2
1 ཏེན༌ན༌བོའེ༌ཕིའ༌ ངའེ༌, ཁྱོ༌ཞའ༌ ལན༌ ཉིས༌པ༌ ཐུགས༌ཏེ༌ ཚེར༌ཁ༌ དང༌ རྡུག༌ངལ༌ མི༌ལྟན༌ཅེས༌སི༌ ཐག༌ཅད༌པིན༌། 2 གལ༌ཏེས༌ ངའེ༌ ཁྱོ༌ཞ༌གུན༌ལ༌ ཚེར༌ཅུག༌ན༌, ཏེ༌ནེ༌ སུའི༌ ངའ༌ ཐད༌པོ༌ ཡོང༌ཅུག༌ཨིན༌, ཏན༌ཏན༌ལ༌ ངའེ༌ ཚེར༌ཁ༌ ལྟན༌ཁན༌གུན༌ནི༌ མི༌ཅུག༌། 3 ཏེན༌ན༌བོའེ༌ཕིའ༌ ངའེ༌ ཁྱོ༌ཞ༌གུན༌ལ༌ ཏེ༌ ཨི༌གེ༌བོ༌ བྲིས༌པིན༌, ཅིའ༌ཟེར༌ན༌ ང༌ ཡོང༌ ཟ༌ནེ༌, ངའ༌ སྐྱིད༌པོ༌ ཁྱོང༌གོ༌ཤེས༌ཅན༌གུན༌ནི༌ ཚེར༌ཁ༌ མི༌ཁྱོང༌། ཁྱོ༌ཞ༌གུན༌ནི༌ ཐད༌པོའེ༌ ང༌ ཐད༌པོ༌ ཁྱོང༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌? 4 ངའེ༌ ཏེ༌ ཨི༌གེ༌བོ༌ མ༌སྲན༌ཏྲེ༌ ཚེར༌ཁ༌, སྙིང༌ངི༌ ནང༌ང༌ བར༌དོ༌ དང༌ ཆི༌མ༌ མང༌པོ༌ ཉམ༌པོ༌ བྲིས༌པིན༌། ཚེར༌ཁ༌ ཡོང༌ མ༌ཅུག༌ག༌, ངའེ༌ ཁྱོ༌ཞ༌གུན༌ལ༌ ཙམ༌ཤིག༌གི༌ ཅེས༌པ༌ ཅོ༌ཁན༌བོ༌ ཧ༌གོ༌ཅུག༌ཉིན༌ རག༌པིན༌།
སྡིག༌པ༌ ཅོ༌ཁན༌བོའ༌ ཤགས༌པ༌ ཏོང༌།
2:5 ནེ༌ 13
5 རྡུག༌པོ༌ ཚང༌མ༌ བྱུང༌ཅུག༌ཁན༌ནི༌ མི༌བོའེ༌ ཁྱོ༌ཞ༌གུན༌ལ༌ ང༌ སང༌ མང༌ང༌ རྡུག༌པོ༌ ལྟན༌ཏེ༌ ཨིན༌ནོག༌ ཟེར༌ ཟ༌ནེ༌, ངའེ༌ ཧས༌ ཏངས༌ཏེ༌ མན༌། 6 ཁྱོ༌ཞའ༌ མང༌ཆེའེ༌ ཁོའ༌ ཆད༌པ༌ ཏང༌ཁན༌བོ༌, ཁོའེ༌ ཕིའ༌ ཐད༌ཐད༌ ཨིན༌ནོག༌ ཅིའ༌ཟེར༌ན༌ ཁོའེ༌ གྱོད༌པ༌ ཅོས༌ཏེ༌ ཨིན༌ནོག༌། 7 ཨིན༌ནའང༌ ཏ༌ ཁོའ༌ ཤགས༌པ༌ ཏངས༌ཏེ༌ ཁོའེ༌ སེམས༌ལ༌ ཞི༌དེ༌ ཏང༌གོ༌ཤེས༌ ཨིན༌ནོག༌, ཏེ༌ མན༌ན༌ ཁོའ༌ རྡུག༌པོའེ༌ ལྕིད༌པོ༌ ཁུར༌ མི༌ཉན༌། 8 ངའེ༌ ཁྱོ༌ཞ༌གུན༌ལ༌ ཁོའ༌ ཡང༌སྐྱར༌ ཅེས༌པ༌ ཅོ༌ཅེས༌ལ༌ སྤོས༌པ༌ ཏང༌ཨིན༌ ཞུ༌ཝ༌ ཕུལ༌ལད༌། 9 ཁྱོ༌ཞ༌གུན༌ནི༌ ངའེ༌ ཟེར༌ཁན༌ ཚང༌མ༌ལ༌ ཁའ༌ ཉན༌དུག༌ག༌ མི༌དུག༌ ལྟ༌ཅེས༌སི༌ ཕིའ༌ ངའེ༌ ཁྱོ༌ཞ༌གུན༌ལ༌ སྔུན༌ལ༌ ཨི༌གེ༌ བྲིས༌པིན༌། 10 ཁྱོ༌ཞ༌གུན༌ནི༌ ཏེ༌ མི༌བོའ༌ ཤགས༌པ༌ ཏང༌ང༌ཅིག༌, ངེའང༌ ཁོའ༌ ཤགས༌པ༌ ཏང༌ཨིན༌། ཡང༌ ཤགས༌པ༌ ཏང༌གོ༌ཤེས༌པོའ༌ ཤགས༌པ༌ ཏང༌ཅེས༌པོ༌ ངའེ༌ མ༌ཤི༌ཀའེ༌ ཝང༌ངི༌ ནང༌ང༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཅོའད༌། 11 ཤེ༌ཏན༌ནི༌ ང༌དང༌ངི༌ ནང༌ང༌ ཡོད༌ཁན༌ནི༌ ནས༌ལུག༌པོའེ༌ ཕན༌ཐོགས༌ མི༌ལེན༌ཅེས༌སི༌ ཕིའ༌, ང༌དང༌གུན༌ནི༌ ཏེ༌ མི༌བོའ༌ ཤགས༌པ༌ ཏང༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ང༌དང༌གུན༌ལ༌ ཤེ༌ཏན༌ནི༌ ཐབས༌ངན༌པ༌གུན༌ གྱུས༌ཡོད༌ཏེ༌ ཨིན༌ནོག༌།
12 ང༌ ཏྲོ༌འེས༌སི༌ གྱལ༌སའེ༌ ནང༌ང༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཤད༌ད༌ལ༌ ལེབ༌བ༌ཅིག༌, གཙོ༌བོ༌ ཡེ༌ཤུའི༌ སྒོ༌ ཕེའ༌ ཛད༌ཏེ༌ ངའ༌ ཏེ༌ཟུག༌ ཅོ༌ཅེས༌སི༌ སྐབས༌ སལས༌། 13 ཨིན༌ནའང༌ ངའེ༌ སེམས༌སི༌ ནང༌ང༌ ཞི༌དེ༌ མེ༌རག༌པིན༌, ཅིའ༌ཟེར༌ན༌ ངའེ༌ སྤུན༌ ཏི༌ཏུས༌ ཁྱོ༌ཞ༌གུན༌ནི༌ ཀ༌ནེ༌ ལོན༌གུན༌ ཁུར༌ཏེ༌ ཏ༌རུང༌ ཚོག༌པ༌ མ༌ལེབ༌པ༌ ངའེ༌ ཏྲོ༌འེས༌པ༌གུན༌ལ༌ ཇུ༌ ཞུས༌ཏེ༌ ཁོ༌ ཙལ༌ལ༌ མ༌ཀེ༌དོ༌ནི༌ཡཱའེ༌ གྱལ༌སའ༌ སོང༌པིན༌།
ཆད༌དོན༌ སོ༌མའེ༌ ཞབ༌སྟོག༌པ༌གུན༌།
2:14 ནེ༌ 3:6
14 ཨིན༌ནའང༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཁོང༌ ནི༌, ང༌ཞ༌གུན༌ལ༌ ཆད༌མེད༌ལ༌ མ༌ཤི༌ཀའེ༌ གྱལ༌ཁའ༌ ཐོབ༌ཁན༌ནི༌ ཁྲོམས༌སྐོར༌རི༌ ནང༌ང༌ གོ༌ཁྲིད༌ ཛད༌ཁན༌བོ༌ ཞུགས༌ཏེ༌ ཨིན༌ནོག༌ *2:14 པ༌འུ༌ལུའི༌ ཏུས༌ལ༌ ནམ༌ཞིག༌ རོམ༌པའེ༌ མག༌མི༌གུན༌ནི༌ ཞན༌ཡང༌ མག༌མི༌གུན༌ལ༌ ཕམ༌ཀལ༌ ཟ༌ནེ༌ ཁོང༌གུན༌ནི༌ རོམ༌པའེ༌ ཡུལ༌པ༌གུན༌ནི༌ དུན༌ལ༌ ཁོང༌རང༌གུན༌ལ༌ གྱལ༌ཁའ༌ ཆེན༌མོ༌ ཐོབ༌ཁན༌བོ༌ ལྟན༌ཅེས༌སི༌ ཕིའ༌ ཕམ༌ཀལ༌ཁན༌ནི༌ མག༌མི༌གུན༌ ཁྲིད༌ཏེ༌ ཁྱོང༌ངད༌ཀྱག༌། ། ཏ༌ དག༌ས༌ ཁོང༌ངི༌ ང༌ཞ༌གུན༌ མ༌ཤི༌ཀ༌ ཤེས༌ཁན༌ནི༌ ཏྲི༌ཞིམ༌བོ༌, སྤེལ༌ཅེས༌ལ༌ ཀོལ༌ལ༌ ཛད༌ཏེ༌ ཨིན༌ནོག༌། 15 ཅིའ༌ཟེར༌ན༌ ང༌ཞ༌གུན༌ མ༌ཤི༌ཀའེ༌ དཀོན༌མཆོག༌ག༌ ཕུལ༌ལ༌ ཛད༌ཁན༌ནི༌ ཏྲི༌ཞིམ༌ཅན༌ནི༌ སྤོས༌ ཙོགས༌ ཨིན༌ནོག༌། ཨིན༌ནའང༌ སྐྱོབ༌བ༌ ཛད༌ཅེས༌ཅན༌གུན༌ནི༌ ཏེ༌ ཏྲི༌ཞིམ༌བོ༌ ཁྲེས༌སྟོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌གུན༌ནི༌ སང༌ སོ༌སོ༌ རིག༌ ཚོར༌ར༌ནོག༌། 16 ཁ༌ཅིག༌གི༌ ང༌ཞའ༌ ཤི༌ཁན༌ནི༌ ཏྲི༌མ༌, ཨིན༌ནའང༌ ཞན༌གུན༌ནི༌ སྲོག༌ སལ༌ཁན༌ནི༌ ཏྲི༌ཞིམ༌ ཙོགས༌ ཚོར༌ར༌ནོག༌། ཏེ༌ཙོགས༌སི༌ ལས༌ ཁག༌ཅན༌ ཅོ༌ཅེས༌སི༌ ཁྱུད༌ སུའ༌ ཡོད༌ཀྱག༌?
17 ཁྱོ༌ཞ༌གུན༌ནི༌ ལྟོས༌ཤིག༌, ང༌ཞ༌གུན༌ ཕན༌ཐོགས༌སི༌ ཕིའ༌ ཆོས༌ཤད༌ཁན༌ནི༌ ཏེ༌ སྐྱོན༌ཇན༌ མི༌གུན༌ ཙོགས༌ མན༌ཧེ༌། ཨིན༌ནའང༌ དཀོན༌མཆོག༌གི༌ ཀལ༌ལ༌ ཛད༌ཁན༌ དང༌ ཁོང༌ངི༌ ཟིགས༌ཨིན༌ ཡོད༌ཁན༌བོ༌ གྱུས༌ཡོད༌ཁན༌ནི༌ མི༌གུན༌ ཙོགས༌ལ༌, མ༌ཤི༌ཀའེ༌ ཝང༌ངི༌ ནང༌ང༌, ང༌ཞའེ༌ སེམས༌ ཟང༌པོ༌ ཉམ༌པོ༌ ཆོས༌ཤད༌དད༌།
*2:14 2:14 པ༌འུ༌ལུའི༌ ཏུས༌ལ༌ ནམ༌ཞིག༌ རོམ༌པའེ༌ མག༌མི༌གུན༌ནི༌ ཞན༌ཡང༌ མག༌མི༌གུན༌ལ༌ ཕམ༌ཀལ༌ ཟ༌ནེ༌ ཁོང༌གུན༌ནི༌ རོམ༌པའེ༌ ཡུལ༌པ༌གུན༌ནི༌ དུན༌ལ༌ ཁོང༌རང༌གུན༌ལ༌ གྱལ༌ཁའ༌ ཆེན༌མོ༌ ཐོབ༌ཁན༌བོ༌ ལྟན༌ཅེས༌སི༌ ཕིའ༌ ཕམ༌ཀལ༌ཁན༌ནི༌ མག༌མི༌གུན༌ ཁྲིད༌ཏེ༌ ཁྱོང༌ངད༌ཀྱག༌།