4 དཀོན༌མཆོག༌གི༌ སྡིག༌པ༌ ཅོ༌ཁན༌ནི༌ ཕོ༌ཉ༌གུན༌ནའང༌ ཕུད༌ད༌ མ༌ཛད༌ད༌, མུན༌ནག༌གི༌ ནང༌ང༌ ལྕག༌རོག༌ ཏངས༌ཏེ༌ ཁྲིམས༌ཅད༌དི༌ ཞག༌ ཚག༌པ༌ ཉལ༌ཝའེ༌ ནང༌ང༌ ཕང༌ང༌ ཛད༌ཏེ༌ ཨིན༌ནོག༌། 5 ཡང༌ སྔུན༌མའེ༌ མིར༌གྱུད༌གུན༌ནའང༌, ཕུད༌ད༌ མ༌ཛད༌ད༌, དཀོན༌མཆོག༌ག༌ མ༌ཇིགས༌ཁན༌གུན༌ནི༌ ཕིའ༌ ཇིག༌རྟེན༌ནི༌ཀ༌ ཆུ༌ལོག༌ ཀལ༌ལ༌ ཛདས༌། ཨིན༌ནའང༌ ལམ༌ དྲང༌པོའེ༌ སྐོར༌ལ༌ ཆོས༌ཤད༌ཁན༌ ཁོང༌ངི༌ ཞབ༌སྟོག༌པ༌, ནོ༌ཨཱ༌ དང༌ ཁོའེ༌ ནང༌མི༌ རྡུན༌བོ༌ སྐྱོབ༌བ༌ ཛདས༌། 6 སོ༌དོམ༌ དང༌ ག༌མོ༌ར༌ གྱལ༌ས༌ ངན༌པ༌ ཉིས༌ཀོའ༌ དཀོན༌མཆོག༌གི༌ ཤི༌ཅེས༌སི༌ ཁྲིམས༌ཅད༌ད༌ ཛད༌ཏེ༌ མེའ༌ སྲགས༌ཏེ༌ གོག༌ཐལ༌ལ༌ གྱུར༌ ཅུག༌ག༌ ཛདས༌། ཏེ༌བོ༌ ནི༌ ཡོང༌ཅེས༌ཅན༌ནི༌ དཀོན༌མཆོག༌ག༌ མ༌ཇིགས༌ཁན༌ནི༌ མིར༌གྱུད༌གུན༌ནི༌ཀ༌ བྱུང༌ཅེས༌པོ༌ སྤེ༌ཞིག༌གི༌ ཚུལ༌ལ༌ སལ༌ལ༌ ཛདས༌། 7 ཡང༌ སོ༌དོམ༌མི༌ གྱལ༌སའེ༌ ཏེ༌ ཁྲིམས༌མེད༌དི༌ མི༌གུན༌ནི༌ ལུས༌བྲེལ༌ ངན༌པའེ༌ སྕོད༌པ༌གུན༌ནི༌ ཞས༌ཏེ༌, མ༌སྲན༌ཏྲེ༌ སེམས༌ སྐྱོ༌མོ༌ སོང༌ཏེ༌ ཡོད༌ཁན༌ དྲང༌པོ༌ དཀོན༌མཆོག༌གི༌ ཞབ༌སྟོག༌པ༌ ལོཊ༌ སྐྱོབ༌བ༌ ཛདས༌། 8 ༼ཏེ༌ མི༌ དྲང༌པོ༌བོ༌ ཏེ༌གུན༌ནི༌ སྐྱིལ༌ལ༌ དུགས༌ཏེ༌ ཞག༌ཏང༌ ཁོང༌གུན༌ནི༌ ངན༌པ༌ ལས༌གུན༌ ཐོང༌ཅེས༌ དང༌ ཚོར༌ཅེས༌པོའེ༌, ཁོའེ༌ སེམས༌ དྲང༌པོ༌བོའ༌ རྡུག༌ངལ༌ ཐོང༌ངད༌པིན༌༽། 9 ཏེ༌ནེ༌ ཀ༌ཟུག༌གི༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌གུན༌ ཚོད༌ལྟ༌གུན༌ནེ༌ སྐྱོབ༌ཅེས༌ དང༌ མི༌ངན༌གུན༌ལ༌ ཁྲིམས༌ཅད༌དི༌ ཞག༌ ཚོག༌པ༌ ཆད༌མེད༌ལ༌ ཆད༌པ༌ ཀལ༌ཨིན༌ བོར༌ཅེས༌ གུན༌ ཁོང༌ངི༌ ཁྱེན༌ན༌ ཛད༌ད༌ནོག༌། 10 མིག༌སལ༌ལི༌ ཝང༌ ཡོད༌ཁན༌གུན༌ལ༌ རྩིས༌མེད༌ ཅོས༌ཏེ༌ ལུས༌བྲེལ༌ ངན༌པའེ༌ དོད༌པའེ༌ ལམ༌མི༌ཀ༌ གྲུལ༌ཁན༌གུན༌ལ༌ དཀོན༌མཆོག༌གི༌ ཆད༌པ༌ སལ༌ལ༌ ཛད༌ཨིན༌།

ཏེ༌གུན༌ རང༌གྱལ༌ཅན༌ དང༌ ཕོ༌སོ༌ཅན༌ ཡོང༌ང༌ནོག༌, ཡང༌ ཟིར༌རྗིད༌ཅན༌གུན༌ནི༌ སྐོར༌ལ༌ ངན༌པ༌ ཟེར༌ཅེས༌ལ༌ ཚབ༌ས༌ མ༌ནོག༌། 11 དཀོན༌མཆོག༌གི༌ ཕོ༌ཉ༌གུན༌ ཝང༌ དང༌ སྟོབས༌སི༌ ནང༌ང༌ ཏེ༌ ཟུས༌མའེ༌ ལོབ༌པོན༌གུན༌ནི༌ སང༌ ཀྲག༌པོ༌ ཡོད༌ནའང༌, དཀོན༌མཆོག༌གི༌ དུན༌ལ༌ ཁོང༌གུན༌ནིའང༌ ཏེ༌གུན༌ནི༌ གྱབ༌གལ༌ལ༌ ངན༌པ༌ མོལ༌ལ༌ ཛད༌ད༌ མི༌དུག༌།

12 ཏེ༌ ཟུས༌མའེ༌ ལོབ༌པོན༌གུན༌ སམ༌བ༌ མ༌ཏང༌ང༌ ལས༌ ཅོ༌ཁན༌ནི༌ ནག༌ཚོགས༌སི༌ སེམས༌ཅན༌གུན༌ ཙོགས༌ ཨིན༌ནོག༌, ཀ༌གུན༌ ཟུམས༌ཏེ༌ ཁྲེས༌སྟོར༌ ཅོ༌ཅེས༌ལ༌ སྐྱེས༌ཏེ༌ ཨིན༌། ཁོང༌གུན༌ལ༌ ཧ༌མ༌གོ༌ཁན༌གུན༌ནི༌ སྐོར༌ལ༌ ཁོང༌གུན༌ནི༌ ཁྲེལ༌གོད༌ ཏང༌ང༌ནོག༌, ནག༌ཚོགས༌སི༌ སེམས༌ཅན༌གུན༌ ཙོགས༌ལ༌ ཏེ༌གུན༌ནའང༌ ཁྲེས༌སྟོར༌ ཆེན༌། 13 ཏེ༌གུན༌ལ༌ རང༌ངི༌ ལས༌ ངན༌པའེ༌ བྲས༌བུ༌ ངན༌པ༌ ཐོབ༌ཨིན༌། ཏེ༌གུན༌ ཉི༌མའེ༌ འོད༌དི༌ ནང༌ང༌ ཁོ༌རང༌གུན༌ནི༌ དོད༌པ༌ ངན༌པའེ༌ ལས༌ ཅོ༌ཅེས༌ལ༌ ཐད༌ད༌ནོག༌, ཡང༌ ཁོང༌གུན༌ ཁྱོ༌ཞའེ༌ ཀོས༌ལག༌ དང༌ ལྡོང༌ངི༌ཀ༌ ནག༌ཐིག༌ ཕོག༌ཁན༌ ཙོགས༌ ཨིན༌ནོག༌། ཁྱོ༌ཞའ༌ ཉམ༌པོ༌ ཡེ༌ཤུ༌ ཀྲོང༌ཤེས༌པོ༌ ཨིད༌ཏུ༌ ཅོ༌ཨིན༌ ཁར༌ཇི༌ ཟའ༌ ཟ༌ནེའང༌, ཁོང༌གུན༌ནི༌ ཁྱོ༌ཞ༌ གོབ༌སྐོར༌ ཏང༌ཅེས༌ལ༌ ཐད༌ད༌ནོག༌། 14 ཏེ༌གུན༌ནི༌ ཏུས༌གྱུན༌ ལུས༌བྲེལ༌ལི༌ ཕིའ༌ དོད༌པ༌ ཅོའ༌ནོག༌, ཡང༌ སྡིག༌པ༌ མ༌ཅོའ༌ མ༌ནེ༌ དུག༌ཉན༌ན༌ མ༌ནོག༌, ཏད༌པ༌ སྟན༌པོ༌ མེད༌ཁན༌གུན༌ལ༌ སྡིག༌པ༌ ཅོ༌ཅེས༌སི༌ ཚོད༌ལྟའེ༌ ནང༌ང༌ ཁྱེར༌ར༌ནོག༌། ཁོང༌གུན༌ ནབ༌སེམས༌སི༌ ནང༌ང༌ ཁས༌པ༌ ཡང༌ རྔན༌ ཕོག༌ཁན༌ནི༌ པུར༌གྱུད༌ ཨིན༌ནོག༌། 15 ཏེ༌གུན༌ནི༌ ལམ༌ དྲང༌པོ༌ ཕངས༌ཏེ༌, བེ༌ཨོར༌རི༌ བུ༌ཚ༌ ལུང༌སྟོན༌པ༌ བཱ༌ལའམ༌མི༌ ལམ༌ ངན༌པའེ༌ཀ༌ གྲུལ༌ཏེ༌ ཨིན༌ནོག༌, པེ༌ནེ༌ ཅོ༌ཅེས༌སི༌ དོད༌པའེ༌, ཁོའ༌ ངན༌པ༌ ཅོ༌ཅུགས༌ཏེ༌ ཨིན༌པིན༌། 16 ཨིན༌ནའང༌ ཏེ༌ ཞག༌ག༌, སྤེ༌ར༌ ཟེར༌ མི༌ཤེས༌ཁན༌ནི༌ བུང༌བུའང༌ སྤེ༌ར༌ ཏང༌ཉན༌ཏེ༌ ཁོའེ༌ ལས༌ངན༌གུན༌ནི༌ ཕིའ༌ ཁོའ༌ ཁའ༌སྐྱེས༌ཏེ༌, ཁོའ༌ ཆལ༌ཆོལ༌ལི༌ ལས༌ ཅོ༌ཅེས༌ནེ༌ གགས༌།

17 ཏེ༌ ཟུས༌མའེ༌ ལོབ༌པོན༌གུན༌ ནི༌, ཆུ༌ མེད༌ཁན༌ནི༌ ཆུ༌མིག༌ དང༌, ལུང༌རག༌ ཀྲག༌པོའེ༌ མ༌མུན༌ ཏེད༌ཏེ༌ ཁྱེར༌ར༌ ཙོགས༌ ཨིན༌། ཏེ༌གུན༌ནི༌ ཕིའ༌ མུན༌ནག༌ ཚང༌མའེ༌སང༌ ཏིང༌ཅན༌བོ༌ ལྡམ༌མ༌ ཛད༌ཏེ༌ ཡོད༌། 18 ཏེ༌གུན༌ནི༌ ཏོན༌མེད༌དི༌ སྤེ༌ར༌ ཏང༌ཨིན༌ རང༌སྟོད༌ ཏང༌ང༌ནོག༌། ཉེ༌ཐུབ༌ཤིག༌རང༌ སྡིག༌པའེ༌ མི༌ཚེ༌ ཕུད༌ཅེས༌ནེ༌ ཤོར༌ཐུབ༌ཁན༌ནི༌ མི༌གུན༌ལ༌ ཁོང༌གུན༌ནི༌ ཟུགས༌པོའེ༌ དོད༌པ༌ ངན༌པ༌ ནང༌ཞིན༌ ཅོ༌ཅེས༌ལ༌, ཚོད༌ལྟའེ༌ ནང༌ང༌ ཏང༌དུག༌། 19 ཏེ༌གུན༌ནི༌ ཞན༌མ༌གུན༌ལ༌ རང༌ཝང༌ ཏང༌ཅེས༌སི༌ ཁ༌ཆད༌ ཅོ༌རུག༌, ཨིན༌ནའང༌ ཁོ༌རང༌གུན༌ ངན༌པའེ༌ ཚེ༌ཡོག༌ གྱུར༌ཏེ༌ དུག༌, ཅིའ༌ཟེར༌ན༌ མི༌ཞིག༌ ཁོའེ༌ཀ༌ ཝང༌སྲུལ༌ཁན༌བོའེ༌ ཚེ༌ཡོག༌ གྱུར༌ར༌ནོག༌། 20 གལ༌ཏེས༌ ང༌དང༌ངི༌ གཙོ༌བོ༌ དང༌ སྐྱབ༌གོན༌, ཡེ༌ཤུ༌ མ༌ཤི༌ཀ༌ ཤེ༌ཤེས༌པོའེ༌ ཇིག༌རྟེན༌ནི༌ དོད༌པ༌ ངན༌པ༌གུན༌ནེ༌ ཤོར༌ཐུབ༌ཁན༌གུན༌ནི༌ ཡང༌སྐྱར༌ སྡིག༌པའ༌ ཁོ༌རང༌གུན༌ནི༌ཀ༌ ཁྲིལ༌ཅུགས༌ཏེ༌ ཝང༌སྲུལ༌ཅུག༌གད༌ན༌, ཏེ༌ནེ༌ ཏེ༌གུན༌ནི༌ ནས༌ལུག༌པོ༌ སྔུན༌ནི༌ སང༌ མང༌ང༌ ཐུའ༌ཆེན༌། 21 ཏེ༌གུན༌ནི༌ དམ༌པ༌ མི༌ཚེ༌ ཕུད༌ཅེས༌སི༌ བཀའ༌ སལ༌ཁན༌བོ༌ ཧ༌གོ༌ཏེ༌ སྟིང༌ནེ༌ ངོ༌ལོག༌ ཅོའེ༌ སང༌, ཏེ༌གུན༌ལ༌ དྲང༌པོ༌ མི༌ཚེ༌ ཕུད༌ཅེས༌སི༌ ལམ༌བོ༌ མ༌ནེ༌ གྱུས༌ མ༌སོང༌པིན༌ན༌, གྱལ༌ལ༌ ཡོད༌གྲོ༌། 22 ཁོང༌གུན༌ནི༌ ཕིའ༌ ཏ༌ འི༌ ཏམ༌སྤེ༌བོ༌ ཁྲོད༌ད༌ནོག༌, "ཁྱི༌ཞིག༌ རང༌ངི༌ སྐྱུགས༌པ༌ ཟའ༌ལ༌ ལོགས༌ཏེ༌ ཆའ༌ནོག༌།" ཡང༌ "ཕག༌ ཁྲུས༌ཏེ༌ སྟིང༌ནེ༌ ལྡམ༌པ༌ལག༌གི༌ ནང༌ང༌ དྲེས༌ས༌ལ༌ ལོགས༌ཏེ༌ ཆའ༌ནོག༌།"*2:22 ཏམ༌སྤེ༌ སྤེ༌ཆའེ༌ 26:11