༌ མ༌ནེ༌ མི༌ཤི༌ཅེས༌ཅན༌ནི༌ ཟུགས༌པོའེ༌ ནང༌ང༌ གྱུར༌ར༌ཅིག༌, འི༌ དམ༌པའེ༌ སུང༌རབས༌པོ༌ དྲན༌དྲ༌ གྲུབ༌ཅེས༌ ཨིན༌ནོག༌, "དཀོན༌མཆོག༌གི༌ གྱལ༌ཁའེ༌ ཤི༌ཅེས༌པོ༌ མེད༌ཁན༌ ཛདས༌།"§ 15:54 ཧོ༌ཤཱ༌ཡི༌ སྤེ༌ཆའེ༌ 25:8
55 "ཝ༌ ཤི༌ཅེས༌, ཏ༌ ཁྱོ༌རང༌ངི༌ གྱལ༌ཁ༌བོ༌ ཀ༌རེ༌།
ཝ༌ ཤི༌ཅེས༌, ཏ༌ ཁྱོ༌རང༌ངི༌ ཟུག༌ཟེར༌བོ༌ ཀ༌རེ༌?"* 15:55 ཧོ༌ཤཱ༌ཡི༌ སྤེ༌ཆའེ༌ 13:14
56 སྡིག༌པའེ༌ ཞས༌ཏེ༌ མི༌གུན༌ནི༌ཀ༌ ཤི༌ཅེས༌ བྱུང༌ང༌ནོག༌, ཡང༌ ཁྲིམས༌ གྱུད༌ཏེ༌ ང༌དང༌ང༌ སྡིག༌པའེ༌, མ༌ ཇིགས༌པ༌ ཁྲེས༌སྟོར༌ ཅོ༌ཁན༌ནི༌ ཝང༌བོ༌ ཧ༌གོའ༌ནོག༌། 57 ཨིན༌ནའང༌ དཀོན༌མཆོག༌ག༌ ཐུག༌རྗེ༌ཆེ༌, ཁོང༌ངི༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ ང༌དང༌གུན༌ལ༌ སྡིག༌པ༌ དང༌ ཤི༌ཅེས༌སི༌ཀ༌ གྱལ༌ཁའ༌ སལ༌ལ༌ ཛད༌ཏེ༌ ཨིན༌ནོག༌།
58 ཏེ༌བོའེ༌ཕིའ༌ ངའེ༌ སྤུན༌གུན༌ ཏད༌པའེ༌ ནང༌ང༌ ཤེད༌ཅན༌ དང༌ སྟན༌པོ༌ གྱུར༌ཤིག༌། ཏུས༌གྱུན༌ གཙོ༌བོའེ༌ ཕིའ༌ རིངས༌ཨིན༌ཞིག༌ ཞབ༌སྟོག༌ ཞུ༌ཤིག༌, ཅིའ༌ཟེར༌ན༌ གཙོ༌བོའེ༌ ཕིའ༌ ཅི༌ཞིག༌ ཅོ༌ནའང༌, གོད༌ལ༌ མི༌ཆ༌ཅེས༌པོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།