ཡོ༌ཧཱ༌ནན༌ནི༌ ཆག༌བྲིས༌ ཏང༌པོ༌།
ཡོ༌ཧཱ༌ནན༌ནི༌ ཆག༌བྲིས༌ ཏང༌པོའེ༌ སྐོར༌།
འི༌ ཆག༌བྲིས༌ བྲིའ༌ ཛད༌ཁན༌ནི༌ ང༌དང༌གུན༌ལ༌ ཁོང༌ངི༌ མིང༌བོ༌ ཤད༌ད༌ ཛད༌ཏེ༌ མི༌དུག༌། ཨིན༌ནའང༌ འི༌ ཆག༌བྲིས༌ བྲིས༌ ཚུལ༌བོ༌ ཡོ༌ཧཱ༌ནན༌ནི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌ དང༌, ཟོབས༌ཤེས༌, ཡང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ སྤང༌པོ༌ ཏང༌ཅེས༌ གུན༌ནེ༌, འི༌ ཆག༌བྲིས༌པོ༌ གཙོ༌བོ༌ ཡེ༌ཤུའི༌ སྐུ༌ཚབས༌ ཡོ༌ཧཱ༌ནན༌ནི༌ བྲིའ༌ ཛད༌ཁན༌བོ༌ ང༌དང༌གུན༌ལ༌ ཧ༌གོའ༌ནོག༌།
ཆོས༌ཚོགས༌སི༌ ནང༌ང༌ ཁས༌པ༌གུན༌ནེ༌, འི༌ ཆག༌བྲིས༌པོ༌, ཡོ༌ཧཱ༌ནན༌ནི༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 52 ནེ༌ 62 ཉེ༌ཁོར༌ལ༌ བྲིའ༌ ཛད༌ཁན༌བོ༌ ང༌དང༌གུན༌ལ༌ གྱུས༌ ཆའ༌ནོག༌།
ཡོ༌ཧཱ༌ནན༌ནི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌བོ༌, སིལ༌ཁན༌གུན༌ལ༌ ཏེ༌ཏུས༌སི༌ ཟུས༌མའེ༌ ལོབ༌པོན༌གུན༌ནེ༌ སྐྱོབ༌ཅེས༌པོ༌ ཨིན༌པིན༌། ཏེ༌གུན༌ནི༌ ཡེ༌ཤུ༌ ནི༌ མི༌ ཚུལ༌ལ༌ འི༌ ཇིག༌རྟེན༌ནི༌ ནང༌ང༌ མ༌ཡོང༌ང༌ ཨིན༌ཁན༌ ཡང༌, ང༌དང༌གུན༌ནི༌ སྡིག༌པའེ༌ ནང༌ང༌ མི༌ཚེ༌ ཕུད༌ནའང༌ གྲིག༌ཅེས༌པོ༌ ལབ༌བད༌པིན༌། ཡོ༌ཧཱ༌ནན༌ནི༌ དོད༌པ༌བོ༌, ཏད༌པ༌ཅན༌གུན༌ལ༌ ཁོང༌གུན༌ནི༌ ཐར༌པ༌ མེད༌ཁན༌ ཅོ༌ཁན༌ནི༌ ཟུས༌མའེ༌ ལབ༌ཞ༌གུན༌ནེ༌ སྐྱོབ༌བ༌ ཛད༌ཅེས༌པོ༌ ཨིན༌པིན༌།
ཏེ༌བོའེ༌ཕིའ༌ ཡོ༌ཧཱ༌ནན༌ནི༌ མ༌ སལ༌པོ༌ ཅོས༌ཏེ༌ ཡེ༌ཤུ༌ ནི༌, དཀོན༌མཆོག༌གི༌ སྲས༌ ཨིན༌ཁན༌ ཡང༌, མི༌ ཚུལ༌ལ༌ འི༌ ཇིག༌རྟེན༌ནི༌ ནང༌ང༌ སྐྱོད༌ད༌ ཛད༌ཁན༌བོའེ༌ སྤང༌པོ༌ སལ༌ལད༌པིན༌། ཁོང༌ངི༌ ཁོང༌ དང༌, ཞན༌ སྐུ༌ཚབས༌གུན༌ནི༌ ཡེ༌ཤུ༌ ཐོང༌ཁན༌, ལག༌པ༌ རྩེ༌ཁན༌, ཡང༌ ཁོང༌ངི༌ མོལ༌ཁན༌གུན༌ ཚོར༌ཁན༌, ང༌དང༌གུན༌ལ༌ ཨིད༌ཏུ༌ སྐུལ༌ལ༌ ཛདས༌། ཁོང༌ངི༌ ཞན༌མ༌ ཟུན༌མའེ༌ ལབ༌ཞ༌གུན༌ལ༌, གྱབ༌གལ༌ ཅོས༌ཏེ༌ ང༌དང༌གུན༌ལ༌ སྡིག༌པའེ༌ ནང༌ང༌ མི༌ཚེ༌ ཕུད༌ཨིན༌ དུགས༌ཏེ༌ ཐར༌པ༌ ཐོབ༌ཨིན༌, སམ༌ མི༌གོ༌ཤེས༌པོ༌ སལ༌པོ༌ ཅོས༌ཏེ༌ མོལ༌ལ༌ ཛདས༌། ཏེ༌ནེ༌ ཁོང༌ངི༌ ཏད༌པ༌ཅན༌གུན༌ལ༌ ཀ༌ཟུག༌གི༌ དེན༌བ༌ དང༌ ཟུས༌མའེ༌ ལབ༌ཞ༌གུན༌ལ༌ སྟག༌ཅད༌ ཅོ༌ཨིན༌, ཏེ༌བོ༌ ལབ༌བ༌ ཛདས༌༎
1
མི༌ཚེའེ༌ བཀའ༌།
1:1 ནེ༌ 4
1 ང༌ཞའེ༌ ཁྱོ༌ཞ༌གུན༌ལ༌, གོ༌ཟུག༌ནེ༌ ཕར༌ལ༌ ཡོད༌ཁན༌ནི༌ མི༌ཚེའེ༌ བཀའེ༌ སྐོར༌ལ༌ ཤད༌ཅེས༌ཨིན༌, ཀ༌བོའེ༌ མོལ༌ཁན༌གུན༌ ང༌ཞ༌གུན༌ནི༌ ཚོར༌ ཡང༌ ཇལ༌། འོ༌ན༌ རང༌ངི༌ མིག༌ནེ༌ ཞིབ༌སལ༌ ཅོས༌ཏེ༌ ཇལ༌, མ༌ཚད༌ ཁོང༌ང༌ ང༌ཞ༌རང༌ངི༌ ལག༌པ༌ རྩེས༌པིན༌། 2 དཀོན༌མཆོག༌གི༌ ཏེ༌ མི༌ཚེ༌བོ༌ སྔོན༌ཅུག༌ག༌ ཛདས༌, ཡང༌ ང༌ཞ༌གུན༌ནི༌ ཁོང༌ ཇལ༌། ང༌ཞ༌གུན༌ ཏེ༌ མི༌ཚེའེ༌ སྤང༌པོ༌ ཨིན༌ནོག༌, ཡང༌ ཁྱོ༌ཞ༌གུན༌ལ༌ ཏེན༌ན༌ ཐའ༌མེད༌པའེ༌ མི༌ཚེ༌ སྐོར༌ལ༌ ཤད༌དད༌, ཀ༌བོ༌ དཀོན༌མཆོག༌ ཡབ༌ ཉམ༌པོ༌ ཡོད༌པིན༌, ཡང༌ ང༌ཞ༌གུན༌ནི༌ཀ༌ སྔོན༌ཅུག༌ག༌ ཛདས༌། 3 ཁྱོ༌ཞ༌གུན༌ནའང༌ ང༌ཞ༌གུན༌ ཉམ༌པོ༌ དྲེ༌ཤེས༌སི༌ ཕིའ༌ ང༌ཞའེ༌ ཁོང༌ངི༌ སྐོར༌ལ༌ ཚོར༌ཁན༌ དང༌ ཐོང༌ཁན༌ གུན༌ ཁྱོ༌ཞའ༌ ཤད༌དད༌, ཡང༌ ང༌ཞ༌གུན༌ དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ ཉམ༌པོ༌ དྲེས༌ཏེ༌ ཨིན༌། 4 ང༌ཞའེ༌ ཐད༌པོ༌གུན༌ དྲན༌དྲ༌ ཁྱོ༌ཞ༌གུན༌ ཉམ༌པོ༌ བགོ༌ཅེས༌སི༌ ཕིའ༌ འི༌ ཨི༌གེ༌བོ༌ ང༌ཞའེ༌ བྲིའད༌།
འོད༌དི༌ ནང༌ང༌ དུག༌ཅེས༌།
1:5 ནེ༌ 10
5 འི༌ ལོན༌བོ༌ ང༌ཞ༌གུན༌ལ༌ ཡེ༌ཤུའི༌ ཀ༌ནེ༌ ཚོར༌, ཡང༌ ཏ༌ དག༌ས༌ ཁྱོ༌ཞ༌གུན༌ལ༌ ཤད༌ཅེས༌ཨིན༌། དཀོན༌མཆོག༌ ནི༌ འོད༌ ཨིན༌ནོག༌, ཡང༌ ཁོང༌ངི༌ ནང༌ང༌ མུན༌གྲིག༌ མ༌ནེ༌ མེད༌ཀྱག༌། 6 གལ༌ཏེས༌ ང༌དང༌གུན༌ནི༌ དཀོན༌མཆོག༌ ཉམ༌པོ༌ བྲེལ༌ བོར༌རད༌ ཟེར༌ཨིན༌ ཏ༌རུང༌ངའང༌ ངན༌སེམས༌ཅན༌ནི༌ མུན༌གྲིག༌གི༌ ནང༌ང༌ གྲུལ༌ལད༌ན༌, ཏེ༌ནེ༌ ང༌དང༌གུན༌ནི༌ ཟུན༌ ཏངས༌ཏེ༌ དྲང༌པོའེ༌ ལམ༌མི༌ཀ༌ མི༌ཚེ༌ མ༌ཕུད༌ད༌ ཨིན༌ནོག༌། 7 ཨིན༌ནའང༌ གལ༌ཏེས༌ ང༌དང༌གུན༌ འོད༌དི༌ ནང༌ང༌ གྲུལ༌ལད༌ན༌, ཀ༌ཟུག༌ དཀོན༌མཆོག༌ འོད༌དི༌ ནང༌ང༌ ཞུགས༌ཏེ༌ ཨིན༌, ཏེ༌ནེ༌ ང༌དང༌གུན༌ ཅིག༌ དང༌ ཅིག༌ ཉམ༌པོ༌ བྲེལ༌ཏེ༌ ཨིན༌ནོག༌, ཡང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀའེ༌ སྐུ༌ཁྲག༌གི༌, ང༌དང༌གུན༌ སྡིག༌པ༌ ཚང༌མ༌ནེ༌ རྩང༌མ༌ ཛད༌ཨིན༌།
8 ཏ༌ གལ༌ཏེས༌ ང༌དང༌གུན༌ནི༌ སྡིག༌པ༌ མ༌ནེ༌ མ༌ཅོས༌པིན༌ ཟེར༌ན༌, ང༌དང༌ངི༌ རང༌དང༌རང༌ང༌ གོབ༌སྐོར༌ཏེ༌ ཨིན༌ནོག༌, ཡང༌ དེན༌བ༌ ང༌དང༌གུན༌ནི༌ ནང༌ང༌ མེད༌པ༌ ཨིན༌ནོག༌། 9 ཨིན༌ནའང༌ གལ༌ཏེས༌ ང༌དང༌གུན༌ནི༌ དཀོན༌མཆོག༌ག༌ ངའེ༌ སྡིག༌པ༌ ཅོས༌པིན༌ ཟེར༌ན༌, ཨིད༌ཤེས༌ཅན༌ དང༌ དྲང༌པོ༌ ཐག༌ཅད༌ ཛད༌ཁན༌, དཀོན༌མཆོག༌གི༌ ང༌དང༌གུན༌ནི༌ སྡིག༌པ༌གུན༌ལ༌ ཤགས༌པ༌ སལ༌ཏེ༌, ང༌དང༌གུན༌ ང༌དང༌ངི༌ ལས༌ ངན༌པ༌གུན༌ནེ༌ རྩང༌མ༌ ཛད༌ཨིན༌། 10 གལ༌ཏེས༌ ང༌དང༌གུན༌ནི༌ ངའེ༌ སྡིག༌པ༌ མ༌ནེ༌ མ༌ཅོས༌པིན༌ ཟེར༌ན༌, ང༌དང༌ངི༌ དཀོན༌མཆོག༌ ཟུན༌ཇན༌ ཐེ༌ཅེས༌ མ༌ཚད༌, ང༌དང༌གུན༌ནི༌ སྙིང༌ངི༌ ནང༌ང༌ དཀོན༌མཆོག༌གི༌ བཀའེ༌ ཕིའ༌ ནས༌ས༌ མེད༌པ༌ ཨིན༌ནོག༌།