3
དཀོན༌མཆོག༌ ང༌དང༌ངི༌ ནམ༌ཁའེ༌ ཡབ༌།
3:1 ནེ༌ 10
1 ལྟོས༌ཤིག༌གའང༌, ཡབ༌ དཀོན༌མཆོག༌གི༌ ང༌དང༌གུན༌ལ༌ ཙམ༌ཤིག༌གི༌ ཅམས༌པ༌ ཛད༌ཏེ༌ ཨིན༌ནོག༌, ཁོང༌ངི༌ ང༌དང༌གུན༌ལ༌ ཁོང༌རང༌ངི༌ ཕྲུ༌གུ༌གུན༌ མོལ༌དུག༌, ཡང༌ ང༌དང༌ ཏེ༌བོ༌ ཨིན༌ནའང༌ ཨིན༌ནོག༌། ཨིན༌ནའང༌ ཇིག༌རྟེན༌ནི༌ ཏད༌པ༌ མེད༌ཁན༌གུན༌ནི༌ ང༌དང༌གུན༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ཁན༌བོ༌ ངོ༌ཤེས༌ས༌ མ༌ནོག༌, ཅིའ༌ཟེར༌ན༌ ཏེ༌གུན༌ནི༌ དཀོན༌མཆོག༌ ངོ༌ མ༌ཤེས༌། 2 ཅེས༌པའེ༌ ཛ༌འོ༌གུན༌, དག༌ས༌ ང༌དང༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ནོག༌། ང༌དང༌གུན༌ ཀ༌ཟུག༌ རིག༌ གྱུར༌ཨིན༌, དག༌ས༌ ཚོག༌པ༌ ང༌དང༌གུན༌ལ༌ སྔོན༌ཅུག༌ག༌ མ༌ཛད༌ད༌ ཨིན༌ནོག༌། ཨིན༌ནའང༌ མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ང༌དང༌གུན༌ ཁོང༌ ཙོགས༌ གྱུར༌ཅེས༌པོ༌ ང༌དང༌ང༌ གྱུས༌ཨིན༌ནོག༌, ཅིའ༌ཟེར༌ན༌ ང༌དང༌གུན༌ནི༌ ཁོང༌ ཁོང༌རང༌ངི༌ དེན༌བའེ༌ ཟིར༌རྗིད༌དི༌ ཡིབས༌སི༌ ནང༌ང༌ ཇལ༌ཨིན༌། 3 ཡང༌ ཏེ༌བོ༌ ཐོང༌ཅེས༌སི༌ དོད༌པ༌ བོར༌ཁན༌གུན༌ནི༌, ཁོ༌རང༌ རྩང༌མ༌ བོར༌ར༌ནོག༌, ཀ༌ཟུག༌ མ༌ཤི༌ཀ༌ རྩང༌མ༌ ཨིན༌།
4 ཡང༌ སྡིག༌པ༌ ཅོ༌ཁན༌གུན༌ནི༌ དཀོན༌མཆོག༌གི༌ བཀའ༌ཁྲིམས༌པོ༌ ཅགས༌ཏེ༌ ཨིན༌ནོག༌, ངོས༌པོའ༌ བཀའ༌ཁྲིམས༌ ཅག༌ཅེས༌པོ༌ ཁོ༌རང༌ སྡིག༌པ༌ ཨིན༌ནོག༌། 5 ཡང༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ང༌དང༌ངི༌ སྡིག༌པ༌གུན༌ མེད༌ཁན༌ ཅོ༌ཅེས༌སི༌ ཕིའ༌ མ༌ཤི༌ཀ༌ སྐྱོད༌ད༌ ཛདས༌། ཁོང༌ངི༌ ནང༌ང༌ སྡིག༌པ༌ མེད༌པིན༌། 6 ཡེ༌ཤུའི༌ ནང༌ང༌ ནས༌ཁན༌གུན༌ནི༌ སྡིག༌པ༌ ཅོ༌ཨིན༌ མི༌དུག༌, ཡང༌ སྡིག༌པ༌ ཅོ༌ཨིན༌ དུག༌ཁན༌གུན༌ལ༌ མ༌ཤི༌ཀ༌ མ༌ཇལ༌ལ༌, ཡ༌ ངོའང༌ མ༌ཤེས༌ས༌ ཨིན༌ནོག༌།
7 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, སུ༌ཞིག༌གའང༌ ཁྱོ༌ཞ༌གུན༌ལ༌ གོབ༌སྐོར༌ ཏང༌ མ༌ཅུག༌ཤིག༌། འོས༌པའེ༌ ལས༌ ཅོ༌ཁན༌ནི༌ མི༌བོ༌ དྲང༌པོ༌ ཨིན༌ནོག༌, ཀ༌ཟུག༌གི༌ མ༌ཤི༌ཀ༌ ཨིན༌། 8 སྡིག༌པ༌ ཅོ༌ཨིན༌ དུག༌ཁན༌གུན༌ ཤེ༌ཏན༌ནི༌ ཨིན༌ནོག༌, ཅིའ༌ཟེར༌ན༌, ཤེ༌ཏན༌ནི༌ ཇིག༌རྟེན༌ ཆགས༌པ༌ནེ༌ ཕར༌ལ༌ སྡིག༌པ༌ ཅོ༌ཨིན༌ ཡོངས༌ཏེ༌ ཨིན༌། དཀོན༌མཆོག༌གི༌ སྲས༌, ཤེ༌ཏན༌ནི༌ ལས༌གུན༌ མེད༌ཁན༌ ཛད༌ཅེས༌སི༌ ཕིའ༌ སྐྱོད༌ད༌ ཛདས༌། 9 དཀོན༌མཆོག༌ནེ༌ སྐྱེས༌ཁན༌གུན༌ནི༌ སྡིག༌པ༌ ཅོ༌ཨིན༌ དུག༌ག༌ མ༌ནོག༌, ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌ ཁོང༌གུན༌ནི༌ ནང༌ང༌ ནས༌ས༌ནོག༌། ཏེ༌གུན༌ལ༌ སྡིག༌པ༌ ཅོ༌ཨིན༌ དུག༌ཉན༌ན༌ མ༌ནོག༌, ཅིའ༌ཟེར༌ན༌ ཏེ༌གུན༌ དཀོན༌མཆོག༌ནེ༌ སྐྱེས༌ཏེ༌ ཨིན༌ནོག༌། 10 ཏེ༌བོའེ༌ཕིའ༌ ང༌དང༌གུན༌ལ༌ སུ༌ དཀོན༌མཆོག༌གི༌ ཕྲུ༌གུ༌གུན༌ ཡང༌ སུ༌ ཤེ༌ཏན༌ནི༌ ཕྲུ༌གུ༌གུན༌ ཨིན༌ཁན༌བོ༌ ཤེས༌ས༌ནོག༌། ལས༌ ཟང༌པོ༌ ཡ༌ རང༌ངི༌ སྤུན༌ལ༌ ཅམས༌པ༌ མ༌ཅོ༌ཁན༌གུན༌ དཀོན༌མཆོག༌གི༌ ཕྲུ༌གུ༌ མ༌ནོག༌།
ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌།
3:11 ནེ༌ 24
11 ཁྱོ༌ཞ༌གུན༌ནི༌ གོ༌མ༌ནེ༌ ཕར༌ལ༌ ཚོར༌ཁན༌ནི༌ ལོན༌བོ༌ འི༌བོ༌ ཨིན༌, "ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།" 12 ཨ༌དཱམ༌མི༌ བུ༌ཚ༌, ཤེ༌ཏན༌ནི༌ ཨིན༌ཁན༌ ཀ༌ཡིན༌ དང༌ཙོགས༌ མ༌གྱུར༌ཤིག༌། ཁོའེ༌ རང༌ངི༌ ནོ༌བོ༌ སདས༌། ཅི༌ཕིའ༌ སདས༌? ཅིའ༌ཟེར༌ན༌ ཀ༌ཡིན༌ནི༌ ལས༌གུན༌ ངན༌པ༌ དང༌, ཁོའེ༌ ནོ༌བོའེ༌ ལས༌གུན༌ དྲང༌པོ༌ ཡོད༌པིན༌། 13 སྤུན༌གུན༌ གལ༌ཏེས༌ ཇིག༌རྟེན༌པའེ༌ ཁྱོ༌ཞ༌གུན༌ལ༌ ནཕ༌རད༌ ཅོའད༌ན༌, ཏེ༌བོའ༌ ཡམ༌ཚན༌ མ༌ཚོར༌ཤིག༌།
14 ང༌དང༌གུན༌ ཤི༌ཅེས༌ནེ༌ ཐར༌ཏེ༌ སོན༌པོའེ༌ ནང༌ང༌ དུགས༌ཏེ༌ ཨིན༌ཁན༌བོ༌ ང༌དང༌གུན༌ལ༌ ཤེས༌ས༌ནོག༌, ཅིའ༌ཟེར༌ན༌ ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོའ༌ནོག༌། ཡང༌ ཅམས༌པ༌ མ༌ཅོ༌ཁན༌གུན༌ ཏ༌རུང༌ངའང༌ ཤི༌ཏེ༌ ཨིན༌ནོག༌། 15 རང༌ངི༌ སྤུན༌ ཡ༌ སྤུན༌མོ༌ ཞིག༌ག༌ ནཕ༌རད༌ ཅོ༌ཁན༌གུན༌ དཀོན༌མཆོག༌གི༌ སྐུན༌དུན༌ལ༌ མི༌སད༌ ཙོགས༌ ཨིན༌ནོག༌། ཡང༌ མི༌སད༌ཅིག༌གི༌ ནང༌ང༌ ཐའ༌མེད༌པའེ༌ མི༌ཚེ༌ མེད༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
16 ཅམས༌པ༌བོ༌ ང༌དང༌གུན༌ནི༌ འི༌ཀ༌ནེ༌ ཧ༌གོའ༌ནོག༌, གཙོ༌བོ༌ ཡེ༌ཤུའི༌ ང༌དང༌གུན༌ནི༌ ཕིའ༌, ཁོང༌རང༌ངི༌ སྲོག༌ སལ༌ལ༌ ཛདས༌། ང༌དང༌གུན༌ནིའང༌ རང༌ངི༌ སྤུན༌གུན༌ནི༌ ཕིའ༌ སྲོག༌པོ༌ ཏང༌གོས༌། 17 གལ༌ཏེས༌ ནོར༌ ཡོད༌ཁན༌གུན༌ནི༌, རང༌ངི༌ སྤུན༌ ཡ༌ སྤུན༌མོ༌ ཞིག༌ག༌ མི༌ཚེ༌ ཕུད༌ཅེས༌སི༌ སྒོས༌དོམ༌ ཡོད༌ཁན༌བོ༌ ཤེས༌ཏེའང༌, ཁོའ༌ རོགས༌ ཅོའ༌ མེད༌ན༌, ཁོའེ༌ ནང༌ང༌ དཀོན༌མཆོག༌གི༌ ཅམས༌པ༌ ཀ༌ཟུག༌གི༌ ནས༌ཨིན༌?
18 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ང༌དང༌གུན༌ནི༌ ཁའ༌ ཅིག༌པོ༌ནེ༌ ཅེས༌པ༌ ཅོའད༌ མ༌ཟེར༌ར༌, དེན༌བའ༌ རང༌ངི༌ ལས༌གུན༌ ལག༌ལེན༌ ཅོས༌ཏེ༌ ལྟན༌ན༌, མི༌གྱལ༌ལ༌? 19 ཏེ༌བོའེ༌ ང༌དང༌གུན༌ དེན༌བའེ༌ ནང༌ནེ༌ སྐྱེས༌ཁན༌ནི༌ ཕྲུ༌གུ༌ ཨིན༌ཁན༌བོ༌ གྱུས༌ ཆའ༌ནོག༌། ཏེ༌ནེ༌ དཀོན༌མཆོག༌གི༌ སྐུན༌དུན༌ལ༌ ང༌དང༌གུན༌ནི༌ སེམས༌སི༌ ནང༌ང༌ ཞི༌དེ༌ ཡོང༌ཨིན༌། 20 གལ༌ཏེས༌ ང༌དང༌ངི༌ སྙིང༌ངི༌, ང༌དང༌ རང༌ང༌ སྐྱོན༌ ཀལ༌ལད༌ན༌, ཇིགས༌ མ༌ཇིག༌ཤིག༌, ཅིའ༌ཟེར༌ན༌, དཀོན༌མཆོག༌ ང༌དང༌ངི༌ སྙིང༌ངི༌ སང༌ ཝང༌ཅན༌ ཞུགས༌ཏེ༌ ཨིན༌ནོག༌། ཁོང༌ངི༌ ཅི༌ཚང༌མ༌ ཁྱེན༌ན༌ ཛད༌ད༌ནོག༌།
21 ཅེས༌པའེ༌ ཛ༌འོ༌གུན༌, གལ༌ཏེས༌ ང༌དང༌རང༌ངི༌ སྙིང༌ངི༌, ང༌དང༌གུན༌ལ༌ སྐྱོན༌ ཀལ༌ལ༌མེད༌ན༌, ང༌དང༌གུན༌ནི༌ དཀོན༌མཆོག༌ག༌ མོས༌ལམ༌ ལོ༌ཁྱེལ༌ ཉམ༌པོ༌ ཞུ༌ཉན༌ན༌ནོག༌། 22 ཡང༌ ཅི༌ཞིག༌ ཁོང༌ང༌ ཞུ༌ན༌, ཏེ༌བོ༌ ང༌དང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཐོབ༌དུག༌, ཅིའ༌ཟེར༌ན༌ ང༌དང༌གུན༌ནི༌ ཁོང༌ངི༌ བཀའ༌གུན༌ལ༌, ཁའ༌ཉན༌ཏེ༌ ཁོང༌ ཐུགས༌ཐད༌ཅེས༌སི༌ ལས༌གུན༌ ཅོའ༌ནོག༌།
23 ཁོང༌ངི༌ བཀའ༌བོ༌ འི༌བོ༌ ཨིན༌, ང༌དང༌གུན༌ནི༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀའེ༌ ཚན༌ནི༌ཀ༌ ཏད༌པ༌ ཁྱོང༌གོས༌, ཡང༌ ཁོང༌ངི༌ བཀའ༌ ནང༌ཞིན༌ ཅིག༌ དང༌ ཅིག༌ག༌ ཅམས༌པ༌ ཅོ༌གོས༌། 24 ཁོང༌ངི༌ བཀའ༌གུན༌ལ༌ ཁའ༌ཉན༌ཁན༌གུན༌ དཀོན༌མཆོག༌གི༌ ནང༌ང༌ ནས༌ཏེ༌ ཡང༌ དཀོན༌མཆོག༌ ཁོང༌གུན༌ནི༌ ནང༌ང༌ ནས༌ས༌ ཛད༌ད༌ནོག༌། དཀོན༌མཆོག༌གི༌ ང༌དང༌གུན༌ལ༌ དམ༌པའེ༌ ཐུག༌ཉིད༌ སལ༌ལ༌ ཛད༌ པ༌སང༌, དཀོན༌མཆོག༌ ང༌དང༌གུན༌ནི༌ ནང༌ང༌ ནས༌ས༌ ཛད༌ཏེ༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།