2
གཙོ༌བོ༌ ཡེ༌ཤུའི༌ ང༌དང༌ང༌ རོགས༌ ཛད༌ད༌ནོག༌།
2:1 ནེ༌ 6
1 ངའེ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ཁྱོ༌ཞ༌གུན༌ནི༌ སྡིག༌པ༌ མི༌ཅོ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ བྲིའད༌། ཨིན༌ནའང༌ གལ༌ཏེས༌ སུ༌ཞིག༌གི༌ སྡིག༌པ༌ ཅོ༌ན༌, དཀོན༌མཆོག༌ ཡབ༌བི༌ སྐུན༌དུན༌ལ༌ ང༌དང༌གུན༌ནི༌ ཕིའ༌ ཞུ༌ཝ༌ ཞུས༌ཏེ༌ ཆད༌པའེ༌ ཀ༌ནེ༌ སྐྱོབ༌བ༌ ཛད༌ཁན༌ཞིག༌ ཡོད༌ཏེ༌ ཨིན༌ནོག༌, ཁོང༌ ནི༌ ཡེ༌ཤུ༌ མ༌ཤི༌ཀ༌ དྲང༌པོ༌བོ༌ ཞུགས༌ཏེ༌ ཨིན༌། 2 ཁོང༌ ནི༌, ཏེན༌ན༌བོ༌ ཞུགས༌ཏེ༌ ཨིན༌, ཀ༌བོའེ༌ ང༌དང༌གུན༌ནི༌ སྡིག༌པ༌གུན༌ སེལ༌ལ༌ ཛད༌ཅེས༌སི༌ ཕིའ༌ ཁོང༌རང༌ངི༌ སྲོག༌པོ༌ སལ༌ལ༌ ཛདས༌, ཡང༌ ང༌དང༌ ཅིག༌པོའེ༌ ཕིའ༌ མན༌པ༌, ཇིག༌རྟེན༌པ༌ ཚང༌མའེ༌ སྡིག༌པ༌གུན༌ནི༌ ཕིའང༌།
3 ཏ༌ གལ༌ཏེས༌ ང༌དང༌གུན༌ནི༌ དཀོན༌མཆོག༌གི༌ བཀའ༌རྒྱ༌གུན༌ ཁའ༌ཉན༌ན༌, ཏེ༌ནེ༌ ང༌དང༌གུན༌ལ༌ ཁོང༌ ཤེས༌ཁན༌བོ༌ ཏན༌ཏན༌ གྱུས༌ ཨིན༌ནོག༌། 4 སུ༌ཞིག༌གི༌ "ང༌ དཀོན༌མཆོག༌ ཤེས༌སད༌" ཟེར༌ཏེ༌, ཁོང༌ངི༌ བཀའ༌གུན༌ལ༌ ཁའ༌ཉན༌ན༌ མེད༌ན༌, ཁོ༌ ཟུན༌ཇན༌ ཨིན༌ནོག༌, ཡང༌ ཏེ༌ མི༌བོའེ༌ ནང༌ང༌ དཀོན༌མཆོག༌གི༌ དྲང༌པོའེ༌ བཀའ༌ མེད༌པ༌ ཨིན༌ནོག༌། 5 ཨིན༌ནའང༌ སུ༌ཞིག༌གི༌ ཁོང༌ངི༌ བཀའ༌གུན༌ནི༌ཀ༌ ལག༌ལེན༌ ཅོའད༌ན༌, ཏན༌ཏན༌ ཏེ༌གུན༌ནི༌ ནང༌ང༌ དཀོན༌མཆོག༌གི༌ ཅམས༌པ༌ གང༌པོ༌ ཡོད༌ཁན༌བོ༌ ཐོང༌ང༌ནོག༌, ཏེ༌བོའེ༌ ང༌དང༌གུན༌ དཀོན༌མཆོག༌ ཉམ༌པོ༌ བྲེལ༌ཏེ༌ ཡོད༌ཁན༌བོ༌ ང༌དང༌གུན༌ལ༌ ཧ༌གོའ༌ནོག༌། 6 སུ༌ཞིག༌གི༌ "ང༌, དཀོན༌མཆོག༌ ཉམ༌པོ༌ བྲེལ༌ཏེ༌ ཨིན༌" ཟེར༌རད༌ན༌, ཏེ༌ནེ༌ ཡེ༌ཤུའི༌ མི༌ཚེ༌ ཕུད༌ད༌ ཛད༌ཁན༌ ཙོགས༌སི༌ མི༌ཚེ༌ཞིག༌, ཁོང༌གུན༌ནིའང༌ ཕུད༌གོ༌ཤེས༌ ཨིན༌ནོག༌།
བཀའ༌རྒྱ༌ སོ༌མ༌།
2:7 ནེ༌ 14
7 ཅེས༌པའེ༌ ཛ༌འོ༌གུན༌, ངའེ༌ ཁྱོ༌ཞ༌གུན༌ལ༌ བྲི༌ཁན༌ནི༌ བཀའ༌རྒྱ༌བོ༌ སོ༌མ༌ མན༌པ༌ སྙིང༌པ༌ཞིག༌ ཨིན༌, ཀ༌བོ༌ ཁྱོ༌ཞ༌གུན༌ལ༌ གོ༌མ༌ནེ༌ ཕར༌ལ༌ ཐོབ༌ཏེ༌ ཨིན༌ནོག༌། ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ ཏེ༌ བཀའ༌རྒྱ༌ སྙིང༌པ༌བོ༌, ཁྱོ༌ཞ༌གུན༌ནི༌ སྔུན༌ལ༌ ཚོར༌ཏེ༌ ཨིན༌ནོག༌། 8 ཨིན༌ནའང༌ ཏེ༌ བཀའ༌རྒྱ༌བོ༌ སོ༌མ༌ཞིག༌གའང༌ ཨིན༌ནོག༌། ཡེ༌ཤུའི༌ ཁོང༌རང༌ངི༌ མི༌ཚེའེ༌བོ༌ ཏེན༌ན༌ བཀའ༌རྒྱ༌ དྲན༌དྲ༌ ཕུད༌ད༌ ཛདས༌, ཡང༌ ཁྱོ༌ཞ༌གུན༌ནིའང༌ ཕུད༌དུག༌, ཅིའ༌ཟེར༌ན༌ ཁྱོ༌ཞའེ༌ ནང༌ང༌ མུན༌གྲིག༌པོ༌ མེད༌ཁན༌ ཆེན༌ སོང༌ཏེ༌ དཀོན༌མཆོག༌གི༌ དེན༌བའེ༌ འོད༌དི༌ ལྡངས༌པོ༌ ཁྱེབ༌ཨིན༌ ཆ༌རུག༌།
9 ཡང༌ སུ༌ཞིག༌གི༌ "ང༌ འོད༌དི༌ ནང༌ང༌ ཨིན༌" ཟེར༌ཨིན༌, ཨིན༌ནའང༌ རང༌ངི༌ སྤུན༌ ཡ༌ སྤུན༌མོ༌ ཉམ༌པོ༌ ནཕ༌རད༌ ཅོ༌ན༌, ཏེ༌གུན༌ ཏ༌རུང༌ངའང༌ མུན༌གྲིག༌གི༌ ནང༌ང༌ དུགས༌ཏེ༌ ཨིན༌ནོག༌། 10 ཡང༌ སུ༌ཞིག༌གི༌ རང༌ངི༌ སྤུན༌ ཡ༌ སྤུན༌མོ༌ ཉམ༌པོ༌ ཅམས༌པ༌ བོར༌རད༌ན༌, ཁོ༌ འོད༌དི༌ ནང༌ང༌ ནས༌ཏེ༌ ཨིན༌ནོག༌, ཁོའེ༌ ནང༌ང༌, ཁོ༌ སྡིག༌པའེ༌ ནང༌ང༌ གྱེལ༌ཅུག༌ཁན༌ ཅའང༌ མེད༌ཏེ༌ ཨིན༌ནོག༌། 11 ཨིན༌ནའང༌ སུ༌ཞིག༌གི༌ རང༌ངི༌ སྤུན༌ཞིག༌ག༌ ནཕ༌རད༌ ཅོའད༌ན༌, ཁོ༌ མུན༌གྲིག༌གི༌ ནང༌ང༌ ལུས༌ཏེ༌ ཏེ༌ནང༌ང༌ གྲུལ༌ཨིན༌ ཨིན༌ནོག༌། ཁོ༌ ཀ༌རུ༌ ཆའད༌ ཁོའ༌ གྱུས༌ མེད༌ཀྱག༌, ཅིའ༌ཟེར༌ན༌ མུན༌གྲིག༌གི༌ ཁོ༌ ཞ༌ར༌ གྱུར༌ཅུག༌ཏེ༌ ཨིན༌ནོག༌།
12 ངའེ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ངའེ༌ ཁྱོ༌ཞའ༌ བྲིའད༌,
ཅིའ༌ཟེར༌ན༌ གཙོ༌བོ༌ ཡེ༌ཤུ༌ གྱུད༌ཏེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛད༌ཏེ༌ ཨིན༌།
13 ཏད༌པའེ༌ ནང༌ང༌ ལྡན༌ཁན༌གུན༌, ཁྱོ༌ཞའ༌ ངའེ༌ བྲིའད༌,
ཅིའ༌ཟེར༌ན༌ གོ༌ཟུག༌ནེ༌ ཕར༌ལ༌ ཞུགས༌ཏེ༌ ཡོད༌ཁན༌ནི༌ མ༌ཤི༌ཀ༌ ཁྱོ༌ཞའེ༌ ཤེས༌ཏེ༌ ཨིན༌།
ཏད༌པའེ༌ ནང༌ང༌ ཁྱོག༌ཏོང༌གུན༌, ངའེ༌ ཁྱོ༌ཞའ༌ བྲིའད༌,
ཅིའ༌ཟེར༌ན༌ ངན༌པ༌ ཤེ༌ཏན༌ནི༌ཀ༌ ཁྱོ༌ཞའ༌ གྱལ༌ཁའ༌ ཐོབ༌ཏེ༌ ཨིན༌།
14 ཏད༌པའེ༌ ནང༌ང༌ ཕྲུ༌གུ༌གུན༌, ཁྱོ༌ཞའ༌ བྲིའད༌,
ཅིའ༌ཟེར༌ན༌ ཁྱོ༌ཞའེ༌, དཀོན༌མཆོག༌ ཡབ༌ ཤེས༌ཏེ༌ ཨིན༌།
ཏད༌པའེ༌ ནང༌ང༌ ལྡན༌ཁན༌གུན༌, ངའེ༌ ཁྱོ༌ཞའ༌ བྲིའད༌,
ཅིའ༌ཟེར༌ན༌ ཁྱོ༌ཞའེ༌ གོ༌ཟུག༌ནེ༌ ཕར༌ལ༌ ཞུགས༌ཏེ༌ ཡོད༌ཁན༌ནི༌ མ༌ཤི༌ཀ༌ ཤེས༌ཏེ༌ ཨིན༌།
ཏད༌པའེ༌ ནང༌ང༌ ཁྱོག༌ཏོང༌གུན༌, ངའེ༌ ཁྱོ༌ཞའ༌ བྲིའད༌,
ཅིའ༌ཟེར༌ན༌ ཁྱོ༌ཞའེ༌ མ༌ཤི༌ཀའེ༌ ནང༌ང༌ ཏད༌པ༌བོ༌ སྟན༌པོ༌,
ཡང༌ དཀོན༌མཆོག༌གི༌ བཀའ༌ ཁྱོ༌ཞའེ༌ སྙིང༌གུན༌ནི༌ ནང༌ང༌ ནས༌ཏེ༌
ཁྱོ༌ཞའ༌ ངན༌པ༌ ཤེ༌ཏན༌ནི༌ཀ༌ གྱལ༌ཁའ༌ ཐོབ༌ཏེ༌ ཨིན༌།
ཇིག༌རྟེན༌ནི༌ ཕིའ༌ དོད༌པ༌ མ༌ཅོ༌ཤིག༌།
2:15 ནེ༌ 17
15 ཇིག༌རྟེན༌ དང༌ ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ཀ༌ སེམས༌ མ༌ཆགས༌ཤིག༌། གལ༌ཏེས༌ མི༌ཞིག༌ ཇིག༌རྟེན༌ དང༌, ཏེ༌ནང༌ང༌ ཡོད༌ཁན༌གུན༌ལ༌ ཆགས༌ན༌, ཁོའེ༌ ནང༌ང༌ ཡབ༌ དཀོན༌མཆོག༌གི༌ ཕིའ༌ ཅམས༌པ༌ མེད༌པ༌ ཨིན༌ནོག༌། 16 ཅིའ༌ཟེར༌ན༌ ཇིག༌རྟེན༌ནི༌ ལས༌ ཚང༌མའེ༌ ནང༌ང༌, སྡིག༌པའེ༌ དོད༌པ༌, མིག༌ནེ༌ ཐོང༌ཁན༌ ཚང༌མའེ༌ དོད༌པ༌ དང༌, རང༌ང༌ ཡོད༌ཁན༌ དང༌ ཅོ༌ཁན༌གུན༌ནི༌ཀ༌ ཕོ༌སོ༌ ཡོང༌ང༌ནོག༌། ཏེ༌གུན༌ ཡབ༌ དཀོན༌མཆོག༌གི༌ ཆོགས༌ནེ༌ མན༌པ༌, ཇིག༌རྟེན༌ནི༌ ཆོགས༌ནེ༌ ཨིན༌ནོག༌། 17 ཇིག༌རྟེན༌ དང༌ ཇིག༌རྟེན༌ནི༌ མི༌གུན༌ནི༌ དོད༌པ༌གུན༌ མེད༌ཁན༌ ཆེན༌, ཨིན༌ནའང༌ དཀོན༌མཆོག༌གི༌ ཐུགས༌ཐད༌ ནང༌ཞིན༌ གྲུལ༌ཁན༌གུན༌ ཏུས༌གྱུན༌ སོན༌ཏེའ༌ ལུས༌ཨིན༌།
མ༌ཤི༌ཀའེ༌ གྲ༌འོ༌ ཡོང༌ཅེས༌སི༌ སྐོར༌།
2:18 ནེ༌ 27
18 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ཏ༌ ཐའ༌མའེ༌ ཞག༌པོ༌ ཉེ༌མོ༌ ལེབས༌ཏེ༌ ཨིན༌ནོག༌། མ༌ཤི༌ཀའེ༌ གྲ༌འོ༌ ཡོང༌ཅེས༌པོ༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌, ཡང༌ དག༌སའང༌ མ༌ཤི༌ཀའེ༌ གྲ༌འོ༌ མང༌པོ༌ཞིག༌ ཡོངས༌ཏེ༌ ཡོད༌ཅེས༌པའེ༌ ང༌དང༌ང༌ ཐའ༌མའེ༌ ཏུས༌ ཉེ༌མོའ༌ ལེབས༌ཏེ༌ ཨིན༌ཁན༌བོ༌ ཧ༌གོའ༌ནོག༌། 19 ཏེ༌གུན༌ ང༌དང༌གུན༌ནི༌ ཕྲོ༌ནེ༌ བིངས༌ཏེ༌ སོང༌, ཨིན༌ནའང༌ དེན༌བ༌ ཁོང༌གུན༌ ང༌དང༌ངི༌ སྤུན༌ མན༌པིན༌, གལ༌ཏེས༌ ཨིན༌པིན༌ན༌, ང༌དང༌གུན༌ ཉམ༌པོ༌ དུགས༌ཏེ༌ ཡོད༌གྲོ༌། ཏ༌ ཁོང༌གུན༌ ང༌དང༌གུན༌ནི༌ ཕྲོ༌ནེ༌ བིངས༌ཏེ༌ སོང༌ པ༌སང༌, ཁོང༌གུན༌ ང༌དང༌གུན༌ནི༌ སྤུན༌ མན༌ཁན༌བོ༌ ཏན༌ཏན༌ སོང༌ཏེ༌ ཨིན༌ནོག༌།
20 ཨིན༌ནའང༌ ཁྱོ༌ཞ༌གུན༌ལ༌ དཀོན༌མཆོག༌གི༌ དམ༌པའེ༌ ཐུག༌ཉིད༌ སལ༌ལ༌ ཛད༌པ༌, ཁྱོ༌ཞའ༌ ཚང༌མའ༌ དེན༌བ༌བོ༌ ཧ༌གོའ༌ནོག༌། 21 ངའེ༌ ཁྱོ༌ཞ༌གུན༌ལ༌ དེན༌བ༌ གྱུས༌ མེད༌ཀྱག༌ སམ༌ཏེ༌ མན༌པ༌, ཁྱོ༌ཞ༌གུན༌ལ༌ ཏན༌ཏན༌ ཤེས༌ཏེ༌ ཡང༌ ཟུན༌བོ༌ དེན༌བའེ༌ ཆོགས༌ནེ༌ མི༌ཡོང༌ཅེས༌པོ༌ གྱུས༌ཡོད༌ པ༌སང༌ བྲིས༌ཏེ༌ ཨིན༌། 22 ཏེ༌ནེ༌ ཟུན༌ཇན༌ སུ༌ ཨིན༌ནོག༌? "ཡེ༌ཤུ༌ ནི༌ མ༌ཤི༌ཀ༌ *2:22 མ༌ཤི༌ཀའེ༌ ཏོན༌ཏག༌པོ༌ དཀོན༌མཆོག༌གི༌ ང༌དང༌གུན༌ སྡིག༌པོའེ༌ ཀ༌ནེ༌ སྐྱོབ༌ཅེས༌སི༌ ཕིའ༌ ལྡམ༌མ༌ ཛད༌ཁན༌བོ༌ ཟེར༌ཏེ༌ ཨིན༌ནོག༌། མ༌ནོག༌" ཟེར༌ཁན༌བོ༌ མ༌ཤི༌ཀའེ༌ གྲ༌འོ༌ ཨིན༌ནོག༌, ཁོའེ༌, ཡབ༌ དང༌ སྲས༌ ཉིས༌ཀོའ༌ ཁོ༌རང༌ངི༌ གཙོ༌བོ༌ མ༌རྩིའ༌ ཨིན༌ནོག༌། 23 སུ༌ཞིག༌གི༌ ཡེ༌ཤུ༌, དཀོན༌མཆོག༌གི༌ སྲས༌ ཨིན༌ཁན༌བོ༌ ཐེའ༌མེད༌ན༌, ཏེ༌ མི༌བོའེ༌ ཡབ༌ ཉམ༌པོའང༌ བྲེལ༌ མེད༌ཏེ༌ ཨིན༌ནོག༌། ཡང༌ སུ༌ཞིག༌གི༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ སྤང༌པོ༌ ཏང༌ན༌, ཁོའེ༌ བྲེལ༌ ཡབ༌ ཉམ༌པོའང༌ ཡོད༌ཏེ༌ ཨིན༌ནོག༌།
24 གོ༌མ༌ནེ༌ ཕར༌ལ༌ ཚོར༌ཁན༌ནི༌ ཏེ༌ ལོན༌ ཟང༌པོ༌བོ༌ ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ལུས༌གོས༌། གལ༌ཏེས༌ ཏེ༌བོ༌ ཁྱོ༌ཞ༌གུན༌ནི༌ ནང༌ང༌ ལུས༌ན༌, ཁྱོ༌ཞ༌གུན༌ནི༌ བྲེལ༌བོ༌ ཡབ༌ དང༌ སྲས༌ ཉམ༌པོའང༌ ལུས༌ཨིན༌། 25 ཏེ༌བོའེ༌ བྲས༌བུ༌ ནི༌, ང༌དང༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཁོང༌ངི༌ ཞལ༌ཆད༌ ཛད༌ཁན༌བོ༌ ཨིན༌ནོག༌།
26 ངའེ༌ ཏེ༌ སྤེ༌ར༌གུན༌, ཁྱོ༌ཞ༌གུན༌ གོབ༌སྐོར༌རི༌ ནང༌ང༌ ཁྱོང༌ཅེས༌སི༌ རྩོན༌གྲུས༌ ཅོ༌ཁན༌གུན༌ནི༌ སྐོར༌ལ༌ སྤང༌པུད༌ཅེས༌ལ༌ བྲིས༌ཏེ༌ ཨིན༌། 27 ཨིན༌ནའང༌ དཀོན༌མཆོག༌གི༌ ཀ༌ནེ༌ ཐོབ༌ཁན༌ནི༌ དམ༌པའེ༌ ཐུག༌ཉིད༌བོ༌ ཁྱོ༌ཞའེ༌ ནང༌ང༌ ལུས༌ པ༌སང༌, ཁྱོ༌ཞ༌གུན༌ལ༌ སུ༌ཞིག༌གིའང༌ ལབ༌གོས༌ མེད༌ཀྱག༌། ཐུག༌ཉིད༌ ཁོང༌རང༌ངི༌ ཁྱོ༌ཞ༌གུན༌ལ༌ ཅི༌ཚང༌མ༌ ལབ༌བ༌ ཛད༌ད༌ནོག༌། ཏེ༌ ལབ༌ཞ༌གུན༌ དེན༌བ༌ ཨིན༌ནོག༌, ཟུན༌ མ༌ནོག༌། ཏེ༌ནེ༌ ཀ༌ཟུག༌ ཁོང༌ངི༌ ལབ༌བ༌ ཛདས༌, ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ བྲེལ༌ཏེ༌ དུག༌ཤིག༌།
དཀོན༌མཆོག༌གི༌ ཕྲུ༌གུ༌གུན༌ནི༌ ཚུལ༌ལ༌ དུག༌ཅེས༌སི༌ སྐོར༌།
2:28 ནེ༌ 29
28 ཏེན༌ན༌བོའེ༌ཕིའ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ཁྲེལ༌བ༌ མ༌ཆའ༌ ཡང༌ ང༌དང༌གུན༌ ཇིགས༌ མ༌ཇིགས༌ས༌, ཁོང༌ངི༌ དུན༌ལ༌ ལང༌ཅེས༌སི༌ ཕིའ༌ ཁོང༌ངི༌ ནང༌ང༌ བྲེལ༌བོ༌ ཆད༌མེད༌ལ༌ བོར༌ཤིག༌།
29 མ༌ཤི༌ཀ༌ དྲང༌པོ༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཡོད༌ པ༌སང༌, ལས༌ དྲང༌པོ༌ ཅོ༌ཁན༌གུན༌ ཁོང༌ནེ༌ སྐྱེས༌ཏེ༌ ཨིན༌ཁན༌བོའང༌ གྱུས༌ཨིན༌ནོག༌།
*2:22 2:22 མ༌ཤི༌ཀའེ༌ ཏོན༌ཏག༌པོ༌ དཀོན༌མཆོག༌གི༌ ང༌དང༌གུན༌ སྡིག༌པོའེ༌ ཀ༌ནེ༌ སྐྱོབ༌ཅེས༌སི༌ ཕིའ༌ ལྡམ༌མ༌ ཛད༌ཁན༌བོ༌ ཟེར༌ཏེ༌ ཨིན༌ནོག༌།