ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཉིས༌པ༌།
ཀོ༌རིན༌ཐི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌, ང༌དང༌ང༌ འི༌ ཆག༌བྲིས༌པོ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌།
འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 22 ཉེ༌ཁོར༌ལ༌ བྲིའ༌ ཛད༌ཁན༌བོ༌ ང༌དང༌གུན༌ལ༌ ཆོས༌སི༌ ཁས༌པ༌གུན༌ གྱུད༌ཏེ༌ གྱུས༌ ཆའ༌ནོག༌། འི༌ ཆག༌བྲིས༌པོ༌, པ༌འུ༌ལུའི༌ ཨེ༌ཕེ༌སས༌སི༌ ནང༌ང༌ ཡོད༌ཏུས༌ བྲིའ༌ ཛད༌ཏེ༌ ཨིན༌ནོག༌།
འི༌ ཆག༌བྲིས༌ དང༌ སྔུན༌མའེ༌ ཆག༌བྲིས༌སི༌ པར༌རི༌ ཏུས༌པོའེ༌ ནང༌ང༌ པ༌འུ༌ལུ༌ ཀོ༌རིན༌ཐི༌ ཆོས༌ཚོགས༌ལ༌ ཐུག༌ག༌ལ༌ སོང༌ཏེ༌ ཨིན༌པིན༌། ཏེ༌ཏུས༌པོ༌ པ༌འུ༌ལུ༌ དང༌ ཁོང༌གུན༌ནི༌ ཕིའ༌ མ༌ ཀགས༌པོའེ༌ ཏུས༌ཤིག༌ ཨིན༌པིན༌, ཅིའ༌ཟེར༌ན༌ ཁོང༌ང༌ ཏེ༌ ཆོས༌ཚོགས༌པོའ༌ ཏེ༌ནང༌ང༌ ཡོད༌ཁན༌ནི༌ ནོར༌ཁྲུལ༌ ཚང༌མའེ༌ ཀ༌ནེ༌ སྐྱོང༌གོས༌པིན༌། སྟིང༌ནེ༌ ཁོང༌ངི༌ ཏི༌ཏུས༌ ཏེ༌རུ༌ ལམ༌ཅུགས༌ ཡང༌ ཁོང༌གུན༌ནི༌ སྐོར༌ལ༌ ཏི༌ཏུས༌སི༌ ཀ༌ནེ༌ ནས༌ཚུལ༌ ཟང༌པོ༌ རིག༌ ཚོར༌། ཨིན༌ནའང༌ ཏ༌རུང༌ངའང༌ ཏེ༌ ཆོས༌ཚོགས༌སི༌ ནང༌ང༌ ཁ༌ཅིག༌གི༌ པ༌འུ༌ལུའི༌ ཝང༌ཆ༌བོའ༌ གྱབ༌གལ༌ ཅོའད༌པིན༌། ཏེན༌ན༌བོའེ༌ཕིའ༌ པ༌འུ༌ལུའི༌ འི༌ ཆག༌བྲིས༌པོ༌ བྲིའ༌ ཛདས༌, འི༌ནང༌ང༌
1, ཀོ༌རིན༌ཐིའ༌ ལོགས༌ཏེ༌ ཡོང༌ཅེས༌སི༌ ཐབས༌ལྡིངས༌སི༌ ནང༌ང༌ ཅི༌ཕིའ༌ གྱུར༌ཇ༌ ཁྱོངས༌ཁན༌བོ༌ ཧ༌གོ༌ཅུག༌ག༌ ཛད༌ཅེས༌;
2, ཁོང༌གུན༌ནི༌ ཆད༌པ༌ ཅད༌ཁན༌, ཏད༌པ༌ཅན༌ སྡིག༌པ༌ ཅོ༌ཁན༌བོ༌ ཉམ༌པོ༌ ཐུན༌བྲེལ༌ ཅོ༌ཅེས༌ལ༌ ཞུ༌ཝ༌ ཞུ༌ཅེས༌;
3, ཟུས༌མ༌ ལོབ༌པོན༌གུན༌ནི༌ སྤུང༌གོལ༌ནེ༌ ཁོང༌ངི༌ ཆག༌ལས༌གུན༌ སྐྱོབ༌བ༌ ཛད༌ཅེས༌;
4, ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ནི༌ ཕིའ༌ པེ༌ནེ༌ རོག༌རམ༌མི༌ ཁ༌ཆད༌ ཅོ༌ཁན༌བོ༌ དྲན༌དྲའ༌ གྲུབ༌ཅུག༌ཅེས༌ལ༌ སྤོས༌པ༌ སལ༌ཅེས༌;
5, ཀོ༌རིན༌ཐི༌ ནང༌ང༌ ཡོད༌ཁན༌ནི༌ ཟུས༌མའེ༌ སྐུ༌ཚབས༌གུན༌ནི༌ ཟེར༌ཁན༌ནི༌ གྱབ༌གལ༌ལ༌, པ༌འུ༌ལུ༌ མ༌ཤི༌ཀའེ༌ སྐུ༌ཚབས༌ ཨིན༌ཁན༌ནི༌ ཝང༌ཆ༌བོ༌ ཆོས༌ཚོགས༌ལ༌ ལྟན༌ཅེས༌༎
1
པ༌འུ༌ལུའི༌ ཆོགས༌ནེ༌ ཇུ༌།
1:1 ནེ༌ 2
1 འི༌ ཨི༌གེ༌བོ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛདས༌ཁན༌ནི༌ པ༌འུ༌ལུའི༌ ཆོགས༌ནེ༌ ཨིན༌། ང༌དང༌ངི༌ སྤུན༌ ཏི༌མོ༌ཐིའི༌ ང༌ ཉམ༌པོ༌ ཡོད༌, ཡང༌ ངའེ༌ འི༌ ཨི༌གེ༌བོ༌ ཀོ༌རིན༌ཐི༌ དཀོན༌མཆོག༌གི༌ ཆོས༌ཚོགས༌ མ༌ཚད༌, ཨ༌ཀ༌ཡཱའི༌ ཡུལ༌ལི༌ ནང༌ང༌ ཡོད༌ཁན༌ནི༌ དཀོན༌མཆོག༌གི༌ མི༌ དམ༌པ༌ ཚང༌མ༌ལའང༌ ཀལ༌ལད༌། 2 དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ལ༌ ཛད༌ཤིག༌།
དཀོན༌མཆོག༌གི༌ སེམས༌ལ༌ ཞི༌དེ༌ སལ༌ལ༌ ཛདས༌།
1:3 ནེ༌ 11
3 ང༌དང༌གུན༌ནི༌, གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ཤིག༌། ཁོང༌ ནི༌, སྙིང༌རྗེའེ༌ ཨ༌བ༌ དང༌ སེམས༌དེ༌ ཚང༌མའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌། 4 ང༌དང༌གུན༌ནིའང༌ ཞན༌མ༌གུན༌ལ༌ སེམས༌སི༌ ནང༌ང༌ ཞི༌དེ༌ ཏང༌ཉན༌ཅེས༌སི༌ ཕིའ༌, དཀོན༌མཆོག༌གི༌ ང༌དང༌གུན༌ལ༌ བར༌དོ༌ ཚང༌མའེ༌ ནང༌ང༌ སེམས༌དེ༌ སལ༌ལ༌ ཛད༌ད༌ནོག༌། དཀོན༌མཆོག༌གི༌ ང༌དང༌གུན༌ལ༌ སལ༌ལ༌ ཛད༌ཁན༌ནི༌ ཏེན༌ན༌ ཙོགས༌ ཞི༌དེ༌ ང༌དང༌གུན༌ནིའང༌ བར༌དོའི༌ ནང༌ང༌ ཡོད༌ཁན༌གུན༌ལ༌ ཏང༌ཉན༌ཨིན༌། 5 མ༌ཤི༌ཀའེ༌ ནང༌ང༌ ང༌དང༌གུན༌ནི༌ རྡུག༌ངལ༌གུན༌ གྱས༌ཨིན༌ ཆ༌ ཟ༌ནེ༌, ང༌དང༌ངི༌ སེམས༌སི༌ ནང༌ང༌ ཞི༌དེའང༌ མ༌ཤི༌ཀ༌ གྱུད༌ཏེ༌ གྱས༌ཨིན༌།
6 གལ༌ཏེས༌ ང༌ཞ༌གུན༌ བར༌དོའི༌ ལྕིད༌དི༌ ནན༌ཏེ༌ ཡོད༌ན༌, ཏེ༌བོ༌ ཁྱོ༌ཞ༌གུན༌ལ༌ ཐར༌པ༌ དང༌ ཁྱོ༌ཞའེ༌ ནང༌ང༌ ཞི༌དེའེ༌ ཕིའ༌ ཨིན༌། ཡང༌ གལ༌ཏེས༌ ང༌ཞ༌གུན༌ལ༌ ཞི༌དེ༌ སལ༌ལ༌ ཛད༌ན༌, ཏེ༌བོའང༌ ཁྱོ༌ཞ༌གུན༌ནི༌ སེམས༌དེ༌ ཕིའ༌ ཨིན༌། ཏེ༌ནེ༌ ང༌ཞ༌གུན༌ནི༌ ཁུར༌ཨིན༌ ཡོད༌ཁན༌ ཙོགས༌ རྡུག༌ངལ༌བོ༌ ཁྱོ༌ཞ༌གུན༌ནིའང༌ ཟོད༌པ༌ དང༌ སྙིང༌རུས༌ ཉམ༌པོ༌ ཁུར༌ཨིན༌། 7 ང༌ཞ༌གུན༌ལ༌ ལོ༌ཁྱེལ༌ རག༌, ཁྱོ༌ཞ༌གུན༌ ང༌ཞའེ༌ རྡུག༌ངལ༌གུན༌ནི༌ ནང༌ང༌ དྲེས༌ པ༌སང༌, ཁྱོ༌ཞ༌གུན༌ ང༌ཞའེ༌ སེམས༌དེའེ༌ ནང༌ངའང༌ དྲེས༌ཨིན༌།
8 སྤུན༌གུན༌ ཁྱོ༌ཞ༌གུན༌ལ༌ ང༌ཞའེ༌ ཨ༌སི༌ཨཱའེ༌ ཡུལ༌ལི༌ ནང༌ང༌ བར༌དོ༌ ཁུར༌ཁན༌གུན༌ ཧ༌གོ༌གོ༌ཤེས༌ ཨིན༌ནོག༌, ཏེ༌ ཁུ༌རུའི༌ ལྕིད༌པོ༌ ང༌ཞ༌གུན༌ནི༌ ཁྱུད༌དི༌ སང༌ མང༌ང༌ ཐལ༌ཏེ༌ ཡོད༌ པ༌སང༌, ང༌ཞའེ༌ སོན༌ཏེའ༌ ལུས༌ཤེས༌སི༌ རེ༌ཝ༌བོ༌ མེད༌ཁན༌ སོང༌། 9 དེན༌བའ༌, ང༌ཞ༌གུན༌ ཤིའ༌ནོག༌ སམ༌། ཨིན༌ནའང༌ ང༌ཞ༌གུན༌ལ༌ ང༌ཞ༌རང༌ངི༌ ཁྱུད༌གུན༌ནི༌ཀ༌ རག༌ལས༌ཏེ༌ མ༌དུག༌ག༌, ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཁན༌ དཀོན༌མཆོག༌གི༌ཀ༌ རག༌ལས༌ཏེ༌ དུག༌གོ༌ཤེས༌སི༌ ཕིའ༌, ཏེ༌གུན༌ བྱུངས༌ཏེ༌ ཨིན༌ནོག༌། 10 ཁོང༌ངི༌ ང༌ཞ༌གུན༌ ཤི༌ཅེས༌སི༌ ཇིགས༌པ༌གུན༌ནི༌ ཀ༌ནེ༌ ཐར༌ ཅུག༌ག༌ ཛད༌ཏེ༌ ཨིན༌ནོག༌, ཡང༌ ཡང༌སྐྱར༌ ཐར༌ ཅུག༌ག༌ ཛད༌ཨིན༌། ཁོང༌ངི༌ ཡོང༌ཅེས༌ཅན༌ནི༌ ཏུས༌སི༌ ནང༌ངའང༌, ང༌ཞ༌གུན༌ ཐར༌ ཅུག༌ག༌ ཛད༌ཅེས༌པོའེ༌ཀ༌ ང༌ཞ༌གུན༌ནི༌ ལོ༌ཁྱེལ༌ བོར༌རད༌། 11 ཡང༌ ཁྱོ༌ཞ༌གུན༌ནི༌ ང༌ཞའེ༌ ཕིའ༌, མོས༌ལམ༌ ཞུ༌ཅེས༌གུན༌ གྱུད༌ཏེ༌ ང༌ཞ༌གུན༌ལ༌ རོགས༌ ཅོའ༌ནོག༌། ཏེ༌ནེ༌ མི༌ མང༌པོ༌ཞིག༌གི༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཅིའ༌ཟེར༌ན༌ དཀོན༌མཆོག༌གི༌ ཐུག༌རྗེ༌ ཉམ༌པོ༌, མང༌པོ༌ཞིག༌གི༌ ང༌ཞའེ༌ སྲུང༌སྐྱོབ༌བི༌ ཕིའ༌ མོས༌ལམ༌ ཞུ༌ཁན༌གུན༌ལ༌ ལན༌སལ༌ལ༌ ཛད༌ཏེ༌ ཨིན༌ནོག༌།
པ༌འུ༌ལུ༌ མི༌སྐྱོད༌ཅེས༌སི༌ གྱུན༌ཚན༌།
1:12 ནེ༌ 2:4
12 ང༌ཞ༌གུན༌ནི༌ ལོ༌ཁྱེལ༌ དང༌ སེམས༌ ལག༌མོ༌ ཉམ༌པོ༌ ཟེར༌ཉན༌ཨིན༌, ང༌ཞ༌གུན༌ འི༌ ཇིག༌རྟེན༌པ༌ ཡང༌ མིག༌སལ༌ལི༌ ཁྱོ༌ཞ༌གུན༌ ཉམ༌པོ༌ དུག༌ ཟ༌ནེ༌, དཀོན༌མཆོག༌གི༌ སལ༌ཁན༌ནི༌ མི༌ཚེ༌ དམ༌པ༌ དང༌ དྲང༌པོའེ༌ ཚུལ༌ལ༌ པུད༌པིན༌། ང༌ཞ༌གུན༌ མི༌ཤེས༌རབས༌སི༌ཀ༌ མན༌པ༌, དཀོན༌མཆོག༌གི༌ ཐུག༌རྗེའེ༌ཀ༌ རག༌ལས༌ཏེ༌ དུགས༌པིན༌། 13 ངའེ༌ ཨི༌གེ༌གུན༌ སལ༌པོ༌ ཨིན༌, ཏེ༌གུན༌ནི༌ ནང༌ང༌, ཡང༌ ཏོན༌ཏག༌ ཅའང༌ སྦས༌ཏེ༌ མེད༌, ཡང༌ ཁྱོ༌ཞ༌གུན༌ལ༌ ཧ༌གོ༌ཅེས༌ལའང༌ ལ༌མོ༌ ཡོད༌། ངའེ༌ རེ༌ཝ༌ ཅོའད༌, ཞག༌ཤིག༌ ཁྱོ༌ཞ༌གུན༌ནི༌ ང༌ཞའེ༌ སྙིང༌ངི༌ ནང༌ང༌ ཡོད༌ཁན༌ ཚང༌མ༌ ཧ༌གོ༌ ཐུབ༌ཨིན༌། 14 ཁྱོ༌ཞ༌གུན༌ནི༌ ང༌ཞའ༌ དག༌ས༌ སིང༌ ཧ༌གོ༌ མ༌ཐུབ༌ནའང༌, གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཞག༌ག༌, ཁྱོ༌ཞ༌གུན༌ནི༌ ང༌ཞའ༌, སལ༌པོ༌ ཅོས༌ཏེ༌ ཧ༌གོ༌ པ༌སང༌, ཁྱོ༌ཞ༌གུན༌ལ༌ ང༌ཞའེ༌ཀ༌ ཕོ༌སོ༌ ཚོར༌ཨིན༌ ཀ༌ཟུག༌ ཁྱོ༌ཞའེ༌ཀ༌ ང༌ཞ༌གུན༌ལ༌ ཕོ༌སོ༌ ཚོར༌རད༌། 15-16 ཁྱོ༌ཞའེ༌ ཧ༌གོའི༌ ནང༌ང༌ ངའ༌ ལོ༌ཁྱེལ༌ ཡོད༌པ༌, ངའེ༌ ཀ༌ནེ༌ ཁྱོ༌ཞའ༌ ཕན༌ཐོགས༌ མང༌ང༌ ཐོབ༌ཅེས༌སི༌ ཕིའ༌, ངའ༌ ཁྱོ༌ཞ༌གུན༌ ཉམ༌པོ༌ ཐུག༌ག༌ ཡོང༌ཅེས༌ལ༌ ལན༌ ཉིས༌ ཐབས༌ལྡིངས༌པིན༌། ཏང༌པོ༌ མ༌ཀེ༌དོ༌ནི༌ཡཱའེ༌ ཡུལ༌ལ༌ ཆའ༌ ཟ༌ནེ༌ ཡང༌ ཉིས༌པ༌ ལོགས༌ཏེ༌ ཡོང༌ ཟ༌ནེ༌, ཏེ༌ནེ༌ ང༌ ཡ༌ཧུ༌དཱའེ༌ ཡུལ༌ལི༌ ནང༌ང༌ བེས༌ལ༌ ཆ༌ ཟ༌ནེ༌, སྒོས༌དོམ༌ ཡོད༌ཁན༌གུན༌ ཁྱོ༌ཞ༌གུན༌ནི༌ ཏང༌ཅེས༌སི༌ རེ༌ཝའང༌ ཨིན༌པིན༌། 17 ཨིན༌ནའང༌ ཁྱོ༌ཞའ༌ ཁ༌ཅིག༌གི༌, ཁོའེ༌ ཐབས༌ལྡིངས༌གུན༌ནི༌ ནང༌ང༌ གྱུར༌ཇ༌ ཅི༌ཕིའ༌ ཁྱོང༌ང༌ནོག༌ ཟེར༌ཏེ༌ ཏྲི༌སྲིད༌ཅེས༌ ཨིན༌ནོག༌། ཅི༌ ཁྱོ༌ཞ༌གུན༌ནི༌, ངའེ༌ ང༌རང༌ངི༌ ཐབས༌ལྡིངས༌གུན༌ སམ༌བ༌ མ༌ཏང༌ང༌ ཅོས༌ཏེ༌ ཨིན༌ནོག༌ སམ༌མ༌ རག༌ག༌? ཅི༌ ཁྱོ༌ཞ༌གུན༌ནི༌, ང༌ ཇིག༌རྟེན༌པ༌གུན༌ ཙོགས༌ ཨིན༌ནོག༌ སམ༌མ༌ རག༌ག༌, ཀ༌གུན༌ནི༌ "ཅོ༌ཨིན༌" ཟེར༌ར༌ནོག༌ ཨིན༌ནའང༌ ཅོའ༌ མ༌ནོག༌?
18 ཨིན༌ནའང༌ ཀ༌ཟུག༌ དཀོན༌མཆོག༌ ཨིད༌ཤེས༌ཅན༌ ཞུགས༌ཏེ༌ ཨིན༌, ངའེ༌ ཁྱོ༌ཞ༌གུན༌ལ༌ "ང༌ ཡོང༌ཨིན༌" ཟེར༌ཁན༌ནི༌ ཁ༌ཆད༌པོའང༌ དྲང༌པོ༌ ཨིན༌པིན༌། ངའེ༌ "མན༌" ཟེར༌ཅེས༌པོའ༌ "ཨིན༌" མི༌ཟེར༌། 19 དཀོན༌མཆོག༌གི༌ སྲས༌, ཡེ༌ཤུ༌ མ༌ཤི༌ཀའེ༌ "ཨིན༌" ཡ༌ "མན༌" མོལ༌ཅེས༌སི༌ ནང༌ང༌ ཐའ༌མ༌ ཐེ༌ཚོམས༌ ཅོའ༌ ཛད༌ད༌ མ༌ནོག༌། སྤུན༌ སི༌ལས༌ *1:19 གིརིས༌སི༌ སྐད༌རིག༌གི༌ ནང༌ང༌ འི༌བོའ༌ སིལ༌ཝ༌ནུས༌སའང༌ ཟེར༌ར༌ནོག༌། ཡང༌ མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌ སྤེ༌ཆའེ༌ ནང༌ང༌ 18:5 པའེ༌ ནང༌ངའང༌ ཐོབ༌ཅེས༌ ཡོད༌ཏེ༌ ཨིན༌ནོག༌། , ཏི༌མོ༌ཐི༌ དང༌ ངའེ༌ ཁྱོ༌ཞ༌གུན༌ལ༌ ཆོས༌ཤད༌ཁན༌བོ༌ ནི༌ ཡེ༌ཤུ༌ མ༌ཤི༌ཀ༌ སྐོར༌ལ༌ ཨིན༌, ཡང༌ དཀོན༌མཆོག༌གི༌ མོལ༌ཁན༌བོ༌ ཁོང༌ངི༌ "དྲན༌དྲའ༌ གྲུབ༌ཅུག༌ག༌ནོག༌།" 20 ཅིའ༌ཟེར༌ན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ ཞལ༌ཆད༌ ཚང༌མ༌ གྲུབ༌ ཅུག༌ག༌ ཛད༌ད༌ནོག༌, ཏེ༌བོའེ༌ཕིའ༌ ང༌ཞ༌གུན༌ནི༌ ཨ༌མེན༌ †1:20 ཨ༌མེན༌ ནི༌ ཏོན༌ཏག༌པོ༌ "དེན༌བའ༌ ཏེ༌བོ༌ གྲུབ༌ཨིན༌" ཟེར༌ར༌ནོག༌ ཟེར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ལད༌།
21 ང༌ཞའ༌ དང༌ ཁྱོ༌ཞའ༌ ཉིས༌ཀོའེ༌ ཏད༌པ༌ མ༌ཤི༌ཀའེ༌ ནང༌ང༌ སྟན༌པོ༌ གྱུར༌ ཅུག༌ག༌ ཛད༌ཁན༌བོ༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཐར༌པའེ༌ ཕིའ༌ ཁོང༌ངི༌ ང༌དང༌གུན༌ ལྡམ༌མ༌ ཛད༌ཏེ༌ ཨིན༌ནོག༌། 22 དཀོན༌མཆོག༌གི༌ དམ༌པའེ༌ ཐུག༌ཉིད༌ ང༌དང༌གུན༌ནི༌ སྙིང༌ངི༌ ནང༌ང༌ བོར༌ར༌ ཛད༌ཏེ༌, ང༌དང༌གུན༌ ཁོང༌ངི༌ ཨིན༌ཁན༌བོའེ༌ ཐེ༌ཙེ༌ གྱབ༌བ༌ ཛདས༌, ཡང༌ ཏེ༌ཟུག༌ ཛད༌ཅེས༌པོའེ༌ དཀོན༌མཆོག༌གི༌ ང༌དང༌གུན༌ལ༌ ཛད༌ཁན༌ནི༌ ཞལ༌ཆད༌ ཚང༌མ༌ གྲུབ༌ཅེས༌པོ༌ ཏན༌ཏན༌ ཅོ༌ ཛདས༌།
23 ཏ༌ ངའེ༌ ཟེར༌ཅེས༌ཅན༌གུན༌ དྲང༌པོ༌ ཨིན༌ཁན༌ནི༌ སྤང༌པོ༌ དཀོན༌མཆོག༌ ཨིན༌། ང༌ ཀོ༌རིན༌ཐིའ༌ ལོགས༌ཏེ༌ མི༌ཡོང༌ཅེས༌སི༌ གྱུན༌ཚན༌བོ༌ ནི༌, ཁྱོ༌ཞ༌གུན༌ལ༌ ངའེ༌ ཀ༌ནེ༌ ཁའ༌ མ༌སྲན༌ཏྲེ༌ ཕོག༌ཅེས༌ནེ༌ སྐྱོབ༌ཅེས༌པོ༌ ཨིན༌པིན༌། 24 ཏེ༌བོ༌ ནི༌, ཁྱོ༌ཞའེ༌ ཏད༌པ༌ ཅོ༌ཁན༌བོ༌ ལག༌ལེན༌ནི༌ ནང༌ང༌ ཁྱོང༌ ཟེར༌ཏེ༌ ཝང༌ ཏང༌ཅེས༌པོ༌ མན༌, ཨིན༌ནའང༌ ཁྱོ༌ཞ༌གུན༌ སྐྱིད༌པོའེ༌ གང༌ཅེས༌སི༌ ཕིའ༌ ང༌ཞའེ༌ ཁྱོ༌ཞ༌གུན༌ ཉམ༌པོ༌ ལས༌ ཅོ༌ཉིན༌རག༌། ཁྱོ༌ཞ༌རང༌ངི༌ ཏད༌པ༌ ཅིག༌པོ༌ གྱུད༌ཏེ༌ ཁྱོ༌ཞ༌གུན༌ སྟན༌པོ༌ ལུས༌ཨིན༌།