3 ཚང༌མའེ༌སང༌ སྔུན༌ལ༌ ཁྱོ༌ཞ༌གུན༌ལ༌ འི༌བོ༌ ཧ༌གོ༌གོས༌, ཐའ༌མའེ༌ ཏུས༌ལ༌ སྡིག༌པའེ༌ དོད༌པ༌ ནང༌ཞིན༌ རང༌ངི༌ མི༌ཚེ༌ ཕུད༌ཨིན༌, ཁྱོ༌ཞའེ༌ ཏད༌པའེ༌ཀ༌ ཁྲེལ༌གོད༌ ཏང༌ཁན༌ནི༌ མི༌རིག༌ ཡོང༌ཨིན༌། 4 ཁོང༌གུན༌ནི༌ ཟེར༌ཨིན༌, "མ༌ཤི༌ཀ༌ ལོགས༌ཏེ༌ སྐྱོད༌ཅེས༌སི༌ ཞལ༌ཆད༌པོ༌ ཀ༌རུ༌ སོང༌" ཡང༌ "ང༌ཞའེ༌ ཕ༌མེས༌པོ༌གུན༌ ཤི༌ ཚར༌པ༌ནེ༌ ཕར༌ལ༌ དག༌ས༌ ཚག༌པ༌ འི༌ ཇིག༌རྟེན༌ནི༌ ཚིར༌གུན༌, ཏེན༌ན༌ ཟུག༌ག༌ གྲུལ༌དུག༌ ཀ༌ཟུག༌ གོ༌མ༌ ཇིག༌རྟེན༌ ཛད༌ ཟ༌ནེ༌ ཡོད༌པིན༌།"

5 ཁོང༌གུན༌ནི༌ མིང༌ནའང༌ འི༌གུན༌ལ༌ སྣང༌མེད༌ ཅོས༌ཏེ༌ ཨིན༌ནོག༌, ཏང༌པོ༌, ཏུས༌ མང༌པོ༌ཞིག༌གི༌ སྔུན༌ལ༌ དཀོན༌མཆོག༌གི༌ བཀའ༌ ནང༌ཞིན༌ལ༌ ནམ༌ཁའ༌བོ༌ ཅོའ༌ ཛད༌ཏེ༌, ས༌ཞི༌བོ༌ ཆུའི༌ ཕྲོ༌ནེ༌ ཕི༌ལོག༌ག༌ ཕིང༌ང༌ ཛད༌ཏེ༌ ཏེ༌བོའ༌ ཆུའི༌ སྐོར༌ཅུག༌ག༌ ཛདས༌། 6 ཉིས༌པ༌, དཀོན༌མཆོག༌གི༌ ཞབ༌སྟོག༌པ༌ ནོ༌ཨཱའེ༌ ཏུས༌ལ༌ དཀོན༌མཆོག༌གི༌ བཀའ༌ ནང༌ཞིན༌ ཆུ༌ལོག༌གི༌ ཞས༌ཏེ༌, ཏེ༌ཏུས༌སི༌ ཇིག༌རྟེན༌པ༌གུན༌ མེད༌ཁན༌ སོང༌ཏེ༌ ཨིན༌པིན༌། 7 ཏེན༌ན༌ དཀོན༌མཆོག༌གི༌ བཀའ༌ གྱུད༌ཏེ༌, ནམ༌ཁའ༌ དང༌ ས༌ ཉིས༌ཀོ༌, མེའེ༌ ནང༌ང༌ སྲག༌ཅེས༌ལ༌ ལུས༌ཤུག༌ག༌ ཛད༌ཏེ༌ ཨིན༌ནོག༌། ཡང༌ ཏེ༌གུན༌ ཏེ༌ཏེ༌ཚོག༌པ༌ ཐེན༌ཏེ༌ བོར༌ར༌ ཛད༌ཏེ༌ ཨིན༌ནོག༌ ནམ༌ཚོག༌པ༌ འི༌ ཇིག༌རྟེན༌ནི༌ ཏད༌པ༌ མེད༌ཁན༌ནི༌ མི༌གུན༌ལ༌, ཁོང༌ངི༌ ཤགས༌ ཅད༌ཏེ༌ མེད༌ཁན༌ ཅོའ༌ མི༌ཛད༌།

8 ཨིན༌ནའང༌ ངའེ༌ ཅེས༌པའེ༌ སྤུན༌གུན༌, འི༌ སྤེ༌ར༌བོ༌ མ༌ནེ༌ མ༌ཞེད༌ཤིག༌, གཙོ༌བོ༌ དཀོན༌མཆོག༌གི༌ སྐུན༌དུན༌ལ༌ ཞག༌ཅིག༌པོ༌ ནི༌ ལོ༌ སྟོང༌ ཅིག༌ ཡང༌ ལོ༌ སྟོང༌ཅིག༌པོ༌ ནི༌ ཞག༌ཅིག༌ དང༌ དྲན༌དྲ༌ ཨིན༌ནོག༌། 9 མི༌ ཁ༌ཅིག༌གི༌ གཙོ༌བོ༌ ཁོང༌རང༌ ལོགས༌ཏེ༌ ཕེབ༌ཅེས༌སི༌ ཞལ༌ཆད༌པོ༌, གོར༌ཏེ༌ ཨིན༌ནོག༌ སམ༌དུག༌, ཨིན༌ནའང༌ ངོས༌པོའ༌ ཁོང༌ གོར༌ཏེ༌ མ༌ནོག༌, ཅིའ༌ཟེར༌ན༌ ཁོང༌ངི༌ ཁྱོ༌ཞ༌གུན༌ནི༌ ཕིའ༌ ཟོད༌པ༌ ཛད༌ཏེ༌ ཨིན༌ནོག༌། ཁོང༌ངི༌ སུ༌ཞིག༌གའང༌ མེད༌ཁན༌ ཅོའ༌ མ༌ཛད༌ད༌, མི༌ཚང༌མའེ༌ གྱོད༌པ༌ ཅོ༌ཅེས༌སི༌ དོད༌པ༌ ཛད༌ད༌ནོག༌། 10 ཨིན༌ནའང༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཅེས༌སི༌ ཞག༌པོ༌ ནི༌, སང༌ཝའེ༌ ནང༌ང༌ རྐུན༌མ༌ ཙོགས༌ལ༌ ལེབ༌ཨིན༌། ཏེ༌ ཞག༌ག༌ ནམ༌ཁའེ༌ བར༌ནང༌བོ༌ མ༌ ཀུ༌ཅོ༌ ཀྲག༌པོ༌ ཉམ༌པོ༌ མེད༌ཁན༌ ཆེན༌, ཡང༌ ནམ༌ཁའེ༌ ནང༌ང༌ ཡོད༌ཁན༌ ཚང༌མ༌ ཚད༌ ཀྲག༌པོའེ༌ ཞུ༌ཏེ༌ ཆེན༌། ཡང༌ ས༌ཞི༌ཀ༌ ཡོད༌ཁན༌ ཚང༌མ༌ ཚིག༌ཏེ༌ མེད༌ཁན༌ ཆེན༌།

11-12 ཏ༌ གལ༌ཏེས༌ འི༌ ཚང༌མ༌ མེད༌ཁན༌ ཆའད༌ན༌, ཁྱོ༌ཞ༌གུན༌ནི༌ མི༌ཚེ༌བོ༌ ཀ༌ཟུག༌ག༌ ཕུད༌གོས༌། དཀོན༌མཆོག༌གི༌ ཞག༌པོའ༌ སྲུང༌ཏེ༌ གྱོགས༌པ༌ ལེབ༌ཅུག༌ཅེས༌ལ༌ རྩོན༌གྲུས༌ ཅོ༌ཨིན༌, ཁྱོ༌ཞ༌གུན༌ནི༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ དང༌ དམ༌པ༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌། ཏེ༌ ཞག༌ག༌ ནམ༌ཁའེ༌ བར༌ནང༌ མེའ༌ ཚིག༌ཏེ༌, ཡང༌ ཏེ༌ནང༌ང༌ ཡོད༌ཁན༌ ཚང༌མ༌ ཞུ༌ཏེ༌ མེད༌ཁན༌ ཆེན༌། 13 ཨིན༌ནའང༌ ང༌དང༌གུན༌ དཀོན༌མཆོག༌གི༌ ཞལ༌ཆད༌ ནང༌ཞིན༌ལ༌ ནམ༌ཁའ༌ སོ༌མ༌ཞིག༌ དང༌ ས༌ཞི༌ སོ༌མ༌ཞིག༌གི༌ ཕིའ༌, སྲུངས༌ཏེ༌ དུག༌ཨིན༌, ཀ༌བོ༌ དྲང༌པོའེ༌ ལམ༌མི༌ཀ༌ གྲུལ༌ཁན༌གུན༌ ནི༌, ཁང༌པ༌ ཨིན༌ནོག༌།

14 ཏེ༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ འི༌ ཚང༌མ༌ བྱུང༌ཅེས༌སི༌ ཕིའ༌ སྲུངས༌ཏེ༌ ཡོད༌ ཟ༌ནེ༌, ཁྱོ༌ཞ༌རང༌ དཀོན༌མཆོག༌གི༌ སྐུན༌དུན༌ལ༌ རྩང༌མ༌, སྐྱོན༌མེད༌ཁན༌ དང༌ ཞི༌དེ༌ ཉམ༌པོ༌ མི༌ཚེ༌ ཕུད༌ཁན༌ཞིག༌ ལྟན༌ ཐུབ༌ཅེས༌སི༌ ཕིའ༌ མ༌ རྩོན༌གྲུས༌ ཅོ༌ཤིག༌།

15 ཡང༌ དཀོན༌མཆོག༌གི༌ ཟོད༌སེམས༌ ཉམ༌པོ༌ ང༌དང༌གུན༌ལ༌ ཐར༌པ༌ ཐོབ༌ཅེས༌སི༌ སྐབས༌ སལ༌ལ༌ ཛད༌ཁན༌བོ༌ ཧ༌གོ༌ གོ༌ཤེས༌པོ༌, མ༌ ཁག༌ཅན༌ཞིག༌ ཨིན༌ནོག༌། ང༌དང༌ངི༌ ཅེས༌པའེ༌ སྤུན༌ པ༌འུ༌ལུའིང༌, དཀོན༌མཆོག༌གི༌ སལ༌ལ༌ ཛད༌ཁན༌ནི༌ ཤེས༌རབས༌ ནང༌ཞིན༌ལ༌, ཁྱོ༌ཞ༌གུན༌ལ༌ བྲིའ༌ ཛད༌ཏེ༌ ཨིན༌ནོག༌། 16 ཁོང༌ངི༌ རང༌ངི༌ ཆག༌བྲིས༌ ཚང༌མའེ༌ ནང༌ང༌, འིན༌ན༌ ཙོགས༌སི༌ གོར༌གྱན༌གུན༌ནི༌ སྐོར༌ལ༌ བྲིའ༌ ཛད༌ཏེ༌ དུག༌། ཁོང༌ངི༌ ཆག༌བྲིས༌ ཁ༌ཅིག༌གི༌ ནང༌ང༌ ཧ༌གོ༌ཅེས༌ལ༌ མ༌ ཀགས༌པོ༌ ཆའ༌ཁན༌ནི༌ ལབ༌ཞ༌ རིག༌གའང༌ ཡོད༌ཏེ༌ ཨིན༌ནོག༌། ཡང༌ སམ༌བ༌ མེད༌ཁན༌ དང༌ སྟན༌ཞི༌ མེད༌ཁན༌ནི༌ མི༌ ཁ༌ཅིག༌གི༌, པ༌འུ༌ལུའི༌ ཆག༌བྲིས༌གུན༌ནི༌ ཏོན༌ཏག༌པོ༌ མིང༌ནའང༌ གྱུར༌ཏེ༌ ཨིན༌ནོག༌, ཀ༌ཟུག༌ ཁོང༌གུན༌ནི༌ ཞན༌ དམ༌པའེ༌ སུང༌རབས༌གུན༌ལ༌ ཅོའད༌, ཀ༌བོའེ༌ ཁོ༌རང༌གུན༌ནི༌ ཕིའ༌ ནོད༌སྐྱལ༌ ཁྱོང༌དུག༌།

ཡང༌ ཁོང༌ང༌ དག༌ས༌ དང༌ ཏུས༌གྱུན༌ སྤལ༌ ཐོབ༌ཤིག༌། ཨ༌མེན༌༎